‘Hekeleka Ayehe Mboka Taya Lili’

‘OMUWA okwa gwayeke ndje, ndi hekeleke ayehe mboka taya lili.’—JES. 61:1, 2.

1. Jesus okwa li a ningile shike mboka taya lili, nomolwashike?

JESUS KRISTUS okwa ti: “Iikulya yandje oyo okulonga ehalo lyaanguka a tumu ndje nokutsakanitha oshilonga shoka e shi pe ndje.” (Joh. 4:34) Jesus okwa li u ulike uukwatya waHe wa dhenga mbanda, sho a li ta longo oshilonga shoka He e mu pa. Uukwatya wumwe mboka Jesus u ulike owo ohole onene yaJehova yokuhola aantu. (1 Joh. 4:7-10) Omuyapostoli Paulus okwa popi kombinga yohole ndjoka sho a ti kutya Jehova, ‘oKalunga kehekeleko alihe.’ (2 Kor. 1:3, KB) Jesus okwa li u ulike ohole ndjoka sho a gwanitha po shoka sha hunganekwa muJesaja. (Lesha Jesaja 61:1, 2.) Jesus okwa li a lesha ehunganeko ndyoka mosinagoga muNasareti e ta popi kutya oohapu ndhoka odhe mu gwanithilwa. (Luk. 4:16-21) Pethimbo lyuukalele we, okwa li a hekeleke mboka taya lili, noku ya tsa omukumo opo ya mone epepelelo.

2, 3. Omolwashike aalanduli yaKristus ye na okuholela iikala ye yokuhekeleka aantu?

² Aalanduli ayehe yaJesus oya pumbwa okulandula oshiholelwa she mokukala taya hekeleke mboka taya lili. (1 Kor. 11:1) Paulus okwa ti: “Kumagidhathaneni ne mu kwathathane, ngaashi hamu shi ningi nokuli.” (1 Tes. 5:11) Otwa pumbwa okuhekeleka yalwe, molwaashoka ngashingeyi aantu oye li ‘momathimbo omadhigu [okukaliwa mugo, NW].’ (2 Tim. 3:1) Muuyuni auhe, aantu oyendji mboka ye na omitima dhu uka oya lulilwa kiikala yaantu yamwe mbyoka hayi ya nikitha oluhodhi, hayi ya yemateke noku ya geyitha.

³ Ngaashi Ombiimbeli ye shi hunganeka, pomasiku gahugunina ngaka aantu oyendji ‘oyi ihole, ye hole eliko, aainomi noye hole uuntsa. Aasheki, ihaa vulika kaakuluntu yawo, ihaa pandula noya pota. Kaye na olukeno nohenda, haa lundilathana, aapwidhi naadhudhu; oye tonde uuwanawa. Oye li aakotokeli, ihaa yawala, haa tuwalala noye hole olundundu peha lyokuhola Kalunga.’ Iikala ya tya ngaaka ngashingeyi oya vuka shi vulithe nale, molwaashoka “aakolokoshi naafudhime otaa tsikile okuza muuwanawa yu uka muuwinayi.”—2 Tim. 3:2-4, 13.

4. Oonkalo muuyuni kunena odhi li ngiini?

⁴ Iinima ayihe mbika kayi na oku tu kumitha molwaashoka Oohapu dhaKaunga otadhi shi popi sha yela kutya “uuyuni auhe ou li mepangelo lyomuhindadhi.” (1 Joh. 5:19) “Uuyuni auhe” owa kwatela mo omahangano gopapolotika, gopalongelokalunga, gopangeshefa nosho wo iinima ayihe mbyoka Satana ha longitha a taandelithe omitoto dhe. Nopwaahe na omalimbililo, Satana Ondiaboli oti ithanwa “omupangeli guuyuni” nosho wo “kalunga [kuuyuni] mbuka.” (Joh. 14:30; 2 Kor. 4:4) Oonkalo kombanda yevi alihe otadhi tsikile nokunayipala, molwaashoka Satana oku na ngashingeyi ondjahi onene, ye oku shi shi kutya oku na ko owala okathimbo okafupi opo Kalunga e mu hulithe po. (Eh. 12:12) Itashi hekeleke tuu okutseya kutya Kalunga masiku ota ka katukila Satana onkatu nosho wo onkalelo ye yiinima yuukolokoshi, nokuhulitha po ompata yi na ko nasha nuunamapangelo!—Gen., ontop. 3; Job ontop. 2.

