Okuhuma kwoye komeho naku monike kwaayehe
“Iinima mbika yi ninga ano, ngoye wi itule mo muyo, opo okuhuma kwoye komeho ku monike kwaayehe.”—1 TIM. 4:15.
1, 2. Hokolola onkalamwenyo yaTimoteus yopetameko nomalunduluko ngoka a ningi sho a li e na omimvo 20 lwaampono?
TIMOTEUS okwa putukile muGalatia, oshitopolwa shi li muRoma shoka hashi ithanwa Turiki ngashingeyi. Moshitopolwa moka omwa li mwa totwa omagongalo gopaKriste konima yoomvula omulongo sho Jesus a si. Momukokomoko gwethimbo, omugundjuka Timoteus, yina nayinakulu oya ningi Aakriste noya kala taya longo nuudhiginini megongalo moka ya li. (2 Tim. 1:5; 3:14, 15) Timoteus okwa li a tyapula onkalamwenyo yuugundjuka we e li Omukriste mpoka a putukila. Ihe ombadhilila onkalamwenyo ye oya lunduluka.
2 Elunduluko ndyoka olya li lya tameke metalelopo etiyali lyomuyapostoli Paulus. Pethimbo ndyoka Timoteus okwa li e na omimvo 20 lwaampono. Pethimbo lyetalelopo lyaPaulus muListra, okwa ndhindhilike kutya ‘ooitaali oya li taa popile Timoteus muuwanawa’ megongalo. (Iil. 16:2) Omugundjuka Timoteus okwa li tu ulike a koka, nonando okwa li e na oomvula oonshona. Onkee ano, kohi yewiliko lyombepo ondjapuki, Paulus nolutu lwaakuluntugongalo oya tenteke Timoteus iikaha noye mu pe oshilonga shi ikalekelwa megongalo.—1 Tim. 4:14; 2 Tim. 1:6.
3. Timoteus okwa li a pewa uuthembahenda wi ikalekelwa wuni?
3 Timoteus ka li tuu a pewa uuthembahenda wi ikalekelwa sho a ningi omweendi pamwe naPaulus! (Iil. 16:3) Dhiladhila owala nkene Timoteus a li a kumwa nokenyanyu ndyoka a li e na. Omimvo ndhoka dha landula ko, Timoteus okwa li e ende pamwe naPaulus nosho wo nayalwe, ta longo oshilonga shoka a pewa kaayapostoli nokaakuluntugongalo. Paulus naTimoteus oya li ya longo iilonga yuutumwa mbyoka tayi humitha komeho uupambepo waamwatate. (Lesha Iilonga 16:4, 5.) Timoteus okwa li a tseyika nawa kAakriste oyendji omolwehumokomeho lye lyopambepo. Konima yomimvo omulongo sho a longo pamwe naTimoteus, Paulus okwa nyolele Aafilippi a ti: “Timoteus oye awike he mú dhiladhila ngaashi ngame noku na oshimpwiyu nane. . . . Ihe uudhiginini we omu u shi, nkene twa kala tatu longo pamwe naye moshilonga shevaangeli ngashika he nomwana.”—Fil. 2:20-22.
4. (a) Timoteus okwa li i inekelelwa oshinakugwanithwa oshinene shini? (b) Omapulo geni tatu vulu okwiipula kombinga yoohapu dhaPaulus ndhoka dhi li muTimoteus gwotango 4:15?
4 Pethimbo ndyoka Paulus a nyolele Aafilippi okwa li i inekelela Timoteus oshinakugwanithwa oshinene shokulangeka po aakuluntugongalo naayakuligongalo. (1 Tim. 3:1; 5:22) Osha yela kutya Timoteus okwa li omukuluntugongalo e shi okwiinekelwa. Natango, montumwafo oyo tuu ndjoka Paulus okwa kumagidha Timoteus a ‘ninge ehumokomeho li iwetikile kwaayehe.’ (1 Tim. 4:15) Mbela Timoteus ka li a ninga nale ehumokomeho e vulithe aantu oyendji? Mbela Paulus okwa li a hala okutya shike moohapu ndhika, nongiini tatu vulu okumona uuwanawa momayele ge?
Nkene ehumokomeho lyopambepo tali vulu okumonika kwaayehe
5, 6. Ongiini uupambepo wegongalo lyaEfeso wa li moshiponga, nongiini Timoteus a li e li gamene?
