Omupiya oo a hokiwa kuJehova

‘Tala, omupiya wange, ou omwenyo wange we mu hokwa.’ — ISA. 42:1.

1. Oshiwana shaJehova otashi ladipikwa shi ninge shike, unene tuu eshi Edimbuluko tali ehene popepi, nomolwashike?

ESHI Edimbuluko lefyo laKristus tali ehene popepi, oshiwana shaKalunga otashi ningi nawa okudulika komayele omuyapostoli Paulus oo taa ti: ‘Tala kuJesus, omuhoveli nomuwanifi weitavelo.’ Paulus okwa weda ko vali a ti: “Dimbulukweni ou e lididimikila ondubo i fike apa yovalunde, mu ha loloke neemwenyo deni di ha fye ounye.” (Heb. 12:2,3) Okutala kunghee Kristus a li a kanyatela oudiinini waye fiyo omokuyamba po omwenyo waye, otashi kwafele Ovakriste ovavaekwa nosho yo oovakwao veedi dimwe opo va twikile okulongela Jehova noudiinini novaha efe ‘eemwenyo davo di fye ounye.’ — Yelekanifa nOvagalati 6:9.

2. Oshike hatu dulu okulihonga momaxunganeko aJesaja e na sha nOmona waKalunga?

² Jehova okwa li a nwefa mo omuprofeti Jesaja a shange omaxunganeko e na sha nOmona waye. Omaxunganeko oo otae tu kwafele opo tu ‘tale komuhoveli nomuwanifi weitavelo,’ Kristus Jesus.a Otaa yandje ouyelele u na sha nomaukwatya aJesus, okuhepekwa kwaye nosho yo okutumbalekwa kwaye e li Ohamba nOmukulili wetu. Omaxunganeko oo otaa ka hapupalifa eudeko letu li na sha nEdimbuluko olo hatu ka dana mEtine, mo 9 Aprili 2009, konima eshi etango la ningina.

Omupiya ta hololwa

3, 4. (a) Outumbulilo “omupiya” oo wa longifwa membo laJesaja otau ulike kulyelye? (b) Ongahelipi Ombibeli ya holola Omupiya oo a popiwa muJesaja etukulwa 42, 49, 50, 52 nosho yo 53?

³ Outumbulilo “omupiya” owa holoka mo membo laJesaja lwoikando ihapu. Omafimbo amwe, outumbulilo oo owa longifwa tau ulike komuprofeti ye mwene. (Jes. 20:3; 44:26) Peemhito dimwe outumbulilo oo owa longifwa tau ulike koshiwana shaIsrael ashishe, ile kuJakob. (Jes. 41:8, 9; 44:1, 2, 21) Ndele mbela ongahelipi shi na sha nomaxunganeko a tongomana e na sha nOmupiya oo taa hangwa muJesaja etukulwa 42, 49, 50, 52 nosho yo 53? Omishangwa dopaKriste dOshigreka oda holola kutya Omupiya waJehova oo a popiwa momatukulwa oo oye lyelye. Shihokwifa, elenga lokuEtiopia olo la popiwa membo lOilonga ola li tali lesha limwe lomomaxunganeko oo eshi Filippus, omuudifi wevangeli, a li a wilikwa komhepo iyapuki a ye kelenga olo. Eshi elenga la mana okulesha eevelishe odo tadi hangwa muJesaja 53:7, 8, ola li la pula Filippus tali ti: “Ohandi ku indile, lombwele nge, olyelye ou ta popiwa komuprofeti, oye mwene ile oumwe elili?” Filippus ka li a ongaonga okuyelifila elenga olo kutya omuprofeti Jesaja okwa li ta popi kombinga yaMessias, Jesus. — Oil. 8:26-35.

