Omaukwanegumbo gopaKriste, landuleni oshiholelwa shaJesus

‘Kristus okwe mú thigile oshiholelwa, opo mu landule ondjila ndjoka a li e yi ende.’—1 PET. 2:21.

1. (a) Omwana gwaKalunga okwa li a dhana onkandangala yini meshito? (b) Jesus oha kala u uvitile aantu ngiini?

SHO Kalunga a shiti egulu nevi, Omwana gwe gwosheeli okwa li pamwe naye e li “engomba.” Omwana gwaKalunga okwa li wo a longo pamwe naHe sho a shiti iinamwenyo niimeno yomaludhi ogendji gi ili nogi ili nosho wo sho a longekidha Oparadisa moka tamu ka kala iishitwa mbyoka a li ta ka shita oshifetha she. Omwana gwaKalunga ngoka konima yethimbo a li a tseyika nedhina Jesus, oku hole aantu unene. ‘Enyanyu lye olya li okunyanyukilwa aana yaantu.’—Omayel. 8:27-31; Gen. 1:26, 27.

2. (a) Oshike Jehova a gandja kaantu inaaya gwanenena shi ya kwathele? (b) Ombiimbeli otayi gandja ewiliko mushike?

² Sho aaihokani yotango ya yono, okukulila aantu muulunde osha ningi oshitopolwa sha simana shelalakano lyaJehova. Jehova okwa li a gandja Kristus e li ekuliloyambo opo aantu ya kulilwe. (Rom. 5:8) Niishewe, Jehova okwa gandja Oohapu dhe, Ombiimbeli, ndhoka tadhi wilike aantu nkene taya vulu oku shi enditha nawa monkalamwenyo nonando oya thigulula okwaahagwanenena. (Eps. 119:105) MOohapu dhe, Jehova okwa gandja ewiliko okukwathela omaukwanegumbo ga kale ga kola noge na ombili. Embo lyaGenesis otali popi kombinga yondjokana tali ti kutya omulumentu oku na ‘okukwatathana nomukadhi, oyo notaa ningi onyama yimwe.’—Gen. 2:24.

3. (a) Jesus okwa longo aantu shike kombinga yondjokana? (b) Oshike tashi kundathanwa moshitopolwa shika?

³ Muukalele we kombanda yevi, Jesus okwa li a tsu omuthindo kutya ondjokana oyi na okukalelela. Okwa li a longo aantu omakotampango ngoka ye na okutula miilonga opo ga kwathele iilyo yomaukwanegumbo yi henuke iikala nomaihumbato ngoka haga yono oondjokana nenge ombili yuukwanegumbo. (Mat. 5:27-37; 7:12) Oshitopolwa shika otashi kundathana nkene omalongo gaJesus noshiholelwa she tashi vulu okukwathela aasamane, aakulukadhi, aavali naanona opo ya kale nombili noya gwanenwa monkalamwenyo.

Nkene omulumentu Omukriste ha simaneke omukadhi

4. Efaathano lini li li pokati kaJesus naasamane Aakriste?

⁴ Kalunga okwa tula po omulumentu opo a kale omutse gwegumbo, ngaashi owala Jesus omutse gwegongalo. Omuyapostoli Paulus okwa ti: “Omulumentu oye omutse gwomukiintu, ongashika Kristus oye omutse gwegongalo noye omuhupithi gwolutu. One aalumentu, holeni aakiintu yeni, ongaashika Kristus e hole egongalo nokwi igandja molwalyo.” (Ef. 5:23, 25, OB-1954) Omukalo ngoka Jesus a li u ungaunga naalongwa ye ogu li oshiholelwa oshiwanawa kaalumentu Aakriste nkene ye na okukala naakulukadhi yawo. Natu kundathaneni omikalo dhimwe nkene Jesus a li a longitha oonkondopangelo ndhoka a pewa kuKalunga.

