Kala wa nyanyukwa nonando owu li moonkalo oondhigu
“Naa nyanyukwe ayehe mboka haa kongo egameno pungoye [Jehova]; otaa ki imba aluhe oondjimbo dhenyanyu.”—EPS. 5:11.
1, 2. (a) Iinima yimwe hayi eta okumona iihuna oyini? (b) Kakele owala komaudhigu gakwalukehe, Aakriste yashili oye na okwiidhidhimikila shike?
OONZAPO DHAJEHOVA nadho ohadhi adhika kuudhigu mboka hawu adha aantu kunena. Aapiya yaKalunga oyendji oya ninga iihakanwa yomiyonena, yiita noyomikalo dhilwe dhokwaahe na uuyuuki. Yamwe otaya mono iihuna omolwiiponga yopaunshitwe, koluhepo, komikithi nokokusilwa. Omuyapostoli Paulus okwa nyola a ti: “Otu shi shi kutya sigo ongashingeyi kehe shimwe shomeshito otashi fudhagana kuuwehame wa fa mboka wopevalo lyokanona.” (Rom. 8:22) Ethimbo limwe ohatu mono wo iihuna omolwokwaahagwanenena kwetu. Onkee otatu vulu okupopya ngaashi Omukwaniilwa David ngoka a ti: ‘Oondjo dhandje; odho omutenge omudhigu okuhumbata.’—Eps. 38:4.
2 Kakele owala komaudhigu gakwalukehe, Aakriste yashili oye na okuhumbata omuti gwomahepeko gwopathaneko. (Luk. 14:27, NW) Ngaashi owala Jesus, aalongwa ye oye tondike nohaya hepekwa. (Mat. 10:22, 23; Joh. 15:20; 16:2) Kungeyi, okulandula Kristus otashi pula tu idhipagele po nokukala aaidhidhimiki omanga twa tegelela omayambeko guuyuni uupe.—Mat. 7:13, 14; Luk. 13:24.
3. Otu shi shi ngiini kutya Aakriste inaya pumbwa okumona iihuna monkalamwenyo opo ya nyanyudhe Kalunga?
3 Mbela shika osha hala okutya Aakriste yashili oya landula ondjila ndjoka itayi eta enyanyu nombili yasha? Mbela otu na owala okukala twa nika uuthigwa noluhodhi monkalamwenyo yetu sigo ehulilo tali ya? Osha yela kutya Jehova okwa hala tu kale twa nyanyukwa omanga twa tegelela shoka u uvaneka. Ombiimbeli oya popya lwiikando kutya aalongelikalunga yashili oye na okukala ya nyanyukwa. (Lesha Jesaja 65:13, 14.) Episalomi 5:11 otali ti: “Naa nyanyukwe ayehe mboka haa kongo egameno pungoye [Jehova]; otaa ki imba aluhe oondjimbo dhenyanyu.” Eeno, otashi vulika tu kale tu na enyanyu, ombili yopamadhiladhilo notwa gwanenwa nonando otu li momaupyakadhi. Natu tale nkene Ombiimbeli tayi tu kwathele tu kale twa nyanyukwa nonando otwa taalela omahepeko.
Jehova ‘oKalunga omunelago’ nenge omunyanyukwi
4. Kalunga oha kala u uvite ngiini ngele aantu itaya longo ehalo lye?
4 Tala koshiholelwa shaJehova. E li Kalunga Omunankondoadhihe, eshito alihe oli li mepangelo lye. Oku na iinima ayihe noina pumbwa nando ekwatho lyomuntu. Nonando ye Omunankondoadhihe, Jehova okwa li u uvite nayi sho omwanamati gumwe gwopambepo a ningi omunashipotha e ta ningi Satana, nokonima sho aayengeli yamwe ye mu landula muunashipotha we. Dhiladhila wo kuuwehame mboka Kalunga a li e uvite sho aantu mboka a shitile kombanda yevi, Adam naEva, ye mu pilamene. Okutameka mpono, oluvalo lwawo omabiliyona nalwo olwa li lwe ekelehi oonkondopangelo dhaJehova.—Rom. 3:23.
5. Oshike sha kala nokuuvitha nayi Jehova noonkondo?
5 Uunashipotha waSatana onkee ngaa tawu tsikile sigo okunena. Jehova okwa kala nokutala aantu taya longele iikalunga, uukolokoshi, taya dhipaga notaya yi momilalo ndhoka kadhi li paunshitwe. (Gen. 6:5, 6, 11, 12) Natango ishewe, ohu uvu sho aantu taya popi iifundja yikenyeneka notaye mu sheke. Aalongelikalunga yashili omathimbo gamwe ohaye mu uvitha wo nayi nokuli. Ombiimbeli otayi popi onkalo ya tya ngaaka niitya mbika: “Olungapi inaaya vulika kuye mombuga, nolungapi ye mu nikitha oluhodhi! Omalupita nomalupita oya yeleke Kalunga; oya geyitha Kalunga kaIsraeli omuyapuki.” (Eps. 78:40, 41) Ohashi ehameke Jehova unene ngele oshigwana she tashi mu ekelehi. (Jer. 3:1-10) Osha yela kutya Jehova oha kala u uvite nayi noonkondo uuna iinima iiwinayi tayi ningwa.—Lesha Jesaja 63:9, 10.
