Kalunga ota ka hupitha aantu okupitila muMesiasa
“Oshoka ngaashi aantu ayehe ye na okusa [omolwuukumwe] wawo naAdam, osho aantu ayehe otaa ka yumudhwa omolwuukumwe wawo naKristus.”—1 KOR. 15:22.
1, 2. (a) Andreas naFilippus oya li yi inyenge ngiini sho ya mono Jesus? (b) Omolwashike tatu tile kutya tse otu na uushili wa yela kutya Jesus oye Mesiasa tu vule Aakriste yonale?
ANDREAS okwa li a lombwele omumwayina Petrus a ti: ‘Otse twa mono Mesiasa.’ Okwa li e na uushili kutya Jesus Omunasaret oku li Omugwayekwa gwaKalunga. Filippus okwa tompo kuume ke Natanael noku mu lombwela ta ti: “Otwa mono omulumentu ngoka a nyolwa kuMoses membo lyompango nokaahunganeki. Oye Jesus, omuna gwaJosef Omunasareti.”—Joh. 1:40, 41, 45.
2 Mbela owu na lela uushili kutya Jesus oye Mesiasa ngoka u uvanekwa, “mwene gwehupitho” ngoka Jehova ta ka longitha? (Heb. 2:10, OB-1954) Kunena, otu na omatompelo ga yela kutya ye Omugwayekwa gwaKalunga tu vule aalanduli ye yomethelemumvo lyotango. Oohapu dhaKalunga otadhi koleke shili okuza pokuvalwa neyumuko lye kutya Jesus oye Kristus. (Lesha Johannes 20:30, 31.) Ombiimbeli otayi ulike wo kutya Jesus ota ka tsikila okugwanitha po onkandangala ndjoka ta dhana e li Mesiasa okuza megulu. (Joh. 6:40; lesha 1 Aakorinto 15:22.) Kunena, nangoye oto vulu okupopya meityo lyopambepo kutya onda ‘mona Mesiasa.’ Ihe tango, tala shoka sha li sha ningitha aalongwa mboka yotango ya thike pehulithodhiladhilo kutya oya mona Mesiasa.
“Oshiholekwa” kombinga yaMesiasa sha hololwa kashona nakashona
3, 4. (a) Ongiini aalongwa yomethelemumvo lyotango ya li ya dhimbulula Mesiasa? (b) Omolwashike omahunganeko agehe gopaMesiasa taku vulu okutiwa kutya oga gwanithilwa owala muJesus?
3 Omolwashike aalanduli yaJesus yomethelemumvo lyotango ya li ye na uushili kutya oye Mesiasa? Omolwaashoka Jehova okwa kala nokuholola kashona nakashona okupitila maapolofeti iinima mbyoka tayi ka kwathela aantu ya dhimbulule Mesiasa ngoka te ke ya. Omulongwantu gumwe gwOmbiimbeli okwa faathanitha oshinima shika nokutula kumwe oshipopitha sha hongwa miintimbu yomamanya. Natu tye ando aalumentu mboka nkene ya valwa ya popye kehe gumwe ote eta oshintimbu shemanya mondunda yontumba. Ngele iintimbu mbyoka oya tulwa kumwe e tayi tungu po efano lya fa oshipopitha shoka sha hongwa memanya, oto ka thika pehulithodhiladhilo kutya opu na omuntu gumwe ngoka a thaneka opulana yoshipopitha shoka e ta tumine omulumentu kehe oshintimbu. Ngaashi owala oshintimbu kehe shomamanya ngoka, ehunganeko kehe kombinga yaMesiasa otali gandja uuyelele wontumba kombinga ye.
4 Mbela omahunganeko agehe ngoka taga popi Mesiasa otashi wapa ngaa ga gwanithilwe omuntu gumwe ohaluka? Omukonakoni gwiinima gumwe okwa ti kutya itashi vulika nando opo omahunganeko agehe ngoka taga popi Mesiasa ga gwanithilwe ohaluka omuntu gwontumba. Okwa ti: “Jesus oye owala mondjokonona ayihe a li e ga gwanitha.”
5, 6. (a) Satana ota ka pangulwa ngiini? (b) Kalunga okwa li a holola ngiini kashona nakashona ezimo moka “oluvalo” lwu uvanekwa talu ka za?
