Mbela okuninga iinima mbika oku li shili okwaahe na uuyuuki?

“Lundulula owala uuyelele kombinga yoshiponga shoye shohauto naayihe otayi ke enda nawa.”

“Aafendelithi ino pumbwa oku ya lombwela iinima ayihe.”

“Oshinima sha simana osho owala kutya ino kwatwa.”

“Omolwashike wu na okufuta ngele oto vulu oku shi mona oshali?”

OTASHI vulika wu uve omapopyo ga tya ngaaka ngele owa pula uuyelele shi na ko nasha niinima yopashimaliwa. Aantu yamwe ohaya monika ya fa ye na omikalo dhokupita mo moshinima kehe. Epulo oondyoka kutya: Mbela omikalo ndhoka odhi li ngaa shili pauyuuki?

Okwaahe na uuyuuki okwi ihanena apuhe kunena nokuli naantu ohaya tala ko okufundja, okufukila nokuyaka dhi li omikalo dha taambiwa ko dhokuhenuka egeelo, wu ninge oshimaliwa nenge wu hume komeho monkalamwenyo. Olundji aanenentu oyendji ihaya tula po oshiholelwa shi li nawa shi na ko nasha nuuyuuki. Moshilongo shimwe shomuEuropa, iipotha yekengelelo nosho wo okuyaka iimaliwa oya londa pombanda noopelesenda dhi vulithe 85 okuza mo 2005 sigo 2006. Naashoka inashi kwatela mo iipotha iishona yokwaahe na uuyuuki, hoka aantu yamwe haya ti kutya oku li uulunde uushona wowala. Otashi vulika kaasha li tashi kumitha kutya aanangeshefa naanapolotika yomoshilongo moka oya li ya kutha ombinga moshinima shisitha ohoni sho ya ningi oonzapo dhiifundja opo ya humithe komeho omaithano gawo.

Ihe nonando okwaahe na uuyuuki oku li apuhe muuyuni, aantu oyendji oya hala okuninga shoka shi li mondjila. Otashi vulika ngoye wu li gumwe gwomuyo. Molwaashoka owu hole Kalunga, owa hala okuninga shoka shi li mondjila momeho ge. (1 Johannes 5:3) Otashi vulika wu ka kale wu uvite ngaashi omuyapostoli Paulus ngoka a nyola a ti: “Otse otu na eiyuvo lya yela, oshoka otwa hala aluhe okulonga shoka shi li mondjila.” (Aahebeli 13:18) Omolwetompelo ndyoka, otatu ku hiya wu tale koonkalo dhimwe ndhoka tadhi vulu okukala emakelo komuntu ngoka a hala okulonga “shoka shi li mondjila.” Otatu ka tala wo komakotampango gOmbiimbeli ngoka taga vulu okukwathela moonkalo dha tya ngaaka.

Olye e na okufuta omolwoshiponga?

Omukiintu gumwe omugundjuka gwedhina Lisaa manga a li ta hingi okwa li a ningi epuko e ti ipumu mumwe nohauto yilwe. Kamwa li mwe ehamekwa omuntu, ihe iihauto ayihe iyali oya li ye ehamekwa. Moshilongo shawo, aahingi mboka aagundjuka ohaya futu ondilo koasulansi yiihauto, noofuto ndhoka ohadhi yi pombanda kehe koshiponga shoka te etitha. Molwaashoka omumwayinagona gwaLisa omukuluntu, Gregor omo a li mohauto, kuume gumwe okwa li a ti kutya naya popye kutya Gregor oye a li ta hingi ohauto. Momukalo ngoka Lisa okwa li ta vulu okukala inaa futa iimaliwa oyindji koasulansi. Ondunge ndjoka oya li tayi monika ya fa ombwanawa. Lisa okwa li e na okuninga po shike?

