Vulikeni nokukala nomukumo ngaashi Kristus

“Inamu tila, ngame onda sinda uuyuni!”—JOH. 16:33.

1. Jesus okwa li a vulika kuKalunga shi thike peni?

JESUS KRISTUS okwa li a longo aluhe ehalo lyaKalunga. Ina dhiladhila nando okwaahavulika kuHe gwomegulu. (Joh. 4:34; Heb. 7:26) Ihe omolwonkalo ye kombanda yevi kasha li oshipu kuye okukala omuvuliki. Sho a tameke okuuvitha, aatondi yaJesus, mwa kwatelwa Satana, oya kambadhala oku mu itaalitha, oku mu thiminika nenge oku mu kengelela e ethe uudhiginini we. (Mat. 4:1-11; Luk. 20:20-25) Aatondi mboka oya li ye ehameke Jesus pamadhiladhilo nopalutu. Lwahugunina, oya li ye shi pondola oku mu dhipagitha komuti gwomahepeko. (Mat. 26:37, 38; Luk. 22:44; Joh. 19:1, 17, 18) Nonando okwa li a piti muudhigu auhe mboka, Jesus okwa kala ‘omuvuliki sigo omeso.’—Lesha Aafilippi 2:8.

2, 3. Oshike tatu vulu okwiilonga mevuliko lyaJesus nonando okwa li a mono iihuna?

² Oshimoniwa shaJesus e li omuntu kombanda yevi oshe mu longo iinima iipe kombinga yokuvulika. (Heb. 5:8) Osha fa Jesus a li itaa vulu okwiilonga sha natango kombinga yokulongela Jehova, molwaashoka okwa li a kala pamwe naJehova ethimbo ele noonkondo nokwa li e li “engomba” lye pethimbo lyeshito. (Omayel. 8:30) Ihe okwiidhidhimikila kwe meitaalo nokumona iihuna e li omuntu, oyu ulike kutya ye omudhiginini thiluthilu. Jesus, Omuna gwaKalunga, okwa li a koko pambepo. Otatu ilongo shike moshimoniwa she?

³ Nonando Jesus okwa li omuntu a gwanenena, ka li a kambadhala okuvulika kuye mwene, ihe okwa li a galikana kuKalunga e mu kwathele. (Lesha Aahebeli 5:7.) Opo tu kale aavuliki, otwa pumbwa okukala aaifupipiki nokugalikana aluhe kuKalunga e tu kwathele. Omolwetompelo ndika, omuyapostoli Paulus okwa li a kumagidha Aakriste a ti: “Okukala kweni naku kale kwa fa kwaJesus Kristus, oye okwi ifupipike nokwe ende ondjila yevuliko sigo omeso lye.” (Fil. 2:5-8) Jesus okwa li u ulike kutya otashi wapa opo aantu ya kale aavuliki nonando oye li muulipamwe waantu ya kolokosha. Ihe Jesus okwa li a gwanenena. Ongiini kombinga yetu tu li aantu inaatu gwanenena?

Natu vulike nonando inaatu gwanenena

4. Osha hala okutya ngiini sho twa shitwa nemanguluko lyokuninga omatokolo?

⁴ Kalunga okwa li a shiti Adam naEva ye li iishitwa yi na oondunge noye na emanguluko okuninga omatokolo. Tu li oluvalo lwawo, natse otu na emanguluko ndyoka. Shika osha hala okutya ngiini? Otashi ti otatu vulu okutokola okuninga shoka shu uka nenge shoka sha puka. Niitya yimwe, Kalunga okwe tu pa emanguluko tu hogolole ngele otwa hala okuvulika kuye nenge hasho. Ihe nonando otu na emanguluko enene lya tya ngaaka, otu na okwiihokolola kuye. Oshoshili kutya omatokolo getu monkalamwenyo otaga ti omwenyo nenge eso kutse. Ohaga nwetha mo wo aantu mboka ye tu dhingilila.

