Nghee eendjovo daJesus tadi dulu okunwefa mo oikala yoye
“Ou a tumwa kuKalunga, oye ta popi eendjovo daKalunga.” — JOH. 3:34.
1, 2. Omolwashike taku dulu okutiwa kutya eendjovo domEudifo laJesus lokOmhunda oda kanghamena ‘keendjovo daKalunga’?
JESUS okwa li a honga ovanhu oilihongomwa ihapu i na ongushu mEudifo laye lokOmhunda. Osho itashi kumwifa molwaashi Jehova oye odjo yEendjovo odo Kristus a li a honga. Jesus okwa ti: “Ou a tumwa kuKalunga, oye ta popi eendjovo daKalunga.” — Joh. 3:34-36.
2 Nonande Eudifo laJesus lokOmhunda ola li la yandjwa meni letatavili, ola li la kwatela mo omatofwemo 21 okudja momambo ahetatu Omishangwa dOshiheberi. Eudifo olo ola li la kanghamena filufilu ‘keendjovo daKalunga.’ Natu ka taleni nghee hatu dulu okutula moilonga imwe yomoilihongomwa ihapu i na ondilo oyo tai hangwa mEudifo la denga mbada lOmona waKalunga omuholike.
‘Ka paafane tete ombili nomumwanyoko’
3. Konima eshi Jesus a li a londwela ovahongwa vaye shi na sha noilanduliko oyo hai etifwa kehandu, omayele elipi a li e va pa?
3 Tu li Ovakriste, otwa hafa notu li ovanambili molwaashi ohatu wilikwa komhepo iyapuki yaKalunga, oyo oshiimati shayo sha kwatela mo omaukwatya ngaashi ehafo nombili. (Gal. 5:22, 23) Molwaashi Jesus ka li a hala ovahongwa vaye va kanife ombili nosho yo ehafo, okwa li e va londwela shi na sha noilanduliko ya nyika oshiponga oyo hai etifwa po ngeenge omunhu okwa kala a handuka efimbo lile. (Lesha Mateus 5:21, 22.) Jesus okwa li a weda ko vali, a ti: ‘Onghee hano, ove ngenge to twala oshali shoye koaltari, ndele oko wa dimbulukila omumwanyoko nokutya, e na sha naave, fiya ko oshali shoye koaltari, u ye manga mu ka paafane ombili nomumwanyoko, ove u aluke u ka yandje oshali shoye.’ — Mat. 5:23, 24.
4, 5. (a) “Oshali” oyo Jesus a li a popya meendjovo daye odo di li muMateus 5:23, 24 otai ulike kushike? (b) Omolwashike sha fimana okupanga ombili nomumwaxo oo mwa ningafana nai naye?
4 “Oshali” oyo Jesus a popya oya li tai ulike keyambo keshe olo la li hali yambwa kotembeli muJerusalem. Pashihopaenenwa, omayambo oinamwenyo okwa li a fimana, molwaashi okwa li oshiteelelwa shelongelokalunga loshiwana shaJehova. Ndele Jesus okwa li a divilika oshinima shimwe vali osho sha fimana neenghono, okupanga ombili nomumwaxo oo mwa ningafana nai naye ofimbo ino ka yandja oshali yoye kuKalunga.
5 Outumbulilo ‘ka paafane ombili’ otau ti ‘okudiminafana po.’ Mbela oshilihongomwa shilipi hatu lihongo meendjovo odo daJesus? Ohatu lihongo mo kutya onghedi omo hatu ungaunga navamwe otai dulu lela okukuma ekwatafano letu naJehova. (1 Joh. 4:20) Onghee hano, omayambo oo a li haa yambelwa Kalunga pefimbo lonale kaa li taa ti sha ngeenge omunhu oo ta yambe eyambo ka li ha ungaunga nawa novanhu vakwao. — Lesha Mika 6:6-8.
Elininipiko oukwatya wa fimana
6, 7. Omolwashike twa pumbwa okukala twe lininipika ngeenge hatu kendabala okupanga ombili nomumwatate oo twa ningafana nai naye?
