Oohapu dhaJehova odhi na omwenyo

Omanenedhiladhilo okuza membo lyEhololo 13:1–22:21

OSHIKE tashi ka ningilwa mboka haya longele Jehova Kalunga nosho wo mboka ihaaye mu longele? Satana noompwidhuli dhe otaya ka ningilwa shike monakuyiwa? Omalaleko nuuyamba geni aantu aavuliki taya ka mona pethimbo lyElelo lyOomvula Eyuvi lyaKristus? Omayamukulo komapulo ngaka nosho wo galwe ga simana, oga gandjwa mEhololo 13:1–22:21.a Moontopolwa ndhika otamu adhika omamoniko 9 gahugunina gomomamoniko 16 ngoka omuyapostoli Johannes a li a mono sho ethelemumvo lyotango E.N. lya li pokuhula po.

Johannes okwa nyola a ti: “Omunelago oongoka ta lesha embo ndika; eeno, aanelago oomboka taa pulakene oohapu dhomahunganeko gomembo ndika e taa vulika kushoka sha nyolelwa mo.” (Eh. 1:3; 22:7) Okulesha nokutula miilonga shoka twi ilonga membo lyEhololo otaku vulu okuguma omitima dhetu, okukoleka eitaalo lyetu muKalunga nomOmwana, Jesus Kristus, noku tu pa etegameno ewanawa kombinga yonakuyiwa.b—Heb. 4:12.

IIYAHA IHEYALI YONDJAHI YAKALUNGA OYA TILWAHI

(Eh. 13:1–16:21)

Ehololo 11:18 otali ti: ‘Aapagani oya geya noonkondo, nethimbo lyondjahi yaKalunga olye ya lyokuhanagula po mboka taya yonagula po evi.’ Opo ku ulikwe kutya omolwashike ondjahi yaKalunga ye ya, emoniko etihetatu otali ulike iilonga ‘yoshilikama shooniga omulongo nomitse heyali.’—Eh. 13:1.

Memoniko etimugoyi, Johannes okwa li a mono “Onzigona a thikama kondundu yaSioni” nopamwe nayo “aantu 144 000.” Oyo oya “kulilwa mo maantu ooyakwawo.” (Eh. 14:1, 4) Omatseyitho gahamano gaayengeli oga li ga landula ko. Memoniko lya landula ko, Johannes okwa li a mono “aayengeli yaheyali ye na omageelo gaheyali.” Osha yela kutya Jehova oye a li a lombwele aayengeli mbaka ya tile “iiyaha mbyoka iheyali yondjahi yaKalunga” miitopolwa yi ili noyi ili yuuyuni waSatana. Iiyaha oya li yi na omatumwalaka nomalondodho ngoka Kalunga a li ta ka pangulitha nago aantu. (Eh. 15:1; 16:1) Omamoniko ngaka gaali oga li taga gandja uuyelele kombinga yomapangulo ngoka ga li tage ke etwa kUukwaniilwa noshiponga oshititatu nosho wo ehiko lyenkuma etiheyali.—Eh. 11:14, 15.

Omapulo gopamanyolo taga yamukulwa:

13:8—‘Embo lyaanamwenyo lyOnzigona’ oshike? Olyo embo lyopathaneko ndyoka li na owala omadhina gaamboka taya ka pangela pamwe naJesus Kristus mUukwaniilwa we womegulu. Omwa kwatelwa omadhina gAakriste aagwayekwa mboka ye li natango kombanda yevi, mboka ye na etegameno lyoku ka mona omwenyo megulu.

13:11-13—Ongiini oshilikama shooniga mbali sha li sha ningi iinima sha fa oshikoko noshi ithana omulilo gu ze megulu? Uushili kutya oshilikama shooniga mbali shoka tashi thaneke Epangelo lya hangana enankondo lyuuyuni lyaAmerika naBritania osha li sha popi sha fa oshikoko, otawu ulike kutya ohashi longitha omambandameko, ethininiko nelongitho lyoonkondo okuthiminika aantu ya taambe ko epangelo lyasho. Osha li shi ithana omulilo gu ze megulu mokwiininga sha fa osho omupolofeti mokupopya kutya osha sinda oonkondo dhuuwinayi miita iitiyali yuuyuni yomethelemimvo eti-20 nomokusindana molugodhi lwUukomonisi.

16:17—“Mombepo” moka mwa tilwahi oshiyaha oshitiheyali oyo shike? ‘Ombepo’ ndjoka otayi thaneke okudhiladhila kwopasatana, ombepo [nenge egamo lyopamadhiladhilo] ndjoka tayi pangele ngashingeyi aantu mboka ihaa vulika kuKalunga.” Ombepo ndjika yuuzigo oya fudhwa kuuyuni auhe wa kolokosha waSatana.—Ef. 2:2.

