Oya li ya tegelela Mesiasa

“Aantu sho ya li mokutegelela, ayehe oya dhiladhila kutya, pamwe Johannes oye [Mesiasa, NW].”—LUK. 3:15.

1. Aasita yoonzi yamwe oya li yu uvu omuyengeli ta popi shike?

AASITA oya li melundu taya tonatele oonzi dhawo uusiku. Oya haluka sho omuyengeli gwaJehova a thikama puyo nosho wo sho ya mono eadhimo lyaKalunga mokati kawo. Omuyengeli okwa ti kuyo, pulakeneni. Okwe ya lombwele onkundana tayi nyanyudha a ti: “Inamu tila! Oshoka ngame otandi mú uvithile elaka lyenyanyu enene tali ningi lyaantu ayehe. Nena tuu ndjika mwa valelwa omukulili . . . Oye Kristus, Omuwa,” ngoka a ka tseyika e li Mesiasa. Aasita mboka oya li taya ka adha okahanona ka lala metemba lyokulila iimuna pondoolopa yi li popepi. Ombaadhilila, “ongundu onene yaayengeli yomegulu” oya tameke okuhambelela Jehova tayi ti: “Esimano olyaKalunga gwokombandambanda! Nombili kombanda yevi maantu e ya hokwa!”—Luk. 2:8-14.

2. Edhina “Mesiasa” otali ti shike, nongiini a li ta vulu okudhimbululwa mo?

² Aasita yoonzi oya li ye shi shi kutya mOshihebeli, “Mesiasa” nenge “Kristus” otashi ti “Omugwayekwa.” (Eks. 29:5-7) Ihe ongiini taya vulu okwiilonga oshindji nokwiitaalitha yalwe kutya okanona hoka ka popiwa komuyengeli oko taka ka kala Mesiasa ngoka a hogololwa kuJehova? Omokukonakona omahunganeko ngoka ge li mOmanyolo gOshihebeli noku ga yelekanitha niilonga nosho wo nonkalamwenyo yokanona hoka.

Omolwashike aantu ya li ya tegelela Mesiasa?

3, 4. Ehunganeko ndyoka li li muDaniel 9:24, 25 olya li lya gwanithwa ngiini?

³ Sho Johannes omuninginithi a li a tameke okuuvitha konima yoomvula dhontumba, oohapu dhe odha li dha ningitha aantu yamwe yi ipule ngele oye Mesiasa. (Lesha Lukas 3:15.) Otashi vulika aantu yamwe ya li yu uvite ko nawa ehunganeko ndyoka tali popi kombinga ‘yiiwike omilongo heyali.’ Ngele osho, oya li taya vulu okumona kutya uunake Mesiasa a li e na okuholoka. Ehunganeko otali ti: “Okuza pethimbo ndyoka elombwelo tali gandjwa lyokutungulula Jerusalem sigo omuwiliki omuhogololwa gwaKalunga te ke ya, otaku piti iiwike iheyali . . . notashi ka kala po iiwike omilongo hamano niiyali.” (Dan. 9:24, 25) Ombiimbeli yOshindonga otayi ti: “Iiwike omilongo heyali oyo uule wethimbo ndyoka Kalunga u uthile oshigwana shoye.” Aalongwantu yi ili noyi ili oyi itaala kutya mbika oya li iiwike yokomvula.

⁴ Kunena, aapiya yaJehova oye shi shi kutya iiwike 69 oyi thike poomvula 483 ndhoka dha popiwa muDaniel 9:25 nosho wo kutya oya tameke mo 455 K.E.N., sho Omukwaniilwa gwaPersia Artakserkses a pe Nehemia epitikilo a ka tungulule Jerusalem. (Neh. 2:1-8) Iiwike mbyoka oya li ya hulu konima yoomvula 483, mo 29 E.N., sho Jesus Omunasareti a ninginithwa nokwa gwayekwa nombepo ondjapuki nokuza mpoka okwa ningi Mesiasa.—Mat. 3:13-17.a

5. Omahunganeko geni tatu ka konakona ngashingeyi?

⁵ Ngashingeyi natu ka kundathaneni omahunganeko omashona gamwe kombinga yaMesiasa ngoka ga li ga gwanithwa pokuvalwa kwaJesus, petameko lyonkalamwenyo ye nosho wo pethimbo lyuukalele we. Nopwaahe na omalimbililo, shika otashi ka koleka eitaalo lyetu moohapu dhopahunganeko dhaKalunga. Otashi ke tu pa wo uunzapo wa yela kutya Jesus oye Mesiasa ngoka a li a tegelelwa ethimbo nuule.

