Mbela otu na ngaa okufuta iifendela?

AANTU owala aashona haya nyanyukilwa okufuta iifendela. Oyendji oyu uvite kutya iimaliwa yawo mbyoka haya futu iifendela ohayi hepithwa mokulongithwa nuuhasha nenge hayi yakwa po. Yamwe ohaya tindi okufuta iifendela molwaashoka iimaliwa ohayi longithwa momukalo omwiinayi. Aakalimo mboka ya kala mondoolopa ndjoka yi li mUuzilo woPokati oya yelitha kutya omolwashike ihaaya futu we iifendela ya ti: “Itatu ka gandja iimaliwa yetu opo yi ka lande iikuti yokudhipaga aanona yetu.”

Oohapu ndhoka ohadhi popiwa kaantu oyendji nokadhi shi oompe. Omuwiliki gwAahindu nakusa Mohandas K. Gandhi okwa li a popi kutya omolwashike eiyuvo lye itaali mu pitike a fute iifendela a ti: “Kehe ngoka ha kwathele Oshilongo mokuunganeka uukwiita, kutya nduno ote shi ningi shu ukilila nenge hasho, ota longo uulunde. Omuntu kehe, kutya nduno omukuluntu nenge omugundjuka ota longo uulunde sho ta ambidhidha epangelo mokufuta iifendela.”

Sha faathana, omupolofesoli Henry David gwomethelemimvo eti-19 okwa li a popi kombinga yaashoka she mu ningitha kaa zimine okufuta iifendela mbyoka hayi ka ambidhidha iita. Okwa li a pula a ti: “Mbela omukwashigwana oku na ngaa okweetha ngoka ha tula po oompango a tokole kutya omukwashigwana oku na okwiiyutha keiyuvo lye mwene? Omolwashike omuntu kehe e na eiyuvo?”

Ompata ndjika oyi na ko nasha nAakriste ayehe, oshoka Ombiimbeli otayi longo sha yela kutya oye na okukaleka eiyuvo lyawo lya yela miinima ayihe. (2 Timoteus 1:3) Kakele kaashono, Ombiimbeli oya zimina wo kutya mboka ye na oonkondopangelo naya kale haya gandja iifendela. Oya ti: “Onkee ano ne omu na okuvulika kaapangeli [omapangelo gopantu], hamolwokutila ondjahi yaKalunga ayike, ihe omolweiyuvo lyeni wo. Onkee ano omolwoshinima shika ohamu gandja oompale oshoka aapangeli ohaa longele Kalunga, uuna taa gwanitha iinakugwanithwa yawo. Ano ya peni shoka mu na oku shi ya pa: ya peni oompale nomafendelo; vulikeni ne mu ya simaneke ayehe.”—Aaroma 13:1, 5-7.

Omolwetompelo ndika, Aakriste yomethelemumvo lyotango, oya li ye shiwike nawa kutya ohaya futu nehalo ewanawa iifendela, nonando oshitopolwa shayo oshindji ohashi ka ambidhidha uukwiita. Oonzapo dhaJehova nadho osho hadhi ningi kunena.a Omolwashike tu na okufuta iifendela ngele iifendela mbyoka ohayi kwathele iilonga mbyoka Aakriste ihaaya kutha ombinga muyo? Mbela Omukriste ni ipwililikile eiyuvo lye uuna tashi ya pethimbo lyokufuta iifendela?

Iifendela nosho wo eiyuvo lyomuntu

Oshindhindhilikwedhi osho shoka kutya iifendela mbyoka Aakriste yomethelemumvo lyotango ya li ya lombwelwa ya fute, ohayi yi kuukwiita. Shika osho oshinima shimwe shomiinima mbyoka yopamaiyuvo lwanima sha ka ningitha Gandhi nosho wo Thoreau ya kale ihaaya futu iifendela.

Ndhindhilika kutya Aakriste kaya li haya vulika koshipango shoka shi li mAaroma ontopolwa 13 molwaashoka ya li owala ya hala okuyanda egeelo, ‘ihe omolweiyuvo lyawo wo.’ (Aaroma 13:5) Eeno, eiyuvo lyOmukriste olyo unene hali mu ningitha a fute iifendela, nokuli nonando ohayi longithwa okukwathela iilonga mbyoka tashi vulika inaa taamba ko paumwene. Opo tu uve ko oohapu ndhika dha fa itaadhi tsu kumwe, otu na oshinima shoka sha simanenena shi na ko nasha neiyuvo lyetu, okanona kokomutima hoka hake tu lombwele ngele iilonga yetu oyi li mondjila nenge oya puka.