6. Kalunga ohu ungaunga ngiini noonkalo ndhoka hadhi mu uvitha nayi?
6 Ihe Jehova iha yiwa moshipala kiinima mbyoka hayi mu uvitha nayi. Uuna pwa holoka uudhigu, Jehova oha katuka nziya a keelele iilanduliko iiwinayi kaayi dhigupale. Okwa li wo a katuka oonkatu opo lwahugunina ehalo lye li gwanithwe. Molwoonkatu ndhoka, Jehova okwa tegelela nenyanyu opo uunamapangelo we wu yukipalithwe, shoka tashi ka etela omayambeko aalongeli ye aadhiginini. (Eps. 104:31) Nonando Jehova okwa kala nokulundilwa, oku li natango ‘Kalunga omunelago.’—1 Tim. 1:11, OB-1954; Eps. 16:11.
7, 8. Ongiini tatu vulu okuholela Jehova uuna iinima itayi ende nawa?
7 Nonando itatu vulu okuyeleka omikalo moka hatu kandula po omikundu dhetu nankene Jehova he shi ningi, otatu vulu oku mu holela sho tatu ungaunga nomaupyakadhi getu. Oshi li paunshitwe okuteka omukumo ngele iinima itayi ende nawa, ihe katu na okukala monkalo ndjoka ethimbo ele. Molwaashoka otwa shitwa oshifetha shaJehova, ohatu vulu okudhiladhila nuukeka notu na uunongo mboka hawu tu kwathele tu konakone nawa omaupyakadhi getu nokukatuka onkatu uuna tashi vulika.
8 Oshinima shimwe shoka tashi ke tu kwathela tu idhidhimikile omaupyakadhi monkalamwenyo, okukala tu shi kutya miinima yimwe itatu vulu okuninga po sha. Okukala tu uvitile nayi unene iinima ya tya ngaaka otashi vulu oku tu piyaganeka noonkondo noku tu kanithitha enyanyu ndyoka hali monika ngele tatu longele Kalunga kashili. Konima ngele twa ningi oonkambadhala ngaashi tatu vulu tu kandule po uupyakadhi, oshi li nawa tu hume komeho nokugandja eitulomo kiinima mbyoka tayi tungu. Omahokololo gOmbiimbeli taga landula otaga yelitha nawa oshinima shika.
Ondjele oya simanenena
9. Hanna okwa li u ulike ngiini kutya oku na ondjele?
9 Tala koshiholelwa shaHanna ngoka a ka ninga yina yomupolofeti Samuel. Okwa li a gwililwa po molwaashoka okwa li iha mono aanona nokwa li ha nyonkelwa nokushekwa omolwokukala ontimbe. Omathimbo gamwe, Hanna okwa li a teka omukumo noonkondo nokwa li ta lili noka li ta vulu okulya nokuli. (1 Sam. 1:2-7) Oshikando shimwe sho a li motempeli yaJehova, Hanna okwa li u uvite “uudhigu e ta lili noonkondo ta galikana OMUWA.” (1 Sam. 1:10) Konima sho Hanna a mbumbulile Jehova shoka shi li momutima gwe, omupristeli omukuluntu Eli okwa li e ya kuye e ta ti: “Inda nombili. Kalunga kaIsraeli ne ku pe shoka we mu indile.” (1 Sam. 1:17) Osha yela kutya Hanna okwa li e wete kutya okwa ninga ashihe shoka ta vulu. Ka li e na shoka ta vulu okuninga opo a kale ha mono aanona. Okwa li u ulike kutya oku na ondjele. Konima yaashoka “okwa zi po e ta li ye ina sa we oluhodhi.”—1 Sam. 1:18.
10. Paulus okwa li u ulike iikala ya tya ngiini sho a li e na uupyakadhi mboka itaa vulu okuninga po sha kuwo?
10 Omuyapostoli Paulus oku ulike wo iikala ya fa mbyoka sho a li e na uupyakadhi mboka wa li we mu lulila. Okwa li e wu ithana “okwega monyama.” (2 Kor. 12:7, OB-1954) Paulus okwa li a ningi ngaashi ta vulu mokupula Jehova megalikano opo a kuthe po uupyakadhi mboka. Paulus okwa li a galikana lungapi kuJehova kombinga yaashoka? Iikando itatu. Konima yoshikando oshititatu, Kalunga okwa li a lombwele Paulus kutya “okwega monyama” itaku ka kuthwa mo pashikumithalonga. Paulus okwa li a taamba ko onkalo ndjoka nokwa kala ta gandja eitulomo mokulongela Jehova nomutima aguhe.—Lesha 2 Aakorinto 12:8-10.
