Ombepo yaKalunga oya kala nokuwilika aapiya ye okuza konale sigo okunena
“Ombepo oye tuu ngoka gumwe, ngoka ta longo ayihe mbika.”—1 KOR. 12:11.
1. Oshike tatu ka kundathana moshitopolwa shika?
OSHIKE ho dhimbulukwa ngele wu uvu oshitya Pentekoste? Otashi vulika ho dhimbulukwa iiningwanima yituntula mbyoka ya li ya ningwa sho aalongwa yaJesus ya li ya tililwa ombepo ondjapuki. (Iil. 2:1-4) Shoka osha li shu ulike kutya Kalunga okwa li a tameke okuwilika aapiya ye momukalo omupe. Moshitopolwa sha zi ko otwa kundathana nkene ombepo yaKalunga ya li ya kwathele aapiya ye yonale aadhiginini ya longe iilonga momikalo tadhi kumitha. Mwaashika otatu ka kundathana nkene ombepo yaKalunga ya li ya wilike aapiya ye yonale manga egongalo lyopaKriste inaali totwa nokonima sho lya totwa. Otatu ka tala wo uuwanawa mboka Aakriste haya mono omolwekwatho lyombepo ondjapuki.
“Ongame omupiya gwaJehova”
2. Maria okwa li a mono ombepo ondjapuki tayi longo momikalo dhini?
2 Sho ombepo ondjapuki ya li ya tililwa aalongwa mboka ya li mondjugo onene yopombanda muJerusalem, Maria naye opo a li. (Iil. 1:13, 14) Ihe omimvo dha konda 30, manga shoka inaashi ningwa, Maria okwa li a mono nkene ombepo yaJehova tayi longo momikalo omindhindhilikwedhi. Jehova okwa li a lundululile omwenyo gwOmwana okuza megulu moshivalelo shaMaria, nonando Maria ka li a hokanwa. Kungawo, okwa li a ningi omusimba kekwatho ‘lyombepo ondjapuki.’—Mat. 1:20.
3, 4. Maria okwa li u ulike iikala yini, nongiini tatu vulu oku mu holela?
3 Omolwashike Maria a li a pewa uuthembahenda wu thike mpoka? Konima sho omuyengeli e mu yelithile shoka Kalunga te ke mu ningila, Maria okwa ti: ‘Ongame omupiya gwaJehova. Nandi ningwe ngaashika wa ti.’ (Luk. 1:38, yelekanitha NW.) Oohapu ndhoka otadhi ulike iikala yomutima gwaMaria. Momukalo moka a yamukula otagu ulike kutya okwa li a zimine oshinima shoka nehalo ewanawa. Ka li ti ipula kutya aantu momudhingoloko otaye ke mu tila ngiini ngele a ningi omusimba nenge a kale ti ipula kutya pamwe Josef ita ka kala we a hala oku mu hokana. Sho Maria a popi neifupipiko kutya ye omupiya gwaJehova, oku ulike kutya okwe mu inekela thiluthilu.
4 Mbela omathimbo gamwe oho kala wu uvite wa gwililwa po komaupyakadhi nenge kiinakugwanithwa mbyoka wu na mehangano lyaJehova? Oshi li nawa kehe gumwe gwomutse i ipule ta ti: ‘Mbela ohandi ningi ngaa iinima metsokumwe nehalo lyaJehova? Mbela ohandi longele ngaa kumwe nooyakwetu?’ Kala wu shi kutya Kalunga oha gandja ombepo ye kwaamboka ye mu inekela thiluthilu nokwaamboka haya vulika kuunamapangelo we.—Iil. 5:32.
Petrus okwa li a kwathelwa kombepo ondjapuki
5. Omomikalo dhini ombepo ondjapuki ya li ya kwathele Petrus pOpentekoste 33 E.N.?
5 Ngaashi Maria, omuyapostoli Petrus naye okwa li a kwathelwa kombepo ondjapuki mesiku lyaPentekoste 33 E.N. Jesus okwa li a pe Petrus nosho wo aayapostoli yalwe oonkondo ya tidhe mo oompwidhuli. (Mark. 3:14-16) Nonando Ombiimbeli itayi gandja uuyelele owundji kombinga yaashoka, otashi vulika Petrus oye a li a longitha oonkondo ndhoka. Ombepo yaKalunga oya li wo ya kwathele Petrus e ye kuJesus te ende kombanda yomeya gEfuta lyaGalilea sho Jesus e mu lombwele e shi ninge. (Lesha Mateus 14:25-29.) Ano osha yela kutya Petrus okwa li i inekela kutya ombepo ondjapuki otayi vulu oku mu kwathela a longe iilongankondo. Konima yaashoka, ombepo ondjapuki oya li ya kwathele Petrus naalongwa ooyakwawo momikalo dhilwe.