5 Natu konakoneni oshikalimo shaTimoteus gwotango 4:15. (Lesha 1 Timoteus 4:11-16.) Paulus okwa nyola oohapu ndhoka konima sho a zi kuMakedonia, ihe okwa li a pula Timoteus a kale muEfeso. Omolwashike mbela? Yamwe yomoshilando shoka oya li ye eta etopoko megongalo mokulonga omalongo giifundja. Timoteus okwa li e na okugamena egongalo li kale lya yela pambepo. Ongiini a li te ke shi ninga? Omukalo gumwe, omokutulila po yalwe oshiholelwa oshiwanawa.
6 Paulus okwa nyolele Timoteus a ti: “Kala omuholelwa kooitaali moohapu, momikalo, mohole, meitaalo nomuuyogoki.” Okwa gwedha ko a ti: “Iinima mbika yi ninga ano, ngoye wi itule mo muyo, opo okuhuma kwoye komeho ku monike kwaayehe.” (1 Tim. 4:12, 15) Ehumokomeho ndika olya li li na ko nasha nuupambepo waTimoteus, ihe hanondondo yoonkondopangelo dhe. Omukriste kehe okwa pumbwa okuninga ehumokomeho lya tya ngaaka.
7. Ayehe megongalo oya tegelelwa ya ninge shike?
7 Ngaashi owala sha li pethimbo lyaTimoteus, nokunena megongalo omu na iinakugwanithwa ya yoolokathana. Yamwe ohaya longo ye li aakuluntugongalo nayamwe aayakuligongalo. Yalwe oye li aakokolindjila. Natango, yalwe oye li aayendi, yamwe oye li miilonga yaBetel nayamwe oye li aatumwa. Aakuluntugongalo ohaya kutha ombinga moopolohalama dhi ili nodhi ili dhokulonga, ngaashi piigongi yoshikandjo noyoshitopolwa. Onkee ano, Aakriste ayehe, aalumentu naakiintu nosho wo aagundjuka otaya vulu okuninga ehumokomeho lyopambepo li iwetikile. (Mat. 5:16) Ngaashi owala Timoteus, nokuli nAakriste mboka ye na oondondo dhiinakugwanithwa dhi ikalekelwa nayo oya tegelelwa ya ninge ehumokomeho lyopambepo ndyoka lyi iwetikile kwaayehe.
Kala omuholelwa mokupopya
8. Ongiini okupopya kwetu haku nwetha mo elongelokalunga lyetu?
8 Oshinima shimwe moka Timoteus a li e na okutula po oshiholelwa, omokupopya kwe. Ongiini tatu vulu okuninga ehumokomeho lyetu li kale lyi iwetikile kwaayehe moshinima shika? Okupopya kwetu ohaku holola kutya tse aantu ya tya ngiini. Jesus okwe shi popi u ukilila a ti: “Shoka shu udhilila momutima, osho shoka okana take shi popi.” (Mat. 12:34) Jakob omumwahe gwaJesus, okwa li wo a mono kutya okupopya kwetu otaku vulu okunwetha mo elongelokalunga lyetu, sho a nyola a ti: “Ngele oku na ngoka ta dhiladhila kutya ota longele Kalunga, ndele ita pangele okupopya kwe, nena elongelokalunga lye itali tompola sha, oti ifundjaleke owala.”—Jak. 1:26.
9. Omolwashike tu na okukala tu shi okuholelwa ngele tashi ya pokupopya?
9 Okupopya kwetu otaku vulu okuhololela yalwe megongalo mpoka pu thike ehumokomeho lyetu lyopambepo. Onkee ano, pehala lyokukutha ombinga mokupopya kwa kaka, itaku tungu, okutamanana nenge taku ehameke, Aakriste ya pyokoka ohaya kambadhala okutungathana, okuhekelekathana nokuladhipikathana. (Omayel. 12:18; Ef. 4:29; 1 Tim. 6:3-5, 20) Ngele otwi ilongekidha aluhe okupopila omithikampango dhaKalunga nokukala metsokumwe nadho, otashi holola etilokalunga lyetu. (Rom. 1:15, 16) Mboka ye na omitima dhu uka otaya ka mona nkene hatu longitha omagano getu gokupopya notashi vulika ya ka landule oshiholelwa shetu.—Fil. 4:8, 9.
Natu kale tu shi okuholelwa momikalo nomuuyogoki
10. Omolwashike eitaalo lyaa na iihelele lya simanenena opo tu hume komeho pambepo?
10 Okupopya taku tungu hako akuke kwa pumbiwa opo Omukriste a kale oshiholelwa oshiwanawa. Ngele oho popi iinima iiwanawa ihe iho yi ningi, nena ngoye omufudhime. Paulus okwa li a tseya nawa uufudhime wAafarisayi niilanduliko iiwinayi yiilonga yawo. Okwa li a londodha Timoteus iikando oyindji a henuke uufudhime nokwiimonikitha kwa tya ngaaka. (1 Tim. 1:5; 4:1, 2) Ihe Timoteus ka li nando omufudhime. Montumwafo ye ontiyali Paulus okwa nyolele Timoteus a ti: ‘Otandi dhimbulukwa eitaalo li li mungoye lyaa na iihelele.’ (2 Tim. 1:5, KB) Ihe natango, Timoteus okwa li a pumbwa okuulukila Aakriste ooyakwawo kutya ye ke na iihelele. Okwa li e na okukala neihumbato li shi okuholelwa.
