Tsikila okukala nonkalamwenyo ya dhenga mbanda

“Ngele otu na omwenyo nenge otatu si, otse oyOmuwa.”—ROM. 14:8.

1. Jesus okwa li a longo aantu shike kombinga yokukalamwenyo kwa dhenga mbanda?

JEHOVA okwa hala tu nyanyukilwe onkalamwenyo ya dhenga mbanda. Aantu otaya vulu okukala noonkalamwenyo dha yooloka, ihe opu na owala omukalo gumwe gwokukalamwenyo ogwo gwa dhenga mbanda. Kapu na shoka tatu vulu okuninga shi li hwepo kaashi shi owala okukala metsokumwe nOohapu dhaKalunga nokwiilonga kombinga yOmwana, Jesus Kristus. Jesus okwa li a longo aalanduli ye ya longele Kalunga mombepo nomoshili, nokwa li wo e ya lombwele ya ka ninge aantu aalongwa. (Mat. 28:19, 20; Joh. 4:24) Mokukala metsokumwe nomalombwelo ngoka Jesus a li a gandja ohatu nyanyudha Jehova nohatu nyanyukilwa omalaleko nuuyamba ge.

2. Ongiini oyendji ya li yi inyenge ketumwalaka lyUukwaniilwa methelemumvo lyotango, nosha hala okutya shike okweenda ‘mondjila’ ndjoka?

² Ngele mboka “ye na iikala iiwanawa kombinga yomwenyo gwaaluhe” ya ningi ooitaali e taya ninginithwa, otu na omatompelo ga yela oku ya hambelela tatu ti: “Otatu mu hambelele sho mwa tameke okukala nonkalamwenyo ya dhenga mbanda!” (Iil. 13:48, NW) Pethimbo lyethelemumvo lyotango lyEyalulo lyoomvula dhetu dhoNgashingeyi, aantu omayovi ya za miigwana ya yoolokathana oya taamba ko oshili noye shi ulika montaneho kutya oyi igandja kuKalunga mokuninginithwa. (Iil. 2:41) Aalongwa mboka yonale oya li ye ende ‘mondjila’ ndjoka. (Iil. 9:2; 19:23, OB-1954) Uutumbulilo mbuka owa li tawu opalele molwaashoka mboka ya li ya ningi aalanduli yaKristus oya kala ye na okukalamwenyo kwa kankamena kokukala neitaalo muJesus Kristus nokuholela oshiholelwa she.—1 Pet. 2:21.

3. Omolwashike oshigwana shaJehova hashi ninginithwa, noyangapi ya li ya ningininwa muule woomvula omulongo dha piti?

³ Iilonga yokuninga aantu aalongwa oya huma komeho neendelelo momasiku ngaka gahugunina noyi li tayi longwa miilongo yi vulithe 230. Momukokomoko gwoomvula omulongo dha piti, aantu ye vulithe 2 700 000 oya li ya ningi etokolo lyokulongela Jehova nokwiininginitha mokuulika eiyapulo lyawo kuye. Omwaalu ngoka ogu li ondjelekati yaantu ye vulithe 5 000 oshiwike kehe! Opo omuntu a ninge etokolo lyokuninginithwa, oku na okukala e na ohole yokuhola Kalunga, e na ontseyo yOmanyolo nosho wo okukala neitaalo mwaashoka ha longo aantu. Eninginitho olyo oshinima sha simanenena monkalamwenyo yetu, molwaashoka ohali ulike kutya otwa tameka okukala tu na ekwatathano lyopothingo naJehova. Ohali ulike wo kutya otu na einekelo kutya ote ke tu kwathela tu mu longele nuudhiginini ngaashi naanaa a li a kwathele aalongeli ye yonale ye ende mondjila ye.—Jes. 30:21.

Omolwashike omuntu e na okuninginithwa?

4, 5. Tumbula po gamwe gomomalaleko nuuyamba nomauwanawa ngoka haga zi mokukala wa ninginithwa.

⁴ Otashi vulika wi ilonga kombinga yaKalunga, nowa ninga omalunduluko monkalamwenyo yoye nowu li ngashingeyi omuuvithi inaa ninginithwa. Oto pandulwa omolwehumokomeho lya tya ngaaka. Ihe mbela owi iyapulila ngaa Kalunga megalikano, nowu na mbela etegameno lyokuninginithwa? Mokukonakona kwoye Ombiimbeli, ngashingeyi otashi vulika wu shi shi kutya okukalamwenyo kwoye oku na okukala we ku tula mokutanga Jehova, kaashi shi owala okwiinyanyudha ngoye mwene nenge okwiikongela omaliko. (Lesha Episalomi 148:11-13; Lukas 12:15.) Onkee ano, omalaleko nuuyamba gamwe geni haga zi mokuninginithwa?

