Natu kongeni omayambeko gaJehova twa mana mo

‘Kalunga ota futu ayehe mboka taye mu kongo.’—HEB. 11:6.

1, 2. (a) Aantu oyendji ohaya kongo ngiini omayambeko gaKalunga? (b) Omolwashike tu na unene ohokwe okumona omayambeko gaJehova?

AANTU oyendji ohaya ti: “Kalunga ne ku yambeke” uuna we ya longela uuwanawa wontumba nenge ngele ya pumbwa ekwatho lyagumwe. Aawiliki yomalongelokalunga ga yoolokathana ohaya yambeke aantu, iinamwenyo niinima mbyoka kaayi na omwenyo. Aantu yamwe ohashi vulika ya kale taye endaenda nomalongelokalunga gontumba molwaashoka ya lombwelwa kutya ohaga yambeke aantu. Olundji aanapolotika ohaya pula Kalunga a yambeke iigwana yawo. Mbela oto dhiladhila kutya omaindilo ga tya ngaaka ogu uka? Mbela ohaga pondola ngaa? Ano oolye naanaa Kalunga ha yambeke, nomolwashike?

² Jehova okwa hunganeka kutya momasiku gahugunina ota ka kala e na aantu ya yogoka noye na ombili ya za miigwana ayihe, mboka tayu uvitha onkundana ombwanawa yUukwaniilwa sigo okooha dhevi, nonando oye tondike nohaya patanekwa. (Jes. 2:2-4; Mat. 24:14; Eh. 7:9, 14) Mboka twa taamba ko oshinakugwanithwa shokukala yamwe yomuyo, otwa hala notwa pumbwa omayambeko gaKalunga molwaashoka ngele hasho, itatu ke shi pondola nando. (Eps. 127:1) Ihe ongiini tatu vulu okumona omayambeko gaKalunga?

Omayambeko ogaamboka haya vulika

3. Ando Aaisraeli oya vulikile, ando oshizemo osha kala ngiini?

³ Lesha Omayeletumbulo 10:6, 7. Manga Aaisraeli inaaya ya mEvi lyEuvaneko, Jehova okwa li u ulike kutya otaya ka kala ya hepuluka noya gamenwa ngele taya vulika kuye. (Deut. 28:1, 2) Oshigwana she itashi mono owala omayambeko, ihe otaga ‘ningi gasho.’ Otashi ka yambekwa lela molwaashoka ohashi vulika.

4. Evuliko lyashili olya kwatela mo shike?

⁴ Aaisraeli oya li ye na okukala niikala ya tya ngiini opo yu ulike kutya ohaya vulika? Ompango yaKalunga oya popya kutya ita ka kala a nyanyukwa ngele oshigwana she itashi mu longele “nenyanyu nonomwenyo gwa tundulukwa.” (Lesha Deuteronomium 28:45-47.) Jehova okwa hala tu vulike kuye nomutima aguhe, ina hala tu kale twa fa iinamwenyo noompwiidhuli mbyoka hayi vulika molwaashoka kaayi na nkene. (Mark. 1:27; Jak. 3:3) Okuvulika kwashili kuKalunga otaku ulike kutya otu mu hole. Ohaku ulikwa kenyanyu ndyoka tali etithwa kokwiitaala kutya iipango ye kayi shi iidhigu nonokutya ota “futu ayehe mboka taye mu kongo.”—Heb. 11:6; 1 Joh. 5:3.

5. Okwiinekela meuvaneko lyaJehova ohaku kwathele ngiini omuntu a vulike koshipango shoka shi li muDeuteronomium 15:7, 8?