Ehangano lyoasulansi ohali longitha iimaliwa mbyoka hayi futwa kiilyo yalyo opo lyi fute shoka haya pula ngele pwa holoka oshiponga. Onkee ano, okulandula shoka kuume ke a li e eta po, okwa li tashi ti lelalela kutya Lisa okwa li ta ka ningitha iilyo yilwe yi fute oshiponga shoka omolwokufuta iifuta yoasulansi yi li pombanda. Ka li owala ta ka gandja uunzapo wiifundja ihe okwa li wo ta ka yaka yalwe. Otashi ka kala sha faathana ngele omuntu ta gandja uuyelele wiifundja koasulansi opo yi mu pe ofuto yi li pombanda.

Egeelo lyopampangu otashi vulika li keelele aantu kaaya ninge iinima ya tya ngaaka kaayi li pauyuuki. Ihe etompelo lya simanenena lyokuhenuka okwaahe na uuyuuki otali adhika mOohapu dhaKalunga. Oshipango shimwe shomwaambyoka omulongo otashi ti: “Ino yaka.” (Eksodus 20:15) Paulus okwe endulula oshipango shoka sho a lombwele Aakriste a ti: “Omufuthi na ethe po okuyaka kwe.” (Aaefeso 4:28) Mokuvulika kOohapu dhaKalunga miinima ya tya ngaaka, oho henuka okuninga oshinima shoka Kalunga inaa panda. Oho ulike wo ohole yoye nesimaneko lyoompango dhaKalunga nosho wo ohole yokuhola ooyakweni.—Episalomi 119:97.

“Shomukeesali, Shi Peni Omukeesali”

Peter ngoka e li omunangeshefa okwa li a lombwelwa komuyaluli gwiimaliwa mongeshefa ye opo a pule epangelo li mu futithe iifendela ya gwa pevi molwaashoka okwa landa aniwa iikwakompiuta yondilo. Iikwakompiuta ohayi landwa olundji mongeshefa yaPeter. Nonando Peter ka li a landa shili iikwakompiuta mbyoka, epangelo kalya li tali ka ninga omakonakono li mone ngele oya landwa shili. Okulombwela epangelo kutya okwa landa iikwakompiuta mbyoka okwa li taku ka futitha Peter iifendela ya gwa pevi. Mbela oku na okuninga po shike? Oshike sha li tashi vulu oku mu wilika mokuninga etokolo lye?

Paulus okwa li a lombwele Aakriste yopethimbo lye a ti: “Omuntu kehe na vulike kaapangeli mboka taye mu pangele. . . . Ano ya peni shoka mu na oku shi ya pa: ya peni oompale nomafendelo.” (Aaroma 13:1, 7) Mboka ya hala okukala ya hokiwa kuKalunga ohaya futu iifendela ayihe mbyoka epangelo tali ya pula. Nonando ongawo, ngele ompango otayi pitike oohandimwe nenge oongeshefa dhi fute iifendela ya gwa pevi miinima yontumba, inashi puka oku shi ninga ngele pampango owa gwana oku shi ninga.

Natango, mpaka otapu landula onkalo yimwe ya kwatela mo okufuta iifendela. David okwa kutwa e li omuhongi gwiipilangi mofabulika yomoshitopolwa shawo. Ihe ookuume ke naashiinda oye mu pula e ya ningile uusikopa niikwapundi yomomagumbo gawo noku na ando oku shi ninga konima yiilonga. Oya ti kutya otaye mu futu ondjambi yi li pombanda yaandjoka ha futwa kiilonga, ihe oya hala a kale ta longo nopwaahe na okunyola ombapila yomafutilo. Kungawo David ina pumbwa okufuta iifendela nookastoma dhe inadhi pumbwa okufuta iifendela ya gwedhwa po. Aantu oyendji ohaya dhiladhila kutya shika oshi li mondjila, molwaashoka kehe gumwe oha mono uuwanawa melongekidho lya tya ngaaka. Molwaashoka David okwa hala okunyanyudha Kalunga, ongiini e na okutala ko iilonga mbyoka hayi longwa nopwaahe na okufuta iifendela?

