Ontopolwa 2

Ontumwafo ya za kuKalunga omunahole

LOMBWELA ndje kutya embo lini wu hole unene?— Aanona yamwe otaya ka hogolola ndyoka tali popi kombinga yiinamwenyo. Yalwe otaya ka hogolola ndyoka li na omathano ogendji. Otashi vulu okukala shinyanyudha okulesha omambo ngoka.

Ihe omambo ngoka ge li dhingi muuyuni auhe oongoka tage tu lombwele oshili kombinga yaKalunga. Limwe lyomomambo ngoka oli na ongushu li vule omakwawo agehe. Mbela owa tseya kutya olini?— Olyo Ombiimbeli.

Omolwashike Ombiimbeli ya simana noonkondo?— Omolwaashoka oya za kuKalunga. Otayi tu lombwele kombinga ye nosho wo kombinga yiinima iiwanawa mbyoka te ke tu ningila. Otayi tu ulukile wo shoka tu na okuninga opo tu mu nyanyudhe. Ombiimbeli oya fa ontumwafo ya za kuKalunga.

Kalunga okwa li ta vulu okunyola Ombiimbeli ayihe e li megulu e te yi pe aantu, ihe hasho a ninga. Nonando okwa longitha aapiya ye yokombanda yevi oku yi nyola, omadhiladhilo ngoka ge li mo oga za kuye.

Mbela Kalunga okwe shi ningi ngiini?— Opo wu shi uve ko, natu tale kwaashika. Ngele tatu uvu ewi lyagumwe koradio, ewi ndyoka otashi vulika lyomuntu e li kokule. Ngele tatu tala o-TV, otashi vulika nokuli tu mone omathano gaantu ye li kiilongo yilwe, nohatu vulu okuuva shoka taya popi.

Aantu ohaya vulu nokuli okweenda iinano iileeleka yu uka komwedhi ye li miiyenditho yomewangandjo, nohaya vulu okutumina omatumwalaka kevi ye li hoka. Mbela owe shi tseya?— Ngele aantu ohaya vulu okuninga iinima mbyoka, mbela Kalunga oye ngaa a kale itaa vulu okutuma omatumwalaka okuza megulu?— Osha yela kutya ote shi vulu. Shika okwa kala he shi ningi nale manga aantu ya li kaaye na ooradio noo-TV.

Moses oye omulumentu ngoka a li u uvu Kalunga ta popi. Moses ka li a vulu okumona Kalunga, ihe okwa li a vulu okuuva ewi lye. Opwa li aantu omamiliyona sho shika sha ningwa. Odhoshili kutya esiku ndyoka Kalunga okwa li a kakamitha ondundu ayihe, nopwa li omindundumo noombadhi. Aantu oya li ye shi kutya oKalunga ta popi, ihe oya li ya tila noonkondo. Onkee ano, oya li ya lombwele Moses ya ti: “Otwa tila kutya OMUWA ngele te tu uvithile, otatu ningi tu se.” Konima yaashoka, Moses okwa li a nyola iinima mbyoka Kalunga a popi. Shoka Moses a nyola omo shi li mOmbiimbeli.—Eksodus 20:18-21.

Moses okwa nyola omambo gotango gatano gOmbiimbeli. Ihe haye awike a li a nyola Ombiimbeli. Kalunga okwa li a longitha aalumentu 40 okunyola iitopolwa yOmbiimbeli. Aalumentu mbaka oya li ko nalenale, nosha li sha pula oomvula odhindji opo Ombiimbeli yi pwe okunyolwa. Eeno, osha li sha pula uule woomvula 1 600 lwaampono. Shoka tashi kumitha osho kutya nonando yamwe yomaalumentu mbaka kaya li ye shaathane nando, kehe shimwe shoka ya nyola otashi tsu kumwe lela.

Aalumentu yamwe mboka ya li ya longithwa kuKalunga okunyola Ombiimbeli oya li aanamadhina. Nonando Moses okwa li omusita gwiimuna, okwa li a ningi omuwiliki gwoshigwana shaIsraeli. Salomo okwa li omukwaniilwa ngoka a li omunandunge nomuyamba e vule aantu yopethimbo lye. Ihe aanyoli yalwe kaya li aanamadhina. Amos okwa li omutsiki gwomikwiyu.

Kakele kaashono, omunyoli gumwe gwOmbiimbeli okwa li ondohotola. Mbela owu shi kutya oye lye?— Oye Lukas. Omunyoli gulwe okwa li omufendelithi. Edhina lye oMateus. Niishewe gulwe okwa li omutseyimpango gwompango yelongelokalunga lyOshijuda a pyokoka. Okwa nyola omambo gOmbiimbeli ogendji e vulithe kehe gumwe. Mbela owu shi kutya oye lye?— Oye Paulus. Aalongwa yaJesus, Petrus naJohannes mboka ya li wo aanyoli yOmbiimbeli, oya li aayuli yoohi.

