“Omuwiliki gweni gumwe awike oKristus”

“Inamu pitika, mu ithanwe ‘omuwiliki’, oshoka omuwiliki gweni gumwe awike oKristus.”—MAT. 23:10.

1. Oonzapo dhaJehova odha tala ko lye oye e li Omuwiliki gwadho, nomolwashike?

OONGELEKA dhUukwakriste odhi na aawiliki yopantu, ngaashi omupapa gwaRoma, aabisofi yoongeleka dhoOrtodoksi dhokUuzilo nosho wo aasita yomalongelokalunga galwe. Oonzapo dhaJehova inadhi tala ko omuntu gwontumba oye e li omuwiliki gwadho. Kaye shi aalongwa nenge aalanduli yomuntu gwontumba. Shika oshi li metsokumwe noohapu dhopahunganeko dhaJehova dhi na ko nasha nOmwana ndhoka tadhi ti: “Tala, [onde mu lenge] omuwiliki nondjayi yiigwana, nomuye onde yi ulukile oonkondo dhandje.” (Jes. 55:4) Egongalo lyopaigwana lyAakriste aagwayekwa nooyakwawo ‘yoonzi dhilwe’ inaya hala omuwiliki gulwe kee shi ngoka Jehova e ya pa. (Joh. 10:16) Oye li aadhiginini koohapu dhaJesus ndhoka tadhi ti: “Omuwiliki gweni gumwe awike oKristus.”—Mat. 23:10.

Omuyengelindjayi gwaIsraeli

2, 3. Onkandangala yini Omwana gwaKalunga a li a dhana muIsraeli?

² Oomvula omathele manga egongalo lyopaKriste inaali totwa po, Jehova okwa li a tula po omuyengeli gwe opo a wilike oshigwana she Israeli. Konima sho a kutha mo Aaisraeli muEgipiti, Jehova okwe ya lombwele a ti: “Otandi ku tumine omuyengeli, e ku gamene mondjila noku ku kwatela komeho, sho to ende to yi kehala hoka nde ku longekidhile. Mu pulakena ngoye u vulike kuye. Ino mu tsila ondumbo, oshoka [ye ita ka dhima po etaaguluko lyeni molwaashoka edhina lyandje oli li muye, KB].” (Eks. 23:20, 21) Oshi li pandjele okwiitaala kutya omuyengeli ngoka ‘edhina lyaJehova li li muye’ oye Omwana gwaKalunga omutango.

³ Manga inaa valwa e li omuntu, Omwana gwaKalunga okwa li e na edhina Mikael. Membo lyaDaniel, Mikael oti ithanwa “omuyengelindjayi gwaIsraeli.” (Dan. 10:21) Omulongwa Judas oku ulike kutya Mikael okwa li a kwatelwa mo monkalamwenyo yAaisraeli nale manga Daniel inaa valwa. Konima sho Moses a si, Satana okwa li a kambadhala okulongitha omudhimba gwe opo a vule okwiihumitha komeho momukalo gwontumba, tashi vulika mokuningitha Aaisraeli ya tameke elongelo lyiikalunga. Mikael okwa li a yi mo olunyala opo a keelele shika kaashi ningwe. Judas okwa ti: “Molugodhi lwawo naSatana sho ya li taa ludhikithathana kutya olye e na okukutha po omudhimba gwaMoses, Mikael ina pangula nando Satana nenge e mu sheke, ihe okwe mu lombwele owala a ti: ‘Omuwa ne ku geele!’” (Jud. 9) Konima yaashono, manga Jeriko inaashi kondekwa, nopwaahe na omalimbililo Mikael “ondjayi yiita yOMUWA,” oye a li e ya okushilipaleka Josua kutya Kalunga ote ke mu ambidhidha. (Lesha Josua 5:13-15.) Sho ompwidhuli onkuluntu ya kambadhala okukeelela omuyengeli kaaka thikithe etumwalaka komupolofeti Daniel, omuyengeli omukuluntu Mikael okwa li e ya okukwatha omuyengeli ngoka.—Dan. 10:5-7, 12-14.

