Oto shivwa nefimaneko u uye u ongale pamwe nafye kOlupale lOuhamba

OTASHI dulika ho ende pOlupale lOuhamba lEendombwedi daJehova (Kingdom Hall of Jehovah’s Witnesses) moshitukulwa sheni noho lipula kutya oshike naanaa hashi ningwa mo. Mbela ou shii ngoo kutya okwoongala oko hadi ningi oshivike keshe okwa mangulukila keshe umwe? Keshe oo a hala okuuya okwa manguluka.

Ndele otashi dulika u na omapulo onhumba ngaashi: Omolwashike Eendombwedi daJehova hadi ongala pamwe? Oshike hashi ningwa pokwoongala kwado? Ovo have uya po vehe fi Eendombwedi daJehova ohava ningi omatyekosha elipi shi na sha nokwoongala kwado?

“Ongela oshiwana”

Okudja pefimbo lonale, ovanhu ova kala hava ongala opo va longele Kalunga nove lihonge kombinga yaye. Omido 3 500 lwaapo da pita, Ovaisrael ova li va lombwelwa taku ti: “Ongela oshiwana, ovalumenhu novakainhu nounona nomunailongo woye, ou e li peenhu doye, opo va shiive okuuda nokulongwa okutila Omwene Kalunga keni nokudiinina shili eendjovo adishe domhango ei.” (Deuteronomion 31:12) Kungaho, ovanhu aveshe muIsrael, kutya nee ovanyasha ile ovakulunhu ova li hava hongwa opo va kale hava longele Jehova Kalunga nokudulika kuye.

Omafelemido onhumba konima yaasho, eshi eongalo lopaKriste la totwa po, okwoongala okwa kala natango oshitukulwa sha fimana shelongelokalunga lashili. Omuyapostoli Paulus okwa shanga a ti: “Tu filafaneni oshisho fye tu twafane omukumo mohole nomoilonga iwa. [Inatu efa po okwoongala pamwe, OB-1986] ngaashi vamwe ve li po hava ningi, ndelenee tu kumaidafaneni.” (Ovaheberi 10:24, 25) Ngaashi ashike ekwatafano loukwaneumbo hali pamekwa ngeenge oilyo youkwaneumbo ohai longifa efimbo okukala pamwe, osho ngoo ohole yaavo va hala okulongela Kalunga tai kala ya kola ngeenge ova kala hava ongala pamwe opo va longele Kalunga.

Metwokumwe noihopaenenwa yopamishangwa oyo ya tumbulwa metetekelo, Eendombwedi daJehova ohadi ongala luvali oshivike keshe pOlupale lOuhamba. Okwoongala oko ohaku kwafele ovakalipo va kale va lenga omafinamhango Ombibeli, ve a ude ko nove a tule moilonga. Ngeenge tashi shiiva, elandulafano lokwoongala ohali kala la faafana mounyuni aushe, nokwoongala keshe ohaku kala ku na elalakano lopamhepo le likalekelwa. Ovo hava kala pokwoongala ohava ‘twaafana omukumo’ okupitila meenghundafana tadi tungu komesho nokonima yokwoongala. (Ovaroma 1:12, OB-1986) Oshike mbela hashi ningwa pokwoongala keshe kwEendombwedi?

Oshipopiwa sha kanghamena kOmbibeli

Ovanhu vahapu ohava ongala oshikando shotete pokwoongala kwoshipopiwa sha kanghamena kOmbibeli osho sha nuninwa ovanhu aveshe, nokwoongala oko luhapu ohaku kala ko momaxuliloshivike. Jesus Kristus okwa li ha yandje oipopiwa luhapu, omo mwa kwatelwa Eudifo lokOmhunda olo la shiivika nawa. (Mateus 5:1; 7:28, 29) Omuyapostoli Paulus naye okwa li a yandja oshipopiwa kOvaatena. (Oilonga 17:22-34) Mokushikula oihopaenenwa oyo, pokwoongala kwEendombwedi daJehova ohapa yandjwa oipopiwa oyo ya nuninwa ovanhu aveshe, mwa kwatelwa ovo opo tave uya ko oshikando shotete.

