Ovanyasha, ningeni exumokomesho li wetike
“Aishe ei i diinina, ove u kale muyo, opo okweehena kwoye komesho ku monike kuaveshe.” — 1 TIM. 4:15.
1. Kalunga okwa hala ovanyasha va kale ve udite ngahelipi?
OHAMBA inaendunge Salomo yaIsrael shonale oya ti: “Omunyasha ove, kala wa nyakukwa nounyasha woye, nomutima woye nau ku hafife momafiku omounyasha woye.” (Omuud. 11:9) Nopehe na omalimbililo, Jehova Kalunga okwa hala ovanyasha va kale va hafa, molwaashi oye Odjo yeendjovo odo. Kakele kaasho, Jehova okwa hala ehafo loye li kalelele fiyo osheshi wa pita mo mefimbo lounyasha. Ndelenee ovanyasha luhapu ohava ningi omapuko oo taa dulu okunyona po ehafo lavo lomonakwiiwa. Nokuli nomulumenhu Job oo a li omudiinini okwa li a nyika oluhodi ‘omolwoilonga yaye ii yomounyasha.’ (Job 13:26) Ovanyasha Ovakriste luhapu ohava ningi omatokolo a kwata moiti, unene tuu pefimbo lokamukonda pweyu nosho yo ngeenge tava kulu. Okuninga omatokolo ehe li pandunge ohaku yahameke neenghono ovanyasha pamaliudo nohaku eta omaupyakadi oo tashi dulika a kume onghalamwenyo yavo aishe. — Omuud. 11:10.
2. Ovanyasha otava ka dula okuhenuka okuninga omapuko a kwata moiti elipi ngeenge ova dulika komayele Ombibeli?
2 Ovanyasha ova pumbwa okukala ve na eendunge dokuyoolola. Diladila kombinga yomayele oo omuyapostoli Paulus a li a pa Ovakorinto, eshi a ti: “Inamu kala ounona meendunge, . . . ndelenee kaleni [ovakulunhu, OB-1986] meendunge.” (1 Kor. 14:20) Ngeenge ovanyasha ova dulika komayele oo kutya nava kale ve na eendunge nonokutya nava kale hava tomhafana ngaashi ovakulunhu, otashi ke va kwafela va henuke okuninga omapuko a kwata moiti.
3. Oshike to dulu okuninga opo u ninge omukulunhu meendunge?
3 Ngeenge ou li omunyasha natango, dimbuluka kutya ohashi pula eenghendabala opo omunhu a ninge omukulunhu meendunge. Paulus okwa li a ladipika Timoteus a ti: ‘Inapa kala nande umwe ta dini ounyasha woye. Ndele kala omuhopaelelwa wovaitaveli meendjovo nomokweenda, mohole, momhepo, meitavelo nomoukoshoki. Diinina oku va leshela noku va kumaida noku va longa. Aishe ei i diinina, ove u kale muyo, opo okweehena komesho kwoye ku monike kuaveshe.’ (1 Tim. 4:12-15) Ovanyasha Ovakriste ova pumbwa okuninga exumokomesho, nokweehena komesho kwavo oku na okumonika kuvamwe.
Okuninga exumokomesho osha hala okutya shike?
4. Okuninga exumokomesho lopamhepo okwa kwatela mo shike?
4 Exumokomesho ile tu tye okweehena komesho otashi ti “okuninga omalunduluko oo taa eta ouwa.” Paulus okwa li a ladipika Timoteus a ninge eenghendabala opo a ninge exumokomesho monghedi yaye yokupopya, melihumbato, mohole, meitavelo, moukoshoki nosho yo monghedi omo ha wanifa po oukalele waye. Okwa li e na okuninga eenghendabala opo onghedi yaye yokukalamwenyo i kale i shii okuhopaenenwa. Onghee hano, Timoteus okwa li a pumbwa okutwikila okuninga exumokomesho lopamhepo.
5, 6. (a) Timoteus okwa li a hovela okuninga exumokomesho li liwetikile fimbo a li e fike peni? (b) Ongahelipi ovanyasha tava dulu okuhopaenena Timoteus kunena shi na sha nokuninga exumokomesho?
