Oohapu dhaJehova odhi na omwenyo
Omanenedhiladhilo okuza membo lyEhololo 1:1–12:17
MANGA omunamimvo omuyapostoli Johannes a li mondjedhililo kontuntu yaPatmos, okwa li a mono omamoniko ge li 16. Okwa li a mono shoka Jehova Kalunga naJesus Kristus taya ka ninga mesiku lyOmuwa ndyoka lya li lya tameke okuza pokudhikwa po kUukwaniilwa waKalunga mo 1914 sigo opehulilo lyElelo lyaKristus lyOomvula Eyuvi. Embo lyEhololo ndyoka lya nyolwa kuJohannes lwomo 96 E.N., oli li ehokololo lyomamoniko ga tuntula.
Ngashingeyi natu tale omanenedhiladhilo gomEhololo 1:1–12:17, ga kwatela mo omamoniko gotango gaheyali ngoka ga li ga monika kuJohannes. Omamoniko ngaka omahokithi molwaashoka otaga popi shoka tashi ningwa muuyuni ngashingeyi notagu ulike nkene ehalo lyaJehova tali ka gwanithwa monakuyiwa yi li popepi. Mboka taya lesha ehokololo lyomamoniko ngaka ye na eitaalo otaya ka hekelekwa nokuladhipikwa shili.—Heb. 4:12.
“ONZIGONA” TAYI PATULULA IHAMANO YOMIIHAKO IHEYALI
(Eh. 1:1–7:17)
Tango, Johannes okwa li a mono Jesus Kristus omutumbalekwa nokwa pewa etumwalaka ndyoka a li e na ‘okunyolela membo noku li tumina komagongalo gaheyali.’ (Eh. 1:10, 11) Emoniko lyoshipangelapundi shomegulu olya li lya landula ko. Ngoka a kuutumba koshipangelapundi okwa li e na embo lya hakwa niihakitho iheyali moshikaha she shokolulyo. Ngoka a ‘gwana okupatulula iipatitho yembo ndika’ ke shi gumwe keehe shi “Onime yomezimo lyaJuda” nenge ‘onzigona yi na ooniga heyali nomeho gaheyali.’—Eh. 4:2; 5:1, 2, 5, 6.
Emoniko etitatu olya holola shoka sha ningwa po sho “onzigona” ya matula iihako ihamano yotango kooshimwe nooshimwe. Sho oshihako oshitihamano sha matulwa, ekakamo lyevi enene olya li lya ningwa, nesiku enene lyondjahi olya thiki. (Eh. 6:1, 12, 17) Ihe emoniko lya landula ko otali ulike ‘aayengeli yane ya keelela oombepo dhokoombinga ne dhevi’ sigo 144 000 ya pu okundhindhilikwa noshihako. “Engathithi lyaantu” nenge ongundu onene yaamboka inaaya ndhindhilikwa noshihako oya li ya monika ya “thikama ya taalela oshipangelapundi nOnzigona.”—Eh. 7:1, 9.
Omapulo gopamanyolo taga yamukulwa:
1:4; 3:1; 4:5; 5:6—Uutumbulilo “oombepo heyali” otawu ulike shike? Onomola heyali otayi thaneke egwaneno pataloko lyaKalunga. Onkee ano, etumwalaka ‘komagongalo gaheyali’ otali longo wo koshigwana shaKalunga shoka hashi gongala kunena momagongalo ge vulithe 100 000 muuyuni auhe. (Eh. 1:11, 20) Molwaashoka Jehova oha gandja ombepo ondjapuki ngaashi a hala, uutumbulilo ‘oombepo heyali’ otawu ulike nkene hayi kwathele mboka taya pulakene kehunganeko ndika ye li uve ko nawa noku ye etela omalaleko nuuyamba. Embo lyEhololo otali kundathana iinima oyindji yi li moongundu heyali. Onomola heyali membo ndika otayi thaneke egwaneno nodhoshili kutya embo otali popi kombinga ‘yokugwanithwa’ nenge yokumanwa ‘kwoshiholekwa shaKalunga.’—Eh. 10:7, OB-1954.