Onkundana ombwanawa otayi uvithwa muuyuni auhe

5. Ehunganeko kombinga yiilonga yokuuvitha otali gwanithwa ngiini kunena?

⁵ Ehunganeko lyaJesus otali gwanithwa methimbo ndika edhigu mondjokonona yaantu. Okwa ti: ‘Onkundana ndjika ombwanawa yuukwaniilwa otayi ku uvithilwa uuyuni auhe yi ningile iigwana ayihe uunzapo; notaku ya ihe ehulilo.’ (Mat. 24:14, NW) Iilonga yokuuvitha Uukwaniilwa waKalunga otayi humu komeho inaashi monika nando onale. Kunena, Oonzapo dhaJehova dhi vulithe 7 500 000, ndhoka dhi li momagongalo ge vulithe 107 000, otadhi uvitha nokulonga aantu kombinga yUukwaniilwa waKalunga kombanda yevi alihe, ngaashi owala Jesus. (Mat. 4:17) Aantu mboka taya lili otaya hekelekwa kunena, omolwiilonga yetu yokuuvitha. Oshizemo, aantu 570 601 oya li ya ninginithwa ye li Oonzapo dhaJehova muule womimvo mbali opo dha zi ko.

6. Iilonga yetu yokuuvitha oya tamunuka mo shi thike peni?

⁶ Iilonga yokuuvitha oya tamunukamo noonkondo, noshi iwetikile nawa molwaashoka Oonzapo dhaJehova ohadhi toloka nokutaandelitha iileshomwa yopaMbiimbeli momalaka ge vulithe 500. Mondjokonona ayihe yaantu inamu monika nando onale oshinima sha tya ngaaka. Oshitopolwa shehangano lyaJehova shokombanda yevi otashi kumitha mokukala po kwasho, miilonga nosho wo mokwiindjipala kwasho. Osha yela kutya nopwaahe na ekwatho newiliko lyombepo ondjapuki yaKalunga, oshinima shoka itashi vulu okuningwa muuyuni mbuka tawu pangelwa kuSatana. Molwaashoka onkundana ombwanawa otayi uvithwa kevi alihe, aantu mboka kaaye shi Oonzapo nayo otaya mono ehekeleko okuza mOmanyolo nosho wo mboka taya lili otaya taamba ko etumwalaka lyUukwaniilwa.

Hekeleka ooitaali ooyakweni

7. (a) Omolwashike kaatu na okukala twa tegelela Jehova a hulithe po ngashingeyi oonkalo adhihe ndhoka tadhi tu thiminike? (b) Otu shi shi ngiini kutya otatu vulu okwiidhidhimikila omahepeko nomaudhigu?

⁷ Molwaashoka uuyuni owu udha uukolokoshi nokumona iihuna oshi na uupu tu iyadhe moonkalo ndhoka tadhi tu thiminike. Katu na okukala twa tegelela Kalunga a hulithe po iinima ayihe mbyoka hayi tu yemateke, omanga inaa hanagula po onkalelo ndjika yaSatana. Omanga twa tegelela esiku ndyoka, otatu ka makelwa shoka tashi ka ulika ngele tse aadhiginini ngaa kuJehova nosho wo kuunamapangelo we. (2 Tim. 3:12) Otatu vulu okukala twa fa Aakriste aagwayekwa yomuTessalonika shonale, mboka ya li yi idhidhimikile omahepeko nomaudhigu ye na eitaalo, omolwekwatho nosho wo ehekeleko okuza kuTate yetu gwomegulu.—Lesha 2 Aatessalonika 1:3-5.

