Omagalikano goye otaga holola shike kombinga yoye?

“Ongoye nguka ho uvu omagalikano. Aantu ayehe otaye ya kungoye.”—EPS. 65:2.

1, 2. Omolwashike aapiya yaJehova ye na okugalikana kuye neinekelo?

JEHOVA ihi ipwililikile nando omaindilo gaapiya ye aadhiginini. Otatu vulu okukala neinekelo kutya ohe tu uvu. Nonando Oonzapo dhaJehova omamiliyona odhi galikane kuye poshikando shimwe, ohu uvu omagalikano gadho agehe.

² Omupisalomi David okwa li e na einekelo kutya Kalunga ohu uvu omagalikano sho i imbi a ti: “Ongoye nguka ho uvu omagalikano. Aantu ayehe otaye ya kungoye.” (Eps. 65:2) Omagalikano gaDavid oga li ga yamukulwa molwaashoka okwa li ha longele Jehova nuudhiginini. Oshi li nawa tu ipule tatu ti: ‘Mbela omaindilo gandje ohagu ulike ngaa kutya ondi inekela muJehova nonda lenga elongelokalunga lya yogoka? Omagalikano gandje otaga holola shike kombinga yandje?’

Galikana kuJehova neifupipiko

3, 4. (a) Iikala yini tu na okukala tu na uuna tatu galikana kuKalunga? (b) Oshike tu na okuninga ngele tatu piyaganekwa komadhiladhilo omawinayi omolweyono lya kwata miiti?

³ Opo Kalunga a yamukule omagalikano getu, otu na oku shi ninga neifupipiko. (Eps. 138:6) Otu na okupula Jehova e tu konakone ngaashi David a ningi sho a ti: “Konakona ndje, Kalunga, ngoye u tseye omutima gwandje; tala ndje, u dhimbulule omadhiladhilo gandje. Tala ndje, ngele ndi li mondjila ndjoka yu uka kekano, u endithile ndje mondjila yaaluhe.” (Eps. 139:23, 24) Katu na owala okukala hatu galikana, ihe otu na wo okwiigandja kuKalunga nokuvulika komayele ngoka ge li mOohapu dhe. Jehova ota vulu oku tu wilika tu ende “mondjila yaaluhe,” noku tu kwathela tu ka mone omwenyo gwaaluhe.

⁴ Ongiini ngele otwa gwililwa po komadhiladhilo omawinayi omolweyono lya kwata miiti? (Lesha Episalomi 32:1-5.) Ngele otwa kala neiyuvo tali tu pe uusama otashi vulu oku tu kutha oonkondo ngaashi omiti hadhi kala dha kukuta pethimbo lyokwenye. David okwa li a kanitha ombili notashi vulika a li te ehama omolweyono lye. Ihe ka li tuu a pepelelwa sho e li hempululile Kalunga! Dhiladhila owala nkene David a li e uvite sho ‘oondjo dhe dha dhimwa po’ kuJehova. Otashi ke tu etela epepelelo ngele otatu hempulula oondjo dhetu kuKalunga, naakuluntugongalo Aakriste otaya kwathele wo omuntu ngoka te ehama a aluke pambepo.—Omayel. 28:13; Jak. 5:13-16.

Okwiindila Kalunga noku mu pandula

5. Okwiindila kuJehova otashi ti shike?

⁵ Uuna tatu ipula unene niimpwiyu yasha, otu na okutula omayele gaPaulus miilonga ngoka taga ti: “Inamu kala mu na nando oshimpwiyu shasha, ihe oompumbwe dheni dhi tseyithileni Kalunga momagalikano geni agehe. Ihe indileni aluhe [pamwe nomapandulo, KB].” (Fil. 4:6) ‘Okwiindila’ otashi ti “okuhehela neifupipiko.” Unene tuu ngele tu li muupyakadhi nenge tatu hepekwa, otu na okwiindila Jehova e tu kwathele noku tu wilika.

6, 7. Omolwomatompelo geni tu na okupandula Jehova momagalikano getu?

⁶ Ngele ohatu galikana owala uuna twa pumbwa sha, otashi ulike shike kombinga yekwatathano lyetu naJehova? Paulus okwa ti kutya natu indile Kalunga “pamwe nomapandulo.” Otu na omatompelo okupandula Jehova ngaashi David ngoka a ti: “Uunene owoye noonkondo odhoye, eadhimo nesimano nuuyelele owoye, oshoka iinima ayihe oyoye megulu nokombanda yevi. OMUWA, ongoye omukwaniilwa nomupangeliawike. . . . Kalunga ketu, otatu ku hambelele e tatu tanga edhina lyoye lya simana.”—1 Ondjal. 29:11-13.