1:8, 17—Olye ti ithanwa “Alfa naOmega” nolye “omutango nomuhugunini”? Jehova oye ti ithanwa “Alfa naOmega” shoka tashi tsu omuthindo kutya kakwa li Kalunga omunankondo adhihe komeho ye nokapu na ngoka te ke mu landula. Oye “etameko nehulilo.” (Eh. 21:6; 22:13) Nonando Jehova oti ithanwa “etameko nehulilo” mEhololo 22:13, sha hala okutya, kapu na ngoka e mu tetekele nenge te ke mu landula, oshikalimo shontopolwa yotango yEhololo otashi ulike kutya uutumbulilo “omutango nomuhugunini” otawu ulike kuJesus Kristus. Oye omuntu gwotango a li a yumudhilwa momwenyo gwopambepo noye gwahugunina a yumudhwa kuJehova ye mwene.—Kol. 1:18.
2:7 (OB-1954)—‘Oparadisa yaKalunga’ oshike? Molwaashoka oohapu ndhika otadhi lombwelwa Aakriste aagwayekwa, oparadisa ndjoka tayi popiwa mpaka otayi ulike kehala lyomegulu moka Kalunga ha kala, lya fa oparadisa. Aakriste aagwayekwa aadhiginini otaya ka pewa ondjambi ‘yokulya iiyimati yokomuti gwomwenyo.’ Otaya ka pewa omwenyo ihaagu si.—1 Kor. 15:53.
3:7—Uunake Jesus a li a pewa “iipatululo yaDavid,” nokwa kala te yi longitha ngiini? Jesus okwa li a langekwa po e li Omukwaniilwa gwomezimo lyaDavid peninginitho lye mo 29 E.N. Ihe ka li a pewa oshipatululo shaDavid sigo omo 33 E.N., sho a li a kuutumba kolulyo lwaKalunga megulu. Moka okwa li a thigulula uuthemba wokulonga kehe shoka sha pumbiwa e li omukwaniilwa gwUukwaniilwa waDavid. Okuza mpoka Jesus okwa kala ta longitha oshipatululo shika okweegulula oompito nosho wo uuthembahenda wu na ko nasha nUukwaniilwa. Mo 1919 Jesus okwa li a pe ‘omupiya omudhiginini nomunandunge’ “oshipatululo shegumbo lyaDavid” mokulangeka po ongundu yomupiya ndjoka yi ‘tonatele iinima ye ayihe.’—Jes. 22:22; Mat. 24:45, 47, KB.
3:12—‘Edhina epe’ lyaJesus olini? Edhina ndika oli na ko nasha noshilonga she oshipe nosho wo uuthembahenda we uupe. (Fil. 2:9-11) Nonando kapu na ngoka a tseya nawanawa edhina ndyoka ngaashi Jesus, Jesus okwa li e li nyola kaamwahe aadhiginini mboka ye li mehala lyomegulu opo ya kale ye na ekwatathano lyopothingo naye. (Eh. 19:12) Nayo oya li wo ya pewa uuthembahenda wumwe wi ikalekelwa mboka Jehova e mu pe.
Iiyilongomwa kutse:
1:3, OB-1954. Molwaashoka “ethimbo olya thikana [opo Kalunga a pangule uuyuni waSatana],” osha pumbiwa noonkondo opo tu uve ko etumwalaka lyomembo lyEhololo nokutula miilonga shoka shi li mo.
3:17, 18, OB-1954. Opo tu kale aayamba pambepo otwa pumbwa okulanda kuJesus “oshingoli sha yoololwa komulilo.” Shika otashi ti kutya otu na okukambadhala tu longe shoka oshiwanawa. (1 Tim. 6:17-19) Opo tu hume komeho pambepo, otwa pumbwa tu zale ‘oonguwo oontokele’ ndhoka tadhi tu ndhindhilikitha kutya otu li aalanduli yaKristus nokulongitha “omugwayo gwomeho,” ngaashi omayele ngoka haga adhika moshifo shOshungonangelo.—Eh. 19:8.