Okwoongala ohaku hovele neimbilo olo la dja membo Sing Praises to Jehovah.a Aveshe ovo tava dulu ohava fikama nokwiimba pamwe eimbilo olo tali imbwa. Konima yeilikano olo hali ningwa pauxupi, omupopi a pyokoka oha yandje oshipopiwa osho hashi yandjwa oule wominute 30. (Tala oshimhungu “Oipopiwa tai hongo oyo ya nuninwa ovanhu aveshe.”) Oshipopiwa osho ohashi kala sha kanghamena filufilu kOmbibeli. Omupopi oha pula lwoikando ovapwilikini va pandje Eembibeli davo pomishangwa donhumba odo tadi wapalele nokushikula eshi ta lesha omishangwa odo. Onghee hano, oto dulu okweetelela Ombibeli yoye ile u pule umwe womEendombwedi daJehova komesho yokwoongala ngeenge ota dulu oku ku monena Ombibeli.

Ekonakono lOshungonangelo

Momaongalo mahapu Eendombwedi daJehova, oshipopiwa shomoipafi ohashi shikulwa kEkonakono lOshungonangelo olo hali ningwa monghedi yomapulo nomanyamukulo, noshitukulwa osho tashi konakonwa ohashi kala she likolelela kOmbibeli. Ekonakono olo ohali ningwa oule wovili imwe. Okwoongala oko ohaku ladipike ovo ve li po va shikule oshihopaenenwa shOvaberea vopefimbo laPaulus, ovo va li va “tambula nohokwe eendjovo daKalunga, ndee tava konakona momishangwa.” — Oilonga 17:11.

Ekonakono lOshungonangelo ohali hovele neimbilo. Ouyelele oo hau kundafanwa pokwoongala oko nosho yo omapulo oo haa pulwa komunhu oo ta kwatele komesho ohaa kala moitukulwa yokukonakonwa oyo hai kala moifo yOshungonangelo. Oto dulu okupula u kale ho etelwa oifo yOshungonangelo kuumwe womEendombwedi daJehova. Oitukulwa imwe yomwaayo opo ya konakonwa ongaashi: “Ovadali, tekuleni ounona veni pahole,” “Inamu alulila nande omunhu owii,” nosho yo “Okumona oixuna akushe otaku ka xula po mafiku.” Nonande okwoongala oko ohaku ningwa monghedi yomapulo nomanyamukulo, ovapwilikini ohava yandje omatyekosha avo nehalo liwa, nomatyekosha oo luhapu ohaa yandjwa kwaavo va lesha komesho yefimbo oshitukulwa osho tashi konakonwa nosho yo omishangwa odo di li mo nova dilonga shi na sha nasho. Okwoongala oko ohaku xulifwa neimbilo nosho yo eilikano. — Mateus 26:30; Ovaefeso 5:19.

Ekonakonombibeli lEongalo

Efiku limwe moshivike keshe konguloshi, Eendombwedi daJehova ohadi kala nokwoongala kwopatatu pOlupale lOuhamba oko haku ningwa oule wovili 1 nominute 45. Okwoongala kwotete ohaku kala Ekonakonombibeli lEongalo olo hali ningwa oule wominute 25. Okwoongala oko ohaku kwafele ovo hava kala po va shiive nawa Ombibeli, va lundulule onghedi yavo yokudiladila nosho yo oikala yavo, nova xwepopale ve li ovahongwa vaKristus. (2 Timoteus 3:16, 17) Ngaashi Ekonakono lOshungonangelo, pokwoongala kwa tya ngaho ohapa kundafanwa oshitukulwa shomapulo nomanyamukulo osho she likolelela kOmbibeli. Ovanhu ohava yandje omatyekosha avo nehalo liwa pokwoongala oko. Pokwoongala kwa tya ngaho ohapa longifwa oishangomwa ya nyanyangidwa kEendombwedi daJehova, ye likolelela kOmbibeli.