Onkalamwenyo ye yopetameko oya kala ya hunganekwa

6. Ehunganeko ndyoka li li muGenesis 49:10 olya li lya gwanithwa ngiini?

⁶ Mesiasa okwa li e na okuvalwa kOmuisraeli, gwomezimo lyaJuda. Sho tatekulululwa Jakob a li ta yambeke oyana sho e li pokusa, okwa hunganeke a ti: “Ondhimbo yuukwaniilwa itayi zi mo muJuda nepangelo moluvalo lwe, sigo taku ya [Silo, NW] ngoka te li pewa, ngoka iigwana tayi vulika kuye.” (Gen. 49:10) Aalongwantu Aajuda oyendji yonale oya li ya popi kutya oohapu ndhoka dhaJakob otadhi ulike kuMesiasa. Okuza pethimbo lyokupangela kOmukwaniilwa David, ondhimbo yuukwaniilwa ndjoka tayi ulike (kuuthemba wokupangela) nosho wo epangelo (uuthemba wokugandja omalombwelo) oya kala yi niwe kaakwaniilwa yomezimo lyaJuda. Silo” otashi ti: “Ngoka te wu pewa; ngoka ta wu ka ninga we.” Ezimo lyaakwaniilwa yaJuda olya li tali ka hulila ‘muSilo’ ngoka oye Omuthigululi gwuukwaniilwa sigo aluhe, molwaashoka Kalunga okwa li a lombwele Zedkija, omukwaniilwa gwahugunina gwaJuda kutya epangelo otali ka pewa ngoka e na uuthemba woku li pewa. (Hes. 21:26, 27) Konima ya Zedkija, Jesus oye owala gwomezimo lyaDavid a li u uvanekelwa okupewa uukwaniilwa. Omanga inaa valwa, omuyengeli Gabriel okwa li a lombwele Maria a ti: “Omuwa Kalunga ote mu ningi omukwaniilwa ongaashi he David. Oye ta ningi omukwaniilwa gwoluvalo lwaJakob sigo aluhe; nuukwaniilwa we kau na mpoka tau ka hula po.” (Luk. 1:32, 33) Silo oku na okukala Jesus Kristus, ngoka a za moluvalo lwaDavid gwomezimo lyaJuda.—Mat. 1:1-3, 6; Luk. 3:23, 31-34.

7. Mesiasa okwa li a valelwa peni, nomolwashike sha li oshindhindhilikwedhi?

⁷ Mesiasa okwa li ta ka valelwa muBetlehem. Omupolofeti Mika okwa nyola a ti: “Betlehem Efrata, ongoye gumwe gwomomikunda omishona muJuda, ihe omungoye tamu ka za omuleli gwaIsraeli, oongoka gwomezimo lya za koohekulululwa yomuuyuni wonale.” (Mika 5:2) Mesiasa okwa li e na okuvalelwa muBetlehem shaJudea, momukunda hagu ithanwa Efrata. Nonando yina yaJesus nomusamane gwe, Josef oya li ya kala muNasareti, oya li ye na okuya kuBetlehem ye ki inyolithe omolwelombwelo lyomupangeli Omuroma, naJesus oko a valelwa hoka mo 2 K.E.N. (Mat. 2:1, 5, 6) Ehunganeko ndyoka inali gwanithwa tuu momukalo omundhindhilikwedhi!

8, 9. Oshike sha li sha hunganekwa shi na ko nasha nokuvalwa kwaMesiasa, noshike sha li tashi ka ningwa po konima ngele a valwa?