⁷ Jesus okwa li a pandula Kalunga omolwiikulya nosho wo omolwoshikwiila nomaviinu ngoka ga li ga longithwa pUulalelo wOmuwa. (Mat. 15:36, KB; Mark. 14:22, 23) Kakele owala kokuulika olupandu lwa faathana, otu na ‘okupandula OMUWA omolwiikumitha e yi tu ningile,’ ‘molwomapangulo ge gu uka,’ nomolwoohapu dhe ndhoka dhi li mOmbiimbeli.—Eps. 107:15; 119:62, 105.

Kwatela mo yalwe momagalikano goye

8, 9. Omolwashike tu na okukwatela Aakriste ooyakwetu momagalikano getu?

⁸ Osha yela kutya ohatu galikana kombinga yetu yene, ihe otwa pumbwa wo okukwatela mo yalwe, nokuli nAakriste mboka katu shi komadhina. Nonando omuyapostoli Paulus ka li a tseya ooitaali ayehe yomuKolossa, okwa nyola a ti: “Tse aluhe otatu hambelele Kalunga, He yOmuwa gwetu Jesus Kristus, sho tatu mú galikanene. Oshoka otu uvu eitaalo lyeni okwiitaala Kristus Jesus nohole yeni yokuhola aantu yaKalunga ayehe.” (Kol. 1:3, 4) Paulus okwa li wo a galikana kombinga yAakriste mboka ye li muTessalonika. (2 Tes. 1:11, 12) Omagalikano goludhi ndoka otagu ulike kutya tse aantu ya tya ngiini notaga holola iikala yetu yi na ko nasha naamwatate naamwameme.

⁹ Ngele momagalikano getu ohatu kwatele mo Aakriste aagwayekwa naayendi pamwe nayo ‘oonzi dhilwe,’ otashi ulike kutya otu na ko nasha nehangano lyaKalunga. (Joh. 10:16) Paulus okwa li a pula aalongelikalunga ooyakwawo ya galikane opo ‘a popye nuulaadhi oshiholekwa shika shevaangeli.’ (Ef. 6:17-20) Mbela momagalikano getu gopaumwene ohatu kwatele mo aamwatate yalwe?

10. Okukwatela mo yalwe momagalikano getu otashi ulike shike kombinga yetu?

¹⁰ Ngele ohatu kwatele yalwe momagalikano getu, otashi ka lundulula iikala yetu nkene hatu ya tala ko. Ngele ohatu galikana kombinga yomuntu ngoka tu yele, otashi ke tu kwathela tu kale tu mu hole. (1 Joh. 4:20, 21) Omagalikano ga tya ngaaka ohaga tungu notaga humitha komeho ombili mokati kaamwatate. Natango, omagalikano ngoka otagu ulike kutya otu na ohole ya fa yaKristus. (Joh. 13:34, 35) Uukwatya mboka owu li oshitopolwa shiiyimati yombepo. Mbela ohatu pula tu pewe ombepo ondjapuki ngele tatu galikana paumwene nokupula Jehova e tu kwathele tu ulike ohole, enyanyu, ombili, ontalanteni, ohenda, uuwanawa, eitaalo, olukeno, neipangelomwene mbyoka yi li iiyimati yombepo? (Luk. 11:13; Gal. 5:22, 23, NW) Ngele osho, oohapu niilonga yetu otayi ku ulika kutya otatu endithwa kombepo mokukalamwenyo kwetu akuhe.—Lesha Aagalati 5:16, 25.

11. Omolwashike shi li nawa okukwatela mo yalwe momagalikano getu?

¹¹ Otu na okukwatela oyana yetu momagalikano ngele otwe shi uvu kutya ohaya makelwa ya yake uuna taya nyola ootutsa kosikola nokulongitha Omanyolo tu ya kwathele ya kale aanashili nokaaya longe shoka sha puka. Paulus okwa lombwele Aakriste yomuKorinto a ti: “Tse otatu galikana Kalunga, mwaa ninge nando epuko lyasha.” (2 Kor. 13:7) Jehova oha pandula omagalikano ngoka taga ningwa neifupipiko. (Lesha Omayeletumbulo 15:8.) Otatu vulu okupula yalwe ye tu galikanene, ngaashi omuyapostoli Paulus a ninga. Okwa nyola a ti: “Dhiginineni oku tu galikanena. Otse otu na eiyuvo lya yela, oshoka otwa hala aluhe okulonga shoka shi li mondjila.”—Heb. 13:18.