⁴ Fimbo Jesus a li okaana, omulumenhu umwe omuyuki wedina Simeon okwa li a nwefwa mo komhepo iyapuki a popye kutya “okaana Jesus” otaka ka ninga “ouyelele okuminikila ovapaani,” ngaashi sha li sha xunganekwa muJesaja 42:6 nosho yo 49:6. (Luk. 2:25-32) Kakele kaasho, onghedi ififa ohoni oyo Jesus a li a ungaungwa nayo moufiku oo wa tetekela okupangulwa kwaye, oya li ya xunganekwa muJesaja 50:6-9. (Mat. 26:67; Luk. 22:63) Konima yOpentekoste 33 O.P., omuyapostoli Petrus okwa li a holola filufilu kutya Jesus oye “Omupiya” waJehova. (Jes. 52:13; 53:11; lesha Oilonga 3:13, 26, NW.) Oshike hatu dulu okulihonga momaxunganeko oo e na sha naMessias?

Nghee Jehova a li a deula Omupiya waye

5. Omupiya okwa li a mona edeulo lilipi?

⁵ Exunganeko limwe laJesaja otali yandje ouyelele muhapu u na sha nekwatafano lopofingo olo la li pokati kaJehova nosho yo nOmona waye omudalwa wotete fimbo a li ine uya kombada yedu. (Lesha Jesaja 50:4-9.) Omupiya okwa li a popya kutya Jehova onghee ngoo ta twikile oku mu deula, eshi a ti: ‘Ota pendula okutwi kwange, opo ndi ude ko panghedi yovahongwa.’ (Jes. 50:4, yelekanifa OB-1986.) Efimbo alishe olo, Omupiya waJehova okwa kala ta pwilikine nokulihonga kuXe, ndele ta ningi omuhongwa omuduliki. Kau fi tuu oufembanghenda we likalekelwa okuhongwa kOmushiti weshito alishe!

6. Ongahelipi Omupiya a li a ulika kutya omudiinini filufilu kuXe?

⁶ Mexunganeko olo, Omupiya okwa popya kutya Xe Jehova oku li ‘Omwene Omunamapangelo aeshe.’ Osho otashi ulike kutya Omupiya okwa li e lihonga oshili ya fimana i na sha nounamapangelo waJehova weshito alishe. Omupiya oo okwa li a ulika kutya omudiinini filufilu kuXe, eshi a ti: “Omwene Kalunga okwa fitulula okutwi kwange, ame inandi anya, inandi shuna monima.” (Jes. 50:5) Omupiya oo okwa ‘kala [puJehova] ngaashi omulongi onghulungu’ eshi eshito alishe novanhu va li tava shitwa. “Omulongi onghulungu” okwa li ha ‘danauka moipafi [yaJehova] alushe, nokwa li ha danauka kongonga yedu laye, ndele [Omona waKalunga] a nyakukilwa ovana vovanhu.’ — Omayel. 8:22-31, yelekanifa NW.

7. Oshike tashi ulike kutya Omupiya okwa li e lineekela mekwafo laXe eshi a li ta yelekwa?

⁷ Edeulo olo Omupiya a li a mona nosho yo ohole yaye yokuhola ovanhu oya li ye mu kwafela a dule okutaalela omapataneko manene oo a li ta ka shakeneka kombada yedu. Okwa li a twikila okuhafela okulonga ehalo laXe, nokuli naashi a li a taalela omahepeko manene. (Eps. 40:9; Mat. 26:42; Joh. 6:38) Eshi Jesus a li kombada yedu okwa li e lineekela kutya Xe okwe mu hokwa note ke mu yambidida a dule okupita momayeleko oo a li ta ka shakeneka. Ngaashi sha li sha xunganekwa komuprofeti Jesaja, Jesus okwa li a dula okupopya ta ti: ‘Ou ta yukifa nge oku li popepi. Olyelye ta hokololifa nge? Tala, Omwene, Omwene ota popile nge.’ (Jes. 50:8, 9) Exunganeko limwe laJesaja ola holola kutya Jehova okwa li a kwafela shili Omupiya waye omudiinini moukalele waye wokombada yedu.

