Hwepopaleka omagalikano goye okupitila mekonakonombiimbeli
“Omuwa, okutsi kwoye naku uve eindilo lyaapiya yoye.”—NEH. 1:11, KB.
1, 2. Omolwashike shi li nawa okukonakona omagalikano gamwe ngoka ga nyolwa mOmbiimbeli?
EGALIKANO nekonakonombiimbeli oya simanenena unene melongelokalunga lyashili. (1 Tes. 5:17; 2 Tim. 3:16, 17) Odhoshili kutya Ombiimbeli kayi shi embo lyomagalikano. Ihe muyo omu na omagalikano ogendji, mwa kwatelwa ngoka taga adhika mOmapisalomi.
2 Sho to yi lesha noku yi konakona, oto ki itsa mo omagalikano ngoka taga popi oonkalo ndhoka ho iyadha mudho. Omagalikano goye otaga ka kala taga ti sha shili ngele owa kwatele mo mugo omadhiladhilo ngoka ge li mOmanyolo. Oshike tatu ilongo momayamukulo ngoka ga li ga pewa mboka ya pula ekwatho nomoshikalimo shomagalikano gawo?
Konga ewiliko lyaKalunga noku li landula
3, 4. Elalakano lyomupiya gwaAbraham olya li lyashike, notatu ilongo mo shike mwaashoka Jehova e mu ningile?
3 Ngele to konakona Ombiimbeli, oto ka yelelwa kutya owu na okugalikana aluhe kuKalunga e ku wilike. Tala shoka sha li sha ningwa po sho tatekulululwa Abraham a li a tumu omupiya gwe Eliaser kuMesopotamia a ka kongele Isak omukiintu omutilikalunga. Sho aakiintu ye ya okuteka omeya pomuthima, omupiya okwa galikana a ti: “OMUWA . . . , otii ka pula gumwe gwomuyo te ti: ‘Kwatha ndje, u endeke oshuma shoye, ndi nwe mo.’ Ngele ota ti: ‘Nwa mo, noongamelo dhoye otandi dhi hugile wo,’ oye na ninge ngoka we mu hogololele omuntu gwoye Isak. Ngele shika tashi ningwa, otandi ka tseya kutya owa dhiginine euvaneko lyoye kumwene gwandje.”—Gen. 24:12-14.
4 Egalikano lyomupiya gwaAbraham olya li lya yamukulwa sho Rebbeka a hugile oongamelo dhe. Rebbeka okwa yi pamwe nomupiya ngoka kuKaanan e ta ningi omukulukadhi gwaIsak. Odhoshili kutya itatu ka tegelela Kalunga e tu pe endhindhiliko lyontumba. Ihe nonando ongaaka, ote ke tu kwatela komeho monkalamwenyo yetu ngele ohatu mu galikana notwa tokola tu wilikwe kombepo ye.—Gal. 5:18.
Egalikano ohali tu kwathele twaahi ipule unene
5, 6. Oshike tatu ilongo megalikano lyaJakob sho a li e li pokutsakanena naEsau?
5 Egalikano ohali tu kwathele twaaha kale nokwiipula unene. Sho Jakob a li a tila omukwanambwiyu omukwawo Esau, okwa galikana a ti: “OMUWA, . . . inandi opalela esilohenda lyoye nuudhiginini woye we u ulukile ndje, ngame omuntu gwoye. . . . Hupitha ndje miikaha yomumwameme Esau, oshoka ongame nda tila kutya ote ke tu homona e te tu hanagula po atuhe, nokuli aakulukadhi naanona. Dhimbulukwa, nkene u uvaneke, u ninge ndje nawa e to pe ndje oluvalo olwindji talu nyenge okuyalulwa, lu thike pehekevi lyomooha dhefuta.”—Gen. 32:9-12.