Omuwiliki ngoka u uvanekwa okwa li a thiki

4. Ehunganeko lini lya li lya hunganekwa shi na ko nasha nokuya kwaMesiasa?

⁴ Manga oshiningwanima shoka shokukeelela omuyengeli inaashi ningwa, Jehova okwa li a tumu omuyengeli Gabriel a ka lombwele Daniel ehunganeko li na ko nasha nokuya ‘kwomuwiliki omuhogololwa gwaKalunga’ nenge Mesiasa. (Dan. 9:21-25)a Pethimbo naanaa ndyoka lya li lya hunganekwa lwokuuka pehulilo lyo 29 E.N., Jesus okwa li a ninginithwa kuJohannes. Ombepo ondjapuki oya li ya tililwa Jesus, ye mu ningi Omugwayekwa, sha hala okutya, Kristus ngoka e li Mesiasa. (Mat. 3:13-17; Joh. 1:29-34; Gal. 4:4) Kungawo, okwa li ta ka ninga Omuwiliki itaa vulu okuyelekwa nagulwe.

5. Ongiini Kristus a li Omuwiliki pethimbo lyuukalele we kombanda yevi?

⁵ Okuza petameko lyuukalele we kombanda yevi, Jesus okwa li u ulike kutya oku li “omuwiliki omuhogololwa gwaKalunga.” Konima owala yomasiku omashona sho a tameke uukalele we, okwa li a tameke okugongela aalongwa ye nokwa li a longo oshikumithalonga she shotango. (Joh. 1:35–2:11) Aalongwa ye oya li ye mu landula sho a li e ende apuhe moshilongo, tu uvitha onkundana ombwanawa yUukwaniilwa. (Luk. 8:1) Okwa li e ya dheula miilonga yokuuvitha nokwa li a kwatele komeho iilonga yokuuvitha noyokulonga aantu, nokungawo okwa tula po oshiholelwa oshiwanawa. (Luk. 9:1-6) Aakuluntugongalo Aakriste kunena otaya ningi nawa ngele taye mu holele moshinima shika.

6. Omomukalo guni Kristus a li u ulike kutya oku li Omusita nosho wo Omuwiliki?

⁶ Jesus okwa li u ulike oshinima shilwe shi na ko nasha nokukala kwe Omuwiliki mokwiiyelekanitha nomusita omunahole. Paulelalela aasita yiimuna ohaya wilike iimuna yawo. W. M. Thomson okwa nyola membo lyedhina The Land and the Book a ti: “Omusita oha kwatele komeho oonzi dhe, hanelalakano owala lyoku dhi ulukila ondjila, ihe okushilipaleka wo kutya komeho oku li nawa nosho wo kutya otapu vulu okweendwa kudho. . . . Oha wilike oonzi nondhimbo [ye], te dhi fala kuulithilo noku dhi gamena kaatondi yadho.” Mokuulika kutya oku li omusita gwashili nOmuwiliki, Jesus okwa ti: “Ongame omusita ngo omwaanawa. Omusita omwaanawa ota gandjele oonzi omwenyo gwe. Oonzi dhandje ohadhi uvu ewi lyandje; ngame ondi dhi shi, odho notadhi landula ndje.” (Joh. 10:11, 27) Mokuulika uushili woohapu dhe, Jesus okwa li a si eso lyopayambo pehala lyoonzi dhe, ihe Jehova “okwe mu yeluthile pombanda . . . a kale Omuwiliki nOmuhupithi.”—Iil. 5:31; Heb. 13:20.