Omagalikano getu oga kwatela mo natango oshindji

12. Oshike tu na okupula tango momagalikano getu?

¹² Mbela omagalikano getu ohagu ulike ngaa enyanyu nuulaadhi wetu sho tu li Oonzapo dhaJehova? Mbela ohatu pula ngaa tango opo ehalo lyaKalunga li gwanithwe momaindilo getu, ngaashi okuuvitha etumwalaka lyUukwaniilwa, okuyapulitha uunamapangelo we nokusimaneka edhina lye? Otu na okupula tango iinima mbyoka momagalikano getu, ngaashi shu ulikwa kuJesus moshiholelwa shegalikano ndyoka a tameke noohapu tadhi ti: “Tate yetu ngu u li megulu! Edhina lyoye nali yapulwe; uukwaniilwa woye nawu ye; ehalo lyoye nali gwanithwe kombanda yevi wo ngaashi megulu.”—Mat. 6:9, 10, KB.

13, 14. Omagalikano getu ohaga holola shike kombinga yetu?

¹³ Omagalikano getu kuKalunga ohaga holola omainyengotompelo getu, ohokwe yetu nomahalo getu. Jehova okwa tseya uukwatya wetu womeni. Omayeletumbulo 17:3 otaga ti: “Ontelekelo oyoshisiliveli neziko olyoshingoli, ihe OMUWA oha konakona oomwenyo.” Oha mono meni momitima dhetu. (1 Sam. 16:7) Oku shi nkene hatu kala tu uvitile okugongala, uukalele wetu nosho wo aamwatate naamwameme. Jehova oku shi nkene hatu tala ko ‘aamwahe’ yaKristus. (Mat. 25:40) Ngele tatu pula sha megalikano, oha kala e shi nale kutya otwe shi pumbwa shili nenge hasho. Jesus okwa ti: “Ngele tamu galikana, inamu popyagana ongaapagani mboka ye shi, oha uvilwa omolwomapopyagano gawo.”—Mat. 6:7.

¹⁴ Shoka tatu popi megalikano ohashi holola wo kutya otwi inekela Kalunga shi thike peni. David okwa ti: “Oshoka [Jehova] ongoye omugameni gwandje, epopilongulu lyandje lya kola kaatondi yandje! Kaleka ndje muuyapuki woye sigo aluhe; tula ndje megameno kohi yomawawa goye.” (Eps. 61:3, 4) Ohatu nyanyukilwa egameno lyaKalunga ngele ‘ta dhiki etsali lye kombanda yetu’ pathaneko. (Eh. 7:15, KB) Itashi hekeleke tuu okuhedha kuJehova megalikano tu na uushili kutya ‘oku li pamwe natse’ uuna eitaalo lyetu tali makelwa!—Lesha Episalomi 118:5-9.

15, 16. Ongiini omagalikano tage tu kwathele tu kale twa gwana okupewa iinakugwanithwa megongalo?

¹⁵ Omainyengotompelo getu otage ku ulika kutya ohatu galikana shili Jehova nomutima aguhe. Pashiholelwa, mbela ohatu kala twa hala ondondo yontumba megongalo molwaashoka tu na lela ehalo okukwathela nokuninga ngaashi tatu vulu miilonga yokuuvitha nokuyakula megongalo? Nenge ohatu kala twe yi hala molwaashoka tu iholele ‘komeho’ nokukala twa hala ‘okupangela’ yalwe? Hasho shi na okukala ngaaka mokati koshigwana shaJehova. (Lesha 3 Johannes 9, 10; Lukas 22:24-27.) Ngele otu na omahalo ga puka, otatu ke ga mona uuna tatu galikana kuJehova Kalunga moshili note ke tu kwathela tu ninge omalunduluko omanga inaaga mena omidhi momitima dhetu.

¹⁶ Otashi vulika aakulukadhi Aakriste ya kale ya halelela aasamane yawo ya ninge aayakuligongalo nenge aakuluntugongalo konahiya. Aamwameme mboka oya pumbwa okuninga oonkambadhala yi ihumbate nawa opo ya kale metsokumwe nomagalikano gawo. Shika osha simana molwaashoka okupopya neihumbato lyuukwanegumbo womusamane ohayi nwetha mo nkene yalwe haye mu tala ko megongalo.

Okugalikana montaneho yegongalo

17. Omolwashike shi li nawa omathimbo gamwe okugalikana tu ilile?

¹⁷ Jesus okwa li ha yi olundji komahala gontumba opo a ka galikane kuHe i ilile. (Mat. 14:13; Luk. 5:16; 6:12) Omathimbo gamwe, natse otwa pumbwa okukala hatu galikana tu ilile. Ngele tatu galikana meimweneneno, otatu ka ninga omatokolo ngoka taga nyanyudha Jehova notage tu kwathele tu kale twa kola pambepo. Jesus okwa li wo a galikana montaneho, ihe oshi li nawa tu tale nkene tu na oku shi ninga momukalo gu uka.