5. Ongiini Jesus a longitha oonkondopangelo dhe sho a li naalongwa ye?

⁵ Jesus okwa li ‘omunambili nomomutima okwi ishonopeka.’ (Mat. 11:29) Okwa li ha katuka onkatu uuna sha pumbiwa. Ina ndopa nando okugwanitha po iinakugwanithwa ye. (Mark. 6:34; Joh. 2:14-17) Okwa li a pe aalongwa ye omayele nombili, nokwa li e shi ningi nokuli lwiikando uuna sha pumbiwa. (Mat. 20:21-28; Mark. 9:33-37; Luk. 22:24-27) Nonando ongaaka, ka li he ya gandagula nenge e ya sithe ohoni, noka li he ya ningitha ya kale ye uvite ya fa kaaye holike nenge itaya vulu okugwanitha po shoka e ya longa. Pehala lyaashoka, okwa li e ya tanga noku ya ladhipika ya longe shoka shu uka. (Luk. 10:17-21) Itashi kumitha sho aalongwa ye oya li ye mu simaneka molwaashoka okwa li hu ungaunga nayo nohole nosho wo nondjaalela.

6. (a) Aasamane otayi ilongo shike momukalo ngoka Jesus a li hu ungaunga naalongwe ye? (b) Petrus ota ladhipikile aasamane shike?

⁶ Oshiholelwa shaJesus otashi longo aasamane kutya uukwamutse wopaKriste kawu shi okupanga. Pehala lyaashono, otashi ti okuungaunga naakulukadhi yawo nesimaneko nonohole yokwiiyamba. Omuyapostoli Petrus okwa ladhipike aasamane ya holele omukalo gwaJesus gwohole ‘mokukalathana naakiintu’ yawo nohole noku “ya simaneka.” (Lesha 1 Petrus 3:7.) Ihe ongiini mbela omusamane ta vulu okulongitha oonkondopangelo dhe nosho wo okuungaunga nomukadhi nesimaneko pethimbo limwe?

7. Omomukalo guni omusamane ta vulu okusimaneka omukadhi? Shi thaneka.

⁷ Omukalo gumwe ngoka omusamane ta vulu okusimaneka omukulukadhi gwe ogwo okukala e na ko nasha nomaetopo ge nosho wo nomaiyuvo ge omanga inaa ninga etokolo ndyoka tali ka guma uukwanegumbo. Etokolo otashi vulika li kale lya kwatela mo okutembuka, okulundulukila kiilonga yilwe nenge iinima yilwe yakehe siku, ngaashi mpoka tamu ka fudha nenge nkene mu na okulongitha nawa iimaliwa yeni opo mu vule okuhupa monkalelo ndjika uuhupilo wa ninga uudhigu. Molwaashoka uukwanegumbo otawu ka gumwa koshinima shoka, oshi li nawa noshi li pahole komusamane a pulakene komaetopo gomukulukadhi, molwaashoka otaga vulu oku mu kwathela a ninge etokolo li li pandjele nolyopandunge notashi shi ningi oshipu komukadhi oku mu ambidhidha. (Omayel. 15:22) Ngele aasamane Aakriste ohaya simaneke aakulukadhi yawo, aakulukadhi otaya ka kala ye ya hole noku ya simaneka, ihe shoka sha simana unene osho kutya aasamane otaya ka kala ya hokiwa kuJehova.—Ef. 5:28, 29.