11. Paulus okwa li a nyolele Timoteus shike kombinga yomaliko?
11 Paulus okwa li a kumagidha kombinga yeihumbato moontumwafo mbali ndhoka a nyolele Timoteus. Pashiholelwa, Timoteus okwa li e na okuyanda okulalakanena omaliko. Paulus okwa nyola a ti: “Mohole yeliko omo tamu zi uukolokoshi auhe. Aantu oyendji sho ya lalakanene eliko, oya puka mo mondjila yeitaalo noya yono po oomwenyo dhawo niimpwiyu oyindji.” (1 Tim. 6:10) Ohole yokuhola iimaliwa oyi li endhindhiliko kutya uupambepo womuntu inawu kola. Mepingathano naashoka, Aakriste mboka ya gwanenwa ‘kiikulya nomizalo’ ndhoka ye na monkalamwenyo, ohaya humu komeho pambepo.—1 Tim. 6:6-8; Fil. 4:11-13.
12. Ongiini tatu vulu okuulika kutya otatu ningi ehumokomeho monkalamwenyo yetu?
12 Paulus okwa li a lombwele Timoteus nkene sha simana opo aakiintu Aakriste ya “dhiladhile nawa kombinga yomizalo dhawo, yo ya zale oonguwo dhi shi kutalwa nodha yogoka.” (1 Tim. 2:9) Aakiintu mboka haya zala oonguwo dhi shi okutalwa nodha yogoka nohayi ihumbata nawa monkalamwenyo yawo, oye li oshiholelwa sha dhenga mbanda. (1 Tim. 3:11) Ekotampango ndika otali longo wo nokaalumentu Aakriste. Paulus okwa kumagidha aakuluntugongalo ya kale ‘aaidhiliki hayi ikwata nawa noye na elandulathano.’ (1 Tim. 3:2) Aantu ayehe otaya ka mona ehumokomeho lyetu ngele ohatu ulike iikala mbyoka monkalamwenyo yetu yakehe siku.
13. Ongiini tatu vulu okukala oshiholelwa shuuyogoki ngaashi Timoteus?
13 Timoteus okwa li wo e na okutula po oshiholelwa oshiwanawa shuuyogoki. Paulus okwa li ta popi onyata yiipala kondandalunde sho a longitha uutumbulilo mboka. Timoteus okwa li e na okutula po oshiholelwa dhingi unene tuu mokuungaunga kwe naakiintu. Okwa li e na okutala ko ‘aakulukadhi ongooyinakulu naakiintu aagundjuka ongaamwayina muuyogoki auhe.’ (1 Tim. 4:12; 5:2) Kalunga oha mono onyata yiipala ndjoka aantu haya ningi meholamo. Aantu ooyakwetu nayo ohaye yi mono wo konima yethimbo. Oshoshili wo kutya iilonga iiwanawa mbyoka Omukriste ta longo ihayi kala meholamo. (1 Tim. 5:24, 25) Ayehe megongalo oye na ompito okuninga ehumokomeho li iwetikile meihumbato nomuuyogoki.
Ohole neitaalo oya pumbiwa
14. Omanyolo otaga tsu ngiini omuthindo ompumbwe yokukala tu holathane?
14 Ohole oyo hayi ndhindhilikitha Aakriste yashili. Jesus okwa lombwele aalongwa ye a ti: “Ngele omu holathane, nena aantu ayehe otaa ka dhimbulula kutya one aalongwa yandje.” (Joh. 13:35) Ohole ya tya ngaaka otatu yu ulike ngiini? Oohapu dhaKalunga otadhi tu kumagidha tu “idhidhimikilathane mohole” notu ‘kale tu na uukuume nolukeno. Tu silathane ohenda nokudhiminathana po oondjo’ nokuyakula aayenda. (Ef. 4:2, 32, KB; Heb. 13:1, 2) Omuyapostoli Paulus okwa nyola a ti: “Kaleni mu na ohole yaamwayinathana.”—Rom. 12:10.
