Ombepo ondjapuki oshike?
OSHIKANDO shimwe Jesus okwa pula aalongwa ye a ti: “Omuvali olye gwomokati keni, omwana ngele te mu indile ohi, te mu pe eyoka? Nenge te mu indile eyi, ye te mu pe ondje?” (Lukas 11:11, 12) Aanona muGalilea oya li ye hole okulya omayi noohi noya li ya tseya nawa iikulya mbyoka.
Jesus okwa ti kutya otu na okwiindila twa mana mo ombepo ondjapuki, ngaashi okanona taka pula iikulya. (Lukas 11:9, 13) Okuuva ko uukwatya wombepo ondjapuki otashi ke tu kwathela tu uve ko nawa onkandangala ya simana ndjoka tayi dhana monkalamwenyo yetu. Ngashingeyi natu ka taleni shoka Ombiimbeli tayi ti kombinga yombepo ondjapuki.
‘Oonkondo dhaKalunga gwokombandambanda’
Omanyolo oge shi popya sha yela kutya ombepo ondjapuki oyo oonkondo ndhoka Kalunga ha longitha okugwanitha po ehalo lye. Sho omuyengeli Gabriel a li a lombwele Maria kutya ota ka mona okanona nonando okwa li omukadhonalela natango, omuyengeli okwa ti: “Ombepo Ondjapuki otayi ku lambele, noonkondo dhaKalunga gwokombandambanda otadhi ku siikile. Onkee ano omunona nguka ota ka lukwa Omuna gwaKalunga.” (Lukas 1:35) Oohapu dhaGabriel otadhi ulike kutya, opu na ekwatathano pokati kombepo ondjapuki “noonkondo dhaKalunga gwokombandambanda.”
Edhiladhilo ndyoka otali holoka natango membo limwe lyOmbiimbeli. Omupolofeti Mika okwa ti: “OMUWA otu udha ndje nombepo ye noonkondo.” (Mika 3:8) Jesus oku uvanekele aalongwa ye a ti: “One otamu ka pewa oonkondo, uuna Ombepo Ondjapuki ta ka tililwa mune.” (Iilonga 1:8) Omuyapostoli Paulus okwa li a popi wo kombinga ‘yoonkondo dhOmbepo Ondjapuki.’—Aaroma 15:13, 19.
Oohapu ndhoka dhi li metetekelo otadhi tu kwathele tu thike pehulithodhiladhilo lini? Olyo kutya opu na ekwatathano pokati kombepo ondjapuki nosho wo oonkondo dhaKalunga. Jehova oha longitha oonkondo dhe okupitila mombepo ondjapuki. Oku shi popya paufupi, ombepo ondjapuki oyo oonkondo dhaKalunga tadhi longo. Oonkondo ndhoka kadhi shi tuu oonkumithi! Itatu ke shi uva ko naanaa kutya oonkondo dhi thike peni dha li dha pumbiwa mokushita ewangandjo. Jehova okwa popya okupitila momupolofeti Jesaja a ti: “Tala owala utale kegulu! Olye a shiti oonyothi ndhoka wa tala? Oye ngoka te dhi enditha dha fa etangakwiita. Adhihe okwe dhi tseya nawa, nokehe yimwe ote yi tumbula kedhina lyayo! Oonkondo dhe oonenenene, odha kolelela nokape na ndjoka e yi hunutha po.”—Jesaja 40:26.
Ombiimbeli oye shi ulika kutya ewangandjo alihe nomalandulathano galyo oge li po ‘omolwoonkondo oonenenene’ dhaKalunga Omukombandambanda. Osha yela kutya oonkondo dhaKalunga itadhi vulu okuyelekwa nasha, nokukala po kwetu okwi ikolelela kudho. —Tala oshimpungu “Iilongankondo yombepo ondjapuki.”
Jehova oha longitha ombepo ondjapuki inaashi monika nando onale, ngaashi e yi longitha mokushita ewangandjo. Ohe yi longitha wo okukwathela iishitwa ye yi li aantu. MOmbiimbeli omu na iiholelwa oyindji mbyoka tayi ulike nkene oonkondo dhaKalunga ndhoka tadhi longo dha li dha nkondopaleke aapiya ye.