5 Omahunganeko gopaMesiasa oga li taga tsu omuthindo unene “oshiholekwa” shoka sha kwatela mo iinima oyindji ya simanenena. (Kol. 1:26, 27; Gen. 3:15) Oshiholekwa shoka otashi ka pangula “eyoka ndyoka ekulu” Satana Ondiaboli, ngoka e etele aantu uulunde neso. (Eh. 12:9, OB-1954) Epangulo ndyoka otali ka ningwa ngiini? Jehova okwa hunganeka kutya “oluvalo” otalu ka za ‘momukiintu’ ngoka ta ka nyanyagula omutse gwaSatana. “Oluvalo” ndoka lwu uvanekwa olu na oku ka nyanyagula omutse gweyoka nokuhulitha po Satana, omikithi neso. Ihe Kalunga oku uvaneka kutya Satana ota ka tsa tango “oluvalo” lwomukiintu moshithi shompadhi yalwo yopathaneko.
6 Jehova okwa holola kashona nakashona ngoka ta ka kala “oluvalo” lwu uvanekwa. Kalunga okwi iganene e ta lombwele Abraham a ti: “Omungoye nomoluvalo lwoye aantu yomiigwana ayihe otaa ka lalekwa nuuyamba.” (Gen. 22:18) Moses okwa hunganeka kutya oluvalo ndoka otalu ka kala “omuhunganeki” omunene lu mu vule. (Deut. 18:18, 19) Omahunganeko oge shi koleke, na David okwa li a shilipalekelwa kutya Mesiasa ota ka za moluvalo lwe nota ka thigulula uukwaniilwa we sigo aluhe.—2 Sam. 7:12, 16; Jer. 23:5, 6.
Uumbangi kutya Jesus oye Mesiasa
7. Omeityo lini Jesus a za moluvalo ‘lwomukiintu’ gwaKalunga?
7 Kalunga okwa tumu oshishitwa she shotango, Omwana, a kale “oluvalo” ndoka lwu uvanekwa okupitila mehangano lye lyiishitwa yopambepo yomegulu ndyoka lya fa omukiintu Gwe. Shika osha li tashi pula opo Omwana gwaKalunga awike ‘i ihule’ onkalamwenyo yomegulu opo a valwe e li omuntu a gwanenena. (Fil. 2:5-7, OB-1954; Joh. 1:14) Maria okwa li a ‘lambelwa’ kombepo ondjapuki shoka sha li eshilipaleko kutya ngoka ta ka valwa okwa li ‘ta ka lukwa Omuna gwaKalunga.’—Luk. 1:35.
8. Jesus okwa li a gwanitha po ngiini ehunganeko lyopaMesiasa sho a ninginithwa momeya?
8 Omahunganeko gopaMesiasa oge shi ulika kutya openi Jesus ta ka valelwa nuunake. Okwa li a valelwa muBetlehem ngaashi sha hunganekwa. (Mika 5:2) Methelemumvo lyotango, Aajuda oya li ya tegamena noonkondo oshinima shoka. Molwaashoka oya li ya tegelela Mesiasa a holoke, aantu yamwe oya pula Johannes Omuninginithi ngele oye Kristus. Ihe Johannes okwe ya lombwele a ti: “Oku na gumwe ngoka e vule ndje oonkondo te ke ya.” (Luk. 3:15, 16) Sho Jesus a li e na omimvo 30, oku ulike pethimbo lyo opala kutya oye Mesiasa sho e ya kuJohannes poshikufuthinge mo 29 E.N. a ninginithwe kuye. (Dan. 9:25) Okwa tameke uukalele we nehwamo a ti: “Ethimbo olya thika, uukwaniilwa waKalunga owa hedha popepi.”—Mark. 1:14, 15, KB.
9. Nonando aalongwa yaJesus kaya li ye na uumbangi wa gwana, oya li yi itaala thiluthilu kutya oye lye?
9 Ihe aantu oya li ye na okulundulula iikala yawo kombinga ye. Jesus okwa li ta ka ninga Omukwaniilwa, ihe epangelo lye lyomonakuyiwa otali ka pangela okuza megulu notali ka uviwa ko owala nawa konima yethimbo. (Joh. 12:12-16; 16:12, 13; Iil. 2:32-36) Ihe sho Jesus a pula aalongwa ye: “Ne otamu tile ndje ngiini, ongame lye?” Petrus ina kakadhala, ihe okwa yamukula a ti: “Ongoye Kristus, Omuna gwaKalunga omunamwenyo.” (Mat. 16:13-16) Petrus okwa li wo a gandja eyamukulo lya faathana sho oyendji ya li ye mu thigi po molwaashoka kayu uvite ko elongo lye.—Lesha Johannes 6:68, 69.