Oyendji yomaanyoli yOmbiimbeli mbaka, oya li ya nyola kombinga yiinima mbyoka Kalunga a li ta ka ninga monakuyiwa. Mbela iinima mbyoka oya li ye yi tseya ngiini nokuli ngele kaya li ya ningwa natango?— Kalunga okwa li a pe aalumentu mboka uuyelele. Okwa li e ya lombwele shoka sha li tashi ka ningwa.

Ethimbo ndyoka Jesus, Omulongi Omunene, a li kombanda yevi, iitopolwa oyindji yOmbiimbeli oya li ya nyolwa nale. Dhimbulukwa kutya Omulongi Omunene okwa li a kala megulu. Okwa tseya shoka Kalunga a ninga. Mbela okwa li i itaala kutya Ombiimbeli oya za kuKalunga?— Eeno.

Sho Jesus a li ha popi naantu kombinga yiilonga yaKalunga, okwa li he ya leshele mOmbiimbeli. Omathimbo gamwe okwa li he ya lombwele owala shoka shi li mo. Jesus okwa li wo e tu etele uuyelele owundji okuza kuKalunga. Jesus okwa ti: ‘Shoka tandi shi uvu kuye, otandi shi lombwele uuyuni.’ (Johannes 8:26) Jesus okwa li u uvu iinima oyindji kuKalunga molwaashoka okwa li a kala pamwe naKalunga. Mbela openi tatu vulu okulesha iinima mbyoka Jesus a popi?— OmOmbiimbeli. Ayihe otwe yi nyolelwa mOmbiimbeli opo tu yi leshe.

Sho Kalunga a li a longitha aalumentu mboka ye yi nyole, oya li ye yi nyola melaka ndyoka ya li haya longitha esiku kehe. Onkee ano, iitopolwa oyindji yOmbiimbeli oya nyolwa mOshihebeli, yimwe omOshiaramea nayimwe yomuyo omOshigreka. Molwaashoka aantu oyendji kunena kaye shi okulesha omalaka ngoka, Ombiimbeli oya tolokwa momalaka galwe. Kunena iitopolwa yOmbiimbeli otayi vulu okuleshwa momalaka ge vulithe 2 260. Dhiladhila owala kwaashika. Ombiimbeli oyo ontumwafo ndjoka Kalunga a nyolela aantu ayehe. Ihe kashi na nduno mbudhi kutya oya tolokwa momalaka ge thike peni, etumwalaka ndyoka li li mo olya za kuKalunga.

Shoka tashi popiwa kOmbiimbeli osha simana kutse. Nonando oya nyolwa pwa pita uule wethimbo, otayi tu lombwele kombinga yiinima mbyoka tayi ningwa kunena. Otayi tu lombwele shoka Kalunga ta ka ninga monakuyiwa yi li popepi. Shoka tayi popi kashi tuntula tuu! Otayi tu pe etegameno ewanawa.

Ombiimbeli otayi tu lombwele wo kutya Kalunga okwa hala tu kale ngiini monkalamwenyo. Otayi tu lombwele shoka shi li mondjila naashoka sha puka. Shika osho ngoye nangame twa pumbwa okutseya. Otayi tu lombwele kombinga yaantu mboka ya li ya ninga iinima ya puka naashoka sha li she ya ningilwa, opo tu vule okuyanda uupyakadhi mboka wa li we ya adha. Otayi tu lombwele kombinga yaantu mboka ya li ya longa shoka shu uka nosho wo iizemo mbyoka ya ka mona. Iinima ayihe mbyoka oya nyolwa omolwuuwanawa wetu.

Ihe opo tu mone uuwanawa oundji mOmbiimbeli, otwa pumbwa okutseya eyamukulo lyepulo ndika. Olye e tu pa Ombiimbeli? Oto yamukula ngiini?— Eeno, Ombiimbeli ayihe oya za kuKalunga. Ongiini nduno tatu vulu okuulika kutya otu li aanandunge lela?— Omokupulakena kuKalunga nomokulonga shoka te tu lombwele.

Onkee ano, otu na okukala hatu longitha ethimbo okulesha pamwe Ombiimbeli. Ngele twa mono ontumwafo ya za kugumwe ngoka tu hole noonkondo, ohatu yi lesha lwiikando. Ohayi kala yi li oshinima shi na ongushu kutse. Ombiimbeli nayo osho naanaa tu na okukala twe yi tala ko ngawo molwaashoka oyo ontumwafo ya za kwaaNgoka e tu hole noonkondo. Oyo ontumwafo ya za kuKalunga omunahole.

Longitha ominute dhontumba okulesha omanyolo ngaka tagu ulike kutya Ombiimbeli oyo shili Oohapu dhaKalunga, dha nyolwa omolwuuwanawa wetu: Aaroma 15:4; 2 Timoteus 3:16, 17 nosho wo 2 Petrus 1:20, 21.

[Omathano pepandja 17]

Otu shi shi ngiini kutya Kalunga ota vulu okupopya natse e li kokule?

[Omathano pepandja 19]

Aanyoli yOmbiimbeli mbaka oyo oolye?

[Ethano pepandja 20]

Iinima yini to vulu okwiilonga mokulesha Ombiimbeli?