Kaleni nokutunga egongalo
“Hekelekathaneni ne mu tungathane kehe gumwe nomukwawo.”—1 TES. 5:11, KB.
1. Omalalekonuuyamba geni haga zi mokukala tu li megongalo lyopaKriste, ihe otashi vulika natango pu kale pu na omashongo geni?
OKUKALA oshilyo shegongalo lyopaKriste oshi li elalekonuuyamba enene shili. Oho kala wu na ekwatathano ewanawa naJehova. Okukala wi inekela Oohapu dhe dhi li ewiliko lyoye ohaku ku gamene kiilanduliko iiwinayi yokukalamwenyo kaaku li pauKriste. Owu li mokati kookuume kashili mboka ya hala wu kale nonkalamwenyo tayi pondola. Eeno, omalalekonuuyamba ogendji. Ihe Aakriste oyendji otaya kondjo nomaupyakadhi gontumba nenge gongandi. Yamwe yomuyo otashi vulika ya pumbwa ekwatho opo yu uve ko iinima yomuule yOohapu dhaKalunga. Yalwe otaye ehama nenge ya polimana, nenge tashi vulika taya mono iihuna kiilanduliko yomatokolo gawo kaage li pandunge. Natango, atuheni otu li muuyuni kaawu na etilokalunga.
2. Otu na okuninga po shike ngele aamwatate ye li muudhigu, nomolwashike?
2 Kapu na gumwe gomutse a hala okumona Aakriste ooyakwawo taya mono iihuna. Omuyapostoli Paulus okwa li a faathanitha egongalo nolutu nokwa ti kutya “oshilyo shimwe shomolutu ngele tashi ehama, nena iilyo ayihe otayi ehama pamwe nasho.” (1 Kor. 12:12, 26) Moonkalo dha tya ngaaka, otu na okukambadhala tu ambidhidhe aamwatate naamwameme. Opu na omahokololo gopamanyolo ogendji moka iilyo yegongalo lyopaKriste ya li ya kwathele yalwe ya sinde omashongo. Sho tatu konakona omahokololo ngoka, dhiladhila nkene andola to vulu okukwathela momikalo dha faathana naandhoka dha hokololwa. Ongiini to vulu okwaambidhidha aamwaho pambepo nokungawo to tungu egongalo lyaJehova?
“Oye mu kutha e taa yi naye kaandjawo”
3, 4. Omomukalo guni Priskila naAkula ya li ya kwathele Apollos?
3 Sho Apollos a tembukile muEfeso, okwa li nale omuuvithi gwevaangeli omulaadhi. Embo lyIilonga otali ti: “Okwa popi nuulaadhi nokwa longo aantu elongo lyu uka kombinga yaJesus. Ihe okwa li a tseya owala [eninginitho, NW] ndyoka Johannes e li ningi.” Apollos ka li e shi eninginitho “medhina lyaHe nolyOmwana nolyOmbepo Ondjapuki,” otashi vulika molwaashoka a li u uvithilwa kaalongwa yaJohannes Omuninginithi nenge kaalanduli yaJesus mboka ya li po komeho goPentekoste 33 E.N. Nonando Apollos okwa li omulaadhi, opwa li pu na iinima yimwe mbyoka a li inaa uva ko. Ongiini okweendathana nooitaali ooyakwawo kwa li kwe mu kwathele?—Iil. 1:4, 5; 18:25; Mat. 28:19.
4 Aaihokani Aakriste Akula naPriskila oya li yu uvu Apollos ta popi nuulaadhi mosinagoga e taa yi naye kaandjawo e taye mu longo oshindji natango. (Lesha Iilonga 18:24-26.) Shika osha li oshinima shopahole okuninga. Dhoshili, Akula naPriskila oya li ye na okupopya naApollos momukalo omwaanawa gwombili, itaaye mu ningitha a kale u uvite kutya okwa fa a tulwa pevi. Okwa li owala kee na ontseyo yondjokonona yegongalo lyopaKriste lyopetameko. Nopwaahe na omalimbililo Apollos okwa li a nyanyukilwa ookuume ke aape molwaashoka oya li ye mu yelithile uuyelele mbuka wa simana. Sho a li a tseya nawa uuyelele mboka, Apollos okwa “kwatha lela” aamwahe yomuAkaia muGreka nokwa li a gandja uunzapo uuwanawa lela.—Iil. 18:27, 28.
