Ilonga sha mOohapu dhaKalunga

Omolwashike wu na okwiilonga sha mOohapu dhaKalunga?

Moshitopolwa shika omu na omapulo ngoka tashi vulika wi ipula kombinga yago notashi ku ulukile mpoka to vulu okwaadha omayamukulo gago mOmbiimbeli yoye. Oonzapo dhaJehova otadhi ka kala dha nyanyukwa okukundathana nangoye omayamakulo ngaka.

1. Omolwashike wu na okwiilonga sha mOohapu dhaKalunga?

Kalunga oku nine aantu onkundana ombwanawa yoshinima shimwe oshiwanawa. Ote tu lombwele kombinga yasho mOmbiimbeli. Ombiimbeli oya fa ontumwafo ndjoka Tate gwomegulu omunahole e tu nyolela.—Lesha Jeremia 29:11.

2. Onkundana ombwanawa oshike?

Aantu oya pumbwa epangelo ewanawa. Kapu na omupangeli gwopantu a vula okuhulitha po omiyonena, okwaahe na uuyuuki, omikithi nenge eso. Ihe onkundana ombwanawa oyo kutya: Kalunga ota ka pa aantu epangelo ewanawa ndyoka tali ka mangulula aantu mokumona iihuna kwoludhi kehe.—Lesha Daniel 2:44.

3. Omolwashike sha simana okwiilonga sha mOohapu dhaKalunga?

Masiku Kalunga ota ka hanagula po aantu ayehe mboka haye etele aantu okumona iihuna. Manga shoka inaashi ningwa, ota longo aaifupipiki omamiliyona ya nyanyukilwe onkalamwenyo yi li hwepo yopahole. Aantu otayi ilongo sha mOohapu dhaKalunga nkene taya vulu okwiidhidhimikila uupyakadhi monkalamwenyo, nkene taya vulu okumona enyanyu lyashili nonkene taya vulu okunyanyudha Kalunga.—Lesha Sefanja 2:3.

4. Olye Omunyoli gwOmbiimbeli?

Ombiimbeli oya thikama po momambo omashona 66. Omambo ngoka omashona oga nyolwa kaalumentu 40. Omambo gotango gatano oga nyolwa kuMoses pwa pita ngashingeyi oomvula 3 500 lwaampono. Embo lyahugunina olya nyolwa komuyapostoli Johannes pwa pita ngashingeyi oomvula dhi vulithe 1 900. Ihe mboka ya nyola Ombiimbeli oya nyola omadhiladhilo gaKalunga, ihe hagawo yene. Onkee ano, Kalunga oye Omunyoli gwOmbiimbeli.—Lesha 2 Timoteus 3:16; 2 Petrus 1:21.

Otu shi shi kutya Ombiimbeli oya nyolwa kuKalunga molwaashoka oya hunganeka paushili kehe shimwe shoka tashi ka ningwa monakuyiwa. Kapu na omuntu ta vulu okuninga ngaaka. (Jesaja 46:9, 10) Ombiimbeli oye tu hololela wo omaukwatya gaKalunga. Oyi na oonkondo dhokulundulula oonkalamwenyo dhaantu. Uushili mbuka owa kwathela aantu omamiliyona ya kale ya tompwa kutya Ombiimbeli oyi li Oohapu dhaKalunga.—Lesha Josua 23:14; 1 Aatessalonika 2:13.

5. Ongiini to vulu okuuva ko Ombiimbeli?

Jesus okwa tseyika nawa e li omulongi gwOohapu dhaKalunga. Nonando aantu oyendji mboka a li a popi nayo oya li ye shi Ombiimbeli, oya li ya pumbwa ekwatho opo ye yi uve ko. Opo Jesus e ya kwathele, okwa li a popi ta longitha oovelise dhOmbiimbeli e te dhi ya yelithile opo “yu uve ko Omanyolo.” Oshitopolwa “Ilonga sha mOohapu dhaKalunga” otashi ka longitha omukalo gwa faathana oku ku fatululila Omanyolo.—Lesha Lukas 24:27, 45.

Oto ka mona iinima yontumba iikumithi sho to ilongo sha mOohapu dhaKalunga kombinga yelalakano lyonkalamwenyo. Ihe otashi vulika aantu yamwe kaaya kale ya nyanyukwa sho to lesha Ombiimbeli. Shoka inashi ku teya omukumo. Opo wu kale netegameno lyoku ka nyanyukilwa okukala nomwenyo sigo aluhe ongele owala wa tseya Kalunga.—Lesha Mateus 5:10-12; Johannes 17:3.

Opo wu mone uuyelele wa gwedhwa po, tala ontopolwa 2 yembo ndika Omalongo gashili gOmbiimbeli ogeni naanaa?, lya nyanyangidhwa kOonzapo dhaJehova.