7:13, 14. Aakuluntu 24 otaya thaneke 144 000 meadhimo lyawo lyomegulu moka taya yakula ye li aakwaniilwa naayambi nenge aapristeli. Otaya thanekwa kaapristeli yomuIsraeli shonale mboka Omukwaniilwa David a li u unganeke miitopolwa 24. Gumwe gwomaakuluntu okwa li a ulikile Johannes kutya ongundu onene oyini. Onkee ano, osha yela kutya eyumuko lyAakriste aagwayekwa olya li lya tameke komeho yomumvo 1935. Omolwashike tatu tile ngawo? Omolwaashoka momumvo ngoka aapiya yaKalunga aagwayekwa kombanda yevi oya li ya tseyithilwa kutya ongundu onene oyini naanaa.—Luk. 22:28-30; Eh. 4:4; 7:9.
OMANKUMA GAHEYALI OGA LI GA HIKWA SHO OSHIHAKO OSHITIHEYALI SHA PATULULWA
(Eh. 8:1–12:17)
Onzigona oya li ya patulula oshihako oshitiheyali. Opo nduno, aayengeli yaheyali oya li ya pewa omankuma gaheyali. Aayengeli yahamano oya li ya hiki omankuma gawo nokutseyithila “oshititatu” shaantu, shoka tashi thaneke Uukwakriste, omatumwalaka gepangulo. (Eh. 8:1, 2, 7-12; 9:15, 18) Shika osho Johannes a li a mono memoniko etitano. Okwa li a kutha ombinga memoniko lya landula ko sho a li po okambo nokuyeleka uuyapuki wotempeli. Konima sho enkuma etiheyali lya hikwa, megulu omwi igidhwa mokule kwa tiwa: “Ngashingeyi oonkondo dhokupangela uuyuni odhOmuwa Kalunga ketu nodhaKristus gwe.”—Eh. 10:10; 11:1, 15.
Emoniko etiheyali olya li lya ndjandjukununa nawa shoka sha popiwa mEhololo 11:15, 17. Endhindhiliko enene olya li lya monika megulu. Omukiintu gwomegulu okwa li a vala okanona okamati. Ondiaboli oya li yu umbwa mo megulu. Molwaashoka oya li ya sila ondjahi omukiintu ngoka gwomegulu, oya yi yi “ka kondjithe oyana mboka ya hupu ko.”—Eh. 12:1, 5, 9, 17.
Omapulo gopamanyolo taga yamukulwa:
8:1-5 (OB-1954)—Omolwashike megulu mwa li mwa mwenwa thilu, noshike sha li shu umbilwa kombanda yevi? Megulu omwa li mwa mwenwa pathaneko opo ‘omagalikano gaayapuki’ kombanda yevi ga vule okuuvika. Shika osha li sha ningwa pehulilo lyiita yotango yuuyuni. Aakriste aagwayekwa kaya li ya ya megulu pehulilo lyOmathimbo gAapagani ngaashi oyendji ya li ya tegelela shi ningwe. Oya li ya mono iihuna pethimbo lyiita. Onkee ano, oya li ya galikana ya mana mo ya kwathelwe. Mokuyamukula omagalikano gawo, omuyengeli okwa li u umbile omulilo gwopathaneko kombanda yevi ngoka gwa li gwe ya hwameke pambepo. Nonando oya li omwaalu omushona, oya li ya tameke noshikonga shokuuvitha shoka sha li sha ningitha Uukwaniilwa waKalunga wu kale tawu fike Uukwakriste. Omalondodho gomOmbiimbeli ga fa omindundumo oga li gu uvika, uushelu woshili yopamanyolo owa li wa tseyithwa nomalongelokalunga giifundja oga li ga kakamithwa ga fa omatungo taga kakamithwa kekakamo lyevi.
