OMAPULO GOPAMBIIMBELI TAGA YAMUKULWA

Mbela oto vulu ngaa okuuva ko Ombiimbeli?

Ombiimbeli oyo Oohapu dhaKalunga. Oya fa ontumwafo ya za kutate omunahole. (2 Timoteus 3:16) MOmbiimbeli Kalunga ota yelitha nkene tatu vulu oku mu nyanyudha, omolwashike e etha iinima iiwinayi yi kale po noshike ta ka ningila aantu monakuyiwa. Ihe aalongi yomalongelokalunga oya pengitha omalongo gOmbiimbeli naashika osha ningitha aantu oyendji ya dhiladhile kutya kapu na esiku ye ke yi uve ko. — Iilonga 20:29, 30.

Jehova Kalunga okwa hala tu tseye oshili kombinga ye. Nomolwaashoka e tu pa embo ndyoka tatu vulu okuuva ko.​—Lesha 1 Timoteus 2:3, 4.

Ongiini to vulu okuuva ko Ombiimbeli?

Kakele koku tu pa Ombiimbeli, Jehova ohe tu kwathele tu yi uve ko. Okwa tuma Jesus e tu longe. (Lukas 4:16-21) Jesus okwa li a kwathele aapulakeni ye yu uve ko Omanyolo moku ya yelithila oovelise dhi ili nodhi ili.​—Lesha Lukas 24:27, 32, 45.

Jesus okwa li a toto egongalo lyopaKriste, opo iilonga yokuuvitha mbyoka a li a tameke yi vule okutsikila. (Mateus 28:19, 20) Kunena aalanduli yaJesus yashili ohaya kwathele aantu yu uve ko shoka Ombiimbeli tayi longo kombinga yaKalunga. Ngele owa hala okuuva ko Ombiimbeli, Oonzapo dhaJehova otadhi ka kala dha nyanyukwa oku ku kwathela.​—Lesha Iilonga 8:30, 31.