2 Mona ontseyo yashili kombinga yaKalunga
“Mboka ye ku tseye, Kalunga awike kashili, noya tseye wo Jesus Kristus, ngoka we mu tumu, oyo mboka ye na omwenyo gwaaluhe.”—Johannes 17:3.
OPU NA ESHONGO LINI? Aantu yamwe ohaya ti kutya kaku na Kalunga. Yalwe ohaya ti kutya Kalunga ke shi omuntu, ihe oku li owala oonkondo oonenenene. Yamwe mboka yi itaala kutya oko e li otaya longo omalongo taga kondjithathana kombinga yomaukwatya ngoka e na.
ONGIINI TO VULU OKUSINDA ESHONGO NDIKA? Omukalo gumwe gwokumona ontseyo kombinga yaKalunga okutala kiinima mbyoka a shita. Omuyapostoli Paulus okwa ti: “Okuza Kalunga sho a shiti uuyuni, nando oye iha monika, okwa holola puuyelele oonkondo dhe dhaaluhe nuukalunga we. Aantu otaa vulu okukoneka Kalunga miinima mbyoka e yi shiti.” (Aaroma 1:20) Ano sho to konakona nuukeka eshito, oto vulu okwiilonga oshindji kombinga yuunongo nosho wo oonkondo dhOmushiti gwetu.—Episalomi 104:24; Jesaja 40:26.
Onkee ano, opo kehe gumwe a mone ontseyo kutya Kalunga omuntu e li ngiini, okwa pumbwa okulesha Oohapu dhaKalunga noku dhi konakona paumwene. Ino pitika omadhiladhilo goye ga nwethwe mo kuyalwe. Pehala lyaashoka, landula omayele gOmbiimbeli ngoka taga ti: “Inamu faathana nonkalo yuuyuni mbuka, aawe, Kalunga ne mú shitulule meni lyeni nomomadhiladhilo geni. Nena otamu vulu ihe okutseya ehalo lyaKalunga naashoka oshiwanawa, she mu opalela nosha gwana.” (Aaroma 12:2) Pashiholelwa, tala ooshili tadhi landula ndhoka Ombiimbeli ya holola kombinga yaKalunga.
Kalunga oku na edhina. Edhina lyaKalunga otali holoka lwiikando omayovi momanyolo gopetameko gOmbiimbeli. MOmbiimbeli yOshindonga yo-1954 oli li muEksodus 15:3 ndyoka tayi ti: “Jehova ofule; edhina lye Jehova.”
Molwaashoka Jehova Kalunga oku na omaiyuvo, ohu uvu nayi ngele aantu taya longo shoka sha puka. Aaisraeli oya li ya dhini omayele ge omawanawa konima sho Jehova e ya mangulula muupika waEgipiti. Uunashipotha wawo owa li we mu “nikitha oluhodhi.” Iilonga yawo “oya geyitha Kalunga kaIsraeli omuyapuki.”—Episalomi 78:40, 41.
Jehova ohe tu sile oshimpwiyu pauhandimwe. Jesus okwa popi naalongwa ye a ti: “Omanza gaali itaga landithwa po nani nando okapeni kamwe akeke? Nokuli kapu na nando olimwe lyomugo tali gwile [pevi], Ho ngele ina hala. Nomafufu geni agehe gokomutse oga yalulwa. Ano inamu tila: one mu vule omanza ogendji.”—Mateus 10:29-31.
Kalunga ina lenga omuhoko gulwe nenge eputuko lyontumba. Omuyapostoli Paulus okwa lombwele Aagreka muAtena kutya Kalunga “okwa kutha omihoko adhihe dhaantu momulumentu gumwe nokwe ya tula kombanda yevi alihe.” Okwa ti ishewe kutya Kalunga “ke li kokule nomuntu nando ogumwe.” (Iilonga 17:26, 27) Omuyapostoli Petrus okwa ti: “Kalunga aantu ayehe ohe ya tala ye thike pamwe. Ngoka he mu tila noha longo shoka shu uka, Kalunga ote mu taamba, na kale ogwomoshigwana sha tya ngiini.”—Iilonga 10:34, 35.
OTATU KA MONA ONDJAMBI YASHIKE? Aantu yamwe oye na “ehwamo lyokulongela Kalunga, nonando kaye na uunongo oku shi ninga lela.” (Aaroma 10:2) Ihe ngele owu shi lela shoka Ombiimbeli tayi longo kombinga yaKalunga, oto ka henuka okupukithwa noto ka vula ‘okuhedha kuKalunga.’—Jakob 4:8.
Ngele owa hala okumona uuyelele wa gwedhwa po, tala ontopolwa 1, “Oshili kombinga yaKalunga oyini?” membo Omalongo gashili gOmbiimbeli ogeni naanaa?a
[Enyolo lyopevi]
a Lya nyanyangidhwa kOonzapo dhaJehova.
[Ethano pepandja 6]
Omukalo gumwe gwokumona ontseyo kombinga yaKalunga ogwo okutala kiinima mbyoka a shita