Inekela Jehova, ‘Kalunga Kehekeleko Alihe’
“Kalunga, He yOmuwa gwetu Jesus Kristus, na hambelelwe! Oye Tate omunahenda, Kalunga, [kehekeleko alihe, KB].”—2 KOR. 1:3.
1. Aantu yomapipi agehe oye na ompumbwe yashike?
OKUZA pokuvalwa, ohatu kala twa hala okuhekelekwa. Okahanona ohaka lili uuna ka hala okuhekelekwa. Ohake shi ningi ngele ka hala okuukatwa nenge ka sa ondjala. Nokuli nuuna twa koko, olundji ohatu kala twa hala okuhekelekwa, unene tuu ngele tu li muudhigu.
2. Jehova okwa gandja eshilipaleko lini kutya ota ka hekeleka mboka ye mu inekela?
2 Iilyo yuukwanegumbo nosho wo ookuume otaya vulu owala oku tu hekeleka sigo oposhitsa shontumba. Omathimbo gamwe otashi vulika tu iyadhe moonkalo moka twa pumbwa ehekeleko li vulithe pwaandyoka hatu pewa kaantu ooyakwetu. Kalunga oye owala ta vulu oku tu hekeleka kashi na nduno mbudhi kutya omaudhigu getu oge thike peni. Oohapu dhe otadhi tu shilipaleke tadhi ti: “OMUWA oku li popepi naayehe mboka taye mu ithana, . . . notu uvu omaindilo gawo.” (Eps. 145:18, 19) Eeno, “OMUWA oha tonatele aayuuki noha pulakene okulila kwawo.” (Eps. 34:15) Ihe ngele otwa hala e tu kwathele noku tu hekeleke otwa pumbwa oku mu inekela. Omupisalomi David okwe shi ulika sha yela sho i imbi a ti: “OMUWA oye eholameno lyaathiminikwa; oye epopilongulu momathimbo guudhigu. OMUWA, mboka ye ku shi, otaye ku inekele; iho etha nando ogumwe ngoka te ya kungoye.”—Eps. 9:9, 10.
3. Jesus okwa gandja ethaneko lini ndyoka tali ulike kutya Jehova oku hole oshigwana She?
3 Jehova okwa lenga mboka haye mu longele. Jesus okwe shi popi sha yela sho a ti: “Omanza gatano itaga landithwa po nani nando uupeni uyali auke? Ihe kaku na nando olimwe lya dhimbiwa kuKalunga. Oshoka nomafufu geni gokomutse oga yalulwa. Ano inamu tila: one omu vule omanza ogendji.” (Luk. 12:6, 7) Okupitila momupolofeti Jeremia, Jehova okwa li a lombwele oshigwana She shonale a ti: “Ondi mú hole aluhe notandi mú hilile kungame nohole yaaluhe.”—Jer. 31:3.
4. Omolwashike tatu vulu okukala twi inekela omauvaneko gaJehova?
4 Okukala twi inekela muJehova nosho wo kutya oha gwanitha omauvaneko ge otaku vulu oku tu hekeleka uuna tu li muudhigu. Onkee ano, otu na okukala neinekelo muye, ngaashi ndyoka lyu ulikwa kuJosua ngoka a ti: “OMUWA Kalunga keni okwe mú pe iinima ayihe iiwanawa mbyoka e yi mú uvanekele. Okwa gwanitha euvaneko kehe e li uvaneke; kape na nando olimwe lya gwile pohi.” (Jos. 23:14) Shimwe ishewe, otatu vulu okukala nuushili kutya nokuli nando otwa taalelwa koonkalo oondhigu ngashingeyi “Kalunga oku shi kwiinekelwa” nonokutya ite ke etha nando aapiya ye aadhiginini.—Lesha 1 Aakorinto 10:13.
5. Ongiini tatu vulu okuhekeleka yalwe?
5 Omuyapostoli Paulus kwa popi Jehova e li ‘Kalunga kehekeleko alihe.’ (KB) ‘Okuhekeleka’ otashi ti okutalaleka gumwe ngoka e li muudhigu nenge ngoka a nika oluhodhi. Ohaku ningwa opo a kwathelwe a kale inaa nika oluhodhi unene, nenge kaa kale a gwililwa po kuudhigu mboka e li muwo. Jehova osho naanaa he tu hekeleke ngaaka. (Lesha 2 Aakorinto 1:3, 4.) Tate yetu gwomegulu ina ngambekwa kusha nenge komuntu gwontumba, onkee ano, oha gandja ehekeleko kwaamboka ye mu hole. Natse wo otatu vulu okuhekeleka ooitaali ooyakwetu “mboka ye li momaudhigu gi ili nogi ili” tatu shi ningi ‘nehekeleko ndyoka Kalunga he tu hekeleke nalyo.’ (KB) Osha yela kutya Jehova oku na oonkondo kaadhi shi okuyelekwa nasha okuhekeleka mboka yaa na etegameno.