⁵ Natu tale nkene okuvulika kwashili taku vulu okuulikwa mokuvulika kompango ndjoka ya popiwa muDeuteronomium 15:7, 8. (Lesha.) Ngele aantu oya kala metsokumwe nompango ndjoka, otashi ka kwathela oohepele, ihe mbela oya li ngaa tayi ka humitha komeho ekwatathano ewanawa nohole mokati koshigwana shaKalunga? Mbela otashi ulike ngaa kutya otu na eitaalo moonkondo dhaJehova okusila oshimpwiyu aapiya ye nokupandula ompito ndjoka e tu pa okukala tatu mu holele? Osho naanaa. Kalunga oha tala omutima gwaangoka ha gandja nehalo ewanawa noku uvaneka kutya ote ke mu yambekela oshilonga kehe ta ningi. (Deut. 15:10) Okwiitaala meuvaneko ndyoka otaku ningitha omuntu a katuke onkatu, naashoka otashi ke mu etela omayambeko ogendji.—Omayel. 28:20.

6. Aahebeli 11:6 otaye tu shilipalekele shike?

⁶ Kakele kokwiitaala muJehova ngoka ha gandja ondjambi kaapiya ye, Aahebeli 11:6 otaya tsu omuthindo uukwatya wulwe mboka wa pumbiwa opo e tu yambeke. Ndhindhilika kutya Jehova oha futu mboka ‘taye mu kongo’ ya mana mo. Oshitya shomelaka lyopetameko shoka sha longithwa mpaka otashi ti okuninga oonkambadhala dha mana mo nowi itula mo. Shika otashi tu shilipaleke kutya ohe tu laleke nuuyamba. Kalunga kashili, “ngoka ihaa fundju” ohe shi ningi. (Tit. 1:2) Okwa kala nokuulika uule womayovimimvo kutya shoka u uvaneka oshi shi okwiinekelwa shili. Oohapu dhe ihadhi kala inaadhi gwanithwa nando. (Jes. 55:11) Otatu vulu okukala neinekelo kutya ngele otu na eitaalo lyashili, ote ke tu pa ondjambi.

7. Otatu ka lalekwa nuuyamba okupitila ‘moluvalo’ lwaAbraham ngele tatu ningi shike?

⁷ Jesus Kristus oye oshitopolwa shotango ‘sholuvalo’ lwaAbraham. Aakriste aagwayekwa oye li oshitopolwa oshitiyali ‘sholuvalo’ ndoka lwa hunganekwa. Oya lombwelwa ya ‘hokolole iilonga yaKalunga iinene ngoka e yi ithana momilema, ye ye muuyelele we uukumithi.’ (Gal. 3:7-9, 14, 16, 26-29; 1 Pet. 2:9) Uuna tatu ipwililike mboka ya langekwa po kuJesus ya sile oshimpwiyu iinima ye, itatu kala nekwatathano ewanawa naJehova. Ngele “omupiya omudhiginini nomunandunge” ite tu kwathele, itatu ku uva ko esimano lyolela lyaashoka tatu lesha mOohapu dhaKalunga nokutseya nkene tu na oku shi tula miilonga. (Mat. 24:45-47) Ihe ngele tatu tula miilonga iinima mbyoka tatu ilongo mudho, otatu ka lalekwa nuuyamba.

Lalakanena okulonga ehalo lyaKalunga

8, 9. Tatekulululwa Jakob okwa li a longo ngiini nuudhiginini opo a kale metsokumwe negalikano lye?

⁸ Edhiladhilo okuninga oonkambadhala dha mana mo opo tu yambekwe kuKalunga otashi vulika li tu dhimbulukithe tatekulululwa Jakob. Ka li e shi shoka euvaneko ndyoka Kalunga u uvanekela Abraham tali ti, ihe okwa li i itaala kutya Jehova ote ki indjipaleka oluvalo lwahekulu ndoka talu ka ninga oshigwana oshinene. Onkee ano, mo 1781 K.E.N., Jakob okwa yi kuHaran a ka konge omukulukadhi. Ka li owala ta kongo omuntu ngoka a shitika, ihe okwa li ta kongo omukiintu ngoka ha longele Jehova nota vulu okutekula oyana yawo nawa.