11. Omagalikano nomaindilo ohaga dhana onkandangala yini uuna tashi ya pokwiidhidhimikila omaudhigu?
11 Iiholelwa mbika itayi ti kutya otu na okweetha po okugalikana kuJehova shi na ko nasha noonkalo ndhoka dhe tu lulila. (Eps. 86:7) Pehala lyaashoka, Oohapu dhaKalunga otadhi tu lombwele tadhi ti: “Inamu kala mu na nando oshimpwiyu shasha, ihe oompumbwe dheni dhi tseyithileni Kalunga momagalikano geni agehe.” Jehova ota ka yamukula ngiini omagalikano nomaindilo ngoka? Ombiimbeli oya gwedha ko tayi ti: “Nombili yaKalunga, ndjoka yi vule uunongo auhe wopantu, otayi gamene oomwenyo dheni nomadhiladhilo geni muKristus Jesus.” (Fil. 4:6, 7) Odhoshili kutya Jehova otashi vulika ita ka kutha po omaupyakadhi getu, ihe ota ka yamukula omagalikano getu moku tu pa oondunge tu ungaunge nago. Konima ngele twa galikana kombinga yoshinima shontumba, otatu ka mona kutya kashi li pandunge okwiipula unene kwaashoka.
Mona uuwanawa mokulonga ehalo lyaKalunga
12. Omolwashike sha nika oshiponga okukala ethimbo ele wa teka omukumo?
12 Omayeletumbulo 24:10 otaga ti: “Ngele to tenguka pethimbo lyuudhigu, nena oonkondo dhoye oonshona ngiini!” Omayeletumbulo 15:13 otaga ti wo: “Uudhigu womomutima ohau nikitha omwenyo uuthigwa.” Aakriste yamwe oya teka omukumo sigo ye etha po okulesha Ombiimbeli paumwene nokutedhatedha kuyo. Omagalikano gawo ihaga zi we komutima notashi vulika yi itongole ko kooitaali ooyakwawo. Oshoshili kutya osha nika oshiponga okukala ethimbo ele wa teka omukumo.—Omayel. 18:1, 14.
13. Oshike tashi ke tu kwathela tu kondjithe etekomukumo notu kale twa nyanyukwa?
13 Kombinga onkwawo ngele otu na etaloko ewanawa otashi ke tu kwathela tu gandje eitulomo kiinima mbyoka hayi tu etele enyanyu nombili monkalamwenyo yetu. David okwa nyola a ti: “Kalunga kandje, ondi hole okugwanitha ehalo lyoye!” (Eps. 40:8) Katu na nando okweetha po elongelokalunga lyetu ngele iinima itayi tu endele nawa monkalamwenyo. Oshoshili kutya omukalo omwaanawa okukondjitha eyeme ogwo okukutha ombinga miilonga mbyoka hayi nyanyudha omuntu. Jehova okwe shi popya kutya otatu vulu okukala nenyanyu nombili ngele ohatu lesha Oohapu dhe noku dhi konakona aluhe. (Eps. 1:1, 2; Jak. 1:25) Ohatu mono “oohapu oontalala” ndhoka tadhi vulu oku tu ladhipika nokunyanyudha omitima dhetu okuza mOmanyolo Omayapuki nuuna tu li pokugongala kwopaKriste.—Omayel. 12:25; 16:24.
14. Jehova okwe tu uvanekela shike shoka tashi tu etele ombili ngashingeyi?
14 Otu na omatompelo ogendji okukala twa nyanyukwa. Limwe ndyoka lya dhenga mbanda olyo euvaneko lyaKalunga oku ke tu hupitha. (Eps. 13:5) Otu shi kutya Kalunga ota ka pa ondjambi mboka taye mu kongo, nonando oya kale moonkalo dha tya ngiini kunena. (Lesha Omuuvithi 8:12.) Omupolofeti Habakuk okwa popi uushili mboka nawa sho a nyola a ti: “Nonando omikwiyu inadhi ima, nomiivinu dhaa na omandjembele, nonando omiolivi inadhi ima sha, nepya inali vala iilya, nonando oonzi adhihe tadhi si, niigunda yiimuna oyi li owala, otandi nyanyukwa natango nonda panda, oshoka OMUWA Kalunga oye Omukulili gwandje.”—Hab. 3:17, 18.
‘Oshigwana shi na Jehova oye Kalunga kasho, oshi na elago’
15, 16. Tumbula iinima yimwe mbyoka tatu vulu okunyanyukilwa omanga twa tegelela omayambeko gomonakuyiwa.