⁸ Mesiasa okwa li e na okuvalwa kokakadhona. (Lesha Jesaja 7:14.) Jesaja 7:14 okwa hunganeka kutya “omukadhona” ota ka vala okanona okamati. Uutumbulilo mboka owa li wo wa longithwa okuulika kuRebbeka manga inaa hokanwa. (Gen. 24:16, 43, NW) Mateus okwa li a nwethwa mo a longithe oshitya shOshigreka “omukadhona” (parthenos), u ulike kutya oohapu ndhoka dhi li muJesaja 7:14 odha gwanithwa sho Jesus a valwa. Aanyoli yOmavaangeli Mateus naLukas oya popi kutya omukadhona Maria okwa li a ningi omusimba kombepo ondjapuki yaKalunga.—Mat. 1:18-25; Luk. 1:26-35.

⁹ Aanona oya li taya ka dhipagwa konima yokuvalwa kwaMesiasa. Oshinima sha faathana osha li sha ningwa omathelemimvo ga piti, sho Farao gwaEgipiti a li a gandja oshipango kutya aanona ayehe aamati taya valwa kAahebeli naya umbilwe momulonga gwaNiili. (Eks. 1:22) Ihe muJeremia 31:15, 16 otamu popiwa oshinima oshindhindhilikwedhi, moka Rakel ta popiwa pathaneko ta lili oyanamati mboka ya falwa “kevi lyaatondi.” Okulila kwe okwa li ku uvika nokuRama shoka sha li kokule, oshitopolwa shaBenjameni shi li kuumbangalantu waJerusalem. Mateus otu ulike kutya oohapu dhaJeremia odha li dha gwanithwa sho Omukwaniilwa Herodes a gandja oshipango aanona aamati yomuBetlehem nopuushinda washo ya dhipagwe. (Lesha Mateus 2:16-18.) Dhiladhila owala nkene aantu ya li ya nika oluhodhi moshitopolwa shoka.

10. Ehunganeko ndyoka li li muHosea 11:1 olya li lya gwanithwa ngiini?

¹⁰ Ngaashi Aaisraeli, Mesiasa naye okwa li e na okwiithanwa muEgipiti. (Hos. 11:1) Omuyengeli okwa li a lombwele Josef kutya nakuthe okanona nayina e taya tembukile kuEgipiti, omanga Herodes inaa gandja oshipango kutya aanona aamati naya dhipagwe. Oya kala hoka “sigo eso lyaHerodes, opo dhi gwanithwe ndhoka dha popiwa kOmuwa mokana komuhunganeki [Hoses], sho ta ti: ‘Omumwandje onde mu ithana muEgipiti.’” (Mat. 2:13-15) Osha yela kutya Jesus ka li ta vulu okuninga po sha kombinga yiinima mbyoka ya ningwa pevalo lye nosho wo mbyoka ya ningwa sho a li omushona.

Mesiasa ta tameke uukalele we

11. Omugwayekwa gwaJehova okwa li a palelwa ngiini ondjila?

¹¹ Opwa li omutumwa ngoka e na okupalela Omugwayekwa gwaKalunga ondjila. Maleaki okwa hunganeke kutya “omuhunganeki Elia” ota ka tetekela Mesiasa noku mu palela ondjila. (Lesha Maleaki 4:5, 6.) Jesus okwa li e shi popi kutya “Elia” ngoka oye Johannes Omuninginithi. (Mat. 11:12-14) Markus okwe shi ulike kutya uukalele waJohannes owa gwanitha po oohapu dhopahunganeko ndhoka dhi li muJesaja. (Jes. 40:3; Mark. 1:1-4) Jesus haye a li a longekidha opo Johannes e mu tetekele mokulonga iilonga mbyoka ya fa yaElia. Iilonga mbyoka “Elia” a longo oya li metsokumwe nehalo lyaKalunga noya li uupitilo opo aantu ya dhimbulule Mesiasa.