6 Okupanga ombili nomumwaxo oo mwa ningafana nai naye otaku dulu okuyeleka elininipiko loye. Ovakriste ovalininipiki ihava tu eemhata novaitaveli vakwao nelalakano lokuulika kutya ovo ve li mondjila. Osho otashi dulu okweetifa po oupyakadi, ngaashi oo wa li wa holoka mokati kOvakriste vomuKorinto shonale. Shi na sha nonghalo oyo, omuyapostoli Paulus okwa li a popya sha osho tashi ningifa omunhu a diladile moule, eshi a ti: “Oshiponga nokuli kunye eshi [mu] noihokolola mokati keni. Oshike itamu liefa mu ningwe nai ngeno shi dule? Oshike itamu liefa mu nyekwe, ngeno shi dule?” — 1 Kor. 6:7.
7 Jesus ka li a tya kutya otu na okuya kovamwatate noku ke va tomha va itavele kutya ovo ve li mepuko. Ndele elalakano letu lokuya ko kuvo olo oku ka panga ombili navo. Opo tu pange ombili naumwe, otu na okupopya oshili kutya otu udite ngahelipi. Otu na yo okudimina kutya omaliudo avamwe okwa yahamekwa. Ngeenge ofye tu na epuko, otu na okuyandja ombili nelininipiko.
‘Ngeenge eisho loye lokolulyo otali ku hongaula’
8. Hokolola pauxupi eendjovo daJesus odo di li muMateus 5:29, 30.
8 Jesus okwa li a yandja omayele opandunge e na sha noukoshoki wopaenghedi mEudifo laye lokOmhunda. Oku shii kutya oinhimbu yomalutu etu otai dulu okutula okukalamwenyo kwetu moshiponga. Onghee hano Jesus okwa ti: ‘Eisho loye lokolulyo ngenge tali ku hongaula, li kolola mo, ove u li ekeleshi: osheshi okunyona po oshinhimbu shoye shimwe kwe ku wapalela, shi dule olutu loye alishe tali ekelwa muGehenna. Neke loye lokolulyo ngenge tali ku hongaula li teta ko, ove u li ekeleshi, osheshi okunyona po oshinhimbu shoye shimwe oshipu, shi dule olutu loye alishe li ekelwe muGehenna.’ — Mat. 5:29, 30, yelekanifa NW.
9. Ongahelipi “eisho” ile ‘eke’ letu tai dulu oku tu “hongaula”?
9 “Eisho” olo la popiwa kuJesus otali faneke okudula kwetu okutala oinima hatu konenene, “neke” otali faneke osho hatu dulu okulonga nomake etu. Ngeenge inatu lungama, oinhimbu yomalutu etu oyo otai dulu oku tu “hongaula,” ndele hatu efa po ‘okweenda pamwe naKalunga.’ (Gen. 5:22; 6:9) Ngeenge hatu yelekwa tu nyone kuJehova, otu na okukatuka eenghatu da kwata moiti, okukolola mo eisho ile okuteta ko eke letu oku shi popya pafaneko.
10, 11. Oshike tashi dulu oku tu kwafela tu henuke oluhaelo?
10 Ongahelipi hatu dulu okukelela omesho etu aha tale oinima oyo inai koshoka? Omulumenhu omutilikalunga wedina Job okwa ti: “Ame nda udafana nomesho ange: ndi tale ngahelipi kokakadona?” (Job 31:1) Job okwa li omushamane a hombola nokwa li a tokola toko aha nyone eemhango daKalunga di na sha noukoshoki wopaenghedi. Nafye otu na okukala tu na oikala ya tya ngaho, kutya nee otwa hombola ile inatu hombola. Opo tu henuke oluhaelo, otu na okuwilikwa komhepo iyapuki yaKalunga oyo hai imike elipangelo mwaavo ve hole Kalunga. — Gal. 5:22-25.