⁵ Wu li Omukriste i iyapulila Jehova, onkalamwenyo yoye otayi ka kala yi na elalakano kaaku na we. Oto ka kala wu na enyanyu molwaashoka oto longo ehalo lyaKalunga. (Rom. 12:1, 2) Ombepo ondjapuki yaJehova otayi ka imika mungoye omaukwatya gopakalunga ngaashi ombili neitaalo. (Gal. 5:22, 23, NW) Kalunga ota ka yamukula omagalikano goye nota ka laleka nuuyamba oonkambadhala dhoye opo wu kaleke onkalamwenyo yoye metsokumwe nOohapu dhe. Okukala nonkalamwenyo ndjoka ya hokiwa kuKalunga otaku ka koleka etegameno lyoye lyomwenyo gwaaluhe noto ka nyanyukilwa uukalele woye. Natango okwiiyapula nokuninginithwa otashi ka ulika kutya owa hala lela okukala gumwe gwomOonzapo dhaJehova.—Jes. 43:10-12.

6. Eninginitho lyetu ohali ulike shike?

⁶ Mokwiiyapulila Kalunga nokuninginithwa, ohatu ulike montaneho kutya tse oyaJehova. Paulus okwa li a nyola a ti: “Kaku na nando ogumwe gwomutse e li po owala polwe mwene, nokaku na nando ogumwe gwomutse ta si owala polwe mwene. Ngele tatu kala tu na omwenyo, otatu kalele Omuwa, nongele tatu si, otatu sile koshipala shOmuwa. Onkee ano, ngele otu na omwenyo nenge otatu si, otse oyOmuwa.” (Rom. 14:7, 8) Kalunga okwe tu yela moku tu pa emanguluko lyokuninga omatokolo. Uuna twa tokola lela okulalakanena okweenda mondjila ndjika molwaashoka tu hole Kalunga, ohatu nyanyudha omutima gwe. (Omayel. 27:11) Eninginitho lyetu ohali ulike kutya otwi iyapulila Kalunga notu ulika montaneho yaantu kutya Jehova oye Omupangeli gwetu. Ohashi ulike kutya otwa gama kombinga ye shi na ko nasha nompata yuunamapangelo. (Iil. 5:29, 32) Jehova naye oku li kombinga yetu. (Lesha Episalomi 118:6.) Eninginitho ohali tu egululile wo ondjila tu mone omalaleko nuuyamba ogendji ngashingeyi nomonakuyiwa.

Otwa lalekwa nuuyamba nuumwayinathana wopahole

7-9. (a) Jesus okwa gandja eshilipaleko lini kwaamboka ya thiga po ashihe shoka ya li ye na e taye mu landula? (b) Euvaneko lyaJesus ndyoka li li muMarkus 10:29, 30 otali gwanithwa ngiini?

⁷ Omuyapostoli Petrus okwa li a lombwele Jesus a ti: “Tala, otse otwa thigi ko iinima ayihe e tatu ku landula. Otatu ka pewa shike?” (Mat. 19:27) Petrus okwa li a hala okutseya kutya onakuyiwa ye noyaalongwa yalwe yaJesus otayi ka kala ya fa peni. Opo ya kuthe ombinga pakuudha miilonga yokuuvitha yUukwaniilwa, oya li ya ningi omaiyambo ga simana. (Mat. 4:18-22) Jesus okwa li e ya pe eshilipaleko lini?

⁸ Mehokololo lyembo lyaMarkus, Jesus okwa li u ulike kutya aalongwa ye otaya ka kala oshitopolwa shuumwayinathana wopambepo. Okwa ti: “Kaku na ngoka a thiga po egumbo nenge aamwayina aalumentu nenge aamwayina aakiintu nenge he nenge yina nenge oyana nenge epya omolwandje nomolwokutaandelitha elaka etoye, a kale ando itaa mono lwethele muuyuni mbuka omagumbo, aamwayina aalumentu naamwayina aakiintu, ooyina, oyana, omapya—nosho wo omatidhagano; nomuuyuni tau ya ota ka mona omwenyo gwaaluhe.” (Mark. 10:29, 30) Aakriste yomethelemumvo lyotango ngaashi Lidia, Akula, Priskila naGaius, oya li yamwe yomwaamboka ya li ya gandja “omagumbo” noya ningi ‘aamwayina aalumentu naamwayina aakiintu nooyina’ kooitaali ooyakwawo, ngaashi Jesus a li e shi uvaneke.—Iil. 16:14, 15; 18:2-4; 3 Joh. 1, 5-8.