Natu uveni Mesiasa
10. Omolwashike Jehova a tsu omuthindo ompumbwe tu uve Omwana?
10 Omwana gwaKalunga awike okwa li omuntu gwopambepo omunankondo sho a li megulu. Jesus sho e ya kombanda yevi, ‘okwa zi kuKalunga.’ (Joh. 16:27, 28) Okwa ti: “Elongo ndika tandi longo, kali shi lyandje mwene, ihe olya za kuKalunga, ngoka a tuma ndje.” (Joh. 7:16) Jehova okwa li e shi koleke kutya Jesus oye Mesiasa sho a popi peshitululo lye a ti: “Mu uveni.” (Luk. 9:35) Eeno, natu mu uve nokuvulika kOmuhogololwa Ngoka. Shika osha kwatela mo eitaalo nokulonga shoka tashi opalele Kalunga noku mu nyanyudha, opo tu ka mone omwenyo gwaaluhe.—Joh. 3:16, 35, 36.
11, 12. (a) Omolwomatompelo geni Aajuda yomethelemumvo lyotango ya li ye ekelehi Jesus e li Mesiasa? (b) Oolye ya li yi itaala thiluthilu Jesus?
11 Nonando opwa li pu na uumbangi wa gwana kutya Jesus oye Mesiasa, Aajuda oyendji methelemumvo lyotango inaye mu itaala. Omolwashike mbela? Molwaashoka oya li ye na omadhiladhilo gawo yene ga puka kombinga yaMesiasa, mwa kwatelwa kutya ote ke ya mangulula mondjoko yuupika wAaroma. (Lesha Johannes 12:34.) Kungeyi, kaya li ya taamba ko Mesiasa ngoka omahunganeko taga ti kutya ota ka kala a dhinika nokweekelwahi kaantu, omulumentu gwomahepeko nomuvuntu nolwahugunina ota ka dhipagwa. (Jes. 53:3, 5) Nokuli naalongwa ye yamwe oya li ya sa uunye sho ine ya mangulula muupika wAaroma. Ihe oya li aadhiginini, nomokweendela ko kwethimbo oya li yu uvu ko oshinima shoka.—Luk. 24:21.
12 Etompelo ekwawo ndyoka lya ningitha aantu ye ekelehi Jesus e li Mesiasa omuuvanekwa, olya li omalongo ge ngoka kaaye uvite ko. Okuya mUukwaniilwa osha li tashi pula omuntu ‘i idhimbwe ye mwene,’ a ‘lye’ onyama yaJesus ‘noku nwe’ ombinzi ye, ‘a valululwe’ nosho wo okukala ‘kee shi gwomuuyuni.’ (Mark. 8:34; Joh. 3:3; 6:53; 17:14, 16) Aanuuntsa, aayamba naafudhime oya li ye wete shi li oshinakugwanithwa oshidhigu unene. Ihe Aajuda aaifupipiki oya zimine kutya Jesus oye Mesiasa, ngaashi Aasamaria yamwe mboka ya ti: ‘Oye lela omuhupithi gwuuyuni.’—Joh. 4:25, 26, 41, 42; 7:31.