5. Atuheni otu na ekondjo lini, nongiini tatu vulu okupondola?

⁵ Molwaashoka otwa thigulula okwaahagwanenena, oshi li oshidhigu kutse tu kale hatu vulika. Kashi shi aluhe oshipu okuvulika koompango dhaKalunga. Kasha li oshipu kuPaulus okuvulika. Okwa nyola a ti: “Ondi wete ompango onkwawo yi li molutu lwandje tayi kondjitha ndjoka ya ziminwa komadhiladhilo gandje. Oyo oya kwata ndje, ndi kale omupika gwompango yuulunde yi li molutu lwandje.” (Rom. 7:23) Osha yela kutya oshipu okuvulika uuna inatu pumbwa okuninga eiyambo lyasha nenge okwiidhidhimikila uuwehame nuudhigu. Ihe otatu ki inyenga ngiini ngele opu na ekondjithathano pokati kokuvulika ‘nuuhalu wopantu okuhola mbyoka aantu taye yi tala’? Uuhalu mboka wa puka ohawu etwa kokwaahagwanenena kwetu nokenwethomo ‘lyombepo yuuyuni mbuka’ ndjoka ye tu dhingilila. Uuhalu mbuka owu na unene oonkondo. (1 Joh. 2:16; 1 Kor. 2:12) Opo tu wu kondjithe, otu na ‘okulongekidha omutima gwetu’ manga inaatu ya monkalo ondhigu nenge memakelo nokutokola toko okuvulika kuJehova, kutya nduno oshike tashi ningwa. (Eps. 78:8, NW) MOmbiimbeli omu na iiholelwa oyindji yaamboka ya li ye shi pondola molwaashoka oya li ya longekidha omitima dhawo.—Esra 7:10, NW; Dan. 1:8.

6, 7. Gandja eudhi nkene ekonakono lyopaumwene hali tu kwathele tu ninge omatokolo ge li mondjila.

⁶ Omukalo gumwe nkene tatu vulu okulongekidha omitima dhetu omokukonakona nuudhiginini Ombiimbeli nosho wo iileshomwa mbyoka ya kankamena kuyo. Dhiladhila ando owu li monkalo tayi landula. Natu tye ando ongulohi ndjoka esiku lyoye lyokukonakona paumwene. Owa li to galikana Jehova e ku kwathele wu tule miilonga shoka wi ilongo mOohapu dhe. Opo nduno oto dhiladhila ishewe kombinga yokutala okino yontumba ko-TV ongulohi yesiku tali landula. Owu uva nale kutya yamwe otaye yi popile, ihe owa tseya kutya otayi ulike iinima ya nyata nelongitho lyoonkondo.

⁷ Otashi vulika to dhiladhila komayele gaPaulus mAaefeso 5:3 ngoka taga ti: “One aantu yaKalunga, onkee itashi vulika, mokati keni tamu uvika oluhondelo niilonga ya nyata yoludhi kehe yolwiho.” Otashi vulika to dhiladhila wo omayele gaPaulus mAafilippi 4:8. (Lesha.) Sho to tedhatedha omayele ngoka ga nwethwa mo, ipula to ti: ‘Ngele onda pitike omutima gwandje nomadhiladhilo yi nwethwe mo kopolohalama ndjoka, mbela onda landula ngaa oshiholelwa shaJesus shokuvulika kuKalunga thiluthilu?’ Oto ka ninga po shike? Mbela oto ka tsikila ngaa okutala okino ndjoka?

8. Omolwashike sha puka ngele ihatu vulika komithikampango dhaJehova?

⁸ Otashi ka kala sha puka ngele ihatu vulika komithikampango dhaJehova, tashi vulika tatu dhiladhila kutya otatu vulu okukondjitha eendathano ewinayi, nonando eendathano ndyoka otashi vulika li kale lya kwatela mo elongithonkondo nomainyanyudho ga nyata. Pehala lyaashoka, otu na okwiigamena tse yene noyana yetu kenwethomo lya nyata lyombepo yaSatana. Pashiholelwa, aantu yamwe ohaya gwayeke omaholi koongudhi dhondunda opo kadhi umbwe kuuhwa, molwaashoka oye shi kutya ohawu vulu okuumba nokuli noongudhi ndhoka dha kola. Mbela natse katu na okukala twa tokola toko okwiigamena tse yene ‘komakotokelo omawinayi’ gaSatana?—Ef. 6:11.