8. Omanyolo otage shi ulike ngiini kutya Jehova oha hekeleke aapiya ye?

⁸ Nopwaahe na omalimbililo Jehova oha pe aapiya ye ehekeleko ndyoka ya pumbwa. Pashiholelwa, omupolofeti Elia okwa li a tila e ta fadhuka po, nokupopya nokuli kutya okwa hala okusa sho omukwaniilwakiintu Isebel a li a hala oku mu dhipaga. Jehova ina ganda Elia, ihe okwe mu hekeleke nokwe mu tsu omukumo opo a tsikile niilonga ye yokuhunganeka. (1 Aak. 19:1-21) Oshiholelwa shilwe shoka tashi ulike kutya Jehova oha hekeleke aapiya ye oshi iwetikile wo mAakriste yomegongalo lyothelemumvo lyotango. Pashiholelwa, otatu lesha taku ti: “Egongalo alihe lyomuJudea, muGalilea nomuSamaria olya kala li na ombili. [Kehekeleko lyombepo ondjapuki, NW] egongalo olya tungala nolyi indjipala, naayehe oya li haa simaneke Omuwa.” (Iil. 9:31) Inatu nyanyukwa tuu sho natse hatu ‘hekelekwa kombepo ondjapuki!’

9. Omolwashike okwiilonga kombinga yaJesus taku vulu oku tu hekeleka?

⁹ Tu li Aakriste, otwa hekelekwa sho twi ilongo kombinga yaJesus Kristus nokulandula oshinkoti she. Jesus okwa ti: “Ileni kungame amuhe mwa vulwa nomwa humbatekwa uudhigu, ongame notandi mú pe evululuko. Itsikeni ondjoko yandje, ne mu tseye ndje, oshoka ongame omunambili nomomutima ondi ishonopeka; notamu imonene evululuko. Oshoka ondjoko yandje ombwanawa nomutenge gwandje omupu.” (Mat. 11:28-30) Okwiilonga nkene Jesus a li u ungaunga naantu nosho wo okulandula oshiholelwa she oshiwanawa otaku ke tu kwathela noonkondo tu idhidhimikile omaudhigu ngoka hatu iyadha mugo.

10, 11. Oolye taya vulu okuhekeleka mboka ya gwililwa po komaupyakadhi megongalo?

¹⁰ Aakriste ooyakwetu otaya vulu wo oku tu hekeleka. Pashiholelwa, aakuluntugongalo megongalo lyopaKriste otaya vulu okuhekeleka mboka ye li moonkalo oondhigu. Omulongwa Jakob okwa nyola a ti: “Oku na gumwe ta alukwa [pambepo]? Ni ithane aakuluntu yegongalo, ye mu galikanene noye mu gwayeke omagadhi medhina lyOmuwa. Egalikano lyomwiitaali otali aludha omuvu. Omuwa ota galulile omuvu uundjolowele we, noondjo dhe otadhi dhimwa po.” (Jak. 5:14, 15) Iilyo yilwe megongalo nayo otayi vulu wo okukwathela.

¹¹ Olundji oshipu kaakiintu okupopya omaupyakadhi gawo naakiintu ooyakwawo. Aamwameme aakokele mboka ye na owino otaya vulu okupa aamwameme aagundjuka omayele omawanawa. Otashi vulika aamwameme mboka aakokele nayo ya pita nale moonkalo dha faathana monkalamwenyo yawo. Aakiintu otaya vulu okukwathela yalwe omolwuukwatya wawo wohenda nowolukeno mboka ye na paunshitwe. (Lesha Titus 2:3-5.) Aakuluntugongalo nayalwe megongalo otaya vulu shili ‘okupopya nehekeleko naamboka ya polimana’ ye li mokati ketu, naashoka osho ye na okuninga. (1 Tes. 5:14, 15, NW) Oshi li nawa tu kale tu shi kutya Kalunga ‘ohe tu hekeleke muudhigu wetu auhe, opo tu vule wo okukwatha mboka ye li momaudhigu gi ili nogi ili.’—2 Kor. 1:4.