6. Ombepo ondjapuki oya li ya kwathele Petrus a ninge shike mesiku lyaPentekoste 33 E.N. nokonima yalyo?
6 Mesiku lyaPentekoste 33 E.N., Petrus naalongwa ooyakwawo oya li ya kwathelwa pashikumithalonga kombepo ondjapuki ya popye omalaka gaakwiilongo mboka ya li taya talele po muJerusalem. Mesiku moka Petrus oye a li a popitha engathithi lyaantu. (Iil. 2:14-36) Omathimbo gamwe Petrus okwa li ha kala a tila aantu, ihe esiku ndyoka okwa li a popi nuulaadhi, nonando oya li taya ningilwa omatilitho nokumonithwa iihuna. (Iil. 4:18-20, 31) Ombepo yaKalunga oya li ye mu kwathele. (Iil. 5:8, 9) Okwa li wo a yumudha aasi.—Iil. 9:40.
7. Iinima yini mbyoka Jesus a longo aantu ya li ya yelele Petrus konima sho a ningi omugwayekwa?
7 Petrus okwa li u uvite ko nale iinima yimwepo oyindji mbyoka Jesus a li a longo aantu, nokuli manga esiku lyaPentekoste inaali thikana. (Mat. 16:16, 17; Joh. 6:68) Ihe opwa li pu na iinima yimwe mbyoka Jesus a longo aantu ya li inaayi yelela nawa Petrus, nokwa li e yi uvu ko owala konima yOpentekoste. Pashiholelwa, ka li u uvite ko nawa kutya Kristus ota ka yumudhwa konima yomasiku gatatu nolutu lwopambepo nosho wo kutya Uukwaniilwa waKalunga otawu ka kala megulu. (Joh. 20:6-10; Iil. 1:6) Ka li u uvite ko kutya otashi ke enda ngiini opo aantu yopanyama ya ka ninge iishitwa yopambepo noku ka pangela mUukwaniilwa womegulu. Oshinima shoka okwe ke shi uva ko owala sho a ninginithwa nombepo ondjapuki nokupewa etegameno lyomegulu.
8. Aagwayekwa nosho wo ‘oonzi dhilwe’ oye na ontseyo yashike?
8 Aalongwa yaJesus oya li owala yu uvu ko nawa iinima mbyoka a longa aantu konima sho ya tililwa ombepo ondjapuki. Mboka ya nyola omanyolo gOshigreka oya li ya wilikwa kuKalunga ya nyole iinima tayi kumitha yi na ko nasha nelalakano lyaJehova omolwuuwanawa wetu. (Ef. 3:8-11, 18) Aakriste aagwayekwa nosho wo ‘oonzi dhilwe,’ ohaya paluthwa pambepo okuza konzo yimwe. (Joh. 10:16) Mbela oho pandula ngaa ontseyo nosho wo euvoko lyOmbiimbeli ndyoka wu na omolwekwatho lyombepo ondjapuki?
Paulus ‘oku udhithwa ombepo ondjapuki’
9. Ombepo ondjapuki oya li ya kwathele Paulus a ningi shike?
9 Saulus ngoka konima yethimbo a ka tseyika nedhina Paulus, okwa li a pewa omagano gombepo ondjapuki. Shoka osha li sha ningwa pwa pita omumvo gumwe lwaampono konima yOpentekoste. Ombepo oya li ya kwathele omuyapostoli Paulus a ninge iinima momikalo ndhoka tadhi tu etele uuwanawa kunena. Okwa li a wilikwa kuKalunga a nyole omambo 14 gOmbiimbeli. Ombepo yaKalunga ndjoka ya li ya kwathele Petrus, oya li wo ya kwathele Paulus u uve ko nawa noku nyole kombinga yetegameno lyoku ka kala nomwenyo megulu ihaagu si noihaagu yonuka. Oya li wo ya kwathele Paulus a aludhe aavu, a tidhe mo oompwidhuli noku yumudhe aasi. Ohayi kwathele wo aapiya yaKalunga kunena ya longe ehalo lye, nonando ihaya longo iikumithalonga.
10. Ombepo ondjapuki oya li ya kwathele Paulus a popye momukalo guni?
10 Sho Paulus ‘u udhithwa ombepo ondjapuki,’ okwa li a popi nuulaadhi nompulile yimwe. Omupangeli gwaKipro okwa li i inyenge ngiini sho a pulakene oonkundathana adhihe ndhoka? Okwi itaale oshili, molwaashoka okwa li a “kuminwa noonkondo elongo ndyoka tali popi Omuwa.” (Iil. 13:8-12) Paulus okwa li e shi kutya ombepo yaKalunga oyo owala tayi vulu oku mu kwathela a popye oshili. (Mat. 10:20) Konima yethimbo okwa li a pula egongalo lyomuEfeso li mu indilile opo Kalunga e mu pe ‘oohapu ndhoka e na okupopya.’—Ef. 6:18-20.