13. Ongiini Jesus a li a tsuwa moshithi shompadhi pathaneko?
13 Jesus okwa hunganeke kutya ota ka pangulwa kaayambi aakuluntu nota ka alelwa komuti kaapagani, ihe ota ka yumuka mesiku etitatu. (Mat. 20:17-19) Sho a li a shilipalekele oshigongi shaatokoli nenge Osanhedrin kutya oye “Kristus, Omuna gwaKalunga,” okwa li a pangulwa kutya ota tuku Kalunga. (Mat. 26:63-66) Pilatus ina mona sha muye “shoku mu dhipagitha,” ihe molwaashoka Aajuda oye mu lundile wo kutya ota tsu ondumbo nepangelo, Pilatus “okwa gandja Jesus miikaha yawo.” (Luk. 23:13-15, 25) Kungawo, oyi idhimbike “omugandji gwomwenyo” noya ningi ompangela oku mu dhipaga, nonando opwa li uumbangi oundji lela kutya okwa tumwa kuKalunga. (Iil. 3:13-15) Mesiasa okwa li e na ‘okudhipagelwa’ komuti mOpaasa yomo 33 E.N., ngaashi sha hunganekwa. (Dan. 9:26, 27; Iil. 2:22, 23) Okwa li a tsuwa “moshithi” shompadhi okupitila meso ndyoka linyanyalitha, ngaashi sha hunganekwa muGenesis 3:15.
Omolwashike Mesiasa a li e na okusa?
14, 15. (a) Jehova okwe etha Jesus a se omolwomatompelo gaali geni? (b) Jesus okwa ningi shike konima sho a yumudhwa?
14 Jehova okwa li e etha Jesus a se omolwomatompelo gaali ga simanenena. Lyotango, uudhiginini waJesus sigo omeso owu ulike kutya oye “oshiholekwa” oshiyapuki. Okwe shi ulike lela kutya omuntu a gwanenena ota vulu okukala omudhiginini “muKalunga” nokusimanekitha uunamapangelo we, nonando Satana oku mu makele shi thike peni. (1 Tim. 3:16) Etiyali, ngaashi Jesus e shi popi: “Omuna gwOmuntu okwe ya okugandja omwenyo gwe, a hupithe oyendji.” (Mat. 20:28) “Iikulila” ye yi li ofuto ndjoka tayi mangulula aantu muulunde mboka oyana yaAdam ya thigulula, nokwe shi ningi tashi wapa opo ayehe mboka taye mu taamba e li ngoka Kalunga ta longitha a hupithe aantu ya ka mone omwenyo gwaaluhe.—1 Tim. 2:5, 6.
15 Kristus okwa li a yumudhwa konima yomasiku gatatu. Muule womasiku 40 okwa kala hi ihololele aalongwa ye e yu ulukile kutya oku na omwenyo noku ya pa natango omalombwelo ga gwedhwa po. (Iil. 1:3-5) Konima yaashoka okwa londo megulu opo a gandje kuJehova ongushu yekuliloyambo lye ndyoka li na ondilo nokwa tegelela ethimbo lyu uthwa opo okukala po kwe e li Omukwaniilwa gwopaMesiasa ku tameke. Ngashingeyi, oku na iilonga oyindji mbyoka e na okulonga.
A gwanitha po onkandangala ye e li Mesiasa
16, 17. Hokolola onkandangala ndjoka Jesus a dhana e li Mesiasa konima sho a londo megulu.
16 Uule womathelemimvo agehe konima yeyumuko lye, Jesus okwa kala ta tonatele nuudhiginini iilonga yegongalo lyAakriste aagwayekwa ndyoka a kala Omukwaniilwa gwalyo. (Kol. 1:13) Okwa li a tegelela ishewe ethimbo lyu uthwa uuna ta ka pewe oonkondopangelo e li Omukwaniilwa gwUukwaniilwa waKalunga. Omahunganeko gOmbiimbeli niiningwanima muuyuni otayi ulike kutya okukala po kwe e li Omukwaniilwa gwuuyuni okwa tameke mo 1914 moka mwa tameke wo omandhindhiliko ‘gehulilo lyuuyuni.’ (Mat. 24:3; Eh. 11:15) Okathimbo owala konima yaashoka, ye pamwe naayengeli aavuliki oya tidha mo Satana noompwidhuli dhe megulu.—Eh. 12:7-10.
17 Iilonga yokuuvitha nokulonga aantu mbyoka Jesus a tameke mo 29 E.N., oyi li pokupwa. Masiku ota ka pangula aanamwenyo ayehe. Opo ihe ota ka lombwela mboka ya fa oonzi ‘ya ka thigulule Uukwaniilwa mboka ye wu longekidhilwa okuza keshito lyuuyuni.’ (Mat. 25:31-34, 41, yelekanitha KB.) Ayehe mboka ye ekelehi Jesus e li Omukwaniilwa otaya ka hanagulwa po sho ta ka wilika etangakwiita lyomegulu ndyoka tali ke ya lye endela aakolokoshi ayehe. Opo ihe, Jesus ota ka manga Satana noompwidhuli dhe noku mu patela “molumbogo lwomuule.”—Eh. 19:11-14; 20:1-3.