⁹ Otu shi shi kutya Jakob okwa li a tsakanene nomukwanezimo lye Rakel. Okwa li e mu hole nokwa zimine a longele he, Laban, uule womimvo heyali e mu pewe a ninge omukulukadhi gwe. Ndika kali shi owala ehokololo lya tseyika nawa kombinga yohole. Jakob okwa li a tseya nawa shoka Kalunga Omunankondoawike u uvanekela hekulu Abraham nonokutya he, Isak okwa li wo e shi lombwelwa. (Gen. 18:18; 22:17, 18; 26:3-5, 24, 25) Isak okwa li wo a lombwele omwana Jakob a ti: “Kalunga Omunankondoawike na yambeke ondjokana yoye, ye e ku pe aanona oyendji, opo u ka ninge he yiigwana oyindji! Ne ku yambeke noluvalo lwoye, ngaashi a yambekele Abraham; ne ku pe evi ndika, moka wa kala mo ondjendi naandyoka Kalunga e li pe Abraham!” (Gen. 28:3, 4) Oonkambadhala ndhoka Jakob a ningi okukonga omukulukadhi to opalele nokumona aanona, odhu ulike kutya okwi inekela shoka Jehova a popya.

10. Omolwashike Jehova a li a hokwa okuyambeka Jakob?

¹⁰ Jakob ina konga uuyamba opo a sile oshimpwiyu uukwanegumbo we. Okwa li ti ipula unene noluvalo lwu uvanekwa. Okwa gandja eitulomo kokugwanithwa kwehalo lyaJehova. Jakob okwa li a tokola okulonga kehe shimwe ngaashi ta vulu nonando opu na iiyimbi opo Jehova e mu yambeke. Okwa kala e na iikala mbyoka sigo omuukulupe we, na Jehova okwe mu yambeke.—Lesha Genesis 32:24-29.

11. Oonkambadhala dhini tu na okuninga metsokumwe nehalo lyaKalunga lya hololwa?

¹¹ Ngaashi Jakob, natse katu shi iinima ayihe kombinga yelalakano lyaJehova. Ihe ngele tatu konakona Oohapu dhe, otatu ka tseya iinima ya simana mbyoka tayi ka ningwa ‘mesiku lyOmuwa.’ (2 Pet. 3:10, 17) Pashiholelwa, katu shi lela kutya uunake esiku ndyoka tali ke ya, ihe otu shi kutya oli li popepi. Otwi itaala Oohapu dhaKalunga ndhoka tadhi ti kutya uuna tatu gandja uunzapo wothaathaa okathimbo hoka ka hupa ko, otatu ki ihupitha tse yene nosho wo mboka taye tu pulakene.—1 Tim. 4:16.

12. Otu na uushili wuni?

¹² Otu shi kutya ehulilo otali vulu okuya ethimbo kehe, molwaashoka Jehova ita ka tegelela omuntu kehe kombanda yevi a pewe uunzapo opo li ye. (Mat. 10:23) Kakele kaashono, ohatu mono ewiliko ewanawa nkene tu na okulonga nomupondo iilonga yokuuvitha. Omolweitaalo, ohatu kutha ombinga miilonga mbika ngaashi tatu vulu, mokulongitha iiniwe yetu. Mbela ohatu uvitha owala unene miitopolwa moka aantu haya pulakene nawa? Mbela shika otatu vulu ngaa oku shi tseya komeho yethimbo? (Lesha Omuuvithi 11:5, 6.) Iilonga yetu oyo okuuvitha notu na einekelo kutya Jehova ote ke tu yambeka. (1 Kor. 3:6, 7) Otu na uushili kutya oha mono oonkambadhala dhetu dha mana mo note ke tu pa ewiliko ndyoka twa pumbwa okupitila mombepo ye ondjapuki.—Eps. 32:8.

Kala nokupula ombepo ondjapuki

13, 14. Ongiini ombepo ondjapuki yaKalunga ya kwathele aapiya ye?