11 Opo tu henuke oluhaelo, otu na okulipula kutya: ‘Mbela ohandi efa omesho ange a hokwife nge okutala oinima inai koshoka oyo hai dulu okumonika noupu ngaashi momambo, ko-TV ile ko-Internet?’ Natu dimbuluke eendjovo domuhongwa Jakob odo tadi ti: “Keshe umwe ota hongaulwa kokahalu kaye mwene, oko hake mu shili notake mu heke; nokahalu ngenge ka fimbapala, otaka dala oulunde, noulunde eshi owa wanifwa, otau dala efyo.” (Jak. 1:14, 15) Doshili, ngeenge umwe oo e liyapulila Kalunga ota “tale” nokahalu omunhu woukashike kookanhu, okwa pumbwa okuninga omalunduluko oo taa faafanifwa nokukolola mo eisho laye noku li ekelashi. — Lesha Mateus 5:27, 28.
12. Omayele elipi Paulus a yandja oo taa dulu oku tu kwafela tu kondjife omahalo inaa koshoka?
12 Ngeenge itatu longifa omake etu nawa, otaa dulu oku tu ningifa tu nyone sha kwata moiti omifikamhango daJehova di na sha noukoshoki wopaenghedi. Onghee hano, otu na okukala twa tokola toko okukala twa koshoka paenghedi. Otu na okudulika komayele omuyapostoli Paulus oo taa ti: ‘Dipaeni oinhimbu yeni yopadu, oluhaelo, onyata, olwisho loipala, okahalu kai, nolwisho leliko olo elongelo loikalunga.’ (Kol. 3:5) Outumbulilo “dipaeni” otau ulike keenghatu da kwata moiti odo tu na okukatuka opo tu kondjife omahalo inaa koshoka.
13, 14. Omolwashike sha fimanenena okuhenuka okudiladila kombinga yoinima inai koshoka nosho yo okukatuka eenghatu inadi yuka?
13 Ovanhu vahapu moipangelo ohava efa oinhimbu yavo i tetwe ko opo va xupife eemwenyo davo. Nafye otwa pumbwa ‘okweekelashi’ omesho ile omake etu, oku shi popya pafaneko, opo tu henuke okudiladila kombinga yoinima inai koshoka ile okukatuka eenghatu inadi yuka, odo tadi dulu oku tu ningifa tu kale inatu hokiwa vali kuJehova. Opo tu henuke okuya muGehenna osho tashi faneke ehanauno laalushe, otu na okukala twa koshoka pamhepo, pamadiladilo nosho yo paenghedi.
14 Molwaashi otwa fyuulula oulunde noinatu wanenena, otashi pula eenghendabala opo tu kale twa koshoka paenghedi. Paulus okwa ti: “Ohandi denge olutu lange nohandi li dulikifa, opo ndi ha ninge aame ou handi udifile vamwe, ame mwene ngeno ndi ekelweshi.” (1 Kor. 9:27) Onghee hano, natu kaleni twa tokola toko okudulika komayele aJesus e na sha noukoshoki wopaenghedi, noinatu katuka nande monghedi oyo tai ulike okuhenolupandu li na sha nekuliloyambo. — Mat. 20:28; Heb. 6:4-6.
“Yandjeni”
15, 16. (a) Jesus okwe tu tulila po oshihopaenenwa shi na sha nokuyandja shilipi? (b) Eendjovo daJesus odo di li muLukas 6:38 oda hala okutya shike?
15 Eendjovo daJesus nosho yo oshihopaenenwa shaye shiwa otai xumifa komesho omhepo yokuyandja. Jesus okwa li a ulika omhepo yokuyandja eshi a li e uya kombada yedu omolwouwa wovanhu inava wanenena. (Lesha 2 Ovakorinto 8:9.) Jesus okwa li a fiya po nehalo liwa efimano laye lomeulu nokwa ninga omunhu wokombada yedu opo a file ovanhu ovalunde, navamwe vomuvo otava ka fyuulula Ouhamba pamwe naye. (Rom. 8:16, 17) Jesus okwe tu ladipika tu kale hatu yandje nehalo liwa eshi a ti:
16 ‘Yandjeni, nanye yo otamu ka pewa, oshiyelekifo shiwa sha fendwa, sha hekeshelwa, sha hekeshelekeka, tave shi mu pe mekolo leni, osheshi oshiyelekifo eshi tamu shi yelekifa, nanye yo tamu ke shi yelekifilwa.’ (Luk. 6:38) Outumbulilo ‘okupewa mekolo’ otau ulike konghedi yonhumba yopefimbo lOmbibeli, eshi ovalandi kwa li hava mange oiya yavo nomakwamo nokuhomonona mo oikutu yavo opo va dule okuhumbatela medimo oilandomwa yavo, ovalandifi okwa li hava tula oilandomwa moikutu yovalandi. Okukala hatu yandje nehalo liwa otaku ka ningifa vamwe ve tu alulile ouwa, tashi dulika ngeenge tu na omhumbwe. — Omuud. 11:2.