9. Omolwashike tu na okukala twa tokola toko tu vulike kuJehova esiku kehe?

⁹ Konyala kehe siku otu na okuhogolola ngele otatu ka ninga ngaashi Jehova a hala nenge hasho. Ngele otwa hala oku ka hupa, otu na okuvulika kuKalunga nokomakotampango ge. Okulandula oshiholelwa shaKristus shokuvulika “sigo omeso” nokuli, otatu ulike kutya eitaalo lyetu olyashili. Uuna tatu shi ningi, Jehova ote ke tu yambeka. Jesus oku uvaneke a ti: “Ngoka ti idhidhimike sigo ehulilo, oye ta hupithwa.” (Mat. 24:13) Osha yela kutya natse otu na okukokeka omukumo gwa fa gwaJesus.—Eps. 31:24.

Jesus oshiholelwa dhingi shokukala nomukumo

10. Otatu vulu okwiiyadha momathiminiko geni, notu na okuninga shike kwaashoka?

¹⁰ Atuheni otwa pumbwa omukumo opo tu kondjithe iikala neihumbato ewinayi lyuuyuni mbuka we tu dhingilila. Aakriste ohaya thiminikwa kiinima ngaashi onyata yuuyuni, okulalakanena esimano, omauhupilo nosho wo omalongelokalunga, notayi vulu oku ya ningitha ya pilamene Jehova. Yamwe ohaya patanekwa kiilyo yomaukwanegumbo. Miilongo yimwe, iiputudhilolongo otayi humitha komeho unene noonkondo elongo lyoevolusi, naantu mboka inaayi itaala muKalunga oya simanekwa kunena. Katu na owala okukala twa mwenena omathiminiko ngoka. Otu na okukatuka oonkatu tu ga kondjithe nokwiigamena. Oshiholelwa shaJesus otashi tu ulukile nkene tatu vulu okupondola.

11. Ongiini okutedhatedha koshiholelwa shaJesus tashi vulu oku tu gwedhela omukumo?

¹¹ Jesus okwa lombwele aalongwa ye a ti: “Uuyuni otau ke mú hepeka. Ihe inamu tila, ngame onda sinda uuyuni!” (Joh. 16:33) Ka li i igandja nando komanwethomo guuyuni. Ine etha nando uuyuni wu mu imbe a gwanithe po iilonga ye yokuuvitha nenge wu mu ningithe a kale inaa dhiginina we omithikampango dhe shi na ko nasha nelongelokalunga lyashili neihumbato ewanawa, natse osho tu na okuninga. Megalikano, Jesus okwa popi aalongwa ye a ti: “Ngashika ngame ndaa shi gwomuuyuni, osho wo nayo kaye shi yomuuyuni.” (Joh. 17:16) Okukonakona oshiholelwa shaKristus shokukala nomukumo nokutedhatedha kusho, otashi vulu oku tu pa omukumo ngoka twa pumbwa tu kale twa yooloka ko kuuyuni.

Ilonga kuJesus okukala nomukumo

12-14. Gandja iiholelwa nkene Jesus a li u ulike omukumo.

¹² Jesus okwa li u ulike omukumo noonkondo muukalele we auhe. Okwa li a longitha oonkondopangelo dhe e li Omuna gwaKalunga, nokee na uumbanda “okwa yi motempeli e ta tidha mo ayehe ya li taa landa notaa landitha motempeli. Oye okwa tilehi iitafula yaapingakanithi yiimaliwa niipundi yaahalithi yoonguti.” (Mat. 21:12) Sho aakwiita ye ya oku mu kwata uusiku we wahugunina kombanda yevi, Jesus okwa li e na omukumo okugamena aalongwa ye sho a ti: ‘Ngele ongame tamu kongo, nena etheni aalumentu mbaka ya ye.’ (Joh. 18:8) Konima yokathimbo, okwa lombwele Petrus a shune mo egongamwele lye, shoka tashi ulike kutya ka li i inekela miikondjitho yokevi, ihe omuJehova.—Joh. 18:11.