¹³ Ongiini ngele otu wete itaatu vulu okugwanitha po iinakugwanithwa yetu nenge itaatu vulu okukutha ombinga miilonga yokuuvitha? Otu na okupula Jehova e tu pe ombepo ye ondjapuki yi tu kwathele tu hwepopaleke uunkulungu wetu miilonga ye. (Lesha Lukas 11:13.) Ombepo ye ohayi kwathele aantu ya vule okugwanitha po iinakugwanithwa yawo nopwaahe na okutala konakuziwa yawo nenge kontseyo yawo. Pashiholelwa, konima owala sho Aaisraeli ya tembuka muEgipiti, ombepo yaKalunga oya li ya kwathele aasita yoonzi naapika ya sinde aatondi yawo molugodhi, nonando kaya li ye na ontseyo yokukondja. (Eks. 17:8-13) Konima yaashono, oya li ya kwathele Bezalel naOholiab okuthaneka iinima yuungomba yometsalihangano noku yi longa.—Eks. 31:2-6; 35:30-35.

¹⁴ Ombepo ndjoka yi na oonkondo oyo ya kwathele aapiya yaKalunga yokunena ya sile oshimpwiyu oompumbwe dhehangano sho lya li lya pumbwa okutameka okunyanyangidha iileshomwa kulyo lyene. Pethimbo mpoka omutonateli gwasho, omumwatate R. J. Martin, okwa yelitha montumwafo shoka sha longwa po mo 1927 a ti: “Omuwa okwe tu kwathele tu mone eshina enene lyokunyanyangidha, nokuli nonando katu shi oku li pangela noku li longitha. Ihe Omuwa oku shi nkene e na okukwathela omadhiladhilo nuunkulungu waamboka haya ningi oonkambadhala oku mu longela. . . . Miiwike yontumba otwa tseya nkene hali longithwa; notali longo sigo okunena iilonga mbyoka omutoti gwalyo inaa tseya nando kutya otali vulu oku yi longa.” Jehova ota tsikile okuyambeka oonkambadhala ndhoka dha mana mo sigo okunena.

15. Omomukalo guni Aaroma 8:11 taya tsu omukumo mboka ya taalela omamakelo?

¹⁵ Ombepo yaKalunga ohayi longo momikalo dha yoolokathana. Oha vulu oku yi pa aapiya ye ayehe, nohayi ya kwathele ya taaguluke omandangalati omanene. Ongiini ngele otu uvite twa gwililwa po komamakelo? Otatu vulu okutsuwa omukumo koohapu dhaPaulus ndhoka tadhi adhika mAaroma 7:21, 25 nosho wo 8:11. ‘Ombepo ye ndjoka ya yumudha Jesus kuusi’ otayi vulu oku tu kwathela noku tu nkondopaleka tu kondjithe okahalu konyama. Oohapu ndhoka odha nyolelwa Aakriste aagwayekwa, ihe otadhi longo sigo okunena kaapiya yaKalunga ayehe. Atuheni otatu ka mona omwenyo gwaaluhe ngele otwi itaala muKristus, mokuninga oonkambadhala dha mana mo okudhipaga omahalo omawinayi nokukala metsokumwe newiliko lyombepo ondjapuki.

16. Opo tu pewe ombepo ondjapuki yaKalunga otu na okuninga shike?

¹⁶ Mbela otwa tegelela ngaa Kalunga e tu pe oonkondo dhe tadhi longo ngele ihatu ningi oonkambadhala? Aawe. Kakele owala koku dhi pula megalikano, otu na okukonakona Oohapu dhe dha nwethwa mo twa mana mo. (Omayel. 2:1-6) Ombepo yaKalunga ohayi kala wo megongalo lyopaKriste. Okukala kwetu aluhe pokugongala otaku ulike kutya otwa hala tu “uve ko shoka Ombepo te shi lombwele omagongalo.” (Eh. 3:6) Ihe otu na okutaamba ko neifupipiko shoka tatu longwa. Omayeletumbulo 1:23 otage tu ladhipike taga ti: “Pungulukileni komakumagidho gandje, nena ombepo yandje otayi ke mú kungulukila.” Eeno, Kalunga oha gandja ombepo ye ondjapuki “kumboka haa vulika kuye.”—Iil. 5:32.