12. Oshilonga shini sha li sha kwathele aantu ya dhimbulule Mesiasa?

¹² Oshilonga shoka Mesiasa a li a pewa kuKalunga osha li sha kwathele aantu ye mu dhimbulule. Sho Jesus a li mosinagoga muNasareti, momukunda moka a putukila okwa li a lesha ongonga yembo lyaJesaja moka mu na oohapu tadhi mu popi tadhi ti: “Ombepo yOmuwa oya lambele ndje. Osho ngeyi Omuwa okwa gwayeke ndje, ndi uvithile oohepele elaka etoye. Okwa tumu ndje, ndi igidhile oonkwatwa emanguluko, naaposi ya tonate, okumangulula oonakuhepekwa, okutseyitha omumvo, uuna Omuwa te ya, a hupithe aantu ye.” Molwaashoka Jesus oye a li Mesiasa ngoka u uvanekwa shili okwa popi a ti: “Nena ndjika oohapu ndhoka mu uvu dha leshwa, odha gwanithwa.”—Luk. 4:16-21.

13. Jesaja okwa li a hunganeke shike shi na ko nasha nuukalele waJesus?

¹³ Omupolofeti okwa kala a hunganeka nale mpoka Mesiasa ta ka tameka niilonga ye yuukalele. Jesaja okwa nyola a ti: ‘Evi lyomazimo gaSabulon nogaNaftali, Galilea moka aakwiilongo ya kala. Oshigwana she ende momilema, otashi mono uuyelele owindji. Oomboka ya kala momilema thokothoko, uuyelele otau ya minikile.’ (Jes. 9:1, 2) Jesus okwa tameke uukalele we muGalilea, moshitopolwa shaKapernaum moka mwa kala aantu oyendji yomezimo lyaSabulon nolyaNaftali mboka ya li ya nyanyukilwa omauwanawa guuyelele wopambepo ngoka a li e ya pe. (Mat. 4:12-16) MuGalilea omo Jesus a li ningi Euvitho lyokOndundu tali ningitha omuntu a dhiladhile muule, omo wo a li a hogololele aayapostoli ye, a longo oshikumithalonga she shotango nomo wo a li a holokele aalongwa ye 500 konima yeyumuko lye. (Mat. 5:1–7:27; 28:16-20; Mark. 3:13, 14; Joh. 2:8-11; 1 Kor. 15:6) Kungeyi, okwa gwanitha po ehunganeko lyaJesaja sho u uvitha ‘mevi lyomazimo gaSabulon nogaNaftali.’ Jesus okwa li wo u uvitha etumwalaka lyUukwaniilwa miitopolwa iikwawo yaIsraeli.

Iilonga yilwe mbyoka Mesiasa a li ta ka longa oya kala ya hunganekwa nale

14. Episalomi 78:2 olya li lya gwanithwa ngiini?

¹⁴ Mesiasa okwa li ta ka popya momayele. Omupisalomi Asaf okwiimbi a ti: “Otandi longitha iipopiwamayele.” (Eps. 78:2) Otu shi shi ngiini kutya ehunganeko ndika otali popi Jesus? Mateus naye okwa popya oshinima shoka, sho a popi eyele lyaJesus moka a faathanitha Uukwaniilwa waKalunga nomuma yosinapi nosho wo nefulika, a ti: “Ye ine ya lombwela sha itaa popi momayele. Opo oohapu ndhoka dha popiwa komuhunganeki, dhi ninge dhoshili, sho ta ti: ‘Ongame tandi popi momayele; tandi popi iinima mbyoka ya li ya holekwa okuza ketameko lyuuyuni.’” (Mat. 13:31-35) Omukalo gumwe gwa dhenga mbanda gwokulonga aantu ngoka Jesus a li a longitha omokupopya momayele.

15. Ehunganeko ndyoka li li muJesaja 53:4 olya li lya gwanithwa ngiini?

¹⁵ Mesiasa okwa li ta ka aludha aantu. Jesaja okwa hunganeka a ti: “Oshili, okwi itsike uuvu wetu, nuuwehame wetu e u humbata.” (Jes. 53:4) Mateus okwe shi popi kutya konima sho Jesus a aludha yinamweno yaPetrus, okwa aludha wo aantu yalwe “opo dhi gwanithwe ndhoka dha popiwa komuhunganeki Jesaja, ngoka ta ti: ‘Oye okwi itsike uunkundi wetu nomavu getu okwe ga humbata.’” (Mat. 8:14-17) Jesus okwa li a aludha aavu oyendji, ihe shika shimwe owala shomiiholelwa oyindji mbyoka ya nyolwa.