¹³ Jesus okwa li a yaneke pomutenya nopwaahe na uumbanda aalongi aafundja nomalongo gawo ga puka. Okwe ya lombwele a ti: “Yayee, one aalongimpango naafarisayi, one aafudhime! One tuu mboka tamu edhile po osheelo [shUukwaniilwa wegulu] . . . Ohamu etha iinenenima yomompango; uuyuki, esilohenda nokwiinekelwa . . . [Ohamu] yogo oshitenga netemba kombanda, ihe meni omu udha eyugo nuukwaaneidhiliko.” (Mat. 23:13, 23, 25) Aalongwa yaJesus nayo oya pumbwa omukumo ngoka molwaashoka aawiliki yomalongelokalunga giifundja otaye ke ya hepeka nokudhipaga yamwe yomuyo.—Mat. 23:34; 24:9.

¹⁴ Jesus okwa li e na omukumo okukondjitha oompwidhuli. Oshikando shimwe, okwa li a tsakanekwa komulumentu ngoka e niwe koompwidhuli dhi na oonkondo nokapwa li pu na omuntu ngoka ta vulu oku mu manga nomalyenge. Jesus ka li a tila okutidha mo oompwidhuli ndhoka dha li momulumentu ngoka. (Mark. 5:1-13) Kunena, Kalunga ina pa Aakriste oonkondo dhokulonga iikumithalonga ya tya ngaaka. Ihe uuna tatu uvitha notatu longo aantu, natse otu na okukondjitha Satana molugodhi lwopambepo ngoka a ‘tsikitha omadhiladhilo gaamboka inaa itaala.’ (2 Kor. 4:4, OB-1954) Ngaashi moshinima shaJesus, iikondjitho yetu “kayi shi yomuuyuni mbuka, ihe oyo iikondjitho ya kola tatu yi pewa kuKalunga, tayi vulu okuhanagula po omapopilongulu omanene,” sha hala okutya, omalongo giifundja gomalongelokalunga ngoka ga thindilwa maantu. (2 Kor. 10:4) Otatu ilongo oshindji kuJesus mokulongitha iikondjitho mbika.

15. Omukumo gwaJesus ogwa li gwa kankamena koshike?

¹⁵ Jesus okwa li e na omukumo omolweitaalo lye, ihe hamolwaashoka e na ekuni. Natu mu holele. (Mark. 4:40) Ongiini tatu vulu okumona eitaalo lyashili? Natango, omokulandula oshiholelwa shaJesus. Okwa li e shi nawanawa Omanyolo nokwa li e na einekelo mugo thiluthilu. Jesus ka li a longitha egongamwele lyo lyenelyene, ihe egongamwele lyombepo, Oohapu dhaKalunga. Iikando niikando okwa li ha koleke omalongo ge mokutotha mOmanyolo. Olundji okwa li ha tameke oohapu dhe ta ti: “Okwa nyolwa,” nokupopya shoka shi li mOohapu dhaKalunga.a

16. Ongiini tatu vulu okukala neitaalo lya kola?

¹⁶ Opo tu kale neitaalo ndyoka tali vulu okukondjitha omamakelo ngoka haga adha aalongwa yaJesus, otu na okulesha Ombiimbeli noku yi konakona esiku kehe nokukala pokugongala kwopaKriste kehe. Kungeyi, otatu udhitha omadhiladhilo getu nooshili ndhoka dhi li ekankameno lyeitaalo lyetu. (Rom. 10:17) Otu na wo okukala hatu tedhatedha muule kombinga yaashoka tatu ilongo, opo shi ningine momitima dhetu. Eitaalo ndyoka li na omwenyo olyo owala tali vulu oku tu inyengitha tu longe nomukumo. (Jak. 2:17) Otu na wo okugalikana tu pewe ombepo ondjapuki molwaashoka eitaalo oli li shimwe shomiiyimati yombepo.—Gal. 5:22.

