Mbela Kalunga okwa tegelela tu hempulule oondjo dhetu?

Okuhempulula oondjo dhomuntu ye mwene komupristeli nenge komusita otaku tsikile ku li oshitopolwa shomuthigululwakalo gwelongelokalunga moongeleka odhindji. Ihe muulikumwe waantu mboka tawu pitike kehe shimwe, mbela okuhempulula oondjo otaku ti sha natango nenge okwa pumbiwa nokuli?

OPU na omataloko taga kondjithathana kombinga yoshinima shika. Pashiholelwa, oshifo shedhina National Post shaKanada osha nyola kombinga yomuntu ngoka a li a zimine kutya manga owala shi li oshidhigu okulombwela gulwe shoka wa ninga sha puka “oho kala wu uvite wa manguluka lela uuna wi ihempulula kugumwe e te shi zimine, ta galikana pamwe nangoye note ku lombwele shoka wa pumbwa okuninga.” Mepingathano naashoka, embo lyedhina Bless Me, Father, for I Have Sinned olya totha mo oohapu dhomulumentu ngoka a ti: “Okuhempulula oondjo oku li oshinima shiyemateka lela kOngeleka. Ohashi ningitha aantu ya kale ye na omaipulo ogendji noonkondo.” Ombiimbeli otayi ti ngiini kombinga yoshikundathanwa shika?

Shoka Ombiimbeli tayi ti

MOmpango ndjoka Kalunga a li a pe oshigwana shaIsraeli, otatu adha mo omalombwelo gokondandalunde gaashoka sha li sha pumbiwa okuningwa uuna omuntu a longo uulunde. Pashiholelwa, uuna omuntu a yono komuntu omukwawo nenge a teya oompango dhaKalunga, okwa li e na okwiihempulula komupristeli a langekwa po gwomezimo lyaLevi ngoka a li ta ningi ekwatakanitho pehala lye, mokuningila Kalunga eyambo opo a dhiminwe po oondjo dhe.—Levitikus 5:1-6.

Konima yoomvula omathele dha ka pita, sho omuprofeti Natan a li a ganda omukwaniilwa David omolwomayono ge, David okwa li i inyenge ngiini? Okwa li a zimine nziya a ti: “Ngame onda yono kuKalunga.” (2 Samuel 12:13) Okwa li wo a galikana kuKalunga te mu indile e mu sile ohenda. Oshizemo osha li shike? Konima, David okwa li a nyola a ti: “Opo ihe onde ku hempululile oondjo dhandje; inandi holeka omayono gandje. Onda tokola oku ku hempululila omapuko gandje, nowa dhimi po oondjo dhandje adhihe.”—Episalomi 32:5; 51:1-4.

Okwiihempulula omolwoondjo okwa li natango oshitegelelwa shoka sha tulwa po kuKalunga megongalo lyopaKriste methelemumvo lyotango lyEyalulo lyoomvula dhoNgashingeyi. Jakob omumwayina gwaJesus ngoka a li gumwe gwomwaamboka ya li ya kwatele komeho megongalo muJerusalem, okwa li a ladhipike Aakriste ooyakwawo a ti: “Hempululilathaneni ano oondjo ne mu galikanenathane, nena otamu aludhwa.” (Jakob 5:16) Aakriste oya tegelelwa nduno ya hempulule shike noye na oku shi ninga kulye?

Mbela otu na okwiihempulula kombinga yashike?

Esiku kehe, tse tu li aantu inaaya gwanenena otu na egamo lyokukatuka oonkatu inaatu dhiladhila nenge tu longithe nayi elaka lyetu, nokungawo ohatu yono kuyalwe. (Aaroma 3:23) Mbela shika osha hala okutya otu na okuhempulula omayono ga tya ngawo komuntu gwontumba a langekwa po?

