Nkene etumwalaka lyaJesus Kristus lya nwetha mo aantu
“Onkalamwenyo yaJesus sho a li kombanda yevi oya nwetha mo aantu oyendji sigo okunena, naashoka otashi ulike shili kutya ye okwa li a simana.”a—GREGG EASTERBROOK.
OOHAPU odhi na oonkondo. Ngele otadhi popiwa nuunongo ohadhi vulu okuguma omutima, okugandja etegameno nokulundulula onkalamwenyo. Kapu na omuntu gumwe kombanda yevi a popya oohapu dhuunongo e vule Jesus Kristus. Gumwe ngoka a li u uvu euvitho lye lyokondundu ndyoka lya tseyika nawa, konima okwa nyola a ti: “Jesus sho a mana okupopya oohapu ndhoka, aantu oya kuminwa elongo lye.”—Mateus 7:28.
Sigo okunena iinima mbyoka a popya oyi shiwike kaantu muuyuni auhe. Tala kiiholelwa iishona yoohapu dhe ndhoka dha simana.
“Kamu vulu okulongela Kalunga pamwe nemona.”—Mateus 6:24.
“Onkee ano shaa shoka mwa hala aantu ye mú ningile, osho ya ningileni wo.”—Mateus 7:12.
“Ano shono shomupangeli, shi peni omupangeli, naashoka shaKalunga, shi peni Kalunga.”—Mateus 22:21.
“Okugandja oku na elago ku vule okutaamba.”—Iilonga 20:35.
Kakele owala koohapu dhe ndhoka dhi shi okudhimbulukiwa, Jesus okwa ningi wo oshindji. Etumwalaka lye oli na oonkondo molwaashoka olya li tali popi oshili yi na ko nasha naKalunga, tali longo aantu ya mone onkalamwenyo tayi ti sha nosho wo kutya Uukwaniilwa waKalunga owo owala tawu ka kandula po omaupyakadhi gaantu. Sho tatu konakona etumwalaka lye momapandja ngoka ga landula ko, otatu ke shi uva ko kutya omolwashike Jesus “a nwetha mo aantu oyendji” kunena.
[Enyolo lyopevi]
a Sho Jesus e ya muKapernaum shaGalilea okwa li a talika ko e ya kegumbo.