⁹ Shoka Jesus a li a popi otashi gwanithwa kunena meityo enene. “Omapya” ngoka aalanduli ye ya li ya thigi po otaga thaneke okukalamwenyo hoka oyendji haya thigi po nehalo ewanawa mwa kwatelwa aatumwa, iilyo yuukwanegumbo waBetel, aapiya yopaigwana nayalwe opo ya vule okuhumitha komeho iinima yUukwaniilwa miilongo yi ili noyi ili. Aamwatate naamwameme oyendji oya thiga po omagumbo gawo opo ya kaleke onkalamwenyo yawo paunathangwa, nohashi tu nyanyudha okuuva iimoniwa yawo mbyoka tayi ulike nkene Jehova e ya sila oshimpwiyu nonkene oku mu longela kwawo kwe ya nyanyudha. (Iil. 20:35) Natango aalongeli yaJehova ayehe ya ninginithwa otaya vulu okunyanyukilwa omalaleko nuuyamba ‘gokukonga tango uukwaniilwa nuuyuuki waKalunga’ ye li oshitopolwa shuumwayinathana wopaKriste muuyuni auhe.—Mat. 6:33.

Mboka ya ninginithwa oye li “megameno”

10, 11. ‘Egameno lyOmunankondoawike’ oshike, nongiini tatu vulu okuya mo?

¹⁰ Eiyapulo neninginitho ohali etele omuntu omalaleko nuuyamba ga gwedhwa po, sha hala okutya, uuthembahenda wokukala “megameno lyOmunankondoawike.” (Lesha Episalomi 91:1.) Ndika oli li ehala lyopathaneko moka omuntu ta vulu okumona epopilo nokukala a gamenwa pambepo. Oli li ‘egameno molwaashoka inali tseyika kaantu mboka kaaye na euvoko lyiinima yopambepo noinayi inekela muKalunga. Mokukala metsokumwe neiyapulo lyetu nokukala neinekelo muJehova, osha fa tatu mu lombwele tatu ti: “Ongoye omupopili nomugameni gwandje. Ongoye Kalunga kandje, nde ku inekela.” (Eps. 91:2) Jehova Kalunga oye omugameni gwetu. (Eps. 91:9) Inatu pandula tuu kwaashoka!

¹¹ Okukala tu na ompito yoku ya “megameno” lyaJehova ohashi ulike wo kutya otwa lalekwa nuuyamba nuuthembahenda wokukala tu na ekwatathano lyopothingo lyopaumwene naye. Shika ohashi tameke neiyapulo neninginitho. Okuza mpono ohatu tameke ekwatathano naKalunga mokuhedha popepi naye okupitila mokukonakona Ombiimbeli, okugalikana tashi zi komutima nokuvulika kuye thiluthilu. (Jak. 4:8) Kapu na ngoka a li a vulu okuhedha popepi naJehova shi vulithe Jesus, ngoka einekelo lye mOmushiti kaali na esiku lya tengaukile. (Joh. 8:29) Onkee ano, inatu kala nando tu na omalimbililo kutya Jehova ite ke tu kwathela tu gwanithe po euvaneko lyetu lyeiyapulo. (Omuuv. 5:4) Omasiloshimpwiyu gopambepo ngoka Kalunga a ninga taga wapa koshigwana she otagu ulike kutya oku tu hole shili nokwa hala tu pondole moku mu longela.

Natu kale twa lenga Oparadisa yetu yopambepo

12, 13. (a) Oparadisa yopambepo oshike? (b) Ongiini tashi vulika tu kwathele yalwe?

¹² Eiyapulo neninginitho ohali tu egululile wo ondjila opo tu vule okukala moparadisa yopambepo ya lalekwa nuuyamba. Ndjika oyo onkalo yopambepo yi ikalekelwa ndjoka hatu nyanyukilwa pamwe nooitaali ooyakwetu mboka ye na ombili naJehova Kalunga nosho wo naantu yalwe. (Eps. 29:11; Jes. 54:13) Uuyuni kawu na sha shoka tashi vulu okuyelekwa noparadisa yetu yopambepo. Shika ohashi kala shi iwetikile unene tuu piigongi yopaigwana mpoka aamwatate naamwameme okuza miigwana oyindji, omalaka nomihoko haye ya pamwe, haya kala ye na ombili, uukumwe nohole yuumwayinathana.

