Nkene to vulu okuuva ko Ombiimbeli

3. Taamba ko ekwatho okuza kuyalwe

Sho omweendikonakoni Edward John Eyre a li a yi molweendo olule okutaaguluka Olusilu lwi ikalekelwa lwaNullarbor, aavalelwamo yomuAustralia yomoshitopolwa shoka oya li ya longo Eyre nkene e na okuteka omeya moondeina nomomiti dhomingaalipi. Eyre sho a taamba ko ekwatho ndyoka a li ta pewa kaantu mboka ye shi oshilongo shoka, konima yethimbo osha hupitha omwenyo gwe.

OSHIHOLELWA shika otashi ulike kutya okumanitha oshilonga oshidhigu nomupondo, olundji ohashi pumbwa ekwatho lyaangoka e na onsteyo oyindji. Shika osha faathana nuuna wa tameke okulesha Ombiimbeli.

Jesus ka li a tegelela aalanduli ye yu uve ko Ombiimbeli pwaa na ekwatho lyayalwe. Moshiningwanima shimwe, Jesus okwa li a “patulula omadhiladhilo gawo, yu uve ko Omanyolo.” (Lukas 24:45) Jesus okwa li e shi shi kutya aaleshi yOmbiimbeli oya pumbwa ekwatho opo yu uve ko omalongo gopamanyolo.

Ekwatho otali vulu okuza kulye?

Jesus okwa li a lombwele aalanduli ye yashili ya gandje ekwatho ndika. Manga inaa londa okuya megulu, okwa li e ya lombwele a ti: “Indeni ano, ka ningeni aantu ayehe aalongwa yandje, .  . . ne mu ya longe okudhiginina ayihe mbyoka nde yi mu lombwele.” (Mateus 28:19, 20) Iilonga yAakriste oya kwatela mo unene tuu okulonga aantu, moku ya fatululila nkene omakotampango gOmbiimbeli taga vulu okutulwa miilonga monkalamwenyo yesiku kehe. Aakriste yashili ohaya kwathele yalwe yu uve ko Ombiimbeli.

Nziya konima sho Jesus a li a pe aalanduli ye oshilonga shoka, opwa li pwa ningwa oshinima shihokitha noonkondo. Ombiimbeli otayi popi kombinga yelenga edhiginini lyokuEtiopia ndyoka lya li tali lesha oshitopolwa shomomahunganeko gaJesaja. Olya li lya lesha mo oshitopolwa shono kaalya li lyu uvite ko. Ehokololo lyOmbiimbeli otali popi kutya ovelise ndjoka ya li ye li ngwangwaneke otayi lesha tayi ti: “Oye okwa li a fa onzi tayi falwa, yi ka dhipagwe. Oye a li a fa onzigona tayi mwena thilu, uuna tayi kululwa. Noye ina tumbula nando oshitya shimwe. Oye okwa fupipikwa ye ina uthilwa eutho lyu uka. Kaku na nando ogumwe ta ka vula okupopya sha kombinga yoluvalo lwe, oshoka okukalamwenyo kwe kwokombanda yevi okwa hulu po.”—Iilonga 8:32, 33; Jesaja 53:7, 8.

Elenga olya li lya pula Filippus, Omukriste a pyokoka ngoka a li e shi nawa Omanyolo lya ti: “Olye ngoka ta popiwa komuhunganeki? Oti ipopi ye mwene nenge ota popi omuntu i ili?” (Iilonga 8:34) Omuetiopia e na omutima gu uka okwa yile kuJerusalem a ka galikane Kalunga, notashi vulika a li a pula ewiliko megalikano. Osha yela kutya okwa li ta lesha nehalo noneifupipiko. Ihe elenga kalya li natango li uvite ko oohapu ndhika. Olya li lya pula ekwatho neifupipiko kuFilippus. Elenga olya li lya nyanyukwa noonkondo kwaashoka lya fatululilwa kuFilippus, naashoka osha li she li inyengitha li ninge Omukriste.—Iilonga 8:35-39.