Oukalele wOmupiya kombada yedu

8. Oshike tashi ulike kutya Jesus oye a li “omuhoololwa” waJehova oo a li a xunganekwa muJesaja 42:1?

⁸ Ombibeli otai tu lombwele osho sha li sha ningwa po mo 29 O.P., konima eshi Jesus a ninginifwa, tai ti: ‘Omhepo Iyapuki oye mu kulukila nondaka ya dja meulu tai ti: Oove Omona wange omuholike, onde ku hokwa.’ (Luk. 3:21, 22) Jehova okwa li a holola filufilu “omuhoololwa” waye oo a popiwa mexunganeko laJesaja. (Lesha Jesaja 42:1-7.) Jesus okwa li a wanifa po exunganeko olo monghedi ididilikwedi eshi a li moukalele waye wokombada yedu. Mehokololo laye lEvangeli, Mateus okwa li a tofa eendjovo odo tadi hangwa muJesaja 42:1-4, ta ulike kuJesus. — Mat. 12:15-21.

9, 10. (a) Jesus okwa li a wanifa po ngahelipi exunganeko laJesaja 42:3 eshi a li moukalele waye kombada yedu? (b) Ongahelipi Kristus a ‘eta ouyuki’ eshi a li kombada yedu, nonaini ta ka ‘dika po eyukifilopangelo kombada yedu’?

⁹ Ovanhu vongaho ovo va li mokati kOvajuda ova li ve tondike kovawiliki velongelokalunga lOshijuda. (Joh. 7:47-49) Ovanhu ovo ova li hava ungaungwa navo nonyanya notava dulu okufaafanifwa ‘noshihati sha tenda omufya’ ile ‘nonyika tai twimaana omwifi’ noi li pokudima. Ndelenee Jesus okwa li a ulikila ovakwanaluhepo nosho yo ovafininikwa olukeno. (Mat. 9:35, 36) Okwa li e va shiva pahole a ti: “Ileni kuame, nye amushe hamu longo nomwa lolokifwa, Ame ohandi mu pe etulumuko.” (Mat. 11:28) Kakele kaasho, Jesus okwa li a ‘eta ouyuki’ kombada yedu mokuhonga ovanhu omifikamhango daJehova di na sha naasho sha yuka nosho yo osho sha puka. (Jes. 42:3, NW) Okwa li yo a ulika kutya Omhango yaKalunga oi na okutulwa moilonga pandjele nopafilonghenda. (Mat. 23:23) Jesus okwa li yo a ulika ouyuki eshi a li a udifila ovanhu aveshe, oipuna nosho yo eehepele nopehe na onhondo. — Mat. 11:5; Luk. 18:18-23.

¹⁰ Jesaja okwa li yo a xunganeka kutya “omuhoololwa” waJehova ota ka ‘dika eyukifilopangelo kombada yedu.’ (Jes. 42:4) E li Ohamba yOuhamba wopaMessias, osho ote ke shi ninga mafiku eshi ta ka hanauna po omauhamba aeshe opapolotika noku a pingena po nepangelo laye liyuki. Ota ka eta ounyuni mupe, “omo tamu ka kala ouyuki.” — 2 Pet. 3:13; Dan. 2:44.

“Ehangano loiwana nouyelele wovapaani”