Nkene tu na okwiidhidhimikila iiyetithi yomaudhigu
6. Gandja iiholelwa yiinima mbyoka hayi vulu okudhigupaleka onkalamwenyo yetu.
6 Otwa pumbwa ehekeleko miinima oyindji yomonkalamwenyo. Oshinima shimwe shoka hashi tu nikitha unene oluhodhi okusilwa aaholike yetu, unene tuu kuume kopandjokana nenge okanona ketu. Ohatu kala wo twa pumbwa ehekeleko uuna tatu ningwa okatongo nenge tatu liwa oshipungo. Okwaahe na uukolele, uukulupe, oluhepo, omaupyakadhi mondjokana nenge oonkalo dhuuyuni ndhoka dhe tu dhigupalela ohadhi vulu oku tu ningitha tu kale twa pumbwa ehekeleko.
7. (a) Uuna omuntu e li monkalo yinikitha oluhodhi, ehekeleko lini a pumbwa? (b) Jehova ota vulu okuninga shike opo a aludhe ngoka e na omutima gwa “tekauka nogwa nyanyagulwa”?
7 Uuna tu li muudhigu, ohatu kala twa pumbwa ehekeleko ndyoka tali tu talaleke komutima, pamadhiladhilo, pamaiyuvo nosho wo palutu nopambepo. Pashiholelwa, natu tale shi na ko nasha nomutima. Ombiimbeli otayi ti kutya omutima gwetu otagu vulu okukala gwa “tekauka nogwa nyanyagulwa.” (Eps. 51:17, NW) Jehova ota vulu shili okuungaunga nonkalo ndjika, molwaashoka “ota aludha mboka ye ehamekwa koomwenyo, nota manga iilalo yawo.” (Eps. 147:3) Nokuli nonando otu li moonkalo oondhigu noonkondo, Kalunga ota vulu okwaaludha omitima ndhoka dha nyanyagulwa ngele tatu mu galikana tu na eitaalo nokuvulika kiipango ye.—Lesha 1 Johannes 3:19-22; 5:14, 15.
8. Uuna twa gwililwa po pamaiyuvo, ongiini Jehova ta vulu oku tu kwathela?
8 Olundji ohatu kala twa pumbwa okuhekelekwa molwaashoka omadhiladhilo getu otashi vulika ga kale ge ehamekwa noonkondo komamakelo gi ili nogi ili ngoka twa pita mugo. Itatu vulu okwiidhidhimikila oonkalo ndhoka tadhi makele eitaalo lyetu koonkondo dhetu yene. Onkee ano, omupisalomi okwi imbi a ti: “Uuna nda tila nonda sa iimpwiyu, oto hekeleke ndje e to nyanyudha ndje.” (Eps. 94:19) Kakele kaashono, Paulus okwa nyola a ti: “Inamu kala nando mu na oshimpwiyu shasha, ihe oompumbwe dheni dhi tseyithileni Kalunga momagalikano geni agehe. Ihe indileni aluhe nomwenyo gu udha ehambelelo. Nombili yaKalunga, ndjoka yi vule uunongo auhe wopantu, otayi gamene oomwenyo dheni nomadhiladhilo geni muKristus Jesus.” (Fil. 4:6, 7) Okulesha nokutedhatedha kOmanyolo otaku vulu okukala ekwatho enene opo tu vule okwiidhidhimika uuna twa gwililwa po pamaiyuvo.—2 Tim. 3:15-17.