Kehe gumwe oku na okanona kokomutima ka tya ngaaka, ngaashi Thoreau a li e shi ndhindhilike, ihe inashi pumbiwa unene tu kale twe ki inekela. Opo tu kale twa hokiwa kuKalunga, eiyuvo lyetu oli na okutsa kumwe nomithikampango dhe dhopamikalo. Olundji otwa pumbwa okulundulula okudhiladhila nenge etaloko lyetu noku li tsitha kumwe nolyaKalunga, molwaashoka omadhiladhilo ge oge vule getu. (Episalomi 19:7) Onkee ano, otu na okukambadhala tu uve ko etaloko lyaKalunga li na ko nasha nomapangelo gopantu. Mbela etaloko lye olini?

Otwa ndhindhilika kutya omuyapostoli Paulus okwa li a popi kutya omapangelo gopantu ‘ohaga longele Kalunga.’ (Aaroma 13:6) Shoka osha hala okutya shike? Paulelalela, shoka osha hala okutya, ohaya kaleke po elandulathano nokulonga iilonga yawo yi na ongushu omolwoshigwana. Nokuli nomapangelo ngoka kaage na elandulathano olundji ohaga longo iilonga ngaashi okufala opoosa, elongo lyaayehe, okudhima omililo nosho wo okutula po oveta. Nonando Kalunga okwa tseya thiluthilu eyonuko lyomapangelo ngaka ga totwa po kaantu, okweetha ga kale po uule wokathimbo nompango kutya natu fute iifendela omolwokusimaneka elongekidho lye, sha hala okutya, okweetha omapangelo ga tya ngaaka ga pangele aantu.

Ihe Kalunga okweetha owala omapangelo gopantu ga pangele uule wokathimbo. Omapangelo agehe ote ke ga pingena po nUukwaniilwa we womegulu nokuhulitha po uuwinayi auhe mboka ga ningila aantu uule womathelemimvo. (Daniel 2:44; Mateus 6:10) Kakele kaashono, Kalunga ina pitika Aakriste ya kale itaaya vulika komapangelo mokukala itaaya futu iifendela nenge mokwaahavulika miinima yilwe.

Ongiini ngele natango owu uvite ngaashi Gandhi, kutya okufuta iifendela mbyoka tayi ka ambidhidha iita oshi li uulunde? Ngaashi owala ngele otwa hala okutala nawa ehala lyontumba otu na okulonda puule, opo tu li mone nawa, otatu vulu wo okulundulula okudhiladhila kwetu opo ku tse kumwe nokwaKalunga mokudhiladhila nkene etaloko lye li vule getu kokule. Kalunga okwa popi okupitila momupolofeti Jesaja a ti: “Ongaashi egulu li li pombanda puule li vule evi, osho wo oondjila dhandje dhi vule oondjila dheni nomadhiladhilo gandje ge vule omadhiladhilo geni.”—Jesaja 55:8, 9.

Oonkondopangelo dhomapangelo odha ngambekwa?

Nonando Ombiimbeli otayi ti kutya aantu oye na okufuta iifendela komapangelo, oonkondopangelo dhago odha ngambekwa. Jesus okwa li a longo kutya Kalunga okwa gandja owala oonkondopangelo dha ngambekwa komapangelo ngaka. Sho Jesus a li a pulwa ngele oshi li nawa momeho gaKalunga okufuta iifendela komupangeli gwepangelo lyaRoma, okwa li e ya yamukula noohapu ndhika dha simana a ti: “Shono shomupangeli, shi peni omupangeli naashoka shaKalunga, shi peni Kalunga.”—Markus 12:13-17.

Omapangelo ngoka ge lilwe po ‘komupangeli’ ogo haga longo iimaliwa nokukwathela okukaleka po ongushu yayo. Onkee ano, pataloko lyaKalunga, oye na uuthemba wokupula yi futwe. Jesus sho a ti kutya ‘shoka shaKalunga, shi peni Kalunga,’ okwa li a hala okutya otu na owala okwiigandjela Kalunga noku mu longela oye awike, ihe hamahangano gopantu. Ngele oompango dhopantu nenge iitegelelwa yawo itayi tsu kumwe noompango dhaKalunga, Aakriste ‘oye na okuvulika kuKalunga, hakaantu.’—Iilonga 5:29.