17, 18. Ongiini omumwameme gumwe omugundjuka a li u ulike omukumo kosikola?

¹⁷ Omumwameme omugundjuka gwedhina Kitty okwa li a mono nkene eitaalo lyashili hali tu pe omukumo. Okuza kuunona we, okwa li e shi kutya ka li e na ‘okusa evaangeli ohoni’ kosikola, nokwa li a hala lela okugandja uunzapo kaalongwa ooyakwawo. (Rom. 1:16) Omumvo kehe okwa li a tokola toko okuuvithila yakwawo onkundana ombwanawa, ihe ka li e na omukumo oku shi ninga. Sho e na omimvo omulongo naheyali lwaampono, okwa li a yi kosikola yimwe. Okwa ti: “Oshikando shika itandi ka hepitha we ompito ndjoka te mono yokuuvitha.” Kitty okwa galikana a pewe omukumo gwa fa gwaKristus, oondunge nompito tayi opalele oku shi ninga.

¹⁸ Esiku lyetameko lyosikola, aalongwa oya li ya pulwa yi ipopye koogumwe noogumwe. Yamwe oya li ya popi omaitaalo gawo noya ti kutya ihaaya kutha naanaa ombinga miinima yomalongelokalunga. Kitty okwe shi dhimbulula kutya ompito ndjoka oyo a li a pula megalikano. Sho olufo lwe lwa thiki, okwa popi nomukumo a ti: “Ngame ondi li gumwe gwomOonzapo dhaJehova, nOmbiimbeli oyo hayi wilike ndje ngele tashi ya miinima yopambepo noyopamikalo.” Omanga ta popi, aalongwa yamwe oye shi ulike kiipala yawo kutya oye li ompinge naye. Ihe yalwe oya li ya pulakene nawa nokonima oya pula omapulo. Omulongi okwa li a popi kutya Kitty oku li oshiholelwa oshiwanawa shokupopila eitaalo lye. Kitty okwa pandula unene koshiholelwa shaJesus shokukala nomukumo.

Ulika eitaalo nomukumo gwa fa gwaKristus

19. (a) Osha kwatela mo shike okukala neitaalo lyashili? (b) Ongiini tatu vulu okunyanyudha Jehova?

¹⁹ Aayapostoli nayo oya li ye shi mono kutya okulonga kwawo nomukumo oku na okukala kwa kankamena keitaalo. Oya pula Jesus ya ti: “Tu gwedhela eitaalo.” (Lesha Lukas 17:5, 6.) Okukala neitaalo lyashili, kashi shi owala okwiitaala kutya Kalunga oko e li. Osha kwatela mo okukala nekwatathano lyopothingo naye lya faathana naandyoka okanona okashona haka kala ke na nahe omunambili nomunahole. Salomo okwa nwethwa mo a nyole ta ti: “Mumwandje, omwenyo gwoye ngele tagu ningi oondunge, nena omwenyo gwandje otagu nyanyukwa; omutima gwandje otagu ligola, ngele omilungu dhoye tadhi popi shoka shu uka.” (Omayel. 23:15, 16) Sha faathana, ngele otu na omukumo okutula miilonga omakotampango gaJehova, otashi ke mu nyanyudha nontseyo ndjika otayi humitha komeho omukumo gwetu. Onkee ano, natu landuleni aluhe oshiholelwa shaJesus nokukala tu na omukumo okulonga shoka shu uka.

[Omanyolo gopevi]

Oto vulu okuyelitha?

• Oshike tashi tu kwathele tu kale aavuliki nonando inatu gwanenena?

• Eitaalo lyashili olya kankamena kushike, notali tu kwathele ngiini okukala nomukumo?

• Otatu ka mona uuwanawa washike ngele ohatu vulika nokuulika omukumo gwa fa gwaKristus?

[Ethano pepandja 16]

Mbela owa longekidha omutima gwoye wu kondjithe omamakelo?

[Ethano pepandja 18]

Ngaashi Jesus, natse otatu vulu okuulika omukumo gwa kankamena keitaalo