15 Jehova okwa hala tu nyanyukilwe iinima iiwanawa mbyoka e tu pa omanga twa tegelela onakuyiwa onkumithi ndjoka e tu nunina. Ombiimbeli otayi ti: “Onde shi dhimbulula kutya omuntu mokukalamwenyo kwe ke na elago lilwe lyaa shi okunyanyukwa nokulonga uuwanawa. Naashika wo omuntu a lye ye a nwe nokunyanyukilwa iilonga yuupyakadhi we auhe—osho omagano gaKalunga.” (Omuuv. 3:12, 13) ‘Okulonga uuwanawa’ osha kwatela mo wo okuningila yalwe uuwanawa. Jesus okwa ti kutya okugandja oku na elago komeho yokutaamba. Ohashi nyanyudha ookuume ketu yopandjokana, aanona yetu, aavali yetu nosho wo yalwe uuna tatu ya ningile uuwanawa. (Omayel. 3:27) Ngele otu na olukeno, hatu yakula aayenda nohatu dhimine po aamwatate naamwameme, ohashi tu etele wo ombili nohashi nyanyudha Jehova. (Gal. 6:10; Kol. 3:12-14; 1 Pet. 4:8, 9) Natango, okugwanitha po uukalele wetu nombepo yokwiiyamba otashi ke tu etela shili ondjambi.
16 Oohapu dhOmuuvithi ndhoka dha tothwa metetekelo otadhi popi okunyanyukilwa onkalamwenyo ngaashi okulya nokunwa. Eeno, nonando otwa taalelwa komamakelo, otatu vulu okunyanyukilwa iinima yopamaliko mbyoka Jehova e tu pa. Natango, opu na iinima mbyoka hayi tu kumitha noku tu etela enyanyu ngaashi okutala etango tali ningine, uunshitwe wevi, uunamwenyogona tawu yanda omalondo nosho wo iinima yilwe iikumithi meshito mbyoka hatu tala owala oshali. Ngele ohatu dhiladhila iinima mbyoka, ohole yetu yokuhola Jehova otayi ka koka, molwaashoka oye Omugandji gwiinima ayihe iiwanawa.
17. Oshike tashi ka kutha po thiluthilu omaupyakadhi getu, noshike tashi tu hekeleke nokuli ngashingeyi?
17 Lwahugunina, ohole yetu yokuhola Kalunga, okuvulika kiipango ye nosho wo okukala neitaalo tali longo mekuliloyambo otayi ke tu mangulula thiluthilu kuupyakadhi wonkalamwenyo yokwaahagwanenena notayi ke tu fala sigo omenyanyu lyaaluhe. (1 Joh. 5:3) Otashi tu hekeleke ngashingeyi okutseya kutya Jehova oku wete iinima ayihe mbyoka tayi tu hepeke. David okwa nyola a ti: “Otandi nyanyukwa nokutanta omolwesilohenda lyoye. Ou wete okuhepekwa kwandje nowa tseya uudhigu wandje.” (Eps. 31:7) Jehova ohe tu gamene kiiponga molwaashoka oku tu hole.—Eps. 34:19.
18. Omolwashike enyanyu li na okukala tali pangele mokati koshigwana shaKalunga?
18 Omanga twa tegelela egwanitho lyomauvaneko gaJehova Kalunga omunelago, natu mu holele. Inatu etha omadhiladhilo omawinayi ge tu imbe tu tsikile oku mu longela. Uuna pwa holoka uupyakadhi wontumba, natu dhiladhile nokulongitha uunongo wetu moku wu kandula po. Jehova ote ke tu kwathela tu pangele omaiyuvo getu notu katuke oonkatu ndhoka tadhi tu kwathele mokupongolola po oonkalo oondhigu. Onkee ano, natu nyanyukilwe omauwanawa gopalutu nogopambepo ngoka he tu pe. Ngele otwa kala popepi naKalunga, otatu ka kala twa nyanyukwa molwaashoka “oshigwana shi na [Jehova, NW], oye Kalunga kasho, oshi na elago.”—Eps. 144:15.
Owi ilongo shike?
• Ongiini tatu vulu okuholela Jehova sho tatu ungaunga nomaupyakadhi getu?
• Ongiini ondjele tayi vulu oku tu kwathela tu idhidhimikile omaupyakadhi?
• Ongiini tatu ka mona uuwanawa mokulonga ehalo lyaKalunga nonando otu li moonkalo oondhigu?
[Omathano pepandja 16]
Jehova oku uvitile nayi iinima iiwinayi mbyoka hayi ningwa
[Edhina lyomuthaneki 16]
© G.M.B. Akash/Panos Pictures
[Omathano pepandja 18]
Jehova okwe tu pa shoka twa pumbwa opo tu kale twa nyanyukwa