12. Omolwashike sha simanenena okukala pokugongalo kwopaKriste?

¹² Osha simana tu kale aluhe pokugongala kwopaKriste mpoka hatu mono ehekeleko okupitila miipopiwa yopaMbiimbeli. Ombiimbeli otayi ti kutya Judas naSilas “oya kumagidha ooitaali olule noye ya tsu omukumo.” (Iil. 15:32) Pokati kiilyo yegongalo ohapu kala oonkundathana tadhi tungu komeho nokonima yokugongala. Nonando otu li momaudhigu omolwoonkalo dhontumba, inatu itongola ko kegongalo, molwaashoka oku shi ninga otaku ka nayipaleka owala onkalo. (Omayel. 18:1) Oshi li nawa tu landule omayele gaPaulus ga nwethwa mo ngoka taga ti: “Tu silathaneni oshimpwiyu, tu kwathathaneni mokuholathana nomokulongelathana uuwanawa. Inatu etha po okugongala pamwe, ngaashi yamwe haa ningi. Ihe natu kumagidhathaneni, unene sho tu wete esiku lyOmuwa tali hedha popepi.”—Heb. 10:24, 25.

Mona ehekeleko mOmbiimbeli

13, 14. Ulika nkene Omanyolo taga vulu oku tu hekeleka.

¹³ Otatu vulu okumona ehekeleko mOmbiimbeli kutya nduno otu li Aakriste ya ninginithwa nenge opo tatu tameke okwiilonga kombinga yaKalunga nomalalakano ge. Paulus okwa nyola a ti: “Oshoka ashihe shoka sha nyolwa mOmanyolo, osha nyolwa, shi tu longe, opo tu kale tu na etegameno tali zi mokwiidhidhimika notu mone omukumo, ngele tatu lesha oohapu dhaKalunga.” (Rom. 15:4) Omanyolo Omayapuki otaga vulu oku tu hekeleka noku tu ningitha tu ‘kale twa gwana twa pwa notwoopalela oshilonga kehe oshiwanawa.’ (2 Tim. 3:16, 17) Okukala tu shi oshili shi na ko nasha nomalalakano gaKalunga, nokukala tu na etegameno lyolela lyonakuyiwa otaku ke tu hekeleka noonkondo. Onkee ano, osha simana okulesha esiku kehe Oohapu dhaKalunga nosho wo iileshomwa yopaMbiimbeli, molwaashoka otayi vulu oku tu hekeleka noku tu etela uuwanawa momikalo odhindji.

¹⁴ Jesus okwe tu tulila po oshiholelwa oshiwanawa mokulongitha Omanyolo nomokuhekeleka yalwe. Pashiholelwa, oshikando shimwe sho a li i ihololele aalongwa ye yaali konima yokuyumudhwa kwe okwa li e ya “fatululile Omanyolo.” Sho a li ta popi nayo omitima dhawo odha li dha tuntukwa. (Luk. 24:32) Paulus naye okwa li ha ‘tompathana naantu mOmanyolo’ ta holele Jesus. Mboka ya li taya pulakene Paulus muBerea “oya kala ya hokwa okupulakena oohapu dhaKalunga, nesiku kehe oya kala nokukonakona Omanyolo.” (Iil. 17:2, 10, 11) Onkee ano, oshi li nawa tu kale hatu lesha Ombiimbeli esiku kehe opo tu mone uuwanawa muyo nosho wo miileshomwa yopaKriste mbyoka ya nuninwa oku tu hekeleka noku tu pa etegameno uuna tu li momathimbo omadhigu.

Omikalo dhilwe nkene tatu vulu okuhekeleka yalwe

15, 16. Iinima yimwe yini tatu vulu okuninga tu kwathele nokuhekeleka Aakriste ooyakwetu?