5. Ekwatho lyopahole lini aauvithi yUukwaniilwa omayuvi haya pe aantu, nohali eta iizemo yini?
5 Oyendji megongalo lyopaKriste kunena oya pandula lela mboka ye ya kwathela yu uve ko Ombiimbeli. Pokati kaakonakoni oyendji naalongwa yawo opu na uukuume tawu tsikile. Olundji, okukwathela aantu yu uve ko oshili ohaku pumbwa oonkundathana dhopandjigilile nayo momukokomoko gwethimbo lyuule woomwedhi. Onkee ano, aauvithi yUukwaniilwa oye na ehalo lyokuninga omaiyambo molwaashoka oye shi shi kutya otashi ka tya omwenyo nenge eso komuntu ngoka. (Joh. 17:3) Kashi li tuu enyanyu okumona aantu taya dhiginine oshili, taya kala metsokumwe nayo notaya longitha onkalamwenyo yawo mokulonga ehalo lyaJehova!
‘Okwa li ta popilwa muuwanawa’
6, 7. (a) Omolwashike Paulus a li a hogolola Timoteus a ninge omweendi pamwe naye? (b) Timoteus okwa li a kwathelwa a ninge ehumokomeho lini?
6 Sho omuyapostoli Paulus naSilas ya li ya talele po Listra molweendo lwawo olutiyali lwuutumwa, oya li ya adha mo omulumentu omugundjuka Timoteus, tashi vulika sho a li e na oomvula omulongo nasha u uka 20 nenge a pita po. ‘Ooitaali ayehe yomuListra nomuIkonia oya li taye mu popile muuwanawa.’ Yina yaTimoteus Eunike nayinakulu Loide oya li Aakriste yi iyapulila Kalunga, ihe he ka li omwiitaali. (2 Tim. 1:5) Otashi vulika Paulus a li e ya tseya sho a li molweendo lwe lwotango moshitopolwa shoka oomvula dhontumba dha piti. Ihe pethimbo mpoka omuyapostoli okwa li u ulike ohokwe muTimoteus molwaashoka okwa li ta monika e li omugundjuka i ili. Onkee ano, molwaashoka a li a hokiwa kolutu lwaakuluntugongalo, Timoteus okwa li a ningi omweendi pamwe naPaulus miilonga yuutumwa.—Lesha Iilonga 16:1-3.
7 Timoteus okwa li i ilongo oshindji kukuume ke Paulus ngoka a li omukuluntu, nomolwaashoka mokweendela ko kwethimbo Paulus okwa li e na einekelo okutuma Timoteus opo a ka talele po omagongalo noku longe e li omukalelipo gwe. Muule woomvula 15 lwaampono ndhoka Timoteus a li a nyanyukilwa eendathano naPaulus, omugundjuka nguka a li kee na ontseyo notashi vulika a li e na ohoni okwa li a humu komeho sigo a ningi omutonateli a dhenga mbanda.—Fil. 2:19-22; 1 Tim. 1:3.
8, 9. Iilyo yegongalo otayi vulu okuninga shike opo yi ladhipike aagundjuka? Gandja oshiholelwa.
8 Aalumentu naakiintu oyendji aagundjuka megongalo lyopaKriste kunena otaya vulu okuninga ehumokomeho. Ngele oya ladhipikwa nokusilwa oshimpwiyu kwaamboka ye na uupambepo uuwanawa, aagundjuka mbaka otaya vulu okukala ye na omalalakano nokutaamba ko iinakugwanithwa ya gwedhwa po mokati koshigwana shaJehova. Lengalenga megongalo lyeni. Mbela owu wete mo aagundjuka mboka taya vulu okwiigandja, ngaashi Timoteus a li a ningi? Pakwatho lyoye neladhipiko otashi vulika ya ninge aakokolindjila, iilyo yuukwanegumbo waBetel, aatumwa nenge aatonateli aayendi. Oshike to vulu okuninga po wu ya kwathele ya adhe omalalakano ga tya ngawo?
9 Martin, ngoka a kala oshilyo shuukwanegumbo waBetel uule woomvula 20, ota dhimbulukwa nenyanyu nkene omutaleli gwoshikandjo a li u ulike ohokwe muye uule woomvula 30 dha pita sho ya li taya longo pamwe miilonga yomomapya. Omutonateli okwa li a popi nehwamo kombinga yiilonga ye yokoBetel sho a li omugundjuka. Okwa li a ladhipike Martin a dhiladhile kombinga yokwiigandja miilonga yehangano lyaJehova momukalo gwa faathana. Martin oku wete kutya oonkundathana dhawo dhi shi kudhimbulukiwa odha li dha simanenena moku mu kwathela mwaashoka a ka hogolola konima. Olye e shi uuwanawa mboka to vulu okuningila ookuume koye aagundjuka mokupopya nayo kombinga yomalalakano giinima yopauteokratika.
“Popyeni nehekeleko naamboka ya polimana”
10. Epafroditus okwa li u uvite ngiini, nomolwashike?
10 Epafroditus okwa li a yi molweendo olule nolulolodha okuza kuFilippi u uka kuRoma a ka talele po omuyapostoli Paulus ngoka a li mondholongo omolweitaalo lye. Omweendi nguka okwa li omutumwa gwAafilippi. Ka li owala a fala omagano gawo komuyapostoli, ihe okwa li wo a longekidha opo a kale naye a vule okuninga kehe shoka ta vulu opo a ambidhidhe Paulus monkalo ondhigu moka a li. Manga a li muRoma, Epafroditus okwa li e ehama “konyala nokuli a se.” Molwaashoka okwa li u uvite kutya ina pondola shoka a li e endela, okwa li a zizilikwa nenge a polimana.—Fil. 2:25-27.
11. (a) Omolwashike kaatu na okukumwa ngele gumwe megongalo a polimana? (b) Paulus okwa li a pandulile shike Epafroditus?
11 Kunena omathiminiko gi ili nogi ili ohaga ningitha aantu ya kale ya polimana. Eyalulo lyEhangano lyUundjolowele mUuyuni olya ti kutya omuntu 1 gwomaantu 5 otashi vulika a kale a polimana. Oshigwana shaJehova inashi tuntilwa kaashi kwatwe kepolimano. Uupyakadhi wokusila oshimpwiyu uukwanegumbo, uupyakadhi wuukolele, okuteka omukumo molwaashono inaa pondola, nenge iinima yilwe otayi vulu okuningitha omuntu a kale e na omutima gwa tekauka. Aafilippi oya li taya vulu okuninga po shike opo ya kwathele Epafroditus? Paulus okwa li a nyola ta ti: “Mu taambeni . . . nenyanyu, oshoka oye omumwanyoko mOmuwa. Aalumentu ya tya ngaaka ya simanekeni, oshoka omolwoshilonga shaKristus okwa hupula omwenyo gwe, konyala nokuli a se, opo a kwathe ndje ekwatho ndyoka ne yene inaamu vula oku li pa ndje.”—Fil. 2:29, 30.
12. Ongiini mboka ya polimana taya vulu okuhekelekwa?
12 Natse wo otu na okuladhipika aamwatate mboka ya teka omukumo nenge ya polimana. Osha yela kutya opu na okukala pu na iinima mbyoka tatu vulu oku ya pandulila kombinga yiilonga mbyoka haya longele Jehova. Otashi vulika ya ninga omalunduluko omanene moonkalamwenyo dhawo opo ya vule okuninga Aakriste nenge ya longe miilonga yethimbo lyu udha. Ohatu kala tu na olupandu lwoonkambadhala ndhoka notatu vulu oku ya shilipaleka kutya Jehova naye okwe dhi pandula. Nonando uukulupe nenge okwaahe na uukolele ohayi imbi aadhiginini yamwe ya longe shoka ya li taya vulu okulonga nale, natango oya gwana okusimanekwa kutse omolwiilonga yawo yoomvula odhindji. Kutya nduno onkalo oya tya ngiini, Jehova ota pe aalongeli ye aadhiginini ayehe omayele taga ti: “[Popyeni nehekeleko naamboka ya polimana], ambidhidheni aankundi ne mu idhidhimikile ayehe.”—1 Tes. 5:14, yelekanitha NW.
“Omu na oku mu dhimina po noku mu hekeleka”
13, 14. (a) Egongalo lyaKorinto olya li lya katuka onkatu yini ya kwata miiti, nomolwashike? (b) Oshizemo osha li shike sho omuyoni a li a kondwa mo meongalo?
13 Egongalo lyaKorinto lyomethelemumvo lyotango olya li lya taalele onkalo yomulumentu ngoka a li ta hondele nopwaahe na okwiiyela ombedhi. Eihumbato lye olya li lya tula moshiponga uuyogoki wegongalo nosha li nokuli oshisithahoni kooitaali ooyakwawo. Onkee ano, Paulus okwa li a gandja elombwelo kutya omulumentu na kondwe mo megongalo.—1 Kor. 5:1, 7, 11-13.
14 Egeeloputudho ndyoka olya li lye eta oshizemo oshiwanawa. Egongalo olya li lya gamenwa kenwethomo tali yonagula, nomuyoni okwa li a mono epuko lye nokwa li i iyele ombedhi. Pakankameno lyiilonga yomulumentu ngoka mbyoka ya li tayi ulike eiyelombedhi lye, Paulus okwa li u ulike montumwafo ye ontiyali ndjoka a li a nyolele egongalo ndyoka kutya omulumentu na galulilwe megongalo. Shika hasho owala sha li sha pumbiwa. Paulus okwa li wo a lombwele egongalo li ‘dhimine po nokuhekeleka [omulunde ngoka i iyela ombedhi] opo kaa thindilwe pevi koluhodhi lwe e ti iyekelele.’—Lesha 2 Aakorinto 2:5-8. (Yelekanitha NW.)
15. Ongiini tu na okutala ko aalunde mboka yi iyela ombedhi mboka ya galulilwa megongalo?
15 Oshike tatu ilongo mehokololo ndika? Ohashi tu yemateke uuna oohandimwe taya kondwa megongalo. Oya li taya ka shekitha edhina lyaKalunga nosho wo egongalo. Otashi vulika nokuli ya li ya yona kutse pauhandimwe. Ihe ngele aakuluntugongalo mboka ya tulwa po ya konakone onkalo yomuyoni mekwatathano newiliko lyaJehova taya tokola kutya omulunde ngoka i iyela ombedhi na galukile megongalo, otashi ulike kutya Jehova okwe mu dhimina po. (Mat. 18:17-20) Mbela katu na okukambadhala tu holele Jehova? Dhoshili, okukala kaatu na uuhasha nokwaahadhimina po otaku ku ulika kutya otatu pataneke Jehova. Opo tu kaleke ombili nuukumwe megongalo lyaKalunga notu kale twa hokiwa kuye, mbela katu na okukala ‘tu hole’ aalunde mboka yi iyela ombedhi noya galulilwa megongalo?—Mat. 6:14, 15; Luk. 15:7.
“Onde mu pumbwa”
16. Omolwashike Paulus a li a yemata omolwaMarkus?
16 Ehokololo lilwe lyopamanyolo otali ulike kutya katu na okukala tu nine omadhiladhilo omawinayi mboka ye tu yemateka. Pashiholelwa, Johannes Markus okwa li a uvitha nayi omuyapostoli Paulus. Ngiini? Sho Paulus naBarnabas ya li ya yi molweendo lwawo lwotango, Markus okwa li a yi pamwe nayo opo e ke ya kwathele. Ihe ponkatu yimwe manga ya li molweendo, Johannes Markus okwa li a thigi po yakwawo e ta shuna kegumbo omolwomatompelo inaaga tumbulwa. Paulus okwa li u uvithwa nayi noonkondo ketokolo ndika nomolwaashoka sho ya li taya ningi ompangela yokuya molweendo olutiyali, oya li kaaye na euvathano yo naBarnabas kombinga ngele Markus oku na okuya nayo natango. Omolwaashoka sha li sha ningwa po molweendo lwotango, Paulus ka li a hala Markus a ye pamwe nayo.—Lesha Iilonga 13:1-5, 13; 15:37, 38.
17, 18. Otu shi shi ngiini kutya okwaahauvathana hoka kwa li pokati kaPaulus naMarkus okwa li kwa kandulwa po, noshike tatu vulu okwiilonga mwaashika?
17 Osha yela kutya Markus ka li a teka omukumo sho Paulus a li e mu tindi, molwaashoka okwa li a tsikile iilonga ye yuutumwa miitopolwa yilwe pamwe naBarnabas. (Iil. 15:39) Kutya okwa li u ulike uudhiginini nuuinekelwa otashi ulikwa kwaashoka Paulus a li a nyola kombinga ye konima yoomvula dhontumba. Pethimbo mpoka Paulus ngoka a li mondholongo okwa li i ithana Timoteus montumwafo. Montumwafo oyo tuu ndjoka okwa ti: “Etelela Markus, oshoka onde mu pumbwa, a kwathe ndje miilonga.” (2 Tim. 4:11) Eeno, Paulus okwa li e wete kutya Markus okwa li a huma komeho.
18 Mehokololo muka omu na oshiilongomwa. Markus okwa li a kokeke uukwatya uuwanawa wokukala e li omutumwa omwaanawa. Ka li a pundukithwa kwaasho Paulus a li inee mu taamba ko petameko. Ayehe yo naPaulus oya li aalumentu ye na uupambepo uuwanawa, nokwaahauvathana pokati kawo kakwa li kwa kalelele. Mepingathano naashoka, konima Paulus okwa li a mono kutya Markus okwa li omukwathi e na oshilonga. Onkee ano, uuna aamwatate ya sindi omaudhigu nomaupyakadhi ohaga piti po, oshinima shi li mondjila okuninga osho okuhuma komeho nokutsikila okukwathela yalwe ya ninge ehumokomeho lyopambepo. Okukala tu wete uuwanawa mboka wu li muyalwe ohaku tungu egongalo.
Egongalo nosho wo ngoye
19. Ekwatho lini iilyo ayihe yegongalo lyopaKriste tayi vulu okupa ooyakwawo?
19 ‘Momathimbo omadhigu’ ngaka owa pumbwa ekwatho lyaamwaho naamwanyoko megongalo noya pumbwa wo lyoye. (2 Tim. 3:1) Aakriste oohandimwe olundji otashi vulika ya kale kaaye shi kutya naya ninge ngiini opo yu ungaunge nomupondo nonkalo ndjoka ya taalela, ihe Jehova oku shi shi. Ota vulu wo okulongitha iilyo yegongalo yi ili noyi ili, nangoye wa kwatelwa mo, wu kwathele yalwe ya landule ondjila ndjoka yi li mondjila. (Jes. 30:20, 21; 32:1, 2) Onkee ano, pulakena kekumagidho ndyoka omuyapostoli Paulus a gandja! Kaleni ‘[nokuhekelekathana nokutungathana] kehe gumwe nomukwawo, ngaashi hamu shi ningi nokuli.’—1 Tes. 5:11, yelekanitha KB.
Oto yamukula ngiini?
• Omolwashike okutungathana megongalo lyopaKriste kwa pumbiwa?
• Oto vulu okukwathela yalwe ngele ye li momaupyakadhi geni?
• Omolwashike twa pumbwa ekwatho lyayalwe megongalo lyetu?