Okuvalululwa otaku eta po shike?
OMOLWASHIKE Jesus a longitha uutumbulilo ‘okuvalwa mombepo’ sho a popi kombinga yeninginitho nombepo ondjapuki? (Johannes 3:5, OB-1954) Ngele oshitya “evalo” tashi longithwa pathaneko, otashi ti “etameko.” Onkee ano, uutumbulilo “okuvalululwa” otawu ulike “etameko epe.” Kungeyi, omautumbulilo ‘okuvalwa’ nosho wo ‘okuvalululwa’ otaga tsu omuthindo kutya otapu ka kala etameko epe mekwatathano ndyoka li li pokati kaKalunga naamboka ya ninginithwa nombepo ondjapuki. Elunduluko ndyoka enene ohali ningwa ngiini?
Mokufatulula nkene Kalunga ta longekidha aantu ya ka kale aapangeli megulu, omuyapostoli Paulus okwa li a longitha ethaneko li na ko nasha naakwiilongo mboka taya mono uukwashilongo. Okwa li a nyolele Aakriste pethimbo lye kutya oya li ya mono uukwashilongo womegulu. Okwa ti: “Tse uukwashilongo wetu ou li megulu.” (Aafilippi 3:20) Opo tu mone nkene oshiholelwa shika shokumona uukwashilongo tashi tu kwathele okuuva ko kutya elunduluko lya tya ngiini hali holoka po uuna omuntu ta ninginithwa nombepo ondjapuki, natu tale ishewe kethaneko lyomukwiilongo ngoka a hala okulanda evi moshilongo kaashi shi shawo.
Elunduluko lye etwa po kokumona uukwashigwana
Methaneko ndika, omulumentu ita vulu okulanda evi molwaashoka ke shi omukwashigwana gwoshilongo shoka. Ihe natu tye esiku limwe otapu ningwa elunduluko enene. Aakwanepangelo yoshilongo shoka otaye mu pe uuthemba wokuninga omukwashigwana. Shika otashi mu etele uuwanawa washike? Molwaashoka okwa ninga omukwashigwana, ngashingeyi oku na uuthemba wa fa waakwashigwana yalwe yomoshilongo, ngaashi okulanda evi. Okumona kwe uukwashigwana okwe eta po lela elunduluko monkalamwenyo ye.
Shika osha faathana naashoka hashi ningilwa mboka taya valululwa. Tala komafaathano gamwe. Omulumentu methaneko ndika ota vulu owala okulanda evi ngele okwa gwanitha oshitegelelwa shokukala omukwashigwana. Ihe kuye mwene ita vulu oku shi gwanitha. Sha faathana, aantu yamwe otaya ka pewa ehala mUukwaniilwa waKalunga nenge mepangelo lye lyomegulu, ihe otaye li pewa owala ngele oya gwanitha oshitegelelwa shokuya mo, sha hala okutya, ngele ya ‘valululwa.’ Ihe kuyo yene itaya vulu okugwanitha oshitegelelwa shoka, molwaashoka okuvalululwa ohaku zi kuKalunga.
Oshike sha lundulula onkalo yomulumentu gwomethaneko? Okumona kwe uukwashigwana paveta. Ihe okumona kwe uukwashigwana inaku lundulula omulumentu ye mwene. Konima sho a pewa uukwashigwana, ina lunduluka, ihe ngashingeyi oku na ondondo ompe, ya fa yaavalelwamo. Okwa mono etameko epe, a fa a valululwa. Okwa ningi omukwashigwana, naashoka oshe mu pe uuthemba wokulanda evi.
Sha faathana, Jehova okwa lundulula onkalo yongundu yaantu inaaya gwanenena moku ya pitika ya ninge aakwashigwana yepangelo lye lyomegulu. Omuyapostoli Paulus ngoka e li gumwe gwomongundu ndjoka, okwa li a nyolele ooitaali ooyakwawo a ti: “Onkee ano ne aapagani, kamu shi we oondjendi nenge aakwiilongo, aawe, ngashingeyi omu na uukwashilongo umwe naantu yaKalunga nomwa ningi aanegumbo lye.” (Aaefeso 2:19) Molwaashoka oya li ya pewa uukwashilongo womegulu, Aakriste mbaka oya ningi oshitopolwa shepangelo lyaKalunga lyomegulu.
Ihe okumona uukwashilongo mboka inaku lundulula uukwatya wawo, oshoka oye li natango aantu inaaya gwanenena. (1 Johannes 1:8) Nonando ongaaka, ngaashi Paulus a tsikile nokufatulula, konima sho aantu mboka ya gwanitha iitegelelwa yokuninga aakwashigwana, oya mona ondondo ompe. Pethimbo opo tuu mpoka, ombepo yaKalunga oye ya pe einekelo kutya otaya ka kala pamwe naKristus megulu. (1 Johannes 3:2) Omolweinekelo ndyoka lyolela ya pewa kombepo ondjapuki, oye na etaloko epe kombinga yonkalamwenyo. (2 Aakorinto 1:21, 22) Eeno, oya mona etameko epe, ya fa ya valululwa.
Mokupopya kombinga yaamboka ya hogololwa kuKalunga, Ombiimbeli otayi ti: “Otaa ka ninga aayambi yaKalunga noyaKristus notaa ka pangela pamwe naKristus uule woomvula eyuvi limwe.” (Ehololo 20:6) Aahogololwa yaKalunga otaya ka pewa ondondo ye li aakwaniilwa pamwe naKristus mUukwaniilwa waKalunga nenge mepangelo lye lyomegulu. Omuyapostoli Petrus okwa lombwele ooitaali ooyakwawo kutya otaya ka mona ‘eliko itaali wapa okwoola, okuyonuka nokuhula po’ ndyoka ‘lye ya pungulilwa megulu.’ (1 Petrus 1:3, 4) Kali shi tuu eliko li na ondilo!
Ihe oshinima shika shi na ko nasha nokupangela nasho otashi pendutha epulo. Ngele mboka ya valululwa otaya ka pangela ye li aakwaniilwa megulu, mbela otaya ka pangela oolye? Epulo ndyoka otali kundathanwa moshitopolwa tashi landula ko.
[Ethano pepandja 10]
Paulus okwa ti shike kombinga yuukwashilongo womegulu?