Omolwashike Eendombwedi daJehova hadi longifa oishangomwa ye likolelela kOmbibeli pokwoongala kwado? Pefimbo lOmbibeli, kasha li hashi kala sha wana ngeenge omunhu okwa lesha Eendjovo daKalunga ndele ine di fatululilwa. Oda li di na ‘okuleshwa nawa, nokufatululwa opo ovanhu va kale ve udite ko osho va lesha.’ (Nehemia 8:8) Momido opo da di ko, ovanhu ovo hava kala pEkonakonombibeli lEongalo ova li va kwafelwa va ude ko omishangwa donhumba dOmbibeli eshi pokwoongala oko pa li pa konakonwa oishangomwa oyo tai kundafana embo laJesaja, laDaniel nosho yo lEhololo.

Ofikola yOukalele woPauteokratika

Konima yEkonakonombibeli lEongalo ohaku shikula Ofikola yOukalele woPauteokratika. Okwoongala oko haku ningwa oule wominute 30 okwa nuninwa okukwafela Ovakriste va kale ve na ‘ounghulungu wokuhonga.’ (2 Timoteus 4:2, NW) Pashihopaenenwa, mbela owa pulwa nale kokaana koye ile kukaume koye epulo kombinga yaKalunga ile yOmbibeli ndele kwa li lela we li nyamukula mondjila? Ofikola yOukalele woPauteokratika otai dulu oku ku kwafela shi na sha nanghee to dulu okuyandja omanyamukulo mawa a kanghamena kOmbibeli komapulo oo madjuu. Kungaho, ohatu dulu okuwanifilwa eendjovo domuprofeti Jesaja oo a ti: “Omwene okwa pa nge elaka la longwa, opo ndi kale ndi nounongo okuyakula nokutwa ouladi ava va loloka.” — Jesaja 50:4.

Ofikola yOukalele woPauteokratika ohai hovele noshipopiwa sha kanghamena komatukulwa Ombibeli oo ovapwilikini va li va ladipikwa ve a leshe oshivike sha tetekela. Konima yoshipopiwa osho, omupopi oha pula ovapwilikini va yandje omatyekosha e li pauxupi shi na sha naasho va lesha momatukulwa oo, osho ve wete kutya otashi va etele ouwa. Konima yoshipopiwa osho, ohaku shikula oipopiwa yovanafikola ovo ve lishangifa mOfikola yOukalele woPauteokratika.

Ovanafikola ohava pulwa va leshe eevelishe donhumba dOmbibeli komutune ile va yandje oshipopiwa shi na sha nanghee tava dulu okuhonga vamwe Ombibeli. Konima yoshipopiwa keshe, omuyandjimayele a pyokoka oha pandula omunafikola shi na sha naapo a ninga nawa, nomayele oo ohaa kala e likolelela kembo Benefit From Theocratic Ministry School Education. Konima yokwoongala, omuyandjimayele oo oha pe ovanafikola omayele pauhandimwe e na sha naapo va pumbwa okuxwepopala.

Okwoongala oko haku ningwa meni lefimbo lixupi, okwa nuninwa ovanafikola nosho yo aveshe ovo ve li pokwoongala va xwepopaleke okulesha kwavo, okupopya kwavo nosho yo ounghulungu wavo wokuhonga. Konima ngeenge Ofikola yOukalele woPauteokratika oya pu, ohaku shikula Okwoongala kwOpailonga oko haku hovele neimbilo le likolelela komushangwa wa dja mOmbibeli.