9. Ongiini tatu vulu okwiidhidhimika uuna twa gwililwa po pamaiyuvo?
9 Omathimbo gamwe, otashi vulika tu kale twa teka omukumo noonkondo notashi vulika tu kale nomaiyuvo ga puka. Otashi vulika tu kale tu uvite inaatu gwana okupewa iinakugwanithwa yontumba yopamanyolo nenge uuthembahenda wiilonga. Jehova ota vulu wo oku tu hekeleka noku tu kwathela moshinima shika. Pashiholelwa, sho Josua a li a pewa oshilonga shokuwilika oshigwana shaIsraeli shi kondjithe iigwana yaatondi yasho mbyoka iinankondo, Moses okwa lombwele oshigwana a ti: ‘Ikoleleleni e tamu kala mu na omukumo. Inamu ya tila. Kalunga keni, OMUWA oye mwene, ta kala pamwe nane. Ite mu thigi po noite mu etha.’ (Deut. 31:6) Kekwatho lyaJehova, oshigwana she osha wilikwa kuJosua okuya mEvi lyEuvaneko nokusinda aatondi yasho ayehe. Moses okwa li wo a kwathelwa kuJehova pEfuta Etiligane.—Eks. 14:13, 14, 29-31.
10. Ngele otu na uunkundi wopalutu omolwomaudhigu ngoka hage tu adha, ekwatho lini tatu vulu okupewa?
10 Omaudhigu ngoka hage tu adha ohaga vulu oku tu etela uunkundi wopalutu. Ihe ngele ohatu li nawa, nokuvululukwa sha gwana nokuninga omadhewo nosho wo okukala twa yogoka, otashi ke tu etela uuwanawa. Ngele ohatu dhiladhila shoka Ombiimbeli tayi ti kombinga yonakuyiwa, otashi vulu wo oku tu kaleka nuukolele. Onkee ano, uuna tu li moothina natu kaleke momadhiladhilo iiholelwa yaPaulus nosho wo oohapu dhe ndhoka tadhi tsu omukumo tadhi ti: “Tse otwa kala tu na uudhigu owindji, ihe inatu hatwa po. Omathimbo gamwe otwa kala momalimbililo, ihe inatu teka omukumo. Otwa kala tu na aatondi oyendji, ihe Kalunga ine tu ekelahi. Pomathimbo gamwe otwa hepekwa unene, ihe inatu yonagulwa po.”—2 Kor. 4:8, 9.
11. Uuvu wopambepo otawu vulu okukeelelwa ngiini?
11 Omamakelo gamwe otaga vulu okutula uupambepo wetu moshiponga. Jehova ota vulu oku tu kwathela wo moshinima shika. Oohapu dhe otadhi tu shilipaleke tadhi ti: “OMUWA ota yambula po aapunduki nota pendutha po mboka yi ihata po.” (Eps. 145:14) Opo tu aluke kuuvu wopambepo, otu na okukonga ekwatho kaakuluntugongalo. (Jak. 5:14, 15) Otu na wo okukaleka momadhiladhilo aluhe etegameno lyopamanyolo lyoku ka kala nomwenyo sigo aluhe, shoka tashi vulu oku tu kwathela tu idhidhimikile omamakelo ngoka hage tu adha omolweitaalo lyetu.—Joh. 17:3.
Iiholelwa yaamboka ya li ya hekelekwa kuKalunga
12. Jehova okwa li a hekeleke Abraham ngiini?
12 Omupisalomi a nwethwa mo okwa popi a ti: “Dhimbulukwa oohapu dhoye [Jehova] ndho wa lombwele omuntu gwoye, oshoka odha pe ndje etegameno. Etalaleko muuwehame wandje olyo omauvaneko goye taga pe ndje omwenyo.” (Eps. 119:49, 50) Kunena, otu na Oohapu dhaKalunga, moka tatu adha iiholelwa oyindji yaamboka a li a hekeleke. Pashiholelwa, Abraham otashi vulika a li a nika oluhodhi sho u uvu kutya Jehova ota ka hanagula po Sodom naGomorra. Tatekulululwa ngoka omudhiginini okwa li a pula Kalunga a ti: “Oto ka yona po omuyuuki pamwe nomukolokoshi?” Jehova okwa li a hekeleke Abraham moku mu shilipaleka kutya ngele muSodoma okwa adha mo aayuuki 50 ite ke shi hanagula po. Ihe Abraham okwa li natango e mu pula lwiikando itano a ti: Ongiini ngele owa adha mo aayuuki 45? 40? 30? 20? 10? Jehova okwa yamukula Abraham nohenda nosho wo nolukeno oshikando kehe kutya ite ke shi hanagula po ngele omu na aayuuki ye thike mpoka. Nonando kamwa li aayuuki omulongo moshitopolwa shoka, Jehova okwa hupitha Lot noyanakadhona.—Gen. 18:22-32; 19:15, 16, 26.