18. Oshike aamwatate ye na okukaleka momadhiladhilo uuna taya galikana montaneho yegongalo?

¹⁸ Pokugongala kwetu, ohapu hogololwa aalumentu aadhiginini opo ya galikane montaneho yegongalo. (1 Tim. 2:8) Pehulilo lyegalikano, ooitaali ooyakwetu otaya vulu okutya “amen” shoka tashi ti “oshoshili.” Opo ya tye “amen,” oye na okutsa kumwe naashoka sha popiwa. Moshiholelwa shegalikano shoka Jesus a gandja kamu na sha shoka tashi halutha nenge tashi uvitha nayi. (Luk. 11:2-4) Natango, ka li a tumbula oompumbwe adhihe nenge uupyakadhi wakehe gumwe ngoka a li po. Iimpwiyu yetu otu na oku yi popya momagalikano gopaumwene, ihe hamegalikano lyomontaneho. Uuna tatu galikana pehala lyongundu, katu na okukwatela mo iiholekwa yayamwe.

19. Otu na okwiihumbata ngiini pethimbo lyegalikano lyomontaneho?

¹⁹ Uuna gumwe ta galikana pokugongala, otu na okuulika esimaneko ‘lyokutila Kalunga.’ (1 Pet. 2:17) Opu na iinima yimwe mbyoka itaayi opalele okuningwa pethimbo nopehala lyokugongala kwopaKriste. (Omuuv. 3:1) Pashiholelwa, natu tye andola gumwe okwa hala aantu ayehe mboka ye li pokugongala yi ikwate momake pethimbo lyegalikano. Shika otashi vulika shi uvithe nayi nenge shi kuthe po eitulomo lyayamwe, mwa kwatelwa mboka kaaye shi iilyo yeitaalo lyetu. Aaihokani otaya vulu okwiikwata moonyala, ihe ngele otaya papatelathana pethimbo lyegalikano otashi vulu shi pundukithe yamwe. Otashi vulika ya ka dhiladhile kutya aaihokani oya li tayu ulikilathana ohole pehala lyokusimaneka Jehova. Atuheni natu “longeni ayihe nokusimanekitha Kalunga,” molwaashoka otwe mu simaneka nokuhenuka iinima mbyoka tayi piyaganeke yamwe noku ya halutha nenge yi ya pundukithe.—1 Kor. 10:31, 32; 2 Kor. 6:3.

Otu na okugalikana kombinga yashike?

20. Aaroma 8:26, 27 oto ya yelitha ngiini?

²⁰ Omathimbo gamwe otashi vulika tu kale kaatu shi shoka tu na okutya momagalikano getu gopaumwene. Paulus okwa nyola a ti: “Katu shi nkene tu na okwiindila, ihe Ombepo oye mwene te tu galikanene nomifudho kaadhi shi kutumbulwa. Ihe Kalunga ngoka ha mono muule womitima dhaantu, oku shi omadhiladhilo gOmbepo.” (Rom. 8:26, 27) Jehova okwa nyolitha omagalikano ogendji mOmbiimbeli. Omaindilo ngoka okwa li e ga taamba ko ongo ga za kutse nokungeyi okwa li e ga yamukula. Kalunga oku tu shi nokwa tseya iinima mbyoka ombepo ye ya popya okupitila maanyoli yOmbiimbeli. Jehova oha yamukula omagalikano getu uuna ombepo tayi tu “galikanene.” Ihe sho tatu ilongo nawa Oohapu dhe, otatu ka kala tu shi kombinga yaashoka tu na okugalikana.

21. Moshitopolwa tashi landula tatu ka konakona shike?

²¹ Ngaashi twe shi mona, omagalikano getu oga kwatela mo oshindji kombinga yetu. Pashiholelwa, otashi vulika ga holole ekwatathano lyetu naJehova nankene tu shi nawa Oohapu dhe. (Jak. 4:8) Moshitopolwa tashi landula ko otatu ka konakona omagalikano gamwe nomaindilo ngoka ga nyolwa mOmbiimbeli. Okukonakona Omanyolo ngoka otaku ke tu kwathela ngiini opo tu hedhe kuKalunga megalikano?

Oto yamukula ngiini?

• Otu na okukala niikala ya tya ngiini uuna tatu galikana kuJehova?

• Omolwashike tu na okukwatela mo ooitaali ooyakwetu momagalikano getu?

• Omagalikano getu ohaga holola shike kombinga yetu nomainyengotompelo getu?

• Otu na okwiihumbata ngiini pethimbo lyegalikano lyomontaneho?

[Ethano pepandja 11]

Mbela oho tanga nokupandula Jehova aluhe?

[Ethano pepandja 13]

Iikala yetu pethimbo lyegalikano lyomontaneho oyi na aluhe okusimanekitha Jehova