16. Omuyapostoli Johannes oku ulike ngiini kutya Jesus okwa gwanitha po ehunganeko ndyoka li li muJesaja 53:1?

¹⁶ Nonando Mesiasa okwa li a longo uuwanawa owundji, aantu oyendji kaya li ye mu itaala. (Lesha Jesaja 53:1.) Omuyapostoli Johannes oku ulike kutya ehunganeko ndyoka olya gwanithwa sho a nyola a ti: “Nonando [Jesus] okwa longo iikumithalonga mbyoka ayihe montaneho yawo, inaye mu itaala. Opo shoka sha popiwa komuhunganeki Jesaja, shi tse, sho ta ti: ‘Omuwa, olye i itaale euvitho ndyoka twe li uvitha? Olye ngoka Omuwa e mu hololele oonkondo dhe?’” (Joh. 12:37, 38) Pethimbo lyuukalele womuyapostoli Paulus, aantu owala aashona ya li yi itaale onkundana ombwanawa ndjoka tayi popi Jesus ngoka e li Mesiasa.—Rom. 10:16, 17.

17. Ehunganeko ndyoka li li mEpisalomi 69:4 olya li lya gwanithwa ngiini?

¹⁷ Mesiasa okwa li ta ka tondika nopwaahe na etompelo lyasha. (Eps. 69:4) Omuyapostoli Johannes okwe endulula oohapu dhaJesus ndhoka tadhi ti: “Ando onda li inaandi longa mokati kawo iilonga mbyoka inaayi longwa nando okomuntu, nena ando oyo kaye na oondjo. Ihe ngashingeyi sho ya mono shoka nda longo, oyo oye tu tonde atuhe naTate. Shika oshi na okukala ngeyi, opo shoka sha nyolwa mompango yawo shi gwanithwe: ‘Oyo oya tondo ndje pwaa na nando etompelo.’” (Joh. 15:24, 25) Oshitya ‘Ompango’ olundji ohashi longithwa okuulika kOmbiimbeli ayihe. (Joh. 10:34; 12:34) Omahokololo gOmavaangeli otaga ulike kutya Jesus okwa li e tondike, unene tuu kaawiliki yelongelokalunga lyOshijuda. Kakele kaashono, Kristus okwa ti: “Uuyuni otau mú tondo, ihe ngame ou tonde ndje, oshoka otandi u hololele kutya iilonga yawo iiwinayi.”—Joh. 7:7.

18. Oshike tatu ka konakona natango shoka tashi tu kwathele tu kale nuushili wa kola kutya Jesus oye Mesiasa?

¹⁸ Aalanduli yaJesus yomethelemumvo lyotango oya li ye na uushili kutya Jesus oye Mesiasa, molwaashoka okwa li a gwanitha po omahunganeko agehe ngoka ge li mOmanyolo gOshihebeli taga popi shoka Mesiasa a li ta ka ninga. (Mat. 16:16) Ngaashi twe shi mono metetekelo, omahunganeko gamwe ngoka oga li ga gwanithwa nokuli sho Jesus opo a valwa nosho wo pethimbo lyuukalele we muNasareti. Moshitopolwa tashi landula ko otatu ka konakona natango omahunganeko galwe kombinga yaMesiasa. Ngele otatu tedhatedha komahunganeko ngoka pamwe negalikano, otatu ka kala nuushili wa kola kutya Jesus Kristus oye Mesiasa ngoka a li a langekwa po kuTate yetu gwomegulu, Jehova.

[Enyolo lyopevi]

Oto yamukula ngiini?

• Omahunganeko geni ga li ga gwanithwa pokuvalwa kwaJesus?

• Mesiasa okwa li a palelwa ngiini ondjila?

• Oohapu dhopahunganeko dhini dhi li muJesaja ontopolwa 53 dha li dha gwanithilwa Jesus?