5 Eshi Paulus a li a shangela Timoteus e mu pe omayele pokati ko 61 O.P. no 64 O.P., Timoteus okwa hangwa nale e li omukulunhuongalo a pyokoka. Ka li a hangwa opo a hovele okuninga exumokomesho lopamhepo. Mo 49 O.P. ile 50 O.P., eshi Timoteus tashi dulika a li e na omido omulongo nasha ile 20 lwaapo, “okwa li a popiwa nawa kovamwatate ovo va kala muListra nomuIkonio” molwaashi ova li va didilika exumokomesho lopamhepo olo a li a ninga. (Oil. 16:1-5) Paulus okwa li a kufa Timoteus ndele ta i pamwe naye molweendo laye loutumwa, pefimbo opo a li a popilwa kovamwatate. Konima yeemwedi donhumba okudja eshi Paulus a li a didilika kutya Timoteus okwa li natango a ninga exumokomesho, Paulus okwa li e mu tuma a ye kuTessalonika opo a ka hekeleke nokupameka Ovakriste moshilando osho. (Lesha 1 Ovatessaloniki 3:1-3, 6.) Nopehe na omalimbililo, Timoteus okwa li a hovela okuninga exumokomesho li liwetikile fimbo a li omunyasha.
6 Ovanyasha ava mu li meongalo omu na okukendabala okukulika omaukwatya opaKriste paife opo onghedi yeni yokuhonga oshili yOmbibeli nosho yo onghedi yokukalamwenyo kweni i ulike filufilu kutya otamu ningi exumokomesho lopamhepo. Jesus okwa li a “kula mounongo” okudja eshi a li e na omido 12. (Luk. 2:52) Paife natu ka konakoneni eenghedi nhatu omo ovanyasha tava dulu okuulika kutya ova ninga exumokomesho monghalamwenyo: (1) Ngeenge tava ungaunga nomaupyakadi, (2) ngeenge tave lilongekidile okuya mohombo, nosho yo (3) eshi tava kendabala okuninga ‘ovakalele va pyokoka.’ — 1 Tim. 4:6, yelekanifa NW.
Ungaunga nomaupyakadi u na “omadiladilo mawa”
7. Omaupyakadi ohaa kumu ngahelipi ovanyasha?
7 Omukriste umwe womido 17 wedina Carol, okwa ti: “Omafimbo amwe ohandi kala nda loloka palutu, pamaliudo nosho yo pamadiladilo, noihandi kala nokuli nda hala okupenduka ongula.”a Mbela oshike sha li sha etela omumwameme oo eloloko? Fimbo Carol a li e na omido omulongo, oukwaneumbo wavo owa li wa tukauka molwaashi ovadali vaye ova li va teya ohombo. Okudja opo, Carol okwa li a ya naina oo a li iha kala vali metwokumwe nomifikamhango dOmbibeli dopaenghedi. Ngaashi Carol, naave otashi dulika wa taalela eenghalo donhumba didjuu odo ito dulu lela okulundulula.
8. Timoteus okwa li a kondja nomaupyakadi elipi?
8 Nonande Timoteus okwa li ta kondjo nomaupyakadi, okwa li yo a ninga exumokomesho lopamhepo pefimbo opo tuu opo. Pashihopaenenwa, Timoteus okwa li ha kwatwa ‘koudu wendjadja efiku nefiku.’ (1 Tim. 5:23) Eshi pa li oohandimwe vamwe ovo va li va dina eenghonopangelo dovayapostoli, Paulus okwa li a tuma Timoteus oye a ka ungaunge noupyakadi oo. Paulus okwa li a ladipika eongalo li longele kumwe naTimoteus opo a kale “e he netilo” eshi e li mokati kavo. (1 Kor. 4:17; 16:10, 11) Oshi na oupu Timoteus a li e na eehoni ile mumbada.
