Omuwiliki gwetu kunena ngoka i ipyakidhila
“Oye okwa yi, a ka sindane, oshoka oye omusindani.”—EH. 6:2.
1, 2. (a) Iilonga yaKristus e li omukwaniilwa okuza mo 1914 otayi hokololwa yi li ngiini mOmbiimbeli? (b) Kristus okwa katuka oonkatu dhini okuza sho a langekwa po e li omukwaniilwa?
KRISTUS okwa li a langekwa po e li Omukwaniilwa gwUukwaniilwa waJehova wopaMesiasa mo 1914. Momadhiladhilo getu ohatu kala tu mu wete e li ngiini? Mbela ongaashi omukwaniilwa ta dhiladhila a kuutumba koshipangelapundi she, ta tala kombanda yevi ethimbo nethimbo a tale nkene egongalo lye tali shi enditha? Ngele osho, otu na okulundulula okudhiladhila kwetu. Omapisalomi nosho wo embo lyEhololo oge mu ulike e li omukwaniilwa a nuka po e li kokakambe, ta yi “a ka sindane, oshoka oye omusindani,” ta tsikile sigo ta mono “esindano.”—Eh. 6:2; Eps. 2:6-9; 45:1-4.
2 Oshilonga shotango shaKristus konima sho a langekwa po e li omukwaniilwa osho shoka shokusinda “oshikoko pamwe naayengeli yasho.” E li omuyengeli omukuluntu Mikael ngoka ta wilike aayengeli ye, Kristus okwa li u umbu mo Satana noompwidhuli dhe megulu eyapuki e te ya ngambekele okukala owala kombanda yevi. (Eh