Aakriste oyendji kunena otashi vulika ya kale yu uvite nayi shi na ko nasha nankene iifendela yimwe hayi longithwa, ihe ihaya kambadhala okunwetha mo nenge okwiidhopa miilonga yepangelo moku li kondjitha nenge ya tinde okufuta iifendela. Shoka otashi ku ulika kutya inayi inekela Kalunga kutya oye owala ta ka kandula po uupyakadhi waantu. Pehala lyaashono, oya tegelela neidhidhimiko ethimbo lyaKalunga lyo opala uuna ta ka ya olunyala miinima yopantu okupitila mepangelo lyOmwana, Jesus ngoka a popi a ti: “Uukwaniilwa wandje kau shi womuuyuni mbuka.”—Johannes 18:36.

Uuwanawa mboka hawu zi mokuvulika komalongo gOmbiimbeli

Mokulandula omalongo gOmbiimbeli ge na ko nasha nokufuta iifendela, oto ka mona mo uuwanawa owundji. Oto ka yanda okugeelwa hoka kwa longekidhilwa aayonimpango nokukala nuumbanda wokukwatwa. (Aaroma 13:3-5) Shoka sha simana unene, oto ka kala wu na eiyuvo lya yela koshipala shaKalunga noku mu simaneka mokuvulika kompango. Nonando otashi vulika wu kanithe iimaliwa yontumba mokuyelekanitha naamboka ihaaya futu iifendela nenge haya kengelele, kala wi inekela momauvaneko gaKalunga ge na ko nasha nokusila oshimpwiyu aapiya ye aadhiginini. Omunyoli gwOmbiimbeli David okwa ti: “Ngame ngashingeyi onda kulupa, onda kala muuyuni ethimbo ele, ihe inandi mona nando olumwe omuyuuki e ethiwa kOMUWA, nenge oyana taa hehela iikulya.”—Episalomi 37:25.

Hugunina, okuuva ko nokuvulika koshipango shOmbiimbeli shi na ko nasha nokufuta iifendela otashi ku pe ombili yopamadhiladhilo. Kalunga ine ku tala ko kutya owu na oshinakugwanithwa shi na ko nasha nankene epangelo tali longitha iifendela mbyoka ho futu, ngaashi owala ompango ihaayi ku tala ko wu na oshinakugwanithwa shi na ko nasha nankene mwene gwehala ndyoka ho futile komwedhi ha longitha iimaliwa mbyoka ho futu. Omanga ini ilonga oshili yOmbiimbeli, omulumentu gwedhina Stelvio uule woomvula okwa kala a hala pu ningwe omalunduluko gopapolotika muumbugantu waEuropa. Okwa yelitha kutya omolwashike e etha po oonkambadhala dhe ndhoka, okwa ti: “Onda zimina kutya aantu itaya vulu nando okweetitha po uuyuuki, ombili nosho wo uumwayinathana muuyuni awuhe. Uukwaniilwa owala waKalunga owo tawu ka ninga po omalunduluko nokweetitha po uulipamwe waantu wu li hwepo.”

Ngaashi naanaa Stelvio, ngele owa kala ‘nokufuta shoka shaKalunga kuKalunga’ nuudhiginini nangoye oto vulu okukala nuushili mboka. Oto ka mona sho Kalunga te ke eta epangelo lyopauyuuki kombanda yevi alihe nokukutha po iilanduliko nokwaahenuuyuuki hoka kwe etithwa komapangelo gopantu.

[Enyolo lyopevi]

[Oohapu dha simana pepandja 14]

Otwa pumbwa okulundulula omataloko getu opo ga tse kumwe naangoka gaKalunga molwaashoka omadhiladhilo ge oge vule getu kokule

[Oohapu dha simana pepandja 15]

Ngele Aakriste oya kala haya vulika mokufuta iifendela, otaya ka kala ye na eiyuvo ewanawa koshipala shaKalunga notaye ku ulika kutya oye mu inekela kutya ota ka gwanitha po oompumbwe dhawo

[Omathano pepandja 14]

“Shono shomupangeli, shi peni omupangeli naashoka shaKalunga, shi peni Kalunga”

[Edhina lyomuthaneki 14]

Copyright British Museum