13. Hanna okwa li u ulike ngiini kutya okwiinekela muJehova?
13 Hanna, omukulukadhi gwaElkana okwa li a halelela okumona okanona. Ihe ka li ha mono aanona, naashoka osha li she mu nikitha oluhodhi. Okwa galikana kuJehova kombinga yoshinima shoka, nOmusaaseri Eli okwe mu lombwele a ti: “Kalunga kaIsraeli ne ku pe shoka we mu indile.” Shika osha li sha hekeleke Hanna, “ye ina sa we oluhodhi.” (1 Sam. 1:8, 17, 18) Hanna okwa li i inekela thiluthilu muJehova, nokwa li e ethele iinima momake ge. Nonando ka li e shi kutya oshike tashi ka ningwa po, Hanna okwa li e na ombili yokomutima. Mokweendela ko kwethimbo, Jehova okwa yamukula egalikano lye. Okwa ningi omusimba e ta vala okanona okamati, nokwe ka luku Samuel.—1 Sam. 1:20.
14. Omolwashike David a li a pumbwa ehekeleko, nokwa li e li kongo kulye?
14 Omukwaniilwa David gwaIsraeli shonale naye okwa li gumwe gwomwaamboka ya hekelekwa kuKalunga. Molwaashoka Jehova oha ‘tala momutima,’ sho a hogolola David a ka ninge omukwaniilwa gwaIsraeli gwomonakuyiwa, okwa li e shi kutya oku na omutima gu uka nokwa li omudhiginini kelongelokalunga lyashili. (1 Sam. 16:7; 2 Sam. 5:10) Ihe konima yethimbo David okwa li a hondele naBatseba nokwa li a kambadhala okuholeka eyono ndyoka mokudhipagitha omusamane gwe. Sho David a dhimbulula kutya eyono lye olya kwata miiti, okwa galikana kuJehova a ti: “Dhima po oondjo dhandje omolwesilohenda lyoye enene. Yoga ndje uuwinayi wandje auhe, ngu u thete po ondjo yandje. Omayono gandje onde ga dhimbulula; oondjo dhandje odhi li aluhe momeho gandje.” (Eps. 51:1-3) David okwa li i iyele ombedhi shili, na Jehova okwe mu dhimine po. Ihe nonando ongaaka, David okwa li a mono iilanduliko omolweyono lye. (2 Sam. 12:9-12) Kakele kaashono, omolwohenda ye Jehova okwa li a hekeleke omupiya gwe ngoka omwiifupipiki.
15. Jehova okwa li a kwathele Jesus momukalo guni sho e li pokudhipagwa?
15 Jesus okwa li i iyadha moonkalo odhindji oondhigu sho a li kombanda yevi. Kalunga okwa li e etha a makelwe, na Jesus okwa kala a kakatela uudhiginini we e li omuntu a gwanenena ngoka a kala inekela aluhe muJehova nokusimanekitha uunamapangelo We. Sho a li pokugwaalekwa nokudhipagwa, Jesus okwa li a galikana kuJehova a ti: “Hamolwehalo lyandje, ihe olyoye li gwanithwe.” Omuyengeli okwa li a holokele Jesus e te mu tsu omukumo. (Luk. 22:42, 43) Kalunga okwa li a hekeleke Jesus noku mu tsa omukumo e te mu pe ekwatho ndyoka a li a pumbwa.
16. Kalunga ota vulu okuninga po shike ngele tu li pokudhipagwa omolwuudhiginini wetu?
16 Nonando otu dhipagwe omolwuudhiginini wetu sho tu li Aakriste, Jehova ota vulu oku tu kwathela tu kale aadhiginini kuye. Natango, etegameno lyeyumuko ohali tu hekeleke. Otwa tegelela wo nondjuulukwe ethimbo ndyoka omutondi gwahugunina, eso ‘ta ka sindwa.’ (1 Kor. 15:26) Jehova ngoka ihaa dhimbwa nando, oku shi aapiya ye aadhiginini mboka ya sa nale nosho wo yalwe, note ke ya yumudha. (Joh. 5:28, 29; Iil. 24:15) Okukala tu na einekelo meuvaneko lyaJehova li na ko nasha neyumuko otashi tu hekeleke notashi vulu oku tu pa etegameno uuna tu li momahepeko.