¹³ Oparadisa yopambepo ndjoka hatu nyanyukilwa oya yooloka ko thiluthilu koonkalo dhinyanyalithi ndhoka tu wete muuyuni kunena. (Lesha Jesaja 65:13, 14.) Mokuuvitha etumwalaka lyUukwaniilwa, otu na uuthembahenda wokuhiya yalwe ye ye moparadisa yopambepo. Oshi li wo elaleko nuuyamba tu kwathele mboka opo ya tameke okweendathana negongalo notashi ka kwathela oku ya dheula muukalele. Mewiliko lyaakuluntugongalo otashi vulika tu pewe uuthembahenda wokukwathela oohandimwe aape nokuli ngaashi Akula naPriskila ya ‘longo Apollos noku mu yelithila nawalela ondjila yaKalunga.’—Iil. 18:24-26.

Tsikila okwiilonga kuJesus

14, 15. Otu na omatompelo omawanawa geni ngoka tage tu kwathele opo tu tsikile okwiilonga kuJesus?

¹⁴ Otu na omatompelo omawanawa okutsikila okwiilonga kuJesus. Jesus sho a li inaa ninga omuntu gwopanyama okwa kala ta longo pamwe naHe uule womathelemimvo ogendjigendji. (Omayel. 8:22, 30) Okwa li e shi shi kutya omuntu ota vulu okukala nonkalamwenyo ya dhenga mbanda uuna ta longele Kalunga nokuuvitha oshili kombinga ye. (Joh. 18:37) Osha li sha yela kuJesus kutya okulandula okukalamwenyo kumwe ku ili otaku ka kala kwokwiihola mwene nokwopakathimbo. Okwa li e shi shi kutya ota ka makelwa noonkondo nokudhipagwa. (Mat. 20:18, 19; Heb. 4:15) E li oshiholelwa shetu, okwe tu longa nkene tatu vulu okukala aadhiginini.

¹⁵ Konima sho Jesus a li a ninginithwa, Satana okwa li e mu makele e ethe po onkalamwenyo ndjoka ya dhenga mbanda, ihe ine shi pondola. (Mat. 4:1-11) Shika otashi tu longo kutya otatu vulu okukakatela uudhiginini wetu kashi na nduno mbudhi kutya Satana ona ninge shike. Oha kala olundji a taalela mboka ye li pokuninginithwa nenge opo ya ninginithwa. (1 Pet. 5:8) Omapataneko otashi vulika ga ze kwaakwanezimo yetu mboka tashi vulika kaaye na uuyelele wa yela nawa kombinga yOonzapo dhaJehova. Natango omapataneko ngoka ohage tu pe ompito tu ulike omaukwatya omawanawa gopaKriste, ngaashi esimaneko nokuungaunga nayo nuukeka uuna tatu ya yamukula noku ya pa uunzapo. (1 Pet. 3:15) Iimoniwa mbika otayi vulu okuguma mboka taye tu pulakene momukalo omwaanawa.—1 Tim. 4:16.

Dhiginina okweenda mondjila ndjoka ya dhenga mbanda

16, 17. (a) MuDeuteronomium 30:19, 20 omu na iitegelelwa ya simanenena yonkalamwenyo yini? (b) Ongiini Jesus, Johannes naPaulus ya li ya ambidhidha shoka sha li sha nyolwa kuMoses?

¹⁶ Oomvula 1 500 lwaampono manga Jesus inee ya kombanda yevi, Moses okwa li a kumagidha Aaisraeli ya hogolole okukalamwenyo kwa dhenga mbanda ngaashi tashi vulika pethimbo ndyoka. Okwa li a ti: “Nena otandi ku pe, u hogolole pokati komwenyo neso, pokati keyambeko lyaKalunga netulomutima lye, notandi hiya egulu nevi li ninge onzapo yehogololo ndyoka to hogolola. Hogolola omwenyo. Hola OMUWA Kalunga koye, vulika kuye nou mu dhame, nena ngoye mwene noluvalo lwoye otamu ka kala olule.” (Deut. 30:19, 20) Israeli ka li a vulika kuKalunga, ihe iitegelelwa itatu ya simanenena yonkalamwenyo mbyoka ya li ya popiwa kuMoses inayi lunduluka. Oya li wo ya popiwa natango kuJesus nayalwe.