11. Omeityo lilipi Jesus a li ‘ouyelele wovapaani’ mefelemudo lotete, nongahelipi e li ouyelele wovapaani fiyo okunena?

¹¹ Metwokumwe nexunganeko laJesaja 42: 6, Jesus okwa li a koleka kutya oye ‘ouyelele wovapaani.’ Jesus okwa li tete a etela Ovajuda ouyelele wopamhepo, eshi a li moukalele waye wokombada yedu. (Mat. 15:24; Oil. 3:26) Ashike Jesus okwa ti: “Aame ouyelele wounyuni.” (Joh. 8:12) Jesus okwa li ouyelele kOvajuda nosho yo koiwana moku va etela ouyelele wopamhepo nokwa li a yamba po omwenyo waye wopanhu wa wanenena u li oikulila yovanhu aveshe. (Mat. 20:28) Eshi a nyumunwa, Jesus okwa li a pa ovahongwa vaye oshinakuwanifwa shokukala eendombwedi daye ‘fiyo okominghulo dounyuni.’ (Oil. 1:8) Eshi Paulus naBarnabas va li moukalele ova li va tofa outumbulilo oo tau popi shi na sha “nouyelele wovapaani,” nova li va ulika kutya oilonga yavo yokuudifila ovanhu ovo vehe fi Ovajuda otai wanifa po exunganeko olo. (Oil. 13:46-48; yelekanifa naJesaja 49:6.) Oilonga oyo otai longwa natango eshi ovamwaxe vaJesus ovavaekwa nosho yo oovakwao tava udifa onghundana iwa nokukwafela ovanhu va kale ve na eitavelo muJesus oo e li ‘ouyelele wovapaani.’

12. Jehova okwa yandja ngahelipi Omupiya waye e li “ehangano loiwana”?

¹² Mexunganeko olo tuu olo, Jehova okwa li a lombwela Omupiya waye omuhoololwa a ti: ‘Ohandi ke ku amena noku ku nangeka po u kale ehangano loiwana.’ (Jes 42:6) Satana okwa li a ninga eenghendabala tadi twikile opo a dipaife Jesus, nokwiimba Jesus a wanife po oukalele waye wokombada yedu, ndele Jehova okwa li a amena Jesus fiyo osheshi efimbo laye lokufya la fika. (Mat. 2:13; Joh. 7:30) Opo nee Jehova okwa li a nyumuna Jesus nokwe mu yandja e li “ehangano” kovanhu kombada yedu. Eudaneko olo ola li tali shilipaleke kutya Omupiya waKalunga omudiinini ota ka twikila okukala ‘ouyelele wovapaani,’ nota ka mangulula ovo ve li momilaulu dopamhepo. — Lesha Jesaja 49:8, 9.b

13. Ongahelipi Jesus a li a mangulula ‘ovo hava kala omutumba momilaulu’ pefimbo loukalele waye wokombada yedu, nongahelipi ta twikile oku shi ninga?

¹³ Metwokumwe neudaneko olo, Omupiya waJehova omuhoololwa ota ka ‘pashula omesho ovapofi nokupitifa mo eenghwate modolongo nokumangulula ava hava kala omutumba momilaulu.’ (Jes. 42:7) Eshi Jesus a li kombada yedu, okwa li a nyaneka pomutenya eenghulunghedi domalongelokalunga oipupulu nokwa li a udifa onghundana iwa yOuhamba moukalele waye. (Mat. 15:3; Luk. 8:1) Kungaho, okwa li a mangulula Ovajuda ovo va ka ninga ovahongwa vaye moukwatwa wopamhepo. (Joh. 8:31, 32) Monghedi ya faafana, Jesus okwa li a mangulula omamiliyona ovanhu ovo vehe fi Ovajuda moukwatwa wopamhepo. Okwa lombwela ovashikuli vaye a ti: ‘Indeni ka ningeni ovanhu aveshe ovahongwa vange,’ nokwa li e va udanekela kutya ota ka kala pamwe navo “fiyo okexulilo lefimbo lounyuni.” (Mat. 28:19, 20) Kristus Jesus ota pashukile oilonga yokuudifa mounyuni aushe, okudja meulu.

Jehova okwa li a tumbaleka “Omupiya” waye

14, 15. Omolwashike Jehova a li a tumbaleka Omupiya waye, nokwa li e shi ninga ngahelipi?

¹⁴ Mexunganeko vali limwe, Jehova okwa popya shi na sha nOmupiya waye Messias, a ti: “Tala, omupiya wange ota ka kala e na elao, ota ka nenepekwa nokulengwa, ndee ta nenepala.” (Jes. 52:13) Jehova okwa li a tumbaleka Omona waye omolwokukala omudiinini kounamapangelo waYe nomolwokukala omudiinini eshi a li momayeleko manene.