6 Nonando Jakob okwa li a ningi omalongekidho komeho yethimbo omanga inaaya tsakanena naEsau, egalikano lye olya li lya yamukulwa. (Gen. 33:1-4) Ngele to lesha ehokololo ndyoka nawa, oto ke shi mona kutya Jakob ka li owala a pula ekwatho. Okwa li wo u ulike kutya oku na eitaalo tali longo moluvalo lu uvanekwa nokwa pandula ohenda yaKalunga. Mbela owu na ‘uumbanda momwenyo’ gwoye? (2 Kor. 7:5) Ngele osho, eindilo lyaJakob otali vulu oku ku dhimbulukitha kutya omagalikano ohage tu kwathele twaahi ipule unene. Katu na owala okukala hatu indile, ihe otu na wo okuulika eitaalo.
Galikana wu pewe uunongo
7. Omolwashike Moses a li a galikana a pewe ontseyo yoondjila dhaJehova?
7 Ngele owu na ehalo lyokunyanyudha Jehova, owu na oku mu galikana e ku pe uunongo. Moses okwa li a galikana Kalunga e mu pe ontseyo. Okwi indile a ti: “Eeno, odhoshili, [Jehova] sho wa lombwele ndje, ndi fale aantu mbaka kevi ndyoka [okuza muEgipiti] . . . Ngashingeyi ngele nda mono ohenda koshipala shoye, tseyithila ndje oondjila dhoye, . . . nondi kale ndi na ombili nangoye.” (Eks. 33:12, 13) Jehova okwa li a yamukula Moses e te mu pe ontseyo oyindji kombinga yoondjila Dhe, ndjoka a li a pumbwa opo a wilike oshigwana She.
8. Uuwanawa washike to ka mona ngele to tedhatedha kombinga yAakwaniilwa yotango 3:7-14?
8 David okwa pula wo megalikano a ti: “OMUWA, longa ndje oondjila dhoye.” (Eps. 25:4) Salomo omwanamati gwaDavid okwa li i indile uunongo mboka wa pumbiwa kuJehova opo a lele oshigwana shaIsraeli. Jehova okwa li a hokwa egalikano lyaSalomo, nokwa li e mu pe oondunge ndhoka i indile nosho wo uuyamba nesimano. (Lesha 1 Aakwaniilwa 3:7-14.) Ngele uuthembahenda woshinakugwanithwa shoka wa pewa megongalo owu wete wa fa uudhigu kungoye, galikana wu pewe uunongo nokuulika ombepo yeifupipiko. Kalunga ote ku kwathele wu mone ontseyo note ku kwathele wu longithe uunongo mboka wa pumbwa wu sile oshimpwiyu iinakugwanithwa yoye momukalo gu uka nogwohole.
Egalikano nali kale tali zi komutima
9, 10. Megalikano lyaSalomo ndyoka a li a ningi pelangeko lyotempeli omu na shike sha simana?
9 Opo omagalikano getu gu uvike, otu na okugalikana tashi zi komutima. Ngaashi sha nyolwa mAakwaniilwa yotango, ontopolwa onti-8, Salomo okwa li a galikana komeho gongundu onene yaantu tashi zi komutima pelangeko lyotempeli yaJehova muJerusalem mo 1026 K.E.N. Konima sho oshikethahangano sha tulwa mehala lyUuyapukilela noshikogo shaJehova shu udhitha otempeli, Salomo okwe mu tanga.
10 Konakona egalikano lyaSalomo e to tala nkene a li a popi kombinga yomutima. Salomo okwa zimine kutya Jehova oye awike a tseya omutima gwomuntu. (1 Aak. 8:38, 39) Egalikano olyo tuu ndyoka otali ulike kutya opu na etegameno komuyoni ngoka ‘ngele ti itedhulula shili nomwenyo aguhe.’ Ngele opu na omutondi ngoka ta thiminike oshigwana shaKalunga, omagalikano gasho otagu uvika ngele omitima dhasho odhi inekela shili muJehova. (1 Aak. 8:48, 58, 61) Onkee ano, omagalikano goye naga kale taga zi komutima.
Nkene Omapisalomi taga vulu okuhwepopaleka omagalikano goye
11, 12. Owi ilonga mo shike megalikano lyOmulevi ngoka a li itaa vulu okuya muuyapukilela waKalunga uule wokathimbo?