Oonzapo dhaJehova otadhi tsikile natango okulonga iilonga mbyoka ya li ya longwa kuFilippus nosho wo kAakriste yalwe yonale. Miilongo yi vulithe 235, Oonzapo otadhi kwathele yalwe neiyambo yu uve ko kutya omalongo gashili gOmbiimbeli ogeni naanaa. Shika ohadhi shi ningi okupitila miipalanyolo tayi kundathanwa pamanyolo. Omukalo nguka gwokukonakona Ombiimbeli ogwa kwatela mo okukonakona shoka Ombiimbeli tayi ti kombinga yiipalanyolo yontumba.a—Tala oshimpungu “Omayamukulo taga mbilipaleke komapulo gOmbiimbeli.”

“Omapulo gandje agehe oga li ga yamukulwa”

Steven, Valvanera naJo-Anne mboka ya popiwa moshitopolwa shotango, oya li ya tameke okukonakona Ombiimbeli nOonzapo dhaJehova. Steven okwa ti: “Shoka sha li sha kumitha ndje osho kutya uuna to konakona omakotampango nenge omahokololo gopamanyolo, oto vulu oku gu uva ko nuupu. Manga nda li inaandi tameka okukonakona Ombiimbeli nOonzapo dhaJehova, kapwa li pu na ngoka u ulukile ndje nkene ndi na oku shi ninga. Osha li she etele ndje epepelelo enene okutseya kutya inashi pumbiwa okuninga oonkundathana kaadhi na ehulilo notadhi kondjithathana opo wu uve ko Ombiimbeli.”

Valvanera ote shi zimine ta ti: “Kehe shimwe shoka nda li nda longwa kOonzapo dhaJehova osha li pandunge. Iinima oya li yoshili, hamolwaashoka owala tayi popiwa ‘kOngeleka,’ ihe omolwaashoka kehe shimwe osha li sha fatululwa nawa.” Jo-Anne okwa ti: “Uushili kutya omapulo gandje agehe oga li ga yamukulwa kOmbiimbeli, owa li wa ningitha ndje ndi kale handi simaneke noonkondo Omunyoli gwayo, molwaashoka okwa nyolitha nale omayamukulo tago opalele epulo kehe lyomuntu.”

Mbela owu shi gumwe gwomOonzapo dhaJehova? Omolwashike itoo mu pula e ku ulukile nkene ekonakono ndika hali ningwa? Ngele ku na ngoka wu shi gwomOonzapo, nyolela kuyimwe yomoondjukithi ndhoka dhi li pepandja eti-2 lyoshifo shika. Kekwatho lyombepo ondjapuki yaKalunga nokukala wu na ehalo lyokutaamba ko shoka to ilongo nosho wo kekwatho ndyoka to pewa kwaangoka a pyokoka te ku longo Ombiimbeli, Oohapu dhaKalunga itadhi ka kala embo edhigu kungoye okuuva ko. Ombiimbeli oto vulu oku yi uva ko.

[Enyolo lyopevi]

[Oshimpungu/Ethano pepandja 8]

Omayamukulo taga mbilipaleke komapulo gOmbiimbeli

Iitopolwa yimwe mbyoka hayi konakonwa kOonzapo dhaJehova pekonakonombiimbeli lyadho:

• Elalakano lyaKalunga olyashike li na ko nasha nevi?

• Oonakusa oye li peni?

• Mbela otu li ‘momasiku gahugunina’?

• Omolwashike Kalunga e etha okumona iihuna ku kale po?

• Ongiini tandi vulu okuninga onkalamwenyo yuukwanegumbo wandje yinyanyudha?

[Omathano pepandja 7]

Opo wu uve ko Ombiimbeli . . . galikana Kalunga e ku pe ombepo ye, lesha nehalo lyokuuva ko e to taamba ko ekwatho okuza kuyalwe