17. Omayambeko ngoka hatu mono omolwoonkambadhala ndhoka hatu ningi otaga vulu okuyelekanithwa nashike?

¹⁷ Nonando otwa pumbwa okuninga oonkambadhala dha mana mo tu lalekwe nuuyamba kuKalunga, natu dhimbulukwe kutya okulonga nuudhiginini hako akuke taku tu petha iinima iiwanawa mbyoka ha pe oshigwana she. Omayambeko ngoka hatu mono omolwoonkambadhala ndhoka hatu ningi otaga vulu okuyelekanithwa nomukalo moka omalutu getu haga mono uuwanawa miikulya tayi tungu. Kalunga okwa shita omalutu getu komukalo gwa tya ngaaka opo tu nyanyukilwe iikulya notu mone iitungithi okuza muyo. Katu shi naanaa nkene hashi ende opo iikulya yetu yi kale yi na iitungithi, nokapu na gumwe gwomutse ta vulu okuyelitha kutya omalutu getu ohaga mono ngiini oonkondo okuza miikulya mbyoka hatu li. Otu shi owala kutya omulandu ngoka ohagu longo nonokutya ohatu longele kumwe nagwo mokukala hatu li. Ngele ohatu li iikulya tayi tungu, otatu ka kala tu na uukolele. Momukalo gwa faathana, Jehova okwa tula po iitegelelwa yoku ka mona omwenyo gwaaluhe, nokwe tu pa ekwatho ndyoka twa pumbwa opo tu yi gwanithe po. Osha yela kutya ohe tu kwathele noonkondo nokwa gwana okupandulwa. Onkee ano, ngele otwa hala e tu yambeke, otu na okulongela kumwe naye nokukatuka metsokumwe nehalo lye.—Hag. 2:18, 19.

18. Owa tokola toko okuninga shike, nomolwashike?

¹⁸ Natu ninge ano oonkambadhala dha mana mo tu gwanithe po iinakugwanithwa yetu ngaashi tatu vulu. Natu konge aluhe ekwatho kuJehova opo tu pondole. (Mark. 11:23, 24) Sho tatu shi ningi natu kale nuushili kutya ‘ngoka ta kongo ota mono.’ (Mat. 7:8) Aagwayekwa otaya ka pewa ondjambi ‘yomwenyo gwaaluhe’ megulu. (Jak. 1:12) ‘Oonzi dhilwe’ dhaKristus ndhoka tadhi kondjo opo dhi mone omayambeko okupitila moluvalo lwaAbraham, otadhi ka kala dha nyanyukwa oku Mu uva ta ti: “Ne aalalekwa nuuyamba kuTate, ileni, mu ka thigulule [uukwaniilwa mwe wu, KB] longekidhilwa okuza keshito lyuuyuni.” (Joh. 10:16; Mat. 25:34) Eeno, “aayambekwa [kuKalunga] otaa ka thigulula evi, . . . e taa kala mo sigo aluhe.”—Eps. 37:22, 29.

Oto vulu okuyelitha?

• Evuliko lyashili olya kwatela mo shike?

• Otwa pumbwa okuninga shike opo Kalunga e tu yambeke?

• Ombepo ondjapuki yaKalunga otatu yi mono ngiini, nongiini tayi vulu oku tu kwathela?

[Omathano pepandja 12]

Jakob okwa kondjo nomuyengeli opo Jehova e mu yambeke.

Mbela oho ningi oonkambadhala dha tya ngaaka?

[Ethano pepandja 13]

Ombepo ondjapuki yaKalunga oya kwathele Bezalel naOholiab ya longe nuunkulungu