Omutonateli gwegongalo lyopaKriste

7. Jesus ota wilike egongalo lyopaKriste okupitila mushike?

⁷ Kuyele manga inaa londa a ye megulu, omuyumudhwa Jesus okwa li a lombwele aalongwa ye a ti: “Ongame nda pewa epangelo alihe megulu nokombanda yevi.” (Mat. 28:18) Jehova okwa li a pe Jesus uuthemba a tilile aalongwa ye ombepo ondjapuki yi ya nkondopaleke moshili yopaKriste. (Joh. 15:26) Jesus okwa li a tilile Aakriste yopetameko ombepo ndjika pOpentekoste 33 E.N. (Iil. 2:33) Okutililwa hoka kwombepo ondjapuki okwa li kwa ulike kutya egongalo lyopaKriste olya totwa po. Jehova okwa li a pe Omwana oshinakugwanithwa shokukala omuwiliki gwegongalo kombanda yevi te li wilike okuza megulu. (Lesha Aaefeso 1:22; Aakolossa 1:13, 18.) Jesus ota wilike egongalo lyopaKriste okupitila mombepo ondjapuki yaJehova, noku li ta “pangele aayengeli.”—1 Pet. 3:22.

8. Methelemumvo lyotango, Kristus okwa li a longitha oolye kombanda yevi opo a wilike aalongwa ye, noolye ta longitha kunena?

⁸ Kristus okwa li wo a gandja “aantu omagano” okupitila mombepo ondjapuki, yamwe “aasita nayamwe aalongihapu” megongalo. (Ef. 4:8, 11) Omuyapostoli Paulus okwa li a ladhipike aakuluntugongalo Aakriste a ti: “Itonateleni ano, ne mu tonatele wo oshigunda ashihe shoka mwe shi pewa kOmbepo Ondjapuki. Litheni egongalo lyaKalunga ndyoka e li ilikolele neso lyOmwana.” (Iil. 20:28) Sho egongalo lyopaKriste lya tameke, aakuluntugongalo ayehe mboka oya li aagwayekwa. Aayapostoli naakuluntugongalo yegongalo lyomuJerusalem oya li taya longo ye li olutuwiliki. Kristus okwa li a longitha olutuwiliki nduka lu wilike olutu aluhe ‘lwaamwayina’ aagwayekwa kombanda yevi. (Heb. 2:11; Iil. 16:4, 5) Methimbo ndika lyehulilo, Kristus okwi inekelela “omupiya omudhiginini nomunandunge” nomukalelipo gwawo olutuwiliki, ongundu yaalumentu Aakriste aagwayekwa, ‘iinima ye ayihe,’ sha hala okutya, iinima ayihe tayi humitha komeho Uukwaniilwa. (Mat. 24:45-47, yelekanitha KB.) Aagwayekwa noonzi dhilwe oye wete kutya mokulandula ewiliko lyolutuwiliki ndoka lu li po ngashingeyi, osha yela kutya otaya landula Omuwiliki gwawo Kristus.

Kristus okwa li a tameke niilonga yokuuvitha

9, 10. Ongiini Kristus a li a wilike iinima shi na ko nasha nokutaandelithwa kwonkundana ombwanawa?

⁹ Okuza owala ketameko, Jesus mwene okwa li a wilike iilonga yokuuvitha noyokulonga aantu muuyuni auhe. Okwa tula po elandulathano moka onkundana ombwanawa yUukwaniilwa ya li yi na okuthika kaantu ayehe kombanda yevi. Pethimbo lyuukalele we, okwa li a lombwele aayapostoli ye a ti: “Inamu ya kaapagani ne inamu ya moshilando nando oshimwe shAasamaria. Indeni tango koonzi ndhoka dha kana dhomAaisraeli. Mokweenda kweni uvitheni, mu ya lombwele mu tye: [Uukwaniilwa wegulu we ya popepi, KB].” (Mat. 10:5-7) Oya li ye shi ningi nuulaadhi mokati kAajuda nomwaamboka yi itedhululithwa e taya ningi yeitaalo lyOshijuda, unene tuu konima yOpentekoste 33 E.N.—Iil. 2:4, 5, 10, 11; 5:42; 6:7.