¹⁵ Omuyapostoli Petrus okwa popya shi na sha naJesus a ti: “Oye ou okwa ya meulu nokwa kala kolulyo laKalunga, nokwa pewa koshi yaye ovaengeli nomapangelo neenghono e di pangele.” (1 Pet. 3:22) Omuyapostoli Paulus naye okwa popya shi na sha naJesus a ti: ‘Okwe lininipika Ye mwene a dulika fiyo omefyo, heeno, fiyo mefyo [komuti womahepeko NW]. Onghee hano, Kalunga okwe mu lenga, nokwe mu luka edina li li kombada yomadina aeshe, opo aveshe ve nokutwa eengolo medina laJesus naava vomeulu novokombada yedu naava vokoshi yedu, nelaka keshe li nokufimaneka Kalunga Xe nokuhepaulula, kutya Jesus Kristus Oye Omwene.’ — Fil. 2:8-11.

16. Ongahelipi Jesus a li a “nenepekwa” neenghono mo 1914, nokwa li a ninga po shike okudja opo?

¹⁶ Mo 1914, Jehova okwa li a tumbalekifa Jesus shi dulife nale. Okwa li a “nenepekwa” neenghono eshi Jehova e mu nangeka po e li Ohamba yOuhamba wopaMessias. (Eps. 2:6; Dan. 7:13, 14) Okudja opo, Kristus okwa kala ta ‘pangele mokati kovatondadi [vaye].’ (Eps. 110:2) Eshi Jesus a hovela okupangela, tete okwa ta mo Satana neendemoni daye meulu, ndele te va umbile kombada yedu. (Eh. 12:7-12) E li Kores Munene, Kristus okwa mangulula oshixupe shovamwaxe ovavaekwa vokombada yedu moupika wa ‘Babilon shinene.’ (Eh. 18:2; Jes. 44:28) Jesus oye ta wilike oilonga yokuudifa mounyuni aushe oyo ya etifa po okwoongelwa ‘kwoshixupe’ shovamwaxe vopamhepo nosho yo omamiliyona ‘eedi dimwe,’ odo di li oovakwao ovadiinini ‘vokangudu.’ — Eh. 12:17; Joh. 10:16, OB-1986; Luk. 12:32.

17. Otwe lihonga shike kombinga ‘yomupiya’ momaxunganeko aJesaja?

¹⁷ Okukonakona omaxunganeko a tongomana oo taa hangwa membo laJesaja okwa hapupalifa olupandu letu lokupandula Ohamba yetu nOmukulili wetu, Kristus Jesus. Okukala kwaJesus omudiinini filufilu moukalele waye wokombada yedu, okwa holola kutya okwa li a deulwa kuXe fimbo ine uya kombada yedu. Okwa ulika kutya oku li ‘ouyelele wovapaani’ okupitila moukalele waye nosho yo mokutwikila okuwilika oilonga yokuudifa fiyo okunena. Moshitukulwa tashi landula, ohatu ka konakona exunganeko limwe li na sha nOmupiya Messias olo tali holola kutya okwa li ta ka hepekwa nokuyandja omwenyo waye omolwouwa wetu, oinima oyo tu na ‘okudimbulukweni’ eshi Edimbuluko lefyo laye tali ehene popepi. — Heb. 12:2, 3.

[Omashangelo opedu]

Omapulo eendululo

• Olyelye e li “omupiya” oo a popiwa momaxunganeko aJesaja, notu shi shii ngahelipi?

• Omupiya okwa li a mona edeulo lilipi okudja kuJehova?

• Ongahelipi Jesus e li ‘ouyelele wovapaani’?

• Omupiya okwa li a tumbalekwa ngahelipi?

[Efano pepandja 21]

Filippus okwa li a holola filufilu kutya “omupiya” oo a popiwa muJesaja oJesus, Messias

[Efano pepandja 23]

Jesus e li Omupiya waJehova omuhoololwa, okwa li a ulikila eehepele nosho yo ovafininikwa olukeno

[Efano pepandja 24]

Jesus okwa li a tumbalekwa kuXe nokwa nangekwa po e li Ohamba yOuhamba wopaMessias