Shoka Jesus a longo aantu kombinga yaKalunga

“Kaku na ngoka a tseya kutya Tate oye lye, Omwana oye awike, naangoka Omwana a hala oku mu hololela.”—Lukas 10:22.

OMANGA inee ya kombanda yevi, Omwana omutango gwaKalunga okwa li a kala naHe omimvo odhindjidhindji. (Aakolossa 1:15) Okwa li e shi nawa omadhiladhilo, omaiyuvo noondjila dhaHe. Sho e ya kombanda yevi e li omuntu, okwa li a halelela okulonga aantu oshili kombinga yaHe. Otatu vulu okwiilonga oshindji shi na ko nasha naKalunga ngele tatu pulakene kwaashoka Omwana a popya.

Edhina lyaKalunga Jesus okwa simaneka shili edhina lyaKalunga, Jehova. Okwa li a hala aantu ya tseye noya longithe edhina lyaHe. Edhina Jesus otali ti “Jehova Omuhupithi.” Uusiku wa tetekele eso lye, okwa galikana kuJehova a ti: “Ongame onde ya tseyithile edhina lyoye.” (Johannes 17:26) Itashi kumitha sho Jesus a li a longitha edhina lyaKalunga noku li tseyithila yalwe. Aapulakeni ye oya li taya vulu okuuva ko ngiini oshili kombinga yaJehova ngele inaya tseya edhina lye naashoka tali ti?a

Ohole yaKalunga onenenene Oshikando shimwe Jesus okwa lombwele Kalunga megalikano a ti: “Tate, . . . owa kala wu hole ndje, nomanga uuyuni inau shitwa.” (Johannes 17:24) Jesus okwa li u ulike ohole yaKalunga momikalo odhindji sho e ya kombanda yevi molwaashoka uukwatya mboka okwa li e wu ulukilwa nale kuHe manga e li megulu.

Jesus oku ulike kutya ohole yaJehova oya mbwalangandja. Okwa ti: “Osho ngeyi Kalunga a kala e hole uuyuni, oye a gandja Omwana awike, opo shaa ngoka te mu itaale, kaa kane, ihe a kale e na omwenyo gwaaluhe.” (Johannes 3:16) Oshitya shOshigreka shoka sha tolokwa “uuyuni,” itashi ti nando “evi.” Mpaka otashi longithwa okuulika kaantu ayehe. Ohole ndjoka Kalunga u ulukile aantu onene shili nomolwaashono e ya pe Omwana omuholike opo mboka ye na eitaalo ya mangululwe muupika wuulunde neso noya kale netegameno lyoku ka mona omwenyo gwaaluhe. Ohole ndjoka onenenene noitatu vulu oku yi yeleka nasha.—Aaroma 8:38, 39.

Jesus okwa koleke uushili wumwe a ti: Jehova oku hole aapiya ye pauhandimwe. Okwa yelekanitha He nomusita gwoonzi ngoka ha ndhindhilike onzi kehe nohe yi tala ko ya simana. (Mateus 18:12-14) Okwa ti kutya kapu na enza limwe tali gwile pevi Jehova inee shi tseya. Jesus okwa ti wo: “Nomafufu geni agehe gokomutse oga yalulwa.” (Mateus 10:29-31) Ngele Jehova oha ndhindhilike kutya enza limwe ka li po poshihandhila mbela ita ka konenena nokusila oshimpwiyu omuntu kehe ngoka he mu longele? Ngele Jehova oha yalula efufu kehe komutse gwetu nohe li ndhindhilike mbela opu na ngaa oompumbwe, uupyakadhi niimpwiyu yetu mbyoka ta kala kee shi?

Tate gwomegulu Ngaashi twe shi mono moshitopolwa sha tetekele, Jesus oye awike Omwana epona lyaKalunga. Onkee ano, itashi kumitha sho olundji hi ithana Jehova “He.” Nokuli nomoohapu ndhoka Jesus a li a popi tango motempeli sho e na omimvo 12, okwi ithana Jehova ‘Tate.’ (Lukas 2:49) Uutumbulilo ‘Tate’ otawu holoka lwiikando 190 mOmavaangeli. Iikando yimwe okwi ithana Jehova “Ho yeni,” “Tate yetu,” nosho wo ‘Tate.’ (Mateus 5:16; 6:9; 7:21) Sho Jesus a longitha omautumbulilo ngoka okwe shi ulike kutya nonando aantu aalunde noinaya gwanenena, otaya vulu okukala ye holike noye na ekwatathano li shi okwiinekelwa naJehova.

Jehova omunahenda noku na ehalo okudhimina po Jesus oku shi kutya aantu inaaya gwanenena oya pumbwa unene esilohenda lyaJehova. Meyele lyomumati a kanene Jesus okwa yelekanitha Jehova nahe omunamutimahenda noha dhimine po ngoka a papatele omwana ngoka a li a kana sho i itedhulula. (Lukas 15:11-32) Oohapu dhaJesus otadhi ulike kutya Jehova oha tala omalunduluko ngoka tatu ningi momitima dhetu opo e tu sile ohenda, nonando otu li aalunde. Jehova okwa halelela okudhimina po aalunde mboka yi iyela ombedhi. Jesus okwe shi yelitha a ti: “Otandi mú lombwele: osho wo megulu otamu kala enyanyu omolwomulunde gumwe i itedhulula, li vule ndyoka lyokunyanyukilwa aayuuki omilongo omugoyi nomugoyi mboka taa dhiladhila kutya inaa pumbwa eitedhululo.” (Lukas 15:7) Mbela opu na ngaa ngoka ta ka kala inaa hala okuhedha popepi naKalunga omunahenda?

Omuuvi gwomagalikano Sho Jesus a li megulu okwa li a mono kutya Jehova ‘omuuvi gwomagalikano’ noha kala a nyanyukwa okupulakena komagalikano gaapiya ye aadhiginini. (Episalomi 65:2) Pethimbo lyuukalele we, Jesus okwa li a longo aapulakeni ye nkene ye na okugalikana naashoka ye na okupula megalikano. Okwe ya kumagidha ‘kaaya popyagane.’ Okwa ladhipike aapulakeni ye ya galikane opo ehalo lyaKalunga li “gwanithwe kombanda yevi ngaashi megulu.” Otatu vulu wo okwiindila iipalutha yetu yesiku kehe, oondjo dhetu dhi dhimwe po notu kondjithe omamakelo. (Mateus 6:5-13) Jesus okwa longo kutya Kalunga oha yamukula omagalikano nomaindilo gaapiya ye ngaashi he omuvali ha ningi.—Mateus 7:7-11.

Osha yela kutya Jesus okwa li a longo aantu oshili yi na ko nasha naJehova nosho wo kutya ye oKalunga a tya ngiini. Ihe opu na wo oshinima shimwe shoka Jesus a li a halelela okulonga aantu kombinga yaJehova. Okupitila musho Jehova ote ke eta omalunduluko muuyuni auhe nokugwanitha po elalakano lye li na ko nasha nevi nosho wo aantu mboka ye li ko. Oshinima shoka osho sha li tashi dhana onkandangala meuvitho lye.

[Enyolo lyopevi]