¹⁰ Konima, okupitila mombepo ondjapuki, Jesus okwa li a tamununa mo iilonga yUukwaniilwa yokuuvitha sigo okAasamaria nopo nduno okuyalwe mboka ya li kaaye shi Aajuda. (Iil. 8:5, 6, 14-17; 10:19-22, 44, 45) Molwaashono Jesus okwa li a hala onkundana ombwanawa yi taandele miigwana ayihe, okwa li a katuka onkatu ye mwene opo i inyengithe Saulus gwokuTarso a ninge Omukriste. Jesus okwa li a lombwele omulongwa gwe Ananias a ti: “Thikama, inda kaandjaJudas mEpandaanda lyu ukilila e to pula omulumentu Omutarso, edhina lye Saulus. . . . Inda ko kuye, oshoka ngame onde mu hogolola, a longele ndje ye a tseyithile aapagani naakwaniilwa yawo nAaisraeli edhina lyandje.” (Iil. 9:3-6, 10, 11, 15) “Omulumentu” nguka okwa ka ninga omuyapostoli Paulus.—1 Tim. 2:7.

11. Ongiini Kristus a li a tamununa mo iilonga yokuuvitha okupitila mombepo ondjapuki?

¹¹ Sho ethimbo lya li lya thikana lyokutamununa mo iilonga yokuuvitha Uukwaniilwa mokati koshigwana shaamboka kaaya li Aajuda, ombepo ondjapuki yaJehova oya li ya wilike Paulus sho a li molweendo lwuutumwa muAsia eshona nosho wo muEuropa. Ehokololo lyaLukas mIilonga otali ti: “Ano manga [aapolofeti naalongi megongalo lyaAntiokia muSiria] ya li taa longele Omuwa noyi idhilika iikulya, Ombepo Ondjapuki okwe ya lombwele ta ti: ‘Yoololelii ndje mo Barnabas naSaulus, ye ye, ya ka longe oshilonga shoka nde ya ithanena.’ Nena oyo oyi idhilike iikulya e taa galikana, opo ihe oye ya tenteke iikaha noye ya laleke.” (Iil. 13:2, 3) Jesus oye mwene a li i ithana Saulus gwokuTarso a ninge ‘omuhogololwa’ Gwe u uvithile iigwana edhina lye, onkee ano iilonga mbika yokugandja uunzapo oya li ya zi kuKristus, Omuwiliki gwegongalo. Okulongitha kwaJesus ombepo ondjapuki okuwilika iilonga, okwa kala ku iwetikile pethimbo lyolweendo lwuutumwa olutiyali lwaPaulus. Ehokololo otali ti kutya “Ombepo yaJesus,” sha hala okutya, Jesus okupitila mombepo ondjapuki, okwa wilike Paulus naayendi pamwe naye mokuhogolola mpoka ya hala okuya nosho wo pethimbo mpoka ya hala, noya li ya wilikwa kemoniko ya ye muEuropa.—Lesha Iilonga 16:6-10.

Okuwilika kwaJesus egongalo lye

12, 13. Ongiini embo lyEhololo tali ulike kutya Kristus oha landula nawa shoka tashi ningwa megongalo kehe?

¹² Jesus okwa li a landula nuukeka shoka sha li tashi ningwa megongalo lyaalanduli ye aagwayekwa methelemumvo lyotango E.N. Okwa li e shi ashihe shoka sha li tashi ningwa megongalo kehe. Otatu mono uunzapo waashika sho tatu lesha mEhololo ontopolwa 2 no 3. Okwa tumbula omagongalo gaheyali, ngoka agehe ga li muAsia eshona. (Eh. 1:11) Otu na omatompelo lela tu itaale kutya okwa li naanaa e shi wo onkalo yopambepo yomagongalo galwe gaalanduli ye kombanda yevi pethimbo mpoka.—Lesha Ehololo 2:23.