15. Nonando osha simanenena atuhe tu kale tu na ohole, omolwashike aakuluntugongalo ye na oku yi ulika unene?
15 Ngele Timoteus okwa li u ungaunga nonyanya nokuhaula Aakriste ooyakwawo, ando oshilonga she oshiwanawa e li omulongi gwaantu nomutonateli oshowala. (Lesha 1 Aakorinto 13:1-3.) Mepingathano naashoka, Timoteus oku ulukile aamwahe ohole yashili moku ya yakula nomokulonga iilonga iiwanawa molwawo, shoka tashi ulike lela ehumokomeho lyopambepo. Onkee ano, osha li she eleka sho montumwafo ndjoka Paulus a nyolele Timoteus a tumbula kondandalunde kutya Timoteus oku na okukala oshiholelwa oshiwanawa shohole.
16. Omolwashike Timoteus a li e na okuulika eitaalo lya kola?
16 Eitaalo lyaTimoteus olya li lya makelwa sho a li muEfeso. Yamwe oya li ya humitha komeho omalongo ngoka kaage li metsokumwe noshili yopaKriste. Yalwe oya taandelitha “oongano” dhiifundja nenge omauyelele ngoka itaaga tungu egongalo pambepo. (Lesha 1 Timoteus 1:3, 4.) Paulus okwa popi oohandimwe ya tya ngaaka kutya ‘oya kwatwa kuuntsa nokokwaashisha. Ihe otaa yenwa komapulaapulo koompata nokomatompathano.’ (1 Tim. 6:3, 4, yelekanitha KB.) Mbela Timoteus okwa li e na okudhana nomadhiladhilo ga nika oshiponga ngoka ga li megongalo? Aawe, molwaashoka Paulus okwe mu ladhipike a “kondje ekondjo ewanawa lyeitaalo” noku yande “omapopyagano ga nyata nogowala noompata dhiifundja haku tiwa ontseyo aniwa.” (1 Tim. 6:12, 20, 21, KB) Timoteus okwa li a landula shili omayele gaPaulus ngoka ge li pandunge.—1 Kor. 10:12.
17. Ongiini eitaalo lyetu tali vulu okumakelwa kunena?
17 Shihokitha, Timoteus okwa li a lombwelwa kutya “komasiku gokomeho aantu yamwe otaa ke etha eitaalo. Oyo otaa ka vulika koombepo dhiifundja notaa ka landula omalongo goompwidhuli.” (1 Tim. 4:1) Iilyo ayihe megongalo, mwa kwatelwa mboka ye na iinakugwanithwa, oyi na okukala neitaalo lya kola noihali tengauka ngaashi lyaTimoteus. Ehumokomeho lyetu otali ka monika kwaayehe notatu ka kala oshiholelwa oshiwanawa sheitaalo ngele tatu ekelehi thiluthilu omapukitho gaashunimonima.
Kambadhala ehumokomeho lyoye li monike kwaayehe
18, 19. (a) Opo ehumokomeho lyoye li monike kwaayehe, owu na okuninga shike? (b) Otatu ka kundathana shike moshitopolwa tashi landula ko?
18 Osha yela kutya eholokopo lyokolutu, uunkulungu wopaunshitwe nenge esimano hayo hayi utha ehumokomeho lyopambepo lyOmukriste. Omimvo ndhoka omuntu a kala ta longo megongalo nadho ihadhi shi utha. Pehala lyaashono, ehumokomeho lyashili lyopambepo ohali monika ngele tatu vulika kuJehova mokudhiladhila kwetu, mokupopya kwetu nomeihumbato lyetu. (Rom. 16:19) Otu na okupulakena kelombwelo lyokukala tu holathane notu na eitaalo lya kola. Eeno, natu dhiladhile koohapu ndhoka Paulus a li a nyolele Timoteus nokukala metsokumwe nadho opo okuhuma komeho kwetu ku monike kwaayehe.
19 Enyanyu ndyoka li li oshitopolwa shimwe shomiiyimati yombepo yaKalunga ohali ulike ehumokomeho lyetu nosho wo uukuluntu wopambepo. (Gal. 5:22, 23) Oshitopolwa tashi landula ko otashi ka kundathana nkene tatu vulu okukala nenyanyu nonando otu li muudhigu.
Oto yamukula ngiini?
• Yalwe otaya vulu okwiilonga shike mokupopya kwetu?
• Eihumbato nuuyogoki wetu ohayi ulike ngiini ehumokomeho lyetu?
• Omolwashike Aakriste ye na okutula po oshiholelwa oshiwanawa shohole nosheitaalo?
[Ethano pepandja 11]
Nonando Timoteus okwa li omugundjuka, oku ulike kutya ye okwa koka pambepo
[Omathano pepandja 13]
Mbela ehumokomeho lyoye oli wetike kuyalwe?