Okuvalululwa okwa simana shi thike peni?

MOONKUNDATHANA dhawo adhihe naNikodemus, Jesus okwa li a tsu omuthindo kutya okuvalululwa okwa simana noonkondo. Okwa li e shi yelitha ngiini?

Tala nkene Jesus a li a tsu omuthindo esimano lyokuvalululwa sho ta kundathana naNikodemus. Okwa li a ti: ‘Omuntu ngele ita valululwa, ita vulu okumona [uukwaniilwa waKalunga, KB].’ (Johannes 3:3) Iitya “ngele ita” nosho wo “ita vulu” otayi tsu omuthindo esimano lyokuvalululwa. Natu shi thaneke ngeyi: Ngele gumwe ta ti: “Ngele etango itali piti, itapu vulu okukala uuyelele,” okwa hala okutya, etango oli na okupita opo pu kale uuyelele. Momukalo gwa faathana, Jesus okwa ti kutya omuntu oku na okuvalululwa opo a mone Uukwaniilwa waKalunga.

Lwahugunina, opo Jesus a kuthe po omalimbililo agehe moshinima shika, okwa ti: ‘Omu na okuvalululwa.’ (Johannes 3:7) Paohapu ndhika dhaJesus, osha yela kutya okuvalululwa oku li oshitegelelwa opo omuntu ‘a ye’ mUukwaniilwa waKalunga.—Johannes 3:5.

Molwaashoka Jesus okwa li a tala ko okuvalululwa ku li oshinima sha simanenena, Aakriste oye na okushilipaleka kutya oye shi uvite ko nawa. Pashiholelwa, mbela oto dhiladhila kutya Omukriste ye mwene ota vulu okuhogolola a valululwe?

[Oohapu dha simana pepandja 5]

“Ngele etango itali piti, itapu vulu okukala uuyelele”