11. Ongiini ombepo ondjapuki ya li ya wilike Paulus?
11 Ombepo ondjapuki oya li ya kwathele Paulus a vule okupopya, ihe omathimbo gamwe oya li ye mu keelele kaa uvithile miitopolwa yimwe. Ombepo yaKalunga oya kala noku mu wilika molweendo lwe lwuutumwa. (Iil. 13:2; lesha Iilonga 16:6-10.) Sigo okunena iilonga yokuuvitha otayi wilikwa kombepo yaJehova. Ngaashi Paulus, aapiya ye ayehe ohaya uvitha oshili nuulaadhi nonomukumo. Nonando Kalunga ihe tu wilike momukalo moka a li a wilike Paulus, otu na uushili kutya oha longitha ombepo ye opo oshili yi thike kwaamboka ye na omitima dhu uka.—Joh. 6:44.
“Omaunkulungu gi ili nogi ili gokuyakula”
12-14. Yelitha nkene ombepo yaKalunga hayi longo maapiya ye momikalo dha yoolokathana.
12 Mbela omahokololo kombinga yankene Jehova a li a yambeke egongalo lyaagwayekwa methelemumvo lyotango, otaga ladhipike ngaa aapiya ye yokunena? Osho lela. Molwaashoka Paulus okwa li a wilikwa kuKalunga a nyolele egongalo lyomuKorinto shi na ko nasha nomagano gopambepo a ti: ‘Omagano gopambepo oge li po ogendji gi ili nogi ili, ihe ombepo gumwe awike te ga gandja. Oku na oompito dhomayakulo dhi ili nodhi ili, ihe Omuwa ngoka ta yakulwa, gumwe awike. Oku na omaunkulungu gi ili nogi ili gokuyakula, ihe Kalunga gumwe awike ngoka ta pe kehe gumwe uunkulungu momayakulo agehe.’ (1 Kor. 12:4-6, 11) Ano Kalunga oha longitha ombepo ye ondjapuki momikalo dha yoolokathana noha longitha aapiya ye yi ili noyi ili ya gwanithe po elalakano lye. Osha yela kutya aapiya yaKalunga ayehe otaya vulu okupewa ombepo ondjapuki, kutya nduno oomboka ‘yomoshigunda oshishona’ shaKristus nenge ‘oonzi dhilwe.’ (Luk. 12:32; Joh. 10:16) Ihe shoka tu na okudhimbulukwa osho kutya ombepo ondjapuki ohayi kwathele oshilyo kehe shegongalo momukalo gwi ili.
13 Pashiholelwa, aakuluntugongalo ohaya langekwa po mewiliko lyombepo ondjapuki. (Iil. 20:28) Ihe haagwayekwa nombepo ayehe ya langekwa po ye li aakuluntugongalo. Shika otashi tu kwathele tu uve ko kutya ombepo yaKalunga ohayi longo momikalo dhi ili nodhi ili miilyo yegongalo.
14 Ombepo ndjoka ya pewa aagwayekwa ya ninge “aana yaKalunga” nenge oyanamati, oyo tuu ndjoka Jehova Kalunga a li a longitha sho a yumudha Omwana epona opo a kale nomwenyo ihaagu si megulu. (Lesha Aaroma 8:11, 15.) Oyo wo Jehova a longitha okushita iinima ayihe megulu nokombanda yevi. (Gen. 1:1-3) Ombepo ndjoka oyo Jehova a li a longitha mokukwathela Bezalel a longe iilonga yuunkulungu, ya nkondopaleke Simson a longe iilonga mbyoka tayi pula oonkondo dhi ikalekelwa noyo wo ya li ya kwathele Petrus e ende kombanda yomeya. Onkee ano, opu na eyooloko pokati kokuwilikwa kombepo ondjapuki nokugwayekwa nombepo ondjapuki. Okugwayekwa nombepo ondjapuki oku li omukalo gumwe gwi ikalekelwa moka ombepo ye hayi longo. Kalunga oye ha hogolola aagwayekwa.
15. Yelitha ngele Jehova ota ka kala nokuninginitha aapiya ye nombepo ondjapuki sigo aluhe.
15 Ombepo yaKalunga oya kala nokulonga momikalo dhi ili nodhi ili maapiya ye aadhiginini uule womimvo odhindji, nokuli manga okugwayekwa nombepo inaaku tameka. Okugwayekwa nombepo okwa li kwa tameke tangotango mesiku lyaPentekoste 33 E.N., ihe kaku li oshinima tashi kalelele. Okuninginithwa nombepo otaku ka hula po, ihe ombepo ondjapuki otayi ka tsikila nokukwathela aapiya yaKalunga, opo ya kale nokulonga ehalo lye aluhe sigo aluhe.