8:6-12; 9:1, 13; 11:15—Uunake aayengeli yaheyali ya li yi ilongekidha okuhika omankuma gawo, nuunake nongiini ga li ga hikwa? Okwiilongekidha okuhika omankuma gaheyali okwa li kwa kwatela mo okugandja ewiliko okuza mo 1919 sigo 1922 kiilyo yongundu yaagwayekwa ya mwenyopalekwa kombanda yevi ndjoka tayi thanekwa kuJohannes. Aagwayekwa mboka oya li yi ipyakidhila nokuunganekulula uukalele womontaneho nosho wo okutunga omahala gokunyanyangidhila iileshomwa. (Eh. 12:13, 14) Ehiko lyomankuma otali thaneke okuuvitha nopwaahenuumbanda kwoshigwana shaKalunga esiku lyaJehova lyokupangula onkalelo yaSatana tashi longele kumwe naayengeli. Shika osha li sha tameke poshigongi shoshitopolwa shoka sha li muCedar Point, Ohio, mo 1922, notashi tsikile sigo opethimbo lyuudhigu unene.
8:13; 9:12; 11:14—Omeityo lini omahiko gomankuma gatatu gahugunina ga li “iihuna” nenge ‘iiponga’? Omahiko gomankuma gane gopetameko oga li taga aneke pomutenya onkalo yopambepo yUukwakriste, ihe gatatu gahugunina oga li iihuna, molwaashoka oga li taga popi iiningwanima yontumba kondandalunde. Ehiko etitano olya li li na ko nasha nokumangululwa kwoshigwana shaKalunga okuza ‘molumbogo lwomuule’ lwokukala inaashi ipyakidhila mo 1919 niilonga yasho yokugandja uunzapo nopwaahe na okuzimbuka mbyoka ya li ya ningi ya fa egeelo ndyoka tali hepeke Uukwakriste. (Eh. 9:1) Etihamano olya li li na ko nasha nokuponoka kwa mana mo kwomatanga gaakwiita aakayili mondjokonona nosho wo oshikonga oshinene shokuuvitha muuyuni auhe shoka sha li sha tameke mo 1922. Lyahugunina oli na ko nasha nokuvalwa kwUukwaniilwa wopaMesiasa.
Iiyilongomwa kutse:
9:10, 19, OB-1954. Iileshomwa yi shi okwiinekelwa mbyoka ya nyanyangidhwa ‘komupiya omudhiginini nomunandunge’ ya kankamena kOmbiimbeli, oyi na etumwalaka tali tsana. (Mat. 24:45, KB) Etumwalaka ndika otali faathanithwa nomishila dhoombahu ndhoka tadhi ‘tsu dha fa oondje’ nuukambe womatanga gaakwiita mboka omishila dhawo “dha fa omayoka.” Omolwashike mbela? Omolwaashoka iileshomwa mbyoka otayi londodha kombinga ‘yesiku lyondjahi yaJehova.’ (Jes. 61:2, OB-1954) Natu yi taandelitheni nomukumo nonuulaadhi.
9:20, 21. Aaifupipiki oyendji mboka haya kala miilongo mbyoka haku tiwa aniwa oyaapagani oyi inyenga nawa ketumwalaka ndyoka tatu uvitha. Ihe inatu tegelela oongundu dhaantu oyendji kaaye li iilyo yUukwakriste, mboka tayi ithanwa “oshihupe shaantu,” yi itedhulule. Nonando ongaaka, otatu tsikile nuudhiginini niilonga yokuuvitha.
12:15, 16. “Evi” ndyoka tali thaneke iinima yonkalelo yaSatana nenge aapangeli miilongo yi ili noyi ili, ohali ambidhidha emanguluko lyokulongela Kalunga. Okutameka mo 1940 lwaampono, aapangeli mboka oya ‘nina po omeya ga fa omulonga [nenge omahepeko] ngoka ga kungwa koshikoko.’ Ngele Jehova okwa hala oku shi ninga, ota vulu okunwetha mo aapangeli ya gwanithe po ehalo lye. Onkee ano, oshe eleka sho Omayeletumbulo 21:1 taga ti: “Omutima gwomukwaniilwa ogu li miikaha yOMUWA ngaashi omikanka dhomeya; ote gu gameke hoka a hala.” Oohapu ndhika otadhi koleke eitaalo lyetu muKalunga.