“Ombepo yOmuwa oya lambele ndje”
Uukalele waJesus otawu ulike nawa nkene ombepo ondjapuki yaKalunga hayi vulu okupa aapiya ye oonkondo. Jesus okwa lombwele aantu muNasaret a ti: “Ombepo yOmuwa oya lambele ndje.” (Lukas 4:18) Jesus okwa li a ningi shike kekwatho ‘lyoonkondo dhOmbepo Ondjapuki’? (Lukas 4:14) Okwa li a aludha uuvu kehe, okwa lotitha iikungulu mefuta, okwa palutha aantu omayovi niikwiila iishona noohi, nokwa yumudha wo aasi. Omuyapostoli Petrus okwa hokolola Jesus e li “omulumentu a hogololwa kuKalunga. Kalunga okwe shi hololele kiilongankondo, kiikumithalonga nokomandhindhiliko ngoka Kalunga e mu longitha.”—Iilonga 2:22.
Ombepo ondjapuki kunena ihayi ningitha iikumithalonga ya tya ngaaka. Ihe nonando ongaaka, otayi vulu oku tu ningila iinima iikumithi. Jehova oha pe aapiya ye nehalo ewanawa ombepo ondjapuki, ngaashi Jesus a shilipalekele aalongwa ye. (Lukas 11:13) Kungeyi, omuyapostoli Paulus okwa li a vulu okupopya ta ti: “Ayihe otandi yi vulu munguka ta koleke ndje.” (Aafilippi 4:13, OB-1954) Mbela ombepo ondjapuki otayi vulu okudhana onkandangala ya tya ngaaka monkalamwenyo yoye? Oshitopolwa tashi landula otashi ka yamukula epulo ndyoka.
[Oshimpungu/Ethano pepandja 5]
Omolwashike ombepo ondjapuki kayi shi omuntu?
Ombiimbeli otayi yeleke ombepo ondjapuki nomeya. Kalunga oku uvanekela oshigwana she onakuyiwa ya yambekwa sho a ti: “Otandi ka poolela omeya mevi lya sa enota nokutondokitha omilonga puukukutu. Ongame tandi tilile Ombepo yandje kombanda yaana yeni nomayambeko gandje kombanda yoluvalo lweni.”—Jesaja 44:3.
Uuna Kalunga ta tilile ombepo ye kaapiya ye, otaya kala yu “udha Ombepo Ondjapuki” nenge yu “udhithwe Ombepo Ondjapuki.” Jesus, Johannes Omuninginithi, Petrus, Paulus, Barnabas naalongwa mboka ya li ya gongala mesiku lyOpentekoste 33 E.N., ayehe otaya popiwa yu udha nenge yu udhithwa ombepo ondjapuki.—Lukas 1:15; 4:1; Iilonga 4:8; 9:17; 11:22, 24; 13:9.
Ipula ngeyi: Mbela omuntu oha vulu ‘okutililwa’ mooyakwawo oyendji? Mbela oto vulu okutya omuntu gumwe ohu ‘udhitha’ ongundu ayihe yaantu? Itashi vulika. Ombiimbeli otayi popi kutya aantu oya li yu udhithwa uunongo, oondunge nontseyo yashili, ihe inayi popya nando omuntu u udhithwa omuntu omukwawo.—Eksodus 28:3; 1 Aakwaniilwa 7:14; Lukas 2:40; Aakolossa 1:9.
Oshitya shOshigreka shoka sha tolokwa “ombepo” osho pneuʹma shoka tashi gandja wo edhiladhilo lyoonkondo ihaadhi monika. Embo lyaVine Expository Dictionary of New Testament Words otali ti kutya oshitya pneuʹma “otashi gandja unene tuu edhiladhilo lyombepo . . . nosho wo omufudho, ngaashi owala ombepo ndjoka hayi pepe, ihayi monika, ihayi vulu okugumwa noyi na oonkondo.”
Onkee ano, osha yela kutya ombepo ondjapuki kayi shi omuntu.a
[Enyolo lyopevi]
a Opo wu mone uuyelele owundji, tala “Oshili kombinga yaHe, yOmwana noyombepo ondjapuki” pepandja 201-204 membo Omalongo gashili gOmbiimbeli ogeni naanaa? lya nyanyangidhwa kOonzapo dhaJehova.
[Edhina lyomuthaneki]
Photodisc/SuperStock