Ilonga sha moohapu dhaKalunga
Kalunga oye lye?
Moshitopolwa shika omu na omapulo ngoka tashi vulika wa pula kombinga yago notashi ku ulukile mpoka to vulu okwaadha omayamukulo mOmbimbeli yoye. Oonzapo dhaJehova otadhi ka kala dha nyanyukwa okukundathana nangoye omapulo ngaka.
1. Kalunga oye lye?
Kalunga kashili oye Omushiti gwiinima ayihe. Ombiimbeli otayi mu ithana ‘Omukwaniilwa gwiigwana ayihe,’ sha hala okutya, ke na etameko noita ka kala nando e na ehulilo. (Ehololo 15:3) Molwaashoka Kalunga oye Onzo yomwenyo, oye awike tu na okulongela.—Lesha Ehololo 4:11.
2. Kalunga okwa tya ngiini?
Kapu na nando ogumwe a mona Kalunga molwaashoka oye Ombepo, shoka tashi ti kutya oku vule aantu kokule mboka a shitila kombanda yevi. (Johannes 1:18; 4:24) Uukwatya waKalunga owa hololwa miinima mbyoka a shita. Pashiholelwa, ngele tatu tedhatedha kunkene iiyimati noongala dha shitwa nokomaludhi gadho, otatu mono kutya Kalunga oye ohole nomunongo. Uunene wewangandjo otawu tu hololele mpoka pu thike oonkondo dhe.—Lesha Aaroma 1:20.
Otatu vulu nokuli okwiilonga oshindji kombinga yuukwatya waKalunga mOmbiimbeli. Pashiholelwa, otayi tu lombwele shoka e hole naashoka kee hole, nkene hu ungaunga naantu nonkene hi inyenge momikalo dha yoolokathana.—Lesha Episalomi 103:7-10.
3. Mbela Kalunga oku na edhina?
Jesus okwa ti: “Tate yetu, ngu u li megulu: edhina lyoye nali yapulwe.” (Mateus 6:9) Nonando Kalunga oku na omadhinasimaneko ogendji, oku na owala edhina limwe. Ohali popiwa lya yooloka melaka kehe. Moshiingilisa ohatu ti “Jehovah” nenge “Yahweh.”—Lesha Eksodus 15:3, OB-1954.
Edhina lyaKalunga olya kuthwa mo mOombiimbeli odhindji nolya pingenwa po nomadhinasimaneko ngaashi Omuwa nenge Kalunga. Ihe sho Ombiimbeli ya nyolwa, edhina lyaKalunga olya li mo lwiikando 7 000 lwaampono. Jesus okwa li a tseyithile aantu edhina lyaKalunga moku li longitha sho a li te ya yelithile Oohapu dhaKalunga. Okwa li e ya kwathele ya tseye Kalunga.—Lesha Johannes 17:26.
4. Mbela Jehova oku na ko ngaa nasha natse?
Jehova ohu ulike kutya okwe tu hokwa mokupulakena komagalikano getu gopaumwene. (Episalomi 65:2) Mbela sho hatu mono iihuna oyindji otashi ti kutya Kalunga ke na ko nasha natse? Aantu yamwe ohaya ti kutya Kalunga oye he etitha okumona iihuna kwetu opo e tu makele, ihe shika kashi shi shoshili. Ombiimbeli otayi ti: “Itashi vulika Kalunga a longe uugoyoki.”—Job 34:10; lesha Jakob 1:13.
Kalunga okwa pa aantu emanguluko lyokuninga omatokolo paumwene. Mbela inatu pandula emanguluko ndyoka Kalunga e tu pa okutokola oku mu longela? (Josua 24:15) Okumona iihuna otaku indjipala molwaashoka aantu oyendji ohaya ningile yakwawo iinima iiwinayi. Ohashi ehameke Jehova okutala okwaahe na uuyuuki kwa tya ngaaka.—Lesha Genesis 6:5, 6.
Masiku Jehova ota ka longitha Jesus a hulithe po okumona iihuna nosho wo mboka taye ku eta. Ihe ngashingeyi Jehova oku na etompelo ewanawa okweetha okumona iihuna ku kale po pakathimbo. MOshungolangelo otamu ka nyanyangidhwa oshitopolwa shimwe sha pambathana naashika shoka tashi ka yelitha kutya omolwashike Kalunga e etha okumona iihuna ku kale po.—Lesha Jesaja 11:4.
5. Kalunga okwa hala tu ninge shike?
Jehova okwe tu shita tu na uukwatya wokuvula oku mu tseya nokukala tu mu hole. Okwa hala tu ilonge oshili kombinga ye. (1 Timoteus 2:4) Ngele otwa konakona Ombiimbeli, otatu vulu okutseya Kalunga e li Kuume ketu.—Lesha Omayeletumbulo 2:4, 5.
Molwaashoka Jehova okwe tu pa omwenyo, otu na okukala tu mu hole shi vulithe yalwe. Otatu vulu okuulukila Kalunga kutya otu mu hole mokupopya naye megalikano nokuninga shoka te tu pula tu ninge. (Omayeletumbulo 15:8) Jehova ote tu pula tu ungaunge nayalwe nohole.—Lesha Markus 12:29, 30; 1 Johannes 5:3.
Ngele owa hala okumona uuyelele wa gwedhwa po, tala ontopolwa 1 yembo ndika Omalongo gashili gOmbiimbeli ogeni naanaa?, lya nyanyangidhwa kOonzapo dhaJehova.
[Ethano pepandja 23]
Mbela okumona iihuna okwe ethiwa ku kale po netompelo ewanawa?