¹³ Jesus okwa li a pandula omagongalo gamwe omolweidhidhimiko lyago, uudhiginini wago uuna ge li momahepeko, okudhiginina kwago oohapu dhe, nosho wo okukala inaaga taamba ko aashunimonima. (Eh. 2:2, 9, 13, 19; 3:8) Mepingathano naashoka, okwa li a gandja omayele ga kola komagongalo gontumba molwaashoka ohole yagamwe yoku mu hola oya li ya talala noga li ga pitike elongelo lyiikalunga, oluhondelo nosho wo okutopoka miimpaga. (Eh. 2:4, 14, 15, 20; 3:15, 16) E li omutonateli gwopambepo omunahole nokuli nokwaamboka a li a pe ekumagidho lya kwata miiti, Jesus okwa ti: “Ayehe mboka ndi ya hole, ohandi ya geele nohandi ya dhenge. Itedhulula ano wa mana mo.” (Eh. 3:19) Nonando okwa li megulu, Jesus okwa li ta wilike egongalo lyaalongwa ye kombanda yevi okupitila mombepo ondjapuki. Pehulilo lyetumwalaka ndyoka a li a lombwele omagongalo ngoka, okwa ti: “Ngoka e na omakutsi, nu uve ko shoka Ombepo [tayi] lombwele omagongalo.”—Eh. 3:22.

14-16. (a) Ongiini Jesus u ulika kutya oku li Omuwiliki omulaadhi gwoshigwana shaJehova kombanda yevi? (b) Okukala kwaJesus e li “pamwe” naalongwa ye “omasiku agehe sigo ehulilo lyuuyuni” okwe etitha po oshizemo shini? (c) Oshike tatu ka kundathana moshitopolwa tashi landula?

¹⁴ Otwa mona kutya Mikael (ngoka e li Jesus) okwa ulika kutya oku li omuyengeli ependa Omuwiliki gwaIsraeli. Konima, Jesus okwa ka kala Omuwiliki omulaadhi nOmusita omunahole gwaalongwa ye yopetameko. Pethimbo lyuukalele we kombanda yevi, okwa li a kwatele komeho iilonga yokuuvitha, nokonima yeyumuko lye, okwa li a tonatele nawa okutaandelithwa kwonkundana ombwanawa yUukwaniilwa.

¹⁵ Lwahugunina Jesus okwa li ta ka tamununa mo iilonga yokuuvitha sigo okooha dhuuyuni okupitila mombepo ondjapuki. Manga inaa ya megulu, Jesus okwa li a lombwele aalongwa ye ta ti: “Otamu ka pewa oonkondo, uuna Ombepo Ondjapuki [tayi] ka tililwa mune. Nena one otamu ka ninga oonzapo dhokuhokolola ndje paantu ayehe mboka ye li muJerusalem, muJudea alihe nomuSamaria sigo omiilongo ayihe yokombanda yevi.” (Iil. 1:8; lesha 1 Petrus 1:12.) Kohi yewiliko lyaKristus, uunzapo owa li wa gandjwa lelalela methelemumvo lyotango.—Kol. 1:23.

¹⁶ Ihe Jesus mwene okwa li u ulike kutya iilonga mbika oya li tayi ka tsikila sigo omethimbo lyehulilo. Konima sho a pe aalanduli ye elombwelo lyoku ka uvitha nokuninga aantu aalongwa miigwana ayihe, Jesus okwe ya uvanekele a ti: “Ngame otandi kala pamwe nane omasiku agehe sigo ehulilo lyuuyuni.” (Mat. 28:19, 20) Okuza sho a langekwa po e li omukwaniilwa mo 1914, Kristus oku li “pamwe” naalongwa ye shi vulithe nale noku li i ipyakidhila e li Omuwiliki gwawo. Moshitopolwa tashi landula otatu ka konakona nkene iilonga ye ya li ya tamunuka mo okuza mo 1914.

[Enyolo lyopevi]

Omapulo geendululo

• Ongiini Omwana gwaKalunga a li u ulike kutya oku li Omuwiliki i ipyakidhila muIsraeli?

• Kristus oha wilike egongalo lye kombanda yevi okupitila mushike?

• Ongiini Kristus a li a wilike okutamunuka mo kwonkundana ombwanawa?

• Oshike tashi ulike kutya Kristus oha landula nawa onkalo yopambepo ndjoka yi li megongalo kehe?

[Ethano pepandja 24]

“Otandi ku tumine omuyengeli, e ku gamene mondjila”

[Ethano pepandja 26]

Ngaashi sha li monakuziwa, Kristus oha longitha ‘aantu ye li omagano’ ya lithe oonzi dhe