17. Ongahelipi Jehova a tula po oshihopaenenwa shokuyandja, nokuyandja kwoludi lilipi taku dulu oku tu etela ehafo?
17 Jehova oku hole noha pe ondjabi ovo hava yandje nehalo liwa. Jehova okwe tu tulila po oshihopaenenwa shokuyandja, eshi a yandja Omona waye ewifa “opo keshe ou te mu itavele a ha kane, ndelenee a kale e nomwenyo waalushe.” (Joh. 3:16) Paulus okwa ti: “[Ou] ta kunu nepuniko, ota teya yo nepuniko. Keshe tuu na yandje ngaashi omutima waye tau mu lombwele, hanomunyengutima ile kefininiko, osheshi Kalunga e hole ou ta yandje nehafo.” (2 Kor. 9:6, 7) Okulongifa efimbo letu, eenghono detu nosho yo oiniwe yetu mokuxumifa komesho elongelokalunga lashili otaku tu etele ehafo nosho yo omanangeko noupuna mahapu. — Lesha Omayeletumbulo 19:17; Lukas 16:9.
“Ino tetekelifa okushika enghuma”
18. Oshike tashi dulu oku tu imba tu pewe ‘oshipewa’ kuTate yetu womeulu?
18 ‘Lungameni okutalifa ouyuki weni moipafi yovanhu mu monike kuvo; ndele ngenge tamu u talifa, kamu noshipewa kuXo yeni meulu.’ (Mat. 6:1) Eshi Jesus a popya kombinga ‘youyuki,’ okwa li ta popi shi na sha nelihumbato olo li li metwokumwe nehalo laKalunga. Jesus ka li a hala okutya oilonga oyo tai longelwa Kalunga kai na okulongwa moipafi yovanhu, molwaashi okwa li a lombwela ovahongwa vaye a ti: ‘Ouyelele weni nau minikile moipafi yovanhu.’ (Mat. 5:14-16) Ndele itatu ka pewa ‘oshipewa’ kuTate yetu womeulu ngeenge ohatu ningi oinima opo tu “monike,” notu kale twa hokiwa twa fa ovadani voinyandwa molupale loinyandwa. Ngeenge otu na oikala ya tya ngaho, itatu ka kala tu na ekwatafano lopofingo naKalunga noitatu ka mona omanangeko noupuna taa kalelele oo taa ka etwa kOuhamba.
19, 20. (a) Jesus okwa li a hala okutya shike eshi a popya kutya katu na ‘okutetekelifa okushika enghuma’ ngeenge hatu yandje “oikwafa yeehepele”? (b) Omolwashike tuhe na okweefa eke letu lokolumosho li shiive osho eke letu lokolulyo tali ningi?