Nonando omuntu ngoka ta longo momukalo gwa tya ngaaka otashi vulika a kale inaa kwatwa, ita futu iifendela mbyoka e na okufuta kepangelo. Jesus okwa ti: “Shoka shomukeesali, shi peni omukeesali, naashoka shaKalunga, shi peni Kalunga.” (Mateus 22:17-21, KB) Jesus okwa li a popi oohapu ndhika opo a pukulule omadhiladhilo gaapulakeni ye shi na ko nasha nokufuta iifendela. Aakwanepangelo mboka Jesus a li i ithana Omukeesali, oya li ya tala ko iifendela yi li oshinima shoka ye na uuthemba woku shi pewa. Onkee ano, aalanduli yaKristus oye na okutala ko okufuta iifendela ku li oshinakugwanithwa shawo shopamanyolo.

Okuyaka mEkonakono

Omulongwa gwondondo yopombanda gwedhina Marta okwa li ti ilongekidhile ekonakono. Molwaashoka etegameno lye lyoku ka mona iilonga yi li nawa olyi ikolelela kokupita niitsa yopombanda, okwa kala ti ilongo oowili odhindji. Yamwe yomaalongwa ooyakwawo nayo oyi ilongekidhila ekonakono, ihe omomukalo gwi ili. Otaya ka longitha iinima yimwe yopauelektronika ngaashi ongodhi yopeke ya yake opo ya mone iitsa yi li pombanda. Mbela Marta oku na okuninga shoka “kehe gumwe” ta ningi opo a shilipaleke kutya okwa mona iitsa iiwanawa?

Molwaashoka okuyaka mekonakono okwa ha, aantu oyendji ohaya kala yu uvite kutya inashi puka. Ohaya ti: “Shoka sha simana osho owala kutya ino kwatwa.” Okudhiladhila kwa tya ngaaka kaku li mondjila kAakriste yashili. Nonando otashi vulika omulongi a kale inaa mona mboka taya yaka, opu na gulwe ngoka e ya wete. Jehova Kalunga oku shi shoka hatu ningi note ke tu pangulila iilonga yetu. Paulus okwa nyola a ti: “Kaku na nando oshinima shimwe sha holekwa Kalunga. Kehe shimwe shomeshito oshi li puuyelele montaneho yaKalunga, ngoka tu na oku ke mu hokololela ayihe mbyoka twe yi ninga.” (Aahebeli 4:13) Ngele omuntu oku shi shi kutya Kalunga ota tala molwaashoka okwa hala tu ninge shoka shi li mondjila, itashi ke mu inyengitha mbela a kale omunashili uuna ta nyola ekonakono?

Oto ka ninga po shike?

Lisa, Gregor, Peter, David nosho wo Marta oya li ya mono kutya onkalo ndjoka ya taalela oya kwata miiti. Oya li ya tokola ya katuke pauyuuki nosha li she ya ningitha ya kale ye na eiyuvo lya yela nokudhiginina omakotampango ge na ko nasha nuuyogoki wopamikalo. Mbela ngoye oto ka ninga po shike ngele wa taalelwa konkalo ya faathana?

Aalongi pamwe nangoye, aanasikola ooyakweni nosho wo aashiinda otashi vulika ya kale kaaye wete oshiwinayi okupopya iifundja, okuyaka mekonakono nenge okuyaka sha. Dhoshili, otashi vulika ye ku sheke opo ya kambadhale ye ku kondjithe wu kale ho ningi ngaashi haya ningi. Oshike tashi vulu oku ku kwathela wu ninge omatokolo gomondjila nonando oto thiminikwa wu katuke kaashi li pauyuuki?

