Okuvalululwa mbela etokolo lyoye mwene?
OLYE ha tokola opo omuntu a valululwe? Aasita yamwe ngele taya kumagidha aapulakeni yawo ya valululwe, ohaya longitha oohapu dhaJesus ndhoka tadhi ti: “Omu na okuvalululwa.” (Johannes 3:7) Aasita mboka ohaya longitha oohapu ndhika ongelombwelo, ya fa taya ti: “Valululweni!” Kungawo ohayu uvitha kutya oshi li etokolo lyomwiitaali kehe a vulike kuJesus noku katuke oonkatu dha pumbiwa a valululwe. Pataloko lyawo, omuntu ota vulu okuhogolola ye mwene a valululwe. Ihe mbela etaloko ndyoka otali tsu kumwe naashoka Jesus a li a lombwele Nikodemus?
Ngele tatu lesha nuukeka oohapu dhaJesus, otu wete kutya ye ina longa aantu kutya omuntu ota vulu okuhogolola ngele okwa hala okuvalululwa nenge ina hala. Omolwashike tatu tile ngeyi? Uutumbulilo wOshigreka mboka wa tolokwa “okuvalululwa” otawu vulu wo okutolokwa “okuvalululwa okuza megulu.”a Onkee ano, patoloko ndjoka okuvalululwa okwa za “megulu,” sha hala okutya, “kuKalunga.” (Johannes 19:11; Jakob 1:17) Ohaku etwa shili kuKalunga.—1 Johannes 3:9, OB-1954.
Ngele tatu kaleke momadhiladhilo uutumbulilo “okuza megulu,” kashi shi oshidhigu okuuva ko kutya omolwashike omuntu ye mwene ita vulu okuhogolola a valululwe. Dhiladhila owala kombinga yokuvalwa kwoye. Ongoye mbela wa li wa hogolola wu valwe? Hasho nando! Owa valwa molwaashoka ho oye a ningitha wu valwe. Sha faathana, natse wo otatu vulu owala okuvalululwa ngele Tate yetu gwomegulu, Kalunga, te shi ningitha. (Johannes 1:13) Onkee ano, omuyapostoli Petrus oku li mondjila sho ta ti: ‘Kalunga He yOmuwa gwetu Jesus Kristus na simanekwe, oongoka pasilohenda lye enene okokuyumuka kuusi kwaJesus Kristus, okwe tu valululile etegameno li na omwenyo.’—1 Petrus 1:3, OB-1954.
Mbela oshi li elombwelo?
Ihe otashi vulika yamwe ya pule taya ti: ‘Ngele oshoshili kutya kapu na gumwe ngoka ta vulu okutokola kutya ota ka valululwa, omolwashike ano Jesus a gandja elombwelo ndika: “Omu na okuvalululwa”?’ Ndyoka oli li epulo ewanawa, oshoka ando oohapu dhaJesus odha li shili elombwelo, ando ote tu lombwele tu ninge sha shoka itaatu vulu oku shi ninga. Ite ke shi ninga nando. Ano oohapu “omu na okuvalululwa” odhi na okuuviwa ko ngiini?
Ngele tatu tala nawa kelaka lyopetameko moka oohapu ndhoka dha nyolwa, otatu mono kutya inadhi nyolwa molupelombwelo. Pehala lyaashono, oohapu ndhoka odhi li etseyithotumbulo. Noohapu dhilwe, sho Jesus a li a ti “omu na okuvalululwa” okwa li e ya tseyithile sha, ihe ine ya pa elombwelo. Okwa ti: “Osha pumbiwa mu valwe okuza megulu.”—Johannes 3:7, Modern Young’s Literal Translation.
Okuyelitha kutya eyooloko lini li li pokati kelombwelo netseyithotumbulo, dhiladhila keyelekanitho ndika. Dhiladhila komukwiilongo ngoka a hala okulanda evi moshilongo kaashi shi shawo. Omukwiilongo ngoka ota yi komukwanepangelo ngoka e na oshinakugwanithwa okulanditha evi e te mu lombwele ta ti: “Onda hala okulanda evi.” Omukwanepangelo ote mu lombwele: “Ngele owa hala okulanda evi, owu na okukala omukwashigwana.” Osha yela kutya omukwanepangelo ina lombwela omukwiilongo ta ti: “Owu na okukala omukwashigwana!” Pehala lyaashono, omukwanepangelo okwe mu lombwele owala oshitegelelwa shokulanda evi moshilongo. Sha faathana, sho Jesus a ti: “Omu na okuvalululwa,” okwa li ta lombwele owala aantu shoka sha pumbiwa opo ya ‘ye mUukwaniilwa waKalunga.’
Uukwaniilwa waKalunga mboka owa pambathana natango nokuvalululwa. Shika otashi etitha epulo ndika: Elalakano lyokuvalululwa oshike? Osha simana tu mone eyamukulo kepulo ndika opo tu uve ko nawa shoka okuvalululwa taku ti.
[Enyolo lyopevi]
a Omatoloko ogendji gOmbiimbeli oga toloka Johannes 3:3 ngaaka. Pashiholelwa, etoloko A Literal Translation of the Bible otali ti: “Ngele omuntu ina valululwa okuza megulu, ita vulu okumona uukwaniilwa waKalunga.”
[Ethano pepandja 6]
Efaathano lini li li pokati kokuvalululwa nokuvalwa panyama?