9. Okukala nomadiladilo mawa osha hala okutya shike, neyooloko lilipi li li pokati komadiladilo mawa nomhepo youmbada?
9 Lwanima Paulus okwa li a kwafela Timoteus, eshi a li e mu dimbulukifa a ti: “Kalunga ine tu pa omhepo youmbada, ndelenee oyeenghono noyohole [nomadiladilo mawa, NW].” (2 Tim. 1:7) Okukala “nomadiladilo mawa” osha kwatela mo okudula okudiladila nosho yo okutomhafana pandunge. Osha kwatela mo yo okukala ho tale ko oinima i li ngaashi i li, ndele hangaashi wa hala i kale. Ovanyasha vamwe ovo inava kula pamhepo ohava kwatwa koumbada nohava kendabala va henuke okudiladila kombinga yeenghalo didjuu. Ohava kofa ile va tale o-TV sha pitilila, ohava longifa oingangamwifi ile va nwe oikunwa yoalkoholi sha pitilila, ohava kala ve litula mouvilo ile va ye moluhaelo. Ndele tu li Ovakriste, otwa kumaidwa tu “efe okudina Kalunga nouhalu wopaunyuni, fye tu kale tu [na omadiladilo mawa, NW] nouyuki nokuhola Kalunga fimbo tu li mounyuni ou wopaife.” — Tit. 2:12.
10, 11. Ongahelipi omadiladilo mawa taa dulu oku tu kwafela tu kale twa pama pamhepo?
10 Ombibeli otai kumaida ‘ovalumenhu ovanyasha va kale ve na omadiladilo mawa.’ (Tit. 2:6, yelekanifa NW.) Okudulika komayele oo osha hala kutya oto ka ilikana kuKalunga ngeenge wa taalela oupyakadi nokukala we lineekela kutya ote ku pe eenghono. (Lesha 1 Petrus 4:7.) Kungaho, oto ka kala u na elineekelo ‘meenghono odo to pewa kuKalunga.’ — 1 Pet. 4:11.
11 Carol okwa li a kwafelwa kokukala e na omadiladilo mawa nosho yo keilikano. Okwa ti: “Oshinima shimwe shidjuu neenghono osho nda li ndi na okuungaunga nasho osho onghedi yameme yokukalamwenyo inai koshoka. Ndele eilikano ola li la kwafela nge shili. Ondi shii kutya Jehova oku li pamwe naame, onghee hano, kandi na oumbada washa.” Dimbuluka kutya ovanhu ohava dulu okuxwepopala ngeenge va piti momaupyakadi nohava kala va pama. (Eps. 105:17-19; Omaimb.kemo. 3:27) Kalunga ke na efiku e ku efe, kashi na nee mbudi kutya owa taalela oupyakadi woludi lilipi. Ote ke “ku kwafa” shili. — Jes. 41:10.
Lilongekida opo u ka kale nohombo tai pondola
12. Omolwashike Omukriste oo a hala okuhombola ile okuhombolwa e na okutula moilonga efinamhango olo tali hangwa mOmayeletumbulo 20:25?
12 Ovanyasha vamwe vomido dopokati ohava lotokele mohombo, molwaashi ova itavela kutya omaupyakadi avo ngaashi okukala inava hafa, oudja nosho yo omaupyakadi oo hava shakeneke meumbo otaa ka xula po. Ndelenee eano lohombo oli li oshinima sha kwata moiti. Ovanhu vamwe vopefimbo lOmbibeli ova li hava ningi eano inava diladila nawa kwaashishe osho sha kwatelwa mo. (Lesha Omayeletumbulo 20:25.) Omafimbo amwe, ovanyasha ihava diladila va mana mo koiteelelwa oyo ve na oku ka wanifa po mohombo. Lwanima, ohava ka mona kutya mboli ope na shihapu sha kwatelwa mo shi dulife pwaasho va li va teelela.
13. Omapulo elipi ovo tava diladila okweendelafana ve na okulipula, nopeni tava dulu okuhanga omayele oo taa dulu oku va kwafela?
13 Fimbo ino hovela okweendelafana nomunhu wonhumba, lipula kutya: ‘Omolwashike nda hala okuhombola ile okuhombolwa? Oshike ndi na okukala nda teelela oku ka shakeneka? Mbela omunhu ou okwa wapalela nge ngoo shili? Onde lilongekida tuu oku ka wanifa po oiteelelwa yange ngeenge onda hombola ile onda hombolwa?’ “Omupiya omudiinini nomunaendunge” okwa nyanyangida oitukulwa tai popi kombinga yohombo oyo tai dulu oku ku kwafela u likonakone nawa.b (Mat. 24:45-47) Omayele a tya ngaho a tala ko kutya okwa dja kuJehova. Konakona nawa osho sha popiwa mo noku shi tula moilonga. Ino efa nandenande u kale wa “fa eenghambe noufino, ava ve he na eendunge.” (Eps. 32:8, 9) Kala u na eudeko la wana li na sha noiteelelwa oyo u na oku ka wanifa po mohombo. Ngeenge ou udite kutya owe lilongekidila okweendelafana nomunhu wonhumba, dimbuluka alushe okutula po ‘oshihopaenenwa shoukoshoki.’ — 1 Tim. 4:12.
