Shoka Jesus a longo aantu kombinga ye
“Jesus okwa li e shi kutya oye lye, okwa za peni, omolwashike e ya kombanda yevi nosho wo kutya onakuyiwa ye otayi ka kala ngiini.”—HERBERT LOCKYER.
OMANGA inaatu taamba ko iinima mbyoka a longo aantu nokukala tu na eitaalo muyo, otwa pumbwa okutseya kutya Jesus okwa li lye naanaa. Okwa za peni? Elalakano lye okuya kombanda yevi olyashike? Otatu ka mona omayamukulo okuza kuJesus mwene ngoka ga nyolwa mEvaangeli lyaMateus, Markus, Lukas naJohannes.
Jesus oko a li nale omanga inaa valwa e li omuntu kombanda yevi Oshikando shimwe Jesus okwa ti: “Abraham manga inaa valwa, ngame oko nda li nale.” (Johannes 8:58) Abraham okwa li ko nale omimvo 2 000 lwaampono manga Jesus inaa valwa. Ihe nonando ongaaka, Jesus oko a li nale omanga tatekulululwa ngoka omudhiginini inaa valwa. Okwa li peni? Jesus okwa ti: “Ngame onda za megulu.”—Johannes 6:38.
Omwana gwaKalunga Jehova oku na oyanamati yaayengeli oyendji. Ihe Jesus okwi ikalekelwa. Okwi ipopi ye mwene kutya ye “omuvalwa awike gwaKalunga.” (Johannes 3:18) Oohapu ndhoka otadhi ti kutya Jesus oye owala a shitwa shu ukilila kuKalunga. Iinima ayihe Kalunga okwe yi shiti okupitila muJesus.—Aakolossa 1:16.
“Omuna gwomuntu” Jesus okwa longitha uutumbulilo mboka lwiikando okwiipopya ye mwene. (Mateus 8:20) Kungeyi, oku ulike kutya ye ke shi omuyengeli a zala olupe lwopantu. Pehala lyashono, ye omuntuelela. Okupitila mombepo ye ondjapuki, Kalunga okwa lundululile omwenyo gwOmwana okuza megulu noku gu tula moshivalelo shomukadhona Maria. Oshizemo, Jesus okwa valwa a gwanenena noina thigulula uulunde.—Mateus 1:18; Lukas 1:35; Johannes 8:46.
Mesiasa omuuvanekwa Omukiintu Omusamaria okwa lombwele Jesus a ti: “Ondi shi kutya Kristus, nokutya Omugwayekwa ote ke ya.” Jesus okwe mu yamukula a ti: “Ongame naanaa nguka te popi nangoye.” (Johannes 4:25, 26) Oshitya “Mesiasa” noshitya “Kristus” otayi ti “Omugwayekwa.” Jesus okwa li omugwayekwa nenge a langekwa po kuKalunga a gwanithe po euvaneko lyaKalunga lyi ikalekelwa.
Oshinakugwanithwa she sha simana Oshikando shimwe Jesus okwa tile: ‘Ondi na okuuvitha onkundana ombwanawa yUukwaniilwa waKalunga, oshoka osho naanaa shika Kalunga a tumu ndje, ndi shi ninge.’ (Lukas 4:43, yelekanitha KB.) Nonando Jesus okwa li a kwathele aantu oyendji shi ikolelela koompumbwe dhawo, okwa li a lenga okuuvitha Uukwaniilwa waKalunga monkalamwenyo ye. Shoka a longo aantu kombinga yUukwaniilwa otatu ke shi kundathana nale.
Osha yela kutya Jesus okwa li omuntu a simana.a Molwaashoka okwa li megulu tango, oohapu ndhoka a popi sho a li kombanda yevi odha li dhi na eityo ngaashi tatu ke shi mona. Katu na okukala twa kumwa sho etumwalaka ndyoka u uvitha lya guma onkalamwenyo yaantu omamiliona muuyuni.
[Enyolo lyopevi]
a Opo wu mone uuyelele owundji kombinga yonkandangala ndjoka Jesus ta dhana melalakano lyaKalunga, tala ontopolwa 4 membo Omalongo gashili gOmbiimbeli ogeni naanaa? lya nyanyangidhwa kOonzapo dhaJehova.