Nkene omukulukadhi e na okusimaneka shili omusamane gwe

8. Omolwashike oshiholelwa shaEva kaashi shi okulandulwa?

⁸ Jesus okwa tulila po aakulukadhi Aakriste oshiholewa sha gwanenena shokuvulika koonkondopangelo. Etaloko lyaJesus kombinga yoonkondopangelo inali yooloka ko tuu kwaandyoka lyomukiintu gwotango! Eva ina tulila po nando aakulukadhi oshiholelwa oshiwanawa. Jehova okwa li e mu pa omutse ngoka okupitila mugwo a li he ya pe omalombwelo. Ihe Eva ka li a simaneka elongekidho ndyoka. Ka li a taamba ko omalombwelo gaJehova ngoka Adam e mu lombwele. (Gen. 2:16, 17; 3:3; 1 Kor. 11:3) Oshoshili kutya Eva okwa li a pukithwa, ihe nonando ongaaka, okwa li e na okupula tango omusamane gwe ngele oku na okupulakena kewi ndyoka tali mu lombwele shoka ‘Kalunga a tseya.’ Pehala lyaashono, Eva okwa li a lombwele omusamane gwe shoka e na okuninga.—Gen. 3:5, 6; 1 Tim. 2:14.

9. Jesus okwa tula po oshiholelwa shini shi na ko nasha nokuvulika?

⁹ Mepingathano naashoka, Jesus okwa tula po oshiholelwa sha gwanenena shokuvulika kOmutse gwe. Iikala ye nonkalamwenyo ye oye shi ulike kutya “ina dhiladhila nando olumwe, a kambadhale nokuhakana okukala a fa Kalunga.” Pehala lyaashoka, “okwi ihula uukalunga e ta zala olupe lwomupika.” (Fil. 2:5-7) Nonando kunena Jesus oku li Omukwaniilwa ta pangele, oku na natango iikala ya faathana. Oha vulika kuHe neifupipiko miinima ayihe noha ambidhidha uukwamutse We.—Mat. 20:23; Joh. 5:30; 1 Kor. 15:28.

10. Ongiini omukulukadhi ta vulu okwaambidhidha uukwamutse womusamane gwe?

¹⁰ Omukulukadhi Omukriste oku na okuholela Jesus mokwaambidhidha uukwamutse womusamane gwe. (Lesha 1 Petrus 2:21; 3:1, 2.) Tala onkalo yimwe moka omukulukadhi ta vulu oku shi ninga. Omwanamati ote ya kuyina oku mu pula opo a ka ninge oshinima shoka a pumbwa okupewa epitikilo kaavali ye. Molwaashoka oshinima shoka aavali inaye shi kundathana, oshi li nawa kumeme a pule omwana ta ti: “Ho owe mu pula ngaa?” Ngele omwanamati ine shi ninga, nena omukulukadhi oku na oku shi kundathana nomulume manga inaa ninga etokolo lyasha. Shimwe ishewe, omukulukadhi Omukriste ke na okupataneka omulume nenge a kondjithe shoka ta ti ngele ye li pamwe naanona yawo. Ngele ita tsu kumwe nomulume moshinima shontumba, ne ke shi popye naye uuna ye li oyo ayeke.—Ef. 6:4.

Jesus okwa tulila po aavali oshiholelwa

11. Jesus okwa tulila po aavali oshiholelwa shini?

¹¹ Nonando Jesus ka li a hokana noka li e na aanona, okwa tulila po aavali Aakriste oshiholelwa sha dhenga mbanda. Oshashike mbela? Okwa li a longo aalongwa ye nohole noneidhidhimiko okupitila moohapu nomiilonga. Okwa li e yu ulukile nkene ye na okulonga oshilonga shoka e ya pa. (Luk. 8:1) Omukalo ngoka Jesus a li u ungaunga naalongwa ye niikala ye oya li ye yu ulukile nkene ye na okukala nayakwawo.—Lesha Johannes 13:14-17.

12, 13. Oshike aavali ye na okuninga ngele oya hala oyana ya kale aatilikalunga?

¹² Aanona oye na egamo okuholela omikalo dhaavali yawo, kutya nduno omiwinayi nenge omiwanawa. Onkee ano, aavali, ipuleni ngeyi: ‘Oshiholelwa shini hatu tulile po aanona yetu kombinga yethimbo ndyoka hatu longitha okutala o-TV nokwiinyanyudha naandyoka hatu longitha okukonakona Ombiimbeli nokukutha ombiinga miilonga yomomapya? Oshike hatu pititha komeho muukwanegumbo wetu? Mbela ohatu ya tulile po oshiholelwa oshiwanawa mokuninga elongelokalunga lyashili oshinima sha simana monkalamwenyo yetu?’ Ompango yaKalunga oyi na okukala tango momitima dhaavali ngele oya hala oyana ya kale aatilikalunga.—Deut. 6:6.