14. Ongahelipi oukulunhu wopamhepo tau dulu okukala ekwafo ngeenge wa hombola ile wa hombolwa?
14 Oukulunhu wopamhepo nao ohau kwafele ovanhu va pondole konima ngeenge va hombola. Omukriste oo e na oupamhepo muwa oha ningi natango eenghendabala opo a fike “kewano louyadi waKristus.” (Ef. 4:11-14) Oha longo noudiinini opo a kulike omaukwatya a fa aKristus. E li Omuhopaelelwa wetu, ‘Kristus ine liwapalela ye mwene.’ (Rom. 15:3) Ovalihomboli otava ka kala ve na ombili, nohombo yavo otai ka kala ya amenwa ngeenge keshe umwe ita kongo ouwa waye. (1 Kor. 10:24) Omushamane oku na okukala ha ulike ohole yokuhelihola mwene, ofimbo omukulukadi e na okukala a tokola toko okudulika komushamane waye ngaashi ashike Jesus ha dulika kOmutwe waye. — 1 Kor. 11:3; Ef. 5:25.
“Wanifa po filufilu oukalele woye”
15, 16. Ongahelipi exumokomesho loye tali dulu okulimonikila moukalele?
15 Paulus okwa li a popya ta divilike efimano loshinakuwanifwa shaTimoteus, a ti: ‘Ohandi ku anifa koshipala shaKalunga noshOmwene Kristus Jesus, udifa ondjovo; longa oshilonga shomuudifi wevangeli, wanifa po filufilu oukalele woye.’ (2 Tim. 4:1, 2, 5, yelekanifa NW.) Timoteus okwa li e na okukala he “lipalula neendjovo deitavelo” opo a dule okuwanifa po oshinakuwanifwa osho. — Lesha 1 Timoteus 4:6.
16 Ongahelipi to dulu ‘okulipalula neendjovo deitavelo’? Paulus okwa ti: “Diinina oku va leshela noku va kumaida noku va longa. Aishe ei i [dilonga, NW], ove u kale muyo.” (1 Tim. 4:13, 15) Omunhu okwa pumbwa okukala ha konakona paumwene Eendjovo daKalunga noukeka opo a dule okuninga exumokomesho. Outumbulilo “kala muyo,” otau yandje ediladilo lokulonga oshilonga nelitulemo. Mbela onghedindjikilile yoye yokukonakona Ombibeli oya tya ngahelipi? Mbela oho konakona nelitulemo “oinima yomoule yaKalunga”? (1 Kor. 2:10, NW) Ile oho ningi ashike shimha to ningi? Okudilonga kwaasho to lihongo otaku ke linyengifa omutima woye. — Lesha Omayeletumbulo 2:1-5.
17, 18. (a) Ovanyasha ova pumbwa okukulika ounghulungu ulipi? (b) Ongahelipi okukulika oikala ya fa yaTimoteus tashi ke ku kwafela moukalele?
17 Omukokolindjila umwe omunyasha wedina Michelle, okwa ti: “Osho sha li sha kwafela nge ndi pondole moukalele, osho okukala nde litulila po elandulafano lokukonakona Ombibeli nosho yo okukala pokwoongala nopehe na okufaula. Oshidjemo, ohandi ningi alushe exumokomesho lopamhepo.” Okukala u li omukokolindjila otashi ke ku kwafela neenghono u xwepopaleke onghedi yoye yokulongifa Ombibeli moukalele noto ka ninga exumokomesho lopamhepo. Kendabala u kale omuleshi muwa nokukala ho yandje omatyekosha taa tungu pokwoongala kwopaKriste. U li omunyasha a kula pamhepo, kala ho yandje oipopiwa tai hongo mOfikola yOukalele woPauteokratika nokulongifa ouyelele oo wa pewa.