Dhimbulukwa kutya ngele ohatu katuka metsokumwe nehalo lyaKalunga, otatu ka kala tu na eiyuvo ewanawa nokukala twa hokiwa kuye. Omukwaniilwa David okwa nyola a ti: “OMUWA, olye ta pitikilwa okuya motempeli yoye? Olye ta pitikilwa okugalikanena kondundu yoye ondjapuki Sioni? Omuntu ngoka ha vulika kuKalunga miinima ayihe noha longo shoka shu uka; ngo ha popi oshili ye ke na omakoto . . . Omuntu ngoka ha ningi ngeyi, ota ka kala aluhe e li nawa.” (Episalomi 15:1-5) Eiyuvo lya yela nokukala kuume kaKalunga komegulu oya simanenena shi vulithe uuwanawa kehe wopamaliko mboka hawu monika okupitila mokwaahe na uuyuuki.

[Enyolo lyopevi]

[Oohapu dha simana pepandja 12]

“Omufuthi na ethe po okuyaka kwe.”

Okukala twa simaneka Ompango yaKalunga nokukala tu hole aantu ooyakwetu otaku ke tu inyengitha tu kale aanashili miinima yi na ko nasha noasulansi

[Oohapu dha simana pepandja 12]

“Ya peni shoka mu na oku shi ya pa: ya peni oompale.”

Opo tu kale twa hokiwa kuKalunga, otu na okukala hatu futu iifendela ayihe tayi pulwa kepangelo

[Oohapu dha simana pepandja 13]

“Kehe shimwe shomeshito oshi li puuyelele montaneho yaKalunga, ngoka tu na oku ke mu hokololela ayihe mbyoka twe yi ninga.”

Nonando aalongi otashi vulika ya kale inaaye tu kwata tatu yaka, otwa hala okukala aanashili koshipala shaKalunga

[Oshimpungu/Omathano pepandja 14]

Uufuthi mboka hawu monika wa fa kaawu wetike

Kuume koye okwa landa opolohalama ompe yokompiuta nowe yi hala. Okwa ti kutya ote ku ningile mo okopi opo wu hupithe iimaliwa yoye. Mbela shoka oshi li okwaahe na uunashili?

Ngele aantu taya landa oopolohalama dhokompiuta, ohaya zimine kutya otaya ka kala metsokumwe nomilandu ndhoka dha tulwa po meuvathano lyolisensa yopolohalama ndjoka. Olisensa yawo otashi vulika yi pitike nakuyilanda a tule opolohalama ndjoka mokompiuta yimwe owala. Moshinima sha tya ngaaka, okuningila mo gulwe okopi mopolohalama ndjoka otaku ka teya euvathano lyolisensa nokaku li pampango. (Aaroma 13:4) Okuninga okopi hoka oku li wo uufuthi, molwaashoka otaku ningitha ngoka e yi ninga kaa mone iimaliwa mbyoka a li e na okumona.—Aaefeso 4:28.

Yamwe otashi vulika ya tompathane taya ti: ‘Kapu na ngoka te shi mono.’ Otashi vulika osho shi li ngaaka, ihe otu na okudhimbulukwa oohapu dhaJesus ndhoka tadhi ti: “Shaa shoka mwa hala aantu ye mú ningile, osho ya ningileni wo.” (Mateus 7:12) Atuheni ohatu kala twa pandula ngele tatu futwa shi thike piilonga yetu notwa hala aantu ya kale ya simaneka iinima yetu. Onkee ano, otu na okuningila yalwe sha faathana. Otu na okuhenuka uufuthi mboka hawu monika wa fa kaawu wetike mokukutha iinima mbyoka kaayi shi yetu, ngaashi iinima mbyoka yi na uuthembanyanyangidho ngaashi oomusika, omambo nenge oopolohalama dhokompiuta, kashi na nduno mbudhi kutya opambapila nenge oya pungulwa pauelektronika. Omandhindhilikokoneko goongeshefa, uuthemba womutameki gwoshinima, iiholekwa yomalandithilo nuuthemba wokunyanyangidha sha oyi li wo mokati kiinima mbika.—Eksodus 22:7-9.