11 Ngele oto konakona Omapisalomi, otashi ka hwepopaleka omagalikano goye noku ku kwathela wu tegelele Kalunga a yamukule. Omulevi ngoka a li muupongekwa okwa li i idhidhimike. Nonando ka li ta vulu okuya muuyapukilela waJehova uule wokathimbo, okwi imbi a ti: “Omolwashike nda sa oluhodhi ngeyi? Omolwashike nda dhigupalelwa ngeyi? Otandi inekele Kalunga, nonatango tandi ke mu hambelela, omuhupithi gwandje naKalunga kandje.”—Eps. 42:5, 11; 43:5.
12 Oshike tatu ilongo moshiholelwa shOmulevi ngoka? Ngele owu li mondholongo molwaashoka wu li omuyuuki na ku na ompito yokukala pokugongala pamwe nooitaali ooyakweni, tegelela Kalunga e ku yamukule pethimbo lyo opala. (Eps. 37:5) Tedhatedha kwaashoka wa nyanyukilwa nale miilonga yaKalunga noku mu galikana ‘neinekelo’ e ku pe natango ompito yokukala to endathana noshigwana she.
Galikana wu na eitaalo
13. Metsokumwe naJakob 1:5-8, omolwashike tu na okukala neitaalo ngele tatu galikana?
13 Kutya nduno otu li moonkalo dha tya ngiini, natu galikane aluhe tu na eitaalo. Ngele to makelwa omolwuudhiginini woye, landula omayele gomulongwa Jakob. Galikana kuJehova, note ke ku pa lela uunongo wa pumbiwa opo wu ungaunge nemakelo lyoye. (Lesha Jakob 1:5-8.) Kalunga okwa tseya omadhiladhilo ngoka tage ku hepeke nota vulu oku ku wilika noku ku hekeleka okupitila mombepo ye ondjapuki. Galikana kuye nomutima gu udha eitaalo nokutaamba ko ewiliko lyombepo ye nomayele ngoka ge li mOohapu dhe ‘waahe na omalimbililo.’
14, 15. Omolwashike tatu vulu okutya Hanna okwa li a galikana e na eitaalo?
14 Hanna gumwe gwomaakulukadhi yaali yOmulevi Elkana, okwa li a galikana e na eitaalo. Molwaashoka ka li e na oluvalo, okwa li a shekwa kuPeninna, omukulukadhi gulwe gwaElkana, ngoka a li e na aanona oyendji. Petsalihangano, Hanna oku uvaneke kutya ngele okwa mono okanona okamati, ote ke ka pa Jehova. Molwaashoka omilungu dhe odho owala dha li tadhi inyenge sho ta galikana, omupristeli omukuluntu Eli okwa li ta dhiladhila kutya okwa kolwa. Sho a li a mono kutya hasho nani, okwa ti: “Kalunga kaIsraeli ne ku pe shoka we mu indile.” Nonando Hanna ka li a tseya kutya oshizemo otashi ka kala shike, okwa li e na eitaalo kutya omagalikano ge otaga ka yamukulwa. Onkee ano, “okwa zi po e ta li ye ina sa we oluhodhi.” Ka li we a geya nenge a gwililwa po.—1 Sam. 1:9-18.
15 Konima sho Samuel a valwa e ta toyo, Hanna okwa li e mu gandja a ka longe iilonga iiyapuki metsalihangano lyaJehova. (1 Sam. 1:19-28) Ngele ohatu tedhatedha nethimbo kegalikano lye, otashi ka hwepopaleka omagalikano getu yene notashi ke tu kwathela tu mone kutya nokuli nomaupyakadhi ngoka hage tu uvitha nayi otatu vulu oku ga sinda ngele tatu galikana tu na eitaalo kutya Jehova ote ke tu yamukula.—1 Sam. 2:1-10.
16, 17. Oshike sha ningwa po sho Nehemia a galikana nokukatuka meitaalo?
16 Omulumentu omuyuuki Nehemia ngoka a li ko methelemumvo eti-5 K.E.N., okwa li a galikana nokukatuka meitaalo. Okwa pula a ti: “Omuwa, okutsi kwoye naku uve egalikano lyaapiya yoye mboka ya hala okutila edhina lyoye! Ihe nena ndjika pa omupiya gwoye elago, wu pe ohenda komeho yomulumentu nguka.” Olye “omulumentu nguka” ta popiwa mpaka? Omukwaniilwa gwaPersia, Artakserkses, ngoka a li ha pindilwa kuNehemia.—Neh. 1:11, KB.