¹³ Ngele aavali otaya kambadhala okutula miilonga omakotampango gOmbiimbeli monkalamwenyo yawo, oyana otaye ke shi mona. Aanona otaya ka nwethwa mo kwaashoka aavali haya popi nayo noku ya longa. Ihe ngele aanona oye shi mono mo kutya aavali yawo otaya li oompanda mbali, nena otaya ka kala ya dhina omakotampango gOmbiimbeli nenge ye ga tale ko kaage na oshilonga. Oshizemo, itaya ka vula okukondjitha omathiminiko ngoka tage ya zilile muuyuni.

14, 15. Omithikampango dhini aavali ye na okuthindila moyana, nomukalo gumwe taya vulu oku shi ninga oguni?

¹⁴ Aavali Aakriste oye shi kutya okuputudha okanona osha kwatela mo oshindji kaashi shi owala esiloshimpwiyu lyopalutu. Onkee ano, otashi ka kala sha nika uusama okuladhipika okanona ka kale owala nokulalakanena uuwanawa wopamaliko. (Omuuv. 7:12) Jesus okwa lombwele aalongwa ye ya pitithe komeho omithikampango nomalalakano gopambepo. (Mat. 6:33) Onkee ano, aavali Aakriste oye na okuholela Jesus mokukambadhala okuthindila moyana ehalo lyokulalakanena iinima yopambepo.

¹⁵ Omukalo gumwe ngoka aavali taya vulu oku shi ninga ogwo okukonga ethimbo opo oyana ya kale haya endathana naamboka ye li miilonga yethimbo lyu udha. Oshi li nawa unene opo aanona ya kale ye shaathane naakokolindjila nenge nomutonatelishikandjo nomukulukadhi gwe. Olundji ngele aatumwa, Aabetel nenge mboka haya longo iilonga yopaigwana yokutunga taya talele po, ohaya kala ye na iimoniwa iiwanawa mbyoka ya nyanyukilwa mokulongela Jehova. Iiholelwa yawo yokwiiyamba otayi vulu okukwatha aamwoye ya ninge omatokolo ge li pandunge, okwiitulila po omalalakano gopambepo nokumona elongo lye eleka opo ya vule okwiikwatha uuna ye li miilonga yethimbo lyu udha.

Aanona, oshike tashi ke mu kwathela mu landule oshiholelwa shaJesus?

16. Ongiini Jesus a li a simaneke aavali ye yokevi nosho wo He gwomegulu?

¹⁶ Aanona, Jesus okwe mu tulila po wo oshiholelwa sha dhenga mbanda. Okwa li a putudhwa kuJosef naMaria nokwa li a vulika kuyo. (Lesha Lukas 2:51.) Okwa li e shi kutya, nonando oya li inaaya gwanenena, Kalunga okwe yi inekelela oshinakugwanithwa shoku mu sila oshimpwiyu. Omolwaashoka Jesus okwa li e na oku ya simaneka. (Deut. 5:16; Mat. 15:4) Sho a koko, Jesus okwa li aluhe ha ningi iinima mbyoka tayi opalele He gwomegulu, naashika osha kwatela mo okukondjitha omamakelo. (Mat. 4:1-10) Aanona, otashi vulika omathimbo gamwe mu iyadhe tamu makelwa mwaaha vulike kaavali yeni. Oshike tashi ke mu kwathela mu landule oshiholelwa shaJesus?

17, 18. (a) Aagundjuka ohaya kala ya taalelwa komathiminiko geni kosikola? (b) Aagundjuka otaya ka kwathelwa okutinda omamakelo ngele taya dhimbulukwa shike?

