Okuvalululwa mbela oku li ondjila tayi fala kehupitho?

OTO ka yamukula ngiini ngele gumwe e ku pula: “Mbela owa valululwa?” Ando iilyo omamiliyona yomalongelokalunga oyi pulwe epulo ndika, ando otayi ka yamukula nomuthindo tayi ti: “Eeno!” Oyi itaala kutya okuvalululwa oku li endhindhiliko lyAakriste ayehe yashili noko owala ondjila tayi fala kehupitho. Etaloko lyawo otali tsu kumwe naandyoka lyaawiliki yamwe yomalongelokalunga, ngaashi omuteolohi Robert C. Sproul, ngoka a nyola a ti: “Ngele omuntu ina valululwa, . . . ke shi Omukriste.”

Mbela owu li gumwe gwomwaamboka yi itaala kutya ngele owa valululwa owu li mondjila ndjoka tayi fala kehupitho? Ngele osho, nopwaahe na omalimbililo owa hala okukwathela aakwanezimo nookuume koye ya mone ondjila ndjoka nokutameka okweenda nayo. Ihe opo ye shi ninge, oye na okuuva ko eyooloko pokati komuntu ngoka a valululwa naangoka inaa valululwa. Mbela ongiini to ke ya yelithila kutya okuvalululwa otaku ti shike?

Oyendji oyi itaala kutya uutumbulilo “okuvalululwa” otawu ulike kugumwe ngoka ta ningi euvaneko lyolela okulongela Kalunga naKristus, noshizemo ota lunduluka monkalo yokukala a sa pambepo e ta ningi omunamwenyo pambepo. Dhoshili, embwiitya limwe otali fatulula kutya omuntu ngoka a valululwa “olundji oku li Omukriste i igandja okukala omwiitaali, unene tuu konima ngele a mona oshimoniwa tashi kumitha melongelokalunga lyawo.”—Merriam-Webster’s Collegiate Dictionary—Eleventh Edition.

Oto ka kala mbela wa kumwa okuuva kutya Ombiimbeli itayi tsu kumwe nefatululo ndyoka? Owa hala mbela okutseya shoka Oohapu dhaKalunga tadhi ti lela kombinga yokuvalululwa? Otashi ku etele uuwanawa ngele to konakona oshinima shika. Omolwashike mbela? Molwaashoka oku shi uva ko nawa otaku ka guma onkalamwenyo yoye nosho wo etegameno lyoye li na ko nasha nonakuyiwa.

Ombiimbeli otayi ti shike?

Uutumbululilo “okuvalululwa” otawu adhika muJohannes 3:1-12, moka tamu hokololwa oonkundathana dha mana mo pokati kaJesus nomuwiliki gwelongelokalunga muJerusalem.a Ehokololo ndika lyOmbiimbeli olya nyolwa pakuudha moshimpungu shoka shi li pepandja lya landula ko. Otatu ku ladhipike wu li leshe nawa.

Mehokololo ndika, Jesus ota tsu omuthindo iinima oyindji yi na ko nasha ‘nokuvalululwa.’ Oonkundathana dhaJesus otadhi tu kwathele okuyamukula omapulo ngaka ga simanenena gatano:

◼ Okuvalululwa okwa simana shi thike peni?

◼ Mbela otse yene tatu vulu okutokola okuvalululwa?

◼ Elalakano lyokuvalululwa olyashike?

◼ Omuntu oha valululwa ngiini?

◼ Ohaku eta po elunduluko lyashike mekwatathano lyomuntu naKalunga?

Natu tale komapulo ngoka koolimwe noolimwe.

[Enyolo lyopevi]

[Oshimpungu/Ethano pepandja 4]

“Omu na okuvalululwa”

“Gumwe gwomaafarisayi, edhina lye Nikodemus, oshilyo shomongundu yaapangeli Aajuda, okwe ya kuJesus uusiku nokwa ti kuye: ‘Muhongi, otu shi shi, ongoye omulongi ngoka a tumwa kuKalunga, oshoka kaku na nando ogumwe ta vulu okulonga iikumithalonga mbyoka to yi longo, okuninga Kalunga e li pamwe naye.’ Jesus okwe mu yamukula nokwa ti: ‘Ngame otandi ku lombwele oshili: Omuntu ngele ita valululwa, ita vulu okumona [uukwaniilwa waKalunga].’ Nikodemus okwa ti kuye: ‘Omuntu ngele omukuluntu, ota vulu ngiini okuvalwa ishewe? Ita vulu ndishi okushuna moshivalelo shayina, a valwe olutiyali?’ Jesus okwe mu yamukula: ‘Ngame otandi ku lombwele oshili: Kape na omuntu ta vulu okuya [muukwaniilwa waKalunga], ngele ina [valwa] momeya nomOmbepo. Shoka sha valwa panyama, osho onyama, naashoka sha valwa pambepo, osho Ombepo. Ino kumwa, sho nde ku lombwele kutya omu na okuvalululwa. Ano ombepo ohayi pepe shaa mpoka ya hala. Oto uvu oshihomo shayo, ihe ku shi mpoka tayi zi naankoka yu uka. Osho naanaa shi li kukehe ngoka a valwa pambepo.’ Nikodemus okwe mu pula a ti: ‘Shika otashi vulika ngiini?’ Jesus okwa yamukula a ti: ‘Ongoye omulongi gwAaisraeli, ihe nani shika ku shi shi? Otandi ku lombwele oshili. Tse otatu popi shoka tu shi shi notatu hokolola shoka twe shi mona, ihe ne inamu hala okutaamba ehokololo lyetu. Ngele tandi mú lombwele iinima yokombanda yevi, ihe itamu itaale, otamu vulu ngiini okwiitaala, ngele tandi mú hokololele iinima yomegulu?’”—Johannes 3:1-12, yelekanitha KB.