19 Ngeenge otu na oikala ya yuka, ohatu ka dulika kekumaido laJesus olo tali ti: ‘Onghee hano, ngenge to yandje oikwafa yeehepele ino tetekelifa okushika enghuma ngaashi ovanaihelele hava ningi omeeshinagoga nomeendjila, opo va fimanekwe kovanhu. Oshili ohandi mu lombwele: vo ova pewa ondjabi yavo.’ (Mat. 6:2) “Oikwafa yeehepele” oya li hai yandjwa okukwafela ovo ve na omhumbwe. (Lesha Jesaja 58:6, 7.) Jesus novayapostoli vaye ova li ve na okakutu koimaliwa oyo ya li hai longifwa okukwafela eehepele. (Joh. 12:5-8; 13:29) Molwaashi okuyandja oikwafa keehepele kakwa li haku tetekelwa keshiko lenghuma, Jesus okwa li ashike a longifa enenepeko eshi a ti kutya katu na ‘okutetekelifa okushika enghuma ngeenge hatu yandje oikwafa yeehepele.’ Katu na okuyandja oikwafa nelalakano lokulimonikifa, ngaashi Ovafarisai Ovajuda va li hava ningi. Jesus okwa li e va ifana ovanaihelele molwaashi ova li hava shiivifa omayambidido avo ‘meeshinagoga nomeendjila.’ Ovanaihelele va tya ngaho ova li va “pewa ondjabi yavo.” Kava li va mona ondjabi yasha okudja kuJehova, ndele ondjabi oyo va li va mona okukala ashike va hokiwa kovanhu, nokukala omutumba tashi dulika koipundi yokomesho moshinagoga pamwe noorabbi ovo va shiivika nawa. (Mat. 23:6) Mbela ovahongwa vaKristus ova li ve na okukala ve na oikala ya tya ngahelipi? Jesus okwa li e va lombwela eendjovo odo nafye de tu kuma, a ti:
20 ‘Ndelenee ove ngenge ho yandje oikwafa yeehepele eke loye lokolumosho inali shiiva, eshi eke loye lokolulyo tali ningi, opo oikwafa yeehepele yoye i kale meholeko; naXo, ou ha mono meholeko, ote ku futu.’ (Mat. 6:3, 4) Luhapu ngeenge hatu longo sha, ohatu shi longo nomake etu aeshe. Onghee hano, outumbulilo oo kutya eke loye lokolumosho inali shiiva osho eke loye lokolulyo tali ningi owa hala okutya katu na okushiivifa omayambidido oo hatu yandje, nokuli nokwaavo tu na ekwatafano lopofingo navo ngaashi ashike eke letu lokolumosho li li neke lokolulyo.
21. Ondjabi oyo hatu pewa kuJehova oo “ha mono meholeko” oya kwatela mo shike?
21 “Oikwafa yeehepele” oyo hatu yandje otai ka kala meholeko ngeenge ihatu litade. Opo nee Tate yetu “ou ha mono meholeko” ote ke tu pa ondjabi. Tate yetu womeulu oku li “meholeko” molwaashi oku li meulu noiha monika kovanhu nomesho. (Joh. 1:18) Ondjabi oyo hatu ka pewa kuJehova oo “ha mono meholeko” oya kwatela mo okukala tu na ekwatafano lopofingo naye, okudiminwa po omatimba etu noku ka pewa omwenyo waalushe. (Omayel. 3:32; Joh. 17:3; Ef. 1:7) Omaufembanghenda aeshe oo oku dule kokule efimano olo hatu pewa kovanhu.
Eendjovo di na ondilo odo tu na okukala twa lenga
22, 23. Omolwashike twa pumbwa okukala twa lenga eendjovo daJesus?
22 Eudifo lOkomhunda oli na omamona mahapu opamhepo oo e na ondilo. Nopehe na omalimbililo, mEudifo lokOmhunda omu na eendjovo di na ongushu odo tadi dulu oku tu etela ehafo nonande otu li mounyuni ou u na omaupyakadi. Onghee hano, ohatu dulu okukala twa hafa ngeenge otwa kala twa lenga eendjovo daJesus nokweefa di nwefe mo oikala yetu nosho yo onghedi yetu yokukalamwenyo.
23 Keshe oo ta “udu” ndele ta “wanifa” po osho Jesus a li a honga, ota ka nangekwa noupuna. (Lesha Mateus 7:24, 25.) Onghee hano, natu kaleni twa tokola toko okukala metwokumwe nomayele aJesus. Ohatu ke lihonga vali dimwe domeendjovo daJesus domEudifo lokOmhunda moshitukulwa shaxuuninwa shomoitukulwa ei ya pambafana.
Oto nyamukula ngahelipi?
• Omolwashike sha fimana okupanga ombili nomumwaxo oo mwa ningafana nai naye?
• Ongahelipi hatu dulu okuhenuka okuhongaulwa ‘keisho letu lokolulyo’?
• Otu na okukala tu na oikala ya tya ngahelipi i na sha nokuyandja?
[Efano pepandja 9]
Osha fimana ‘okupaafana ombili’ nomwiitaveli mukweni oo mwa ningafana nai naye
[Omafano pepandja 11]
Jehova oha nangeke noupuna ovo hava yandje nehalo liwa