Iiyilongomwa kutse:

13:1-4, 18. “Oshilikama” otashi thaneke omapangelo gopantu ngoka ga zi “mefuta,” sha hala okutya, maantu ya piyagana. (Jes. 17:12, 13; Dan. 7:2-8, 17) Oshilikama shika sha tulwa po nosha pewa oonkondo kuSatana, oshi na onomola 666, tayi ulike kutya inashi gwanenena. Okuuva ko kutya oshilikama oshike otaku tu kwathele opo kaatu shi landule moku shi simaneka nokaatu shi galikane ngaashi aantu oyendji haya ningi.—Joh. 12:31; 15:19.

13:16, 17. Nonando opu na omaupyakadhi ngoka hatu tsakaneke momaipyakidhilo getu gesiku kehe, ngaashi ‘mokulanda nenge mokulanditha,’ katu na okweetha tu thininikilwe mokweetha oshilikama shi pangele onkalamwenyo yetu. Okweetha tu kale tu na ‘endhindhiliko lyoshilikama miikaha yetu nomiipala yetu’ otashi ti kutya otwe etha shi pangele iilonga yetu nenge shi nwethe mo omadhiladhilo getu.

14:6, 7. Oohapu dhomuyengeli otadhi tu longo kutya otu na okuuvitha neendelelo onkundana ombwanawa kombinga yUukwaniilwa waKalunga mboka wa dhikwa po. Otu na okukwathela mboka hatu konakona nayo Ombiimbeli ya kale ye na etilo ewanawa lyokutila Kalunga noku mu simaneka.

14:14-20. Ngele ‘evi lya tiliganene eteyo,’ sha hala okutya, ngele eteyo lyaamboka taya ka hupithwa lya pu, ethimbo otali ka kala lya thika komuyengeli u umbile “moshikolelo oshinene shondjahi yaKalunga” omahila “gomiviinu dhokombanda yevi” ndhoka dha gongelwa. Omiviinu ndhoka, sha hala okutya, omapangelo gaSatana ga yonuka haga monika ngoka taga pangele aantu pamwe ‘nomahila’ giiyimati yago iiwinayi, otadhi ka hanagulwa po sigo aluhe. Otu na okukala twa tokola toko kaatu nwethwe mo komiviinu dhevi.

16:13-16. ‘Oombepo dha nyata’ otadhi thaneke oopolopahanda dhoompwidhuli dha nuninwa okushilipaleka kutya aakwaniilwa yokombanda yevi inaya nwethwa mo kokutilwahi kwoshiyaha oshitiheyali shondjahi yaKalunga, ihe pehala lyaashono otadhi yu ulumike ya pataneke Jehova.—Mat. 24:42, 44.

16:21. Sho ehulilo lyuuyuni mbuka tali hedha popepi, oohapu dhaJehova dhokupangula uuyuni waSatana wa kolokosha otashi vulika dhi kale dha kwatela mo oohapu dha kwata miiti noonkondo dhi na ko nasha nokupangula kwaKalunga, tashi vulika tadhi thanekwa komeya ga ninga iikangwa. Ihe nando ongaaka, aantu oyendji otaya ka tsikila nokupa Kalunga uusama.

OMUKWANIILWA GWESINDANO TA PANGELE

(Eh. 17:1–22:21)

“Babiloni oshinene” shoka shi li uukwaniilwa wuuyuni womalongelokalunga giifundja, osho oshitopolwa shiihuna shuuyuni waSatana. Emoniko eti-11 otali shi thaneke shi li “ohonda kamana,” sha hala okutya, omukiintu inaa yogoka pamikalo, “a kuutumba koshilikama oshitiligane.” Oku na okuhanagulwa po thiluthilu ‘kooniga omulongo’ dhoshilikama shoka she mu humbata. (Eh. 17:1, 3, 5, 16) Emoniko lya landula ko otali yelekanitha ohonda ‘noshilando oshinene’ nolya li tali tseyitha okuteka po kwasho nosho wo elombwelo lye endelela tali lombwele oshigwana shaKalunga shi ‘ze mo musho.’ Okuteka po kwoshilando oshinene okwa li kwa yematelwa koyendji. Ihe megulu omwa li mu na enyanyu, ‘omolwohango yOnzigona.’ (Eh. 18:4, 9, 10, 15-19; 19:7) Memoniko eti-13, omulondi ‘gwokakambe okatokele’ okwa yi a ka kondje niigwana. Okwe eta ehulilo lyuuyuni waSatana wa kolokosha.—Eh. 19:11-16.

Ongiini kombinga ‘yeyoka ndyoka ekulu hali ithanwa omuhindadhi nenge Satana’? Uunake tali ku “umbilwa mefuta lyomulilo”? Shoka osho shimwe shomiinima yomemoniko eti-14. (Eh. 20:2, 10) Omamoniko gaali gahugunina otaga gandja omawilowilo gonkalamwenyo yopethimbo lyEyuvimumvo. Sho ‘ehololo’ lye ya pehulilo, Johannes okwa li a mono ‘omulonga gwomeya gomwenyo, tagu kunguluka tagu ende pokati kepandaanda lyoshilando,’ nokwa li kwa landula ehiyo ekumithi tali hiya “kehe ngoka a sa enota.”—Eh. 1:1; 22:1, 2, 17.