¹⁷ Shotango, ‘otu na okukala tu hole Omuwa Kalunga ketu.’ Ohatu ulike kutya otu hole Kalunga mokukatuka metsokumwe noondjila dhe dhi li pauyuki. (Mat. 22:37) Oshitiyali, ‘otu na okupulakena’ kuJehova mokukonakona Oohapu dhe nokuvulika kiipango ye. (1 Joh. 5:3) Shika otashi tu pula tu kale hatu kala pokugongala kwopaKriste pandjigilile, mpoka Ombiimbeli hayi konakonwa. (Heb. 10:23-25) Oshititatu, ‘otu na okudhama’ kuJehova. Kutya nduno otatu ka kala twa taalela shike, natu kale aluhe tu na eitaalo muKalunga nokulandula Omwana.—2 Kor. 4:16-18.

18. (a) Ongiini Oshungolangelo ya li ya popi kombinga yoshili mo 1914? (b) Otu na okukala tu uvite ngiini omolwuuyelele woshili kunena?

¹⁸ Kashi li tuu elaleko nuuyamba okukala metsokumwe noshili yOmbiimbeli! Mo 1914 epopyo ndika endhindhilikwedhi olya li lya nyanyangidhwa mOshungolangelo ya ti: “Mbela katu li aantu aanelago notwa lalekwa nuuyamba? Mbela Kalunga ketu ke shi ngaa omudhiginini? Ngele opu na ngoka e shi oshinima shoka shi vule mbika, ne shi kuthe. Ngele opu na ngoka wa mono oshinima shi li hwepo shi vulithe mbika, otwi inekela oto ke tu lombwela. Kapu na oshinima shilwe shi li hwepo shi vulithe mbika nenge tashi yelekwa naashoka twa mona mOohapu dhaKalunga. . . . Kapu na ngoka ta vulu okuhokolola ombili, enyanyu nomalaleko nuuyamba ngoka ontseyo ya yela yaKalunga kashili ye tu etela moomwenyo nomonkalamwenyo yetu. Ehokololo kombinga yUunongo waKalunga, Uuyuuki we, Oonkondo dhe nOhole ye otayi gwanitha po ompumbwe yetu yopalutu noyopamadhiladhilo. Itatu kongo we sha shilwe. Kapu na we sha shilwe shoka twa hala kaashi shi owala okuuva Ehokololo ndika ewanawa muule walyo tu li uve ko nawa.” (Oshungolangelo yOshiingilisa yo 15 Desemba, 1914, epandja 377-378) Olupandu lwetu okupandula uuyelele wopambepo noshili inalu lunduluka. Dhoshili, ngashingeyi otu na nokuli omatompelo omanene gokukala twa nyanyukwa molwaashoka otatu ‘ende muuyelele wOmuwa.’—Jes. 2:5; Eps. 43:3; Omayel. 4:18.

19. Omolwashike mboka ya gwanitha po iitegelelwa yeninginitho haya katuka onkatu ndjoka nopwaahe na okukwatakwata?

¹⁹ Ngele owa hala “okweenda muuyelele wOmuwa” ihe ku shi natango Omukriste ngoka i iyapulila Jehova nokwa ninginithwa, ino kwatakwata. Ninga kehe shoka sha pumbiwa opo wu gwanithe po iitegelelwa yopaMbiimbeli yeninginitho, sha hala kutya, omukalo gwi ikalekelwa moka to vulu okuulika olupandu lwaashoka Kalunga naKristus ye tu ningila. Gandja kuJehova oshinima shoye shoka sha simanenena, ano, omwenyo gwoye. Ulika kutya owa hala okulonga ehalo lyaKalunga mokulandula Omwana. (2 Kor. 5:14, 15) Nopwaahe na omalimbililo, ndjoka oyo onkalamwenyo ya dhenga mbanda!

Oto yamukula ngiini?

• Eninginitho lyetu otali ulike shike?

• Eiyapulo kuKalunga neninginitho ohali eta omalaleko nuuyamba geni?

• Omolwashike sha simana okwiilonga kuJesus?

• Oshike tashi ke tu kwathela tu kale twa dhama onkalamwenyo ya dhenga mbanda?

[Ethano pepandja 29]

Eninginitho lyoye ohali ulike kutya owa hogolola onkalamwenyo ya dhenga mbanda

[Omathano pepandja 31]

Mbela owu li “megameno”?