16. Ombepo ondjapuki ohayi kwathele aapiya yaKalunga ya ninge shike kunena?
16 Oshike tashi longwa kombanda yevi kunena mewiliko lyombepo ondjapuki? Ehololo 22:17 otali ti: “Ombepo nomuyalekwa otaa ti: ‘Ila!’ Kehe ngoka tu uvu ko, na tye: ‘Ila!’ Kehe ngoka a sa enota, ne ye; naangoka a hala, na taambe omeya gomwenyo omagano.” Aakriste kunena otaya wilikwa kombepo yaKalunga ya hiye ‘kehe ngoka a hala’ e ye a taambe omeya gomwenyo. Aagwayekwa oyo taya kwatele komeho iilonga yokuhiya notaya kwathelwa koonzi dhilwe. Oongundu adhihe ndhoka mbali, ohadhi gwanitha po iilonga mbyoka kekwatho lyombepo ondjapuki. Ohadhi igandjele Jehova nohadhi ninginithwa ‘medhina lyaHe nolyOmwana nolyombepo ondjapuki.’ (Mat. 28:19) Oongundu adhihe mbali ohadhi imike iiyimati yombepo monkalamwenyo yadho. (Gal. 5:22, 23) Oonzi dhilwe nadho ohadhi kwathelwa kombepo ondjapuki ngaashi aagwayekwa. Ohayi dhi kwathele dhi ninge ngaashi tadhi vulu, opo dhi kale dha yogoka koshipala shaJehova.—2 Kor. 7:1; Eh. 7:9, 14.
Natu kaleni nokupula ombepo ondjapuki
17. Oshike tashi ka ulika kutya otu na ombepo yaKalunga?
17 Kutya nduno otu na etegameno lyoku ka kala nomwenyo sigo aluhe megulu nenge okombanda yevi, Jehova ote tu pe “oonkondo dhi vule ndhoka dhopaunshitwe,” opo tu kale aadhiginini notu ka mone ondjambi. (2 Kor. 4:7, NW) Aantu otashi vulika ye ke tu sheke sho tatu tsikile okuuvitha onkundana ombwanawa yUukwaniilwa. Ihe natu kale tu shi kutya ‘ngele tatu shekwa molwaashoka twa landula Kristus, otse aanelago, oshoka ombepo yuuyelele, ombepo yaKalunga, oyi li kombanda yetu.’—1 Pet. 4:14.
18, 19. Otu na okuninga shike opo Jehova e tu pe ombepo ye ondjapuki, notwa tokola toko okuninga shike?
18 Kalunga oha pe ayehe mboka taye mu kongo nomutima aguhe ombepo ye ondjapuki, nopwaahe na oku ya pula sha. Ohayi tu kwathele tu hwepopaleke uunkulungu wetu notu ninge ashihe shoka tatu vulu miilonga ye. Ombiimbeli otayi ti: “Kalunga oye mwene ta longo aluhe mune oku mú pa ehalo noonkondo, opo a tsakanithe elalakano lye ewanawa.” Omagano gombepo ondjapuki nosho wo oonkambadhala dhetu dha mana mo ‘dhokuuvitha ohapu yomwenyo,’ otadhi ke tu kwathela tu ‘longe nokutila nokukakama molwehupitho lyetu.’—Fil. 2:12, 13, 16.
19 Onkee ano, natu kaleni twi inekela lela mombepo yaKalunga, natu kale aadhiginini miilonga ye nokuninga oonkambadhala, opo tu kale nokuhwepopala mukehe oshilonga shoka e tu pa tu longe notu kale hatu pula aluhe ekwatho kuye. (Jak. 1:5) Ote ke tu pa ekwatho ndyoka twa pumbwa tu uve ko Ombiimbeli, twi idhidhimikile oothina notu uvithe onkundana ombwanawa. Ombiimbeli otayi ti: “Indileni, e tamu pewa; kongeni, e tamu mono; konkoleni, e tamu egululwa.” Shika osha kwatela mo wo okupula ombepo ondjapuki. (Luk. 11:9, 13) Ano natu kaleni nokupula ombepo yaJehova yi tu wilike ngaashi aapiya ye aadhiginini yonale noyokunena.
Oto vulu okuyelitha?
• Iikala ya fa yaMaria yini tu na okukokeka mbyoka tayi ke tu petha omayambeko?
• Omomikalo dhini ombepo ondjapuki ya li ya kwathele Paulus?
• Ombepo ondjapuki ohayi wilike ngiini aapiya yaKalunga kunena?
[Ethano pepandja 24]
Ombepo yaKalunga oya li ya kwathele Paulus a kondjithe oompwidhuli
[Ethano pepandja 26]
Ombepo ondjapuki ohayi kwathele Aakriste kunena kutya nduno oye na etegameno lini