¹⁵ Opu na omikalo odhindji moka tatu vulu okukwathela nokuhekeleka Aakriste ooyakwetu. Pashiholelwa, ngele Omukriste omukokele nenge ngoka te ehama okwa pumbwa sha kositola, otatu vulu oku ka landa ko kiinima ye. Otatu vulu okukwathela yalwe miilonga yawo yomegumbo, nokungeyi otatu ulike kutya otu na nayo. (Fil. 2:4) Otatu vulu wo okupandula ooitaali ooyakwetu omolwomaukwatya gawo omawanawa, ngaashi ohole, uunkulungu, uulaadhi nosho wo eitaalo lyawo.

¹⁶ Omukalo omwaanawa gokuhekeleka aakokele ogwo oku ya talela po nokupulakena nawa kiimoniwa yawo yonale nosho wo omalaleko nuuyamba ngoka ya mona mokulongela Jehova. Shoka otashi ke tu ladhipika noku tu hekeleka. Otashi vulika tu leshe Ombiimbeli nenge iileshomwa yopaMbiimbeli pamwe naamboka tatu talele po. Otatu vulu okulesha pamwe nayo oshitopolwa shOshungolangelo shoka tashi konakonwa oshiwike shoka nenge uuyelele mboka tawu ka kundathanwa pEkonakonombiimbeli lyEgongalo moshiwike shoka. Otatu vulu okutala pamwe nayo oka-DVD kehangano. Shimwe ishewe, otatu vulu okulesha pamwe nayo iimoniwa tayi ladhipike mbyoka yi li miileshomwa yetu.

17, 18. Tu li aalongeli yaJehova aadhiginini, omolwashike tatu vulu okukala nuushili kutya ote ke tu ambidhidha noku tu hekeleka?

¹⁷ Ngele otu shi kutya Omukriste omukwetu okwa pumbwa ehekeleko, otatu vulu oku mu kwatela momagalikano getu. (Rom. 15:30; Kol. 4:12) Sho tatu idhidhimikile omaupyakadhi gomonkalamwenyo nosho wo sho tatu hekeleke yalwe, otatu ka kala neitaalo lya fa lyomupisalomi ngoka i imbi a ti: “Uudhigu woye u fala kOMUWA, oye te ku popile; ihe etha aayuuki ya sindike.” (Eps. 55:22) Jehova ota ka kala aluhe shili noku tu hekeleka noku tu ambidhidha tu li aapiya ye aadhiginini.

¹⁸ Kalunga okwa li a lombwele aalongeli ye yomethimbo lyonale, a ti: “Ongame, eeno, ongame mwene handi mú hekeleke.” (Jes. 51:12) Ngele otatu hekeleke mboka ya polimana, Jehova ota ka yambeka wo iilonga yetu yuudhiginini. Kutya nduno etegameno lyetu oku ka kala nomwenyo kombanda yevi nenge omegulu, kehe gumwe gwomutse ota vulu okumona ehekeleko moohapu dhaPaulus ndhoka a nyolele Aakriste ooyakwawo aagwayekwa tadhi ti: “Omuwa gwetu Jesus Kristus mwene naKalunga Tate yetu, ngoka e tu hole nokwe tu pa kesilohenda lye omukumo gwaaluhe netegameno ewanawa, ne mú tse omukumo ye ne mú koleke, mu longe nomu popye ashihe shoka oshiwanawa.”—2 Tes. 2:16, 17.

Oto dhimbulukwa?

• Iilonga yetu yokuhekeleka mboka ya taya lili oya taandela shi thike peni?

• Iinima yini tatu vulu okuninga opo tu hekeleke yalwe?

• Omanyolo otage shi koleke ngiini kutya Jehova oha hekeleke aapiya ye?

[Ethano pepandja 28]

Mbela oho hekeleke mboka taya lili?

[Ethano pepandja 30]

Kehe gumwe kutya nduno omugundjuka nenge omukokele ota vulu okuladhipika yalwe