17 Nehemia okwa li a galikana e na eitaalo uule womasiku sho u uvu kutya Aajuda mboka ya mangululwa muupongekwa muBabilon oye li ‘muudhigu uunene noya dhinika nomadhingililokuma gaJerusalem oga kumunwa po natango.’ (Neh. 1:3, 4) Egalikano lyaNehemia olya li lya yamukulwa momukalo ngoka inaa tegelela sho Omukwaniilwa Artakserkses e mu pitike a ye kuJerusalem nokutungulula edhingililokuma lyasho. (Neh. 2:1-8) Konima yomasiku omashona, edhingililokuma olya tamekwa okutungwa. Omagalikano gaNehemia oga li ga yamukulwa molwaashoka oge na ko nasha nelongelokalunga lyashili nokwa li a galikana e na eitaalo. Mbela omagalikano goye nago oga fa gaNehemia?
Kala ho tanga nokupandula Jehova
18, 19. Omolwomatompelo geni omupiya gwaJehova e na oku mu tanga noku mu pandula?
18 Dhimbulukwa okutanga nokupandula Jehova uuna to galikana. Otu na omatompelo ogendji oku shi ninga. Pashiholelwa, David okwa li a hala okutanga Jehova omolwuukwaniilwa we. (Lesha Episalomi 145:10-13.) Mbela omagalikano goye ohagu ulike ngaa kutya owa simaneka uuthembahenda wokutseyitha Uukwaniilwa waJehova? Oohapu dhomupisalomi otashi vulika dhi ku kwathele wu lombwele Kalunga nomutima aguhe nkene ho kala wu uvitile okugongala kwopaKriste, iigongi yoshikandjo noyoshitopolwa.—Eps. 27:4; 122:1.
19 Ngele owu na olupandu omolwekwatathano lyoye naKalunga, otashi ku inyengitha wu galikane tashi zi komutima to ti: “OMUWA otandi ku pandula mokati kiigwana. Otandi ku simaneke mokati kaakuuyuni. Esilohenda lyoye otali tsu sigo okegulu; uudhiginini woye otau adha sigo okeyalelo. Kalunga, holola uunene woye kegulu nesimano lyoye kombanda yevi.” (Eps. 57:9-11) Oohapu ndhika itadhi tu ladhipike tuu! Mbela ito shi zimine kutya oohapu ndhoka dhomupisalomi otadhi vulu okuhwepopaleka omagalikano goye?
Indila Kalunga nesimaneko
20. Maria okwa li u ulike ngiini kutya okwa simaneka Kalunga?
20 Oshi na okukala shi iwetikile kutya ohatu simaneke Kalunga momagalikano getu. Oohapu dhesimaneko ndhoka Maria a li a popi konima sho a lombwelwa kutya ota ka ninga yina yaMesiasa, odha faathana naandhoka dhaHanna sho a li a fala Samuel a ka longe metsalihangano. Maria okwe shi ulike kutya okwa simaneka Kalunga sho a ti: “Omwenyo gwandje otagu hambelele Omuwa, ombepo yandje otayi nyanyukilwa Kalunga, omuhupithi gwandje.” (Luk. 1:46, 47) Mbela oto vulu okuhwepopaleka omagalikano goye mokupopya oohapu dha fa ndhoka? Itashi kumitha sho Maria a li a hogololwa a ninge yina yaJesus ngoka Mesiasa.
21. Omagalikano gaJesus oga li gu ulike ngiini esimaneko neitaalo?
21 Jesus okwa li a galikana nesimaneko noneitaalo. Pashiholelwa, manga inaa yumudha Lasarus, “Jesus okwa tala pombanda e ta ti: ‘Tate, otandi ku hambelele, ongoye sho ho uvu ndje. Ondi shi shi kutya ngoye oho uvu ndje aluhe.’” (Joh. 11:41, 42) Mbela omagalikano goye ohaga holola esimano neitaalo lya tya ngaaka? Ngele to konakona oshiholelwa shaJesus shegalikano, oto ka mona kutya otali tsu omuthindo unene tuu esimanekitho lyedhina lyaJehova, okuya kwUukwaniilwa we negwanitho lyehalo lye. (Mat. 6:9, 10) Dhiladhila kombinga yomagalikano goye. Mbela ohagu ulike kutya owu na ohokwe mUukwaniilwa waJehova, mokulonga ehalo lye nomokusimanekitha edhina lye eyapuki? Oge na okukala tage shi ulike.