¹⁷ Otashi vulika aanasikola ooyakweni kaye na ko nasha nomakotampango gOmbiimbeli. Otashi vulika ye ku thiminike wu longe shoka sha puka noku ku yola uuna itoo shi ningi. Mbela aanasikola ooyakweni ohaye ku ula nayi omathimbo gamwe molwaashoka inoo hala okukutha ombinga miinima yontumba pamwe nayo? Ngele osho, oho inyenge ngiini? Owu shi kutya ngele owa kwatwa kuumbanda nokulandula shoka taya ningi, oto ka yematitha aavali yoye nosho wo Jehova. Oshizemo oshini ngele owa landula aanasikola ooyakweni? Otashi vulika wi itulila po elalakano wu ka ninge omukokolindjila nenge omuyakuligongalo, wu ka kwathele miitopolwa moka mu na ompumbwe yaauvithi yUukwaniilwa nenge wu ka longe koBetel. Mbela eendathano naanasikola ooyakweni otali ku kwathele ngaa wu adhe omalalakano goye?

¹⁸ Mbela ne aagundjuka megongalo lyopaKriste ohamu iyadha moonkalo moka eitaalo lyeni tali makelwa? Ngele osho, ohamu ningi po shike? Dhiladhila koshiholelwa shoka Jesus e mu tulile po. Okwa li a tindi sho a makelwa nokukanyatela shoka e shi kutya oshu uka. Ngele owu shi shi, otashi ke ku kwathela wu lombwele aanasikola ooyakweni shu ukilila kutya ito ki imbwanga mumwe nayo wu longe shoka sha puka. Ngaashi Jesus, ukitha eitulomo lyoye ketegameno lyokulongela Kalunga nenyanyu onkalamwenyo yoye ayihe nokuvulika kuye.—Heb. 12:2.

Shoka sha pumbiwa opo uukwanegumbo wu kale nombili

19. Oshike hashi eta ombili yashili monkalamwenyo?

¹⁹ Jehova Kalunga naJesus Kristus oya halela aantu uuwanawa. Nonando inatu gwanenena, otatu vulu okukala tu na ombili. (Jes. 48:17, 18; Mat. 5:3) Jesus okwa longo aalongwa ye ooshili dhopambepo ndhoka tadhi ya etele ombili, ihe hadho adhike a li e ya longo. Okwa li e ya longo wo nkene ye na okukala nonkalamwenyo yi li nawa. Kakele kaashono, okwa li e ya thigile oshiholelwa shokukala nondjele monkalamwenyo nosho wo iikala iiwanawa. Kutya nduno onkandangala yetu muukwanegumbo oyini, atuheni otatu vulu okumona uuwanawa ngele tatu landula oshiholelwa she. Onkee ano, aasamane, aakulukadhi, aavali naanona, landuleni oshiholelwa shaJesus. Okulandula omalongo gaJesus noshiholelwa she, oshi li oshipatululo shokukala twa nyanyukwa notu na ombili muukwanegumbo.

Oto yamukula ngiini?

• Aasamane oye na okulongitha ngiini oonkondopangelo dhawo ndhoka ya pewa kuKalunga?

• Ongiini omukulukadhi ta vulu okulandula oshiholelwa shaJesus?

• Oshike aavali tayi ilongo momukalo ngoka Jesus a li u ungaunga naalongwa ye?

• Aanona otayi ilongo shike moshiholelwa shaJesus?

[Ethano pepandja 13]

Omulumentu omunahole oha ningi shike manga inaa ninga etokolo ndyoka lya guma uukwanegumbo?

[Ethano pepandja 14]

Onkalo yini tayi pe omukulukadhi ompito a ambidhidhe uukwamutse womulumentu gwe?

[Ethano pepandja 15]

Aanona ohaya holele omikalondjigilile omiwanawa dhaavali yawo