Omapulo gopamanyolo taga yamukulwa:

17:16; 18:9, 10—Omolwashike “aakwaniilwa yokombanda yevi” taya ka nikila oluhodhi ohonda ndjoka ya hula yo yene? Oya nika oluhodhi molwokwiihola mwene kwawo. Konima yehanagulo lyaBabiloni oshinene, aakwaniilwa yokombanda yevi otaya ka mona kutya osha li shi na oshilonga kuyo. Osha li sha monikitha iilonga yawo iithininiki ya fa yi li nawa. Babiloni oshinene osha li wo she ya kwathele ya kute aagundjuka miita. Kakele kaashono, osha li sha dhana onkandangala mokukaleka aantu haya vulika kaapangeli.

19:12—Oshe ende ngiini opo Jesus a kale e na edhina kaapu na ngoka e li tseya, kakele ke mwene? Edhina ndika osha yela kutya oli lile po ondondo nomauthembahenda ngoka Jesus e na, ngaashi ngoka ga popiwa muJesaja 9:6, ngoka ta ka nyanyukilwa mesiku lyOmuwa. Kapu na ngoka a tseya edhina ndyoka kakele ke mwene, oshoka omauthembahenda ge ogi ikalekelwa noye owala ta vulu okukala e uvite ko shoka okukala nondondo ndjoka yopombanda taku ti. Ihe nonando ongaaka, gamwe gomomauthembahenda ngaka Jesus okwe ga pe iilyo yongundu yomuyalekwa gwe, ‘mokunyola edhina lye ndyoka epe kuyo.’—Eh. 3:12.

19:14—Oolye taya ka londa uukambe pamwe naJesus puArmagedon? ‘Momatanga gaakwiita yomegulu’ ngoka tage ki imbwanga mumwe naJesus piita yaKalunga, otamu ka kala mwa kwatelwa aayengeli nosho wo aasindani aagwayekwa mboka ya mona nale ondjambi yawo yomegulu.—Mat. 25:31, 32; Eh. 2:26, 27.

20:11-15—Omadhina goolye ga nyolelwa ‘membo nenge moraamata yomwenyo’? Membo moka omu na omadhina gaayehe mboka taya ka mona omwenyo gwaaluhe, sha hala okutya, Aakriste aagwayekwa, iilyo yongundu onene nosho wo aapiya yaKalunga aadhiginini mboka taya ka ‘yumuka.’ (Iil. 24:15; Eh. 2:10; 7:9) ‘Aawinayi’ mboka taya ka yumudhwa omadhina gawo otaga ka nyolwa ‘membo lyomwenyo’ ngele owala yi ihumbata metsokumwe naashoka “sha nyolwa membo” lyomalombwelo ndyoka tali ka kala lya pandjwa pethimbo lyEyuvimimvo. Ihe itaga ka kala ga nyolwa nohinga. Omadhina gaagwayekwa otaga ka kalelela mo molwaashoka oyu ulika uudhiginini wawo sigo okeso. (Eh. 3:5) Omadhina gaamboka taya ka kala nomwenyo kombanda yevi otaga ka kalelela mo ngele ya piti memakelo lyahugunina lyopehulilo lyoomvula eyuvi.—Eh. 20:7, 8.

Iiyilongomwa kutse:

17:3, 5, 16. “Uunongo wokombanda” otawu tu kwathele tu uve ko “oshiholekwa shomukiintu nguka noshoshilikama shoka [oshitiligane mbyu] she mu humbata.” (Jak. 3:17) Oshilikama shika shopathaneko osha tameka shi li Oshipandi shIigwana nokonima yethimbo osha ningi Iigwanahangano. Mbela okuhololwa kwoshiholekwa shika itaku tu inyengitha tu kale aaladhi mokuuvitha onkundana ombwanawa yUukwaniilwa waKalunga nokutseyitha esiku lyaJehova lyokupangula?

21:1-6. Otatu vulu okukala lela nuushili kutya omalaleko nuuyamba ngoka ga hunganekwa taga ka kala po pethimbo lyelelo lyUukwaniilwa otaga ka ningwa shili. Omolwashike? Omolwaashoka Ombiimbeli otayi popi shi na ko nasha nago tayi ti: “Sha gwanithwa!”

22:1, 17. “Omulonga gwomeya gomwenyo” otagu thaneke omasiloshimpwiyu gaJehova gokuhupitha aantu aavuliki muulunde neso. Omeya ngaka otaga monika ngashingeyi. Inatu kala owala twa nyanyukwa okutaamba ehiyo ‘lyokunwa omeya gomwenyo omagano,’ ihe natu kale wo tu na ehalo oku ga pa yalwe.

[Omanyolo gopevi]

[Ethano pepandja 25]

Aavuliki itaya ka mona tuu omalaleko nuuyamba omakumithi kohi yelelo lyUukwaniilwa!