18, 19. Jesus ote ke eta shike mokugwanitha po onkandangala ye e li Mesiasa, naantu aavuliki otaya ka mona uuwanawa washike?
18 Pethimbo lyEpangelo lye lyOomvula Eyuvi, Jesus ota ka kala shili “Omupukululi omukumithi, Kalunga omunankondo, He yomuukwaaluhe, OMUWA gwombili,” ngaashi omadhinasimaneko ge taga ti. (Jes. 9:6, 7) Uukwaniilwa we otawu ke etela aantu egwaneneno mwa kwatelwa aasi mboka taya ka yumuka. (Joh. 5:26-29) Mesiasa ota ka wilika aantu mboka ye na ehalo moku ya fala “koothithiya dhomeya omanamwenyo,” shoka tashi ka kwathela aantu aavuliki ya nyanyukilwe ekwatathano lyombili naJehova. (Lesha Ehololo 7:16, 17.) Konima yepangulo lyahugunina, aanashipotha ayehe, mwa kwatelwa Satana noompwidhuli dhe, otaye ku “umbilwa mefuta lyomulilo,” naashoka otashi ti okunyanyagulwa po thiluthilu kwomutse ‘gweyoka.’—Eh. 20:10.
19 Jesus ita ka gwanitha po tuu onkandangala ye e li Mesiasa momukalo omukumithi nopauyuuki! Aantu mboka taya ka hupithwa otaya ka kala nomwenyo sigo aluhe mOparadisa kombanda yevi ye na uukolele nombili. Edhina lyaJehova eyapuki otali ka yapulwa nuunamapangelo we otawu ka yukipalithwa apuhe. Masiku mboka haya vulika kOmuhogololwa gwaKalunga, otaya ka mona uuthiga kaawu shi kuyelekwa.
Mbela ngoye owa mona Mesiasa?
20, 21. Omolwomatompelo geni wu na okulombwela yalwe kombinga yaMesiasa?
20 Okuza mo 1914 otu li methimbo lyokukala po kwaKristus nenge parousia mOshigreka. Nonando katu mu wete sho e li Omukwaniilwa gwUukwaniilwa waKalunga, otu shi iwetele momahunganeko ngoka taga gwanithwa. (Eh. 6:2-8) Ihe aantu oyendji kunena kaye na ko nasha nuushili mboka tawu ulike okukala po kwaMesiasa, ngaashi owala Aajuda yomethelemumvo lyotango. Oya hala Mesiasa ngoka te ya mangulula muupika wopantu nenge ngoka ta longele kumwe naapangeli yuuyuni mbuka. Ihe ngoye owi ilonga kutya Jesus ngashingeyi oku li Omukwaniilwa gwUukwaniilwa waKalunga. Mbela omutima gwoye kagwa li tagu hunga enyanyu sho we shi uvu? Ngaashi owala aalongwa yomethelemumvo lyotango, oshe tu inyengitha tu tye: ‘Otwa mono Mesiasa.’
21 Ngele to popi kombinga yoshili kunena, mbela oho tsu omuthindo onkandangala ndjoka Jesus ta dhana e li Mesiasa? Mokuninga ngaaka oto ka kokeka olupandu lwoye lwaashoka e ku ningila, lwaashoka ta ningi ngashingeyi naashoka ta ka ninga. Nopwaahe na omalimbililo, nangoye owa lombwela aapambele nookuume koye kombinga yaMesiasa, ngaashi owala Andreas naFilippus. Omolwashike itoo ya lombwele ishewe nuulaadhi noku yu ulukila kutya Jesus Kristus oye shili Mesiasa omuuvanekwa ngoka okupitila muye Kalunga ta ka hupitha aantu?
Oto vulu okuyelitha?
• Ongiini aalongwa yomethelemumvo lyotango ya li ya mono Mesiasa?
• Jesus okwa si omolwomatompelo gaali geni ga simana?
• Jesus ota ka ninga shike natango opo a gwanithe po onkandangala ye e li Mesiasa?