22. Omolwashike wu na uushili kutya Jehova ote ke ku pa uulaadhi wu uvithe onkundana ombwanawa?
22 Olundji omagalikano ohaga kala ga kwatela mo okupula ekwatho kuJehova molwaashoka ohatu hepekwa nokumakelwa. Sho Petrus naJohannes ya li ya lombwelwa moshigongi shaatokoli “yaa longe noyaa popye we nando medhina lyaJesus,” oya li ye shi tindi thiluthilu. (Iil. 4:18-20) Konima sho ya mangululwa, oya lombwele ooitaali ooyakwawo shoka sha ningwa po. Opo ihe ayehe mboka ya li po, oyi indile ekwatho lyaKalunga opo ya popye oohapu dhe nuulaadhi. Kasha li tuu shituntula sho egalikano lyawo lya yamukulwa sho yu “udhithwa Ombepo Ondjapuki e taa tameke okupopya nuulaadhi oohapu dhaKalunga.” (Lesha Iilonga 4:24-31.) Oshizemo, aantu oyendji oya li ya ningi aalongeli yaJehova. Egalikano otali vulu wo oku ku nkondopaleka wu uvithe onkundana ombwanawa nuulaadhi.
Tsikila okuhwepopaleka omagalikano goye
23, 24. (a) Tumbula iiholelwa yOmbiimbeli mbyoka tayi ulike nkene ekonakonombiimbeli tali vulu okuhwepopaleka omagalikano goye. (b) Oshike to ka ninga po wu hwepopaleke omagalikano goye?
23 Opu na natango iiholelwa oyindji mbyoka tayi ulike kutya okulesha Ombiimbeli noku yi konakona otaku vulu okuhwepopaleka omagalikano goye. Pashiholelwa, oto vulu okuzimina megalikano kutya “ehupitho otali zi kOMUWA,” ngaashi Jona a li a ningi. (Jona 2:1-10) Ngele oto ipe uusama omolweyono lya kwata miiti nowa hala aakuluntugongalo ye ku kwathele, omadhiladhilo ngoka ge li momagalikano gaDavid otaga vulu oku ku kwathela wu indile edhiminopo lyoondjo momagalikano goye gopaumwene. (Eps. 51:1-12) Oto vulu okutanga Jehova momagalikano gamwe ngaashi Jeremia a li e shi ningi. (Jer. 32:16-19) Ngele oto kongo kuume kopandjokana, okukonakona oshiholelwa shegalikano shoka shi li muEsra ontopolwa 9 nokugalikana metsokumwe nasho, otashi ka koleka etokolo lyoye okuvulika kuKalunga ‘mokuhokana owala mOmuwa.’—1 Kor. 7:39; Esra 9:6, 10-15.
24 Kala ho lesha Ombiimbeli noku yi konakona. Tala iitsa mbyoka to vulu okukwatela momagalikano goye. Oto vulu okulongitha omadhiladhilo gOmanyolo momaindilo nomagalikano goye gokupandula Jehova noku mu tanga. Oto vulu shili okuhedha kuye sho to hwepopaleke omagalikano goye okupitila mokukonakona Ombiimbeli.
Oto yamukula ngiini?
• Omolwashike tu na okukonga nokulandula ewiliko lyaKalunga?
• Oshike shi na oku tu inyengitha tu pule uunongo megalikano?
• Ongiini embo lyOmapisalomi tali vulu okuhwepopaleka omagalikano getu?
• Omolwashike tu na okugalikana neitaalo nonesimaneko?
[Ethano pepandja 15]
Mbela oho pula ewiliko lyaKalunga okupitila megalikano ngaashi omupiya gwaAbraham?
[Ethano pepandja 17]
Ekonakono lyUukwanegumbo otali vulu okuhwepopaleka omagalikano goye