18 ‘Okulonga oshilonga shomuudifi wevangeli’ otashi ti okupondola moukalele nokukwafela vamwe va ka xupifwe. Osho otashi pula u kulike ‘ounghulungu wokuhonga.’ (2 Tim. 4:2, NW) Ngaashi ashike Timoteus a li e lihonga kuPaulus, naave oto ka dula okulihonga eenghedi dokuhonga kwaavo va pyokoka moukalele ngeenge owa kala ho ningi elongekido u ka longe pamwe navo moukalele. (1 Kor. 4:17) Paulus okwa li a popya ta ulike kovanhu ovo a li a kwafela a ti kutya ka li ashike e va udifila onghundana iwa ndele okwa li yo e va yandjela ‘omwenyo waye,’ sha hala kutya, okwa li a longifa onghalamwenyo yaye opo e va kwafele, molwaashi ova li va ninga ovaholike vaye. (1 Tes. 2:8) Opo u landule oshihopaenenwa shaPaulus shi na sha noukalele, ou na okukulika oikala ya fa yaTimoteus, oo a li shili ha file vamwe oshisho nokwa li ha ‘yakula evangeli.’ (Lesha Ovafilippi 2:19-23.) Mbela naave oho ulike omhepo yokuhelihola mwene ya tya ngaho moukalele?
Exumokomesho ohali etele omunhu ehafo lashili
19, 20. Omolwashike okuninga exumokomesho lopamhepo hashi eta ehafo?
19 Ohashi pula eenghendabala okuninga exumokomesho lopamhepo. Ndele ngeenge owa kulike nelidiiniko ounghulungu woye wokuhonga, oto ka kala u na oufembanghenda ‘wokupunapalifa vahapu’ pamhepo notava ka ninga ‘ehafo noshishani shelitango’ loye. (2 Kor. 6:10; 1 Tes. 2:19) Fred oo e li omukalele wefimbo li yadi, okwa ti: “Paife ohandi longifa efimbo lange mokukwafela vamwe shi dulife nale. Oshoshili kutya okuyandja ohaku eta ehafo linene shi dulife okutambula.”
20 Omukokolindjila umwe omunyasha wedina Daphne okwa hokolola shi na sha nehafo nosho yo embilipalelo olo a mona mokulalakanena oukulunhu wopamhepo, a ti: “Onde lihonga shihapu kombinga yaJehova, nonda kulika ekwatafano lopofingo naye. Oho kala u na eliudo liwa nowa wanenwa ngeenge to ningi ngaashi to dulu opo u hafife Jehova.” Nonande haalushe ovanhu hava mono exumokomesho lopamhepo olo omunhu a ninga, Jehova oha didilike alushe exumokomesho la tya ngaho nokwe li lenga. (Heb. 4:13) Nopehe na omalimbililo, ovanyasha Ovakriste otamu dulu okufimanekifa nokutumbalekifa Tate yetu womeulu. Twikileni okuhafifa omutima waye mokuninga exumokomesho lopamhepo li wetike. — Omayel. 27:11.
[Omashangelo opedu]
a Omadina oo hao ovanhu ovo lelalela.
b Tala moishangomwa ei, Questions Young People Ask — Answers That Work, embo 2, koshi yoshipalanyole: “Mbela omunhu ou okwa wapalela nge ngoo shili?”; Oshungonangelo ye 1 Juni 2001, koshi yoshipalanyole: “Ewiliko laKalunga mokukonga kaume komohombo” nosho yo mo-Awake! 22 Septemba 1983, koshi yoshipalanyole: “Mbela oshi li ngoo pandunge okuya mohombo fimbo u na omido omulongo nasha?”
Owe lihonga shike?
• Oshike sha kwatelwa mokuninga exumokomesho lopamhepo?
• Ongahelipi exumokomesho loye tali dulu okumonika
• ngeenge wa taalela oupyakadi?
• ngeenge to lilongekidile okuya mohombo?
• ngeenge u li moukalele?
[Efano pepandja 18]
Eilikano otali dulu oku ku kwafela u lididimikile omaupyakadi
[Efano pepandja 20]
Ongahelipi ovaudifi ovanyasha tava dulu okuxwepopaleka onghedi yavo yokuhonga?