17. Ongiini Jehova ta vulu oku tu hekeleka, uuna twa silwa aaholike yetu?
17 Itashi hekeleke tuu okutseya kutya aaholike yetu mboka ye li moombila oye na etegameno lyoku ka kala ishewe nomwenyo muuyuni uupe ya manguluka ko komaupyakadhi agehe ngoka ge li ko kunena! Itashi ka kala tuu uuthembahenda uunene ‘kongundu onene’ yaapiya yaJehova mboka taya ka hupa po pehulilo lyonkalelo yiinima oku ka hambelela noku ka longa mboka taya ka yumudhwa ya kale nomwenyo kombanda yevi!—Eh. 7:9, 10, KB.
Omaako ge gaaluhe otage ku ukata
18, 19. Aapiya yaKalunga oya kala nokuhekelekwa ngiini pethimbo sho taya hepekwa?
18 Moses okwa li a shilipaleke oshigwana shaIsraeli okupitila meimbilo li na oonkondo notali inyengitha omutima a ti: “Egameno lyoye oKalunga komathimbo agehe, omaako ge gaaluhe otage ku ukata.” (Deut. 33:27) Konima omupolofeti Samuel okwa lombwele Aaisraeli a ti: “Inamu pilamena OMUWA, ihe mu longeleni nomutima aguhe. . . . OMUWA oku uvaneke noite mú etha nando, oshoka okwa tokola, e mú ninge oshigwana she.” (1 Sam. 12:20-22) Jehova ke na siku e ke tu iteke po, ngele otwa kala twa kakatela kelongelokalunga lyashili. Ote ke tu pa aluhe ekwatho ndyoka twa pumbwa.
19 Kalunga oha kwathele aantu ye kunena, nohe ya hekeleke momasiku ngaka omadhigu gahugunina. Pethimbo lyetu, aamwatate omayuvi ogendji muuyuni auhe oya kala nokuhepekwa nokutulwa moondjedhililo molwaashoka owala taya longele Jehova. Iimoniwa yawo otayi ulike kutya oha hekeleke shili aapiya ye uuna ye li momamakelo. Pashiholelwa, omumwatate gumwe moRusia, okwa li a tulwa mondjedhililo omimvo 23 omolweitaalo lye. Ihe nonando ongaaka, opwa li pwa kongwa ondunge yontumba a kale ta pewa iikulya yopambepo opo eitaalo lye li kale lya kola noku mone ehekeleko. Omumwatate okwa ti: “Uule womimvo adhihe ndhoka, ondi ilongo okukala ndi inekela Jehova nokumona ehekeleko okuza kuye.”—Lesha 1 Petrus 5:6, 7.
20. Omolwashike tatu vulu okukala nuushili kutya Jehova ite tu etha?
20 Kashi na nduno mbudhi kutya otwa taalela oonkalo dha tya ngiini, oshi li nawa tu kaleke momadhiladhilo oohapu dhomupisalomi tadhi hekeleke, ndhoka tadhi ti: “OMUWA ite ekelehi aantu ye.” (Eps. 94:14) Nonando otwa pumbwa okuhekelekwa paumwene, otu na wo uuthembahenda uunene wokuhekeleka yalwe. Ngaashi tatu ke shi mona moshitopolwa tashi landula, otatu vulu wo okuhekeleka yalwe mboka ya nika oluhodhi muuyuni mbuka wu na omaupyakadhi.
Oto yamukula ngiini?
• Iinima yimwe yini tayi vulu oku tu etela omaudhigu?
• Jehova oha hekeleke aapiya ye ngiini?
• Oshike tashi vulu oku tu hekeleka ngele tatu makelwa neso?
[oshimpungu/Omathano pepandja 25]
NKENE TATU VULU OKWIIDHIDHIMIKILA IINIMA MBYOKA TAYI VULU OKUGUMA
▪ omutima gwetu Eps. 147:3; 1 Joh. 3:19-22; 5:14, 15
▪ omadhiladhilo getu Eps. 94:19; Fil. 4:6, 7
▪ omaiyuvo getu Eks. 14:13, 14; Deut. 31:6
▪ uukolele wetu 2 Kor. 4:8, 9
▪ uupambepo wetu Eps. 145:14; Jak. 5:14, 15