Kalunga oye lye?

EPULO ndyoka oto li yamukula ngiini? Yamwe ohaya ti kutya Kalunga oye mu shi nawa noku li kuume kawo kopothingo. Yalwe oya tala ko Kalunga ngaashi omupambele gwokokule. Oyi itaala kutya oko e li, ihe oye mu shi owala kashona. Ngele owi itaala muKalunga, ongiini to ka yamukula omapulo taga landula?

1. Mbela Kalunga omuntu ngaa gwolela?

2. Mbela Kalunga oku na edhina?

3. Mbela Jesus oKalunga Omunankondoadhihe?

4. Kalunga oku na ko nasha nangame?

5. Mbela Kalunga okwa hokwa omalongelokalunga agehe?

Ngele owa pula yalwe ya yamukule omapulo ngoka oto ka mona omayamukulo ga yoolokathana. Onkee ano, itashi kumitha sho pu na oongano nomadhiladhilo ga puka kombinga yaKalunga.

Omolwashike twa pumbwa omayamukulo?

Sho a li ta popi nomukiintu ngoka i itaala muKalunga pomuthima, Jesus Kristus okwa li a tsu omuthindo ompumbwe yokutseya oshili kombinga yaKalunga. Omukiintu nguka Omusamaria okwa li a zimine kutya Jesus omupolofeti. Ihe okwa li ti ipula unene nelongelokalunga lyaJesus ndyoka lya yooloka ko kulye. Sho a popi ngaaka Jesus okwa li e mu pula shu ukilila a ti: “Omu shi tuu ngoka hamu galikana?” (Johannes 4:19-22) Osha yela kutya Jesus okwa li e wete kutya haantu ayehe yomalongelokalunga ye shi Kalunga shili.

Mbela Jesus okwa li a hala kutya kapu na ngoka ta vulu okutseya Kalunga lela? Aawe. Jesus okwa tsikile ko ta lombwele omukiintu a ti: “Aagalikani yashili [otaya] ka galikana Tate mombepo nomoshili. Oshoka aagalikani ya tya ngaaka oyo naanaa Tate e ya hala.” (Johannes 4:23) Mbela ngoye owu li gumwe gwomwaamboka haya galikana Kalunga “mombepo nomoshili?”

Oshi li sha simanenena wu shilipaleke kutya eyamukulo ndyoka wu shi kepulo ndyoka olyomondjila. Omolwashike mbela? Jesus okwa li a tsu omuthindo kutya osha pumbiwa okumona ontseyo yashili sho a galikana a ti: “Mboka ye ku tseya Kalunga awike kashili, noya tseya wo Jesus Kristus, ngoka we mu tumu, oyo mboka ye na omwenyo gwaaluhe.” (Johannes 17:3) Eeno, ompito yoye yokumona omwenyo gwaaluhe oya kwatakanithwa nokutseya kwoye Kalunga kashili.

Mbela otashi wapa ngaa lela tu tseye oshili kombinga yaKalunga? Eeno, otashi wapa. Otatu yi mono ngiini? Jesus okwa popi kombinga ye mwene a ti: “Ongame ondjila noshili nomwenyo. Kape na ngoka ta vulu okuya kuTate, okuninga ta pitile mungame.” (Johannes 14:6) Okwa ti wo: “Kaku na ngoka a tseya kutya Tate oye lye, Omwana oye awike, naangoka Omwana a hala oku mu hololela.”—Lukas 10:22.

Onkee ano, oshipatululo shokutseya Kalunga, otashi adhika momalongo gaJesus Kristus, Omwana gwaKalunga. Jesus oku uvaneka a ti: “Ngele tamu vulika koohapu dhandje, nena kapu na omalimbililo one aalongwa yandje. One otamu ka tseya ihe oshili, noshili otayi ke mú mangulula.”—Johannes 8:31, 32.

Ngele Jesus okwa pulwa omapulo gatano ngoka ga tetekele ote ke ga yamukula ngiini?

[Ethano pepandja 4]

Mbela oho longele Kalunga ngoka kuu shi nawa?