Okwoongala kwoPailonga

Okwoongala kwoPailonga oko haku xuuninwa. Ovapwilikini ohave lihongo nghee ve na okuhonga vamwe oshili yOmbibeli monghedi tai pondola okupitila moipopiwa, momauliko, momapulapulo nosho yo momatyekosha avamwe. Fimbo Jesus a li ina tuma ovahongwa vaye va ka udife, okwa li e va ongaleka ndele te va pe omalombwelo okondadalunde. (Lukas 10:1-16) Molwaashi ova li va deulilwa nawa oilonga yokuudifa, ova li va hafela oimoniwa ihapu ihokwifa. Lwanima, ovahongwa vaJesus ova li va alukila kuye ndele tave mu hokololela oimoniwa yavo. (Lukas 10:17) Ovahongwa ova li yo hava hokolelafana oimoniwa luhapu. — Oilonga 4:23; 15:4.

Elandulafano lOkwoongala kwoPailonga oko haku ningwa oule wominute 35 ohali kala mokafo oko haka piti omwedi keshe, ke na oshipalanyole Oukalele Wetu wOuhamba. Imwe yomoitukulwa oyo opo ya konakonwa ongaashi: “Longeleni Jehova mu li oukwaneumbo,” “Omolwashike hatu shuna kovanhu lwoikando” nosho yo “Hopaenena Kristus moukalele woye.” Okwoongala oko ohaku xulifwa neimbilo, noshilyo shimwe sheongalo ohashi pulwa shi xulife neilikano.

Omatyekosha aavo va li pokwoongala kwEendombwedi

Eongalo ohali kendabala okukwafela keshe umwe a kale a manguluka. Pashihopaenenwa, Andrew okwa li a uda omahokololo mahapu oo taa popile Eendombwedi daJehova mowii. Ndele eshi a li a ya kokwoongala kwEendombwedi oshikando shotete, okwa li a kuminwa onghedi omo ovanhu va li ve mu hambelela. Andrew okwa ti: “Oya li onhele iwa nokukala. Onda li nda kumwa neenghono okumona nghee ovanhu hava ulike omhepo youkaume, nova li ve na ko nasha naame.” Omunyasha womido omulongo nasha wokuKanada wedina Ashel, okwa dimina a ti: “Okwoongala okwa li ku hokwifa shili, nonda li nda dula okushikula noupu.”

José, wokuBrasilia, okwa li a shiivika nawa momudingonoko wavo kutya oku hole omapove. Ndele nande ongaho, okwa li a shivwa kokwoongala kOlupale lOuhamba lomoshitukulwa shavo. Okwa ti: “Ovanhu kOlupale lOuhamba ova li va hambelela nge monghedi yefimaneko, nonande ova li ve shii kutya ondi hole omapove.” Atsushi wokuJapan okwa ti: “Onda dimina kutya oshikando shotete eshi nda ongala nEendombwedi daJehova, kanda li nda manguluka lela. Ndele nande ongaho, onda li nda mona kutya Eendombwedi daJehova ovanhu ashike ngaashi ovanhu vakwao. Oda li da ungaunga naame monghedi oyo ya li ya ningifa nge ndi kale nda manguluka.”

Owa manguluka okuuya kokwoongala kwEendombwedi daJehova

Ngaashi sha ulikwa komatyekosha avamwe oo a tumbulwa metetekelo, okukala pokwoongala pOlupale lOuhamba otaku dulu oku ku etela ouwa muhapu. Okupitila mehongo le likolelela kOmbibeli olo hali yandjwa pokwoongala oko, oto ke lihonga kombinga yaKalunga, na Jehova Kalunga ote ke ku honga osho “tashi ku wapalele.” — Jesaja 48:17.

Pokwoongala kwEendombwedi daJehova ihapa futwa sha noihapa umbwa ongalo. Mbela ino hala okuya kokwoongala kOlupale lOuhamba lomoshitukulwa sheni? Oto shivwa nefimaneko u uye.