Molwaashoka eyono kehe oli li iihuna koshipala shaKalunga, pahenda ye oha kaleke momadhiladhilo okuyona kwetu omolwokwaahagwanenena hoka twa thigulula. Dhoshili, omupisalomi okwe shi zimine ta ti: “OMUWA, ngele to kala nokudhimbulukwa oondjo, olye ta vulu okukala po? Ihe pungoye opu na edhimopo lyoondjo, opo u tilike nokusimanekwa.” (Episalomi 130:3, 4) Onkee ano, oshike tu na okuninga ngele otwa pogola nenge twa yono kuyalwe tashi vulika inaatu shi ningila owina? Dhimbulukwa oshiholelwa shegalikano shoka Jesus a li a longo aalanduli ye okugalikana kutya oye na okukwatela mo oohapu ndhika tadhi ti: “Dhima po oondjo dhetu, ngashika natse wo tatu dhimi po dhaamboka ya yono kutse.” (Lukas 11:4) Eeno, Kalunga ote ke tu dhimina po ngele otwe ya kuye e tatu mu pula e tu dhimine po okupitila medhina lyaJesus.—Johannes 14:13, 14.

Ndhindhilika kutya Jesus okwa li a kwatele mo wo kutya otu na okudhimina po mboka “ya yono kutse.” Omuyapostoli Paulus okwa li a dhimbulukitha ooitaali ooyakwawo a ti: “Kalathaneni mu na uukuume nolukeno. Silathaneni ohenda nokudhiminathana po oondjo, ngashika naanaa Kalunga e mú dhimine po oondjo dheni molwaKristus.” (Aaefeso 4:32) Uuna tatu dhimine po yalwe omayono gawo, otatu ka kala tu na omatompelo omawanawa tu kale twa tegelela Kalunga e tu dhimine po omayono getu.

Ihe mbela otu na okukala twa tegelela Kalunga a dhime po omayono ga kwata miiti ngaashi okuyaka, okufundja owina, oluhondelo, uunkolwe nosho tuu? Kehe gumwe ta longo omayono ngoka ota teya iipango yaKalunga nota yono kuKalunga. Oshike shi na okuningwa po?

Mbela okulye oondjo dhi na okuhempululilwa?

Kalunga ina pa aantu uuthemba wokudhima po oondjo, ihe oye owala ta vulu oku dhi dhima po. Ombiimbeli otayi tu lombwele sha yela tayi ti: “Ngele tatu hempululile Kalunga oondjo dhetu, nena otatu vulu oku mu inekela, oshoka oye ota longo shoka shu uka. Oye ote tu dhimine po oondjo dhetu e te tu yogo omayono getu agehe.” (1 Johannes 1:9) Onkee ano, okulye omayono ngoka ge na okuhempululilwa?

Molwaashoka Kalunga oye owala ta vulu okudhimina po omuntu, oye e na okwiihempululilwa. Shika osho David a li a ningi, ngaashi twe shi mono. Ihe omuntu ota dhiminwa po pakankameno lyashike? Ombiimbeli otayi tu lombwele tayi ti: “Onkee ano itedhululeni, ne mu galukile kuKalunga, opo a dhime po oondjo dheni.” (Iilonga 3:19) Eeno, okudhiminwa po inaku ikolelela owala kokuzimina eyono lyoye nokwiihempulula ihe nokokukala wo wu na ehalo lyokweetha po ondjila ndjoka ya puka. Onkatu ndjika ya gwedhwa po ohayi kala olundji ondhigu. Ihe opu na ekwathelo.

Dhimbulukwa oohapu dhomulongwa Jakob ndhoka dha li dha popiwa metetekelo tadhi ti: “Hempululilathaneni ano oondjo ne mu galikanenathane, nena otamu aludhwa.” Jakob okwa gwedha koohapu ndhoka a ti: “Egalikano lyomuyuuki oli na oonkondo okuninga sha.” (Jakob 5:16) Omuntu ‘omuyuuki’ ota vulu okukala gumwe ‘gwomaakuluntu yegongalo’ mboka Jakob a popi movelise 14. Megongalo lyopaKriste, omu na “aakuluntu yegongalo” ye na uupambepo uuwanawa mboka ya langekwa po ya ambidhidhe mboka ya hala okudhiminwa po kuKalunga. Itashi ti kutya “aakuluntu yegongalo” mboka otaya vulu okudhimina po aantu omayono gawo, molwaashoka kapu na omuntu a pewa uuthemba wokudhimina po omuntu omukwawo shoka a longa oshiwinayi koshipala shaKalunga.a Ihe oya pyokoka pambepo ya pukulule nokuukitha omuntu ngoka a ninga eyono lya kwata miiti, taye mu kwathele a mone kutya eyono lye olya kwata miiti shi thike peni nosho wo kutya okwa pumbwa okwiiyela ombedhi.—Aagalati 6:1.

Omolwashike omuntu e na okuhempulula oondjo dhe?

Kutya nduno eyono olya kwata miiti nenge hasho, omuntu ngoka a yono okwa yona po ekwatathano lye naantu ooyakwawo nosho wo naKalunga. Shoka ohashi mu ningitha shi kale tashi mu nyenyetele nenge a kale e na oshimpwiyu. Mbika ohayi kala iilonga yeiyuvo ndyoka Omushiti gwetu e tu pa. (Aaroma 2:14, 15) Oshike tashi vulu okuningwa po?

Mokutala ishewe kembo lyaJakob, otatu adha mo oohapu ndhika tadhi ladhipike tadhi ti: “Oku na gumwe ta alukwa? Ni ithane aakuluntu yegongalo, ye mu galikanene noye mu gwayeke omagadhi medhina lyOmuwa. Egalikano lyomwiitaali otali aludha omuvu. Omuwa ota galulile omuvu uundjolowele we, noondjo dhe otadhi dhimwa po.”—Jakob 5:14, 15.

Natango menyolo ndika aakuluntu yegongalo otaya lombwelwa ya kwathele oonzi noompumbwe dhadho. Ngiini mbela? Kayi shi owala okuuva kwaamboka tayi ihempulula. Pehala lyaashono, molwaashoka uuwehame wopambepo owa kwatelwa mo, oshinima sha gwedhwa po osha pumbiwa opo ‘li aludhe omuvu.’ Opu na iinima iyali mbyoka omulongwa Jakob a tumbula mbyoka tayi vulu okuningwa.

Shotango osho ‘okugwayeka omagadhi.’ Shika otashi ulike koonkondo dhOohapu dhaKalunga dhokwaaludha. Omuyapostoli Paulus okwa yelitha a ti: “Oohapu dhaKalunga odhi na omwenyo nodhi na oonkondo dhokulonga sha.  . . . Otadhi holola puuyelele omahalo nomadhiladhilo gomomitima dhaantu,” sha hala okutya, otadhi thiki muule womadhiladhilo gomuntu nomomutima gwe. (Aahebeli 4:12) Mokulongitha nuukeka Ombiimbeli, aakuluntu yegongalo otaya vulu okukwathela ngoka te ehama pambepo a mone kutya oshike she etitha uupyakadhi mboka noku katuke oonkatu a kale ishewe a hokiwa kuKalunga.

Opu na wo “egalikano lyomwiitaali.” Nonando omagalikano gaakuluntu yegongalo itaga lundulula nkene Kalunga ta ka longitha uuyuuki we, omagalikano ngaka oga simana kuKalunga ngoka a halelela okudhima po oondjo pakankameno lyekuliloyambo lyaKristus. (1 Johannes 2:2) Kalunga okwi ilongekidha okukwathela omulunde kehe ngoka i iyela ombedhi shili ngoka tu ulike “iilonga mbyoka tayi holola kutya [okwi] itedhulula.”—Iilonga 26:20.

Etompelo lya simanenena kutya omolwashike omuntu e na okuhempulula oondjo dhe, kutya nduno odha ningilwa omuntu nenge oKalunga, olyo okukala a taambiwa ko kuKalunga. Jesus Kristus okwa li u ulike kutya otu na tango okukandula po uupyakadhi mboka tu na naantu ooyakwetu nokuninga ombili nayo manga inaatu longela Kalunga tu na eiyuvo lya yela. (Mateus 5:23, 24) Omayeletumbulo 28:13 otaga ti: “Oongoka ta holeke iilonga ye iiwinayi, oye ke na elago, ihe ngoka te yi hempulula note yi etha, oye ta silwa ohenda.” Ngele twi ifupipike e tatu ya koshipala shaJehova Kalunga tatu pula e tu dhimine po, ota ka kala e tu hokwa note ke tu nenepeka pethimbo lyo opala.—1 Petrus 5:6.

[Enyolo lyopevi]

[Oohapu dha simana pepandja 30]

Kalunga ote ke tu dhimina po omayono getu ngele otwe ya kuye tatu mu pula medhina lyaJesus

[Ethano pepandja 31]

Etompelo lya simanenena kutya omolwashike omuntu e na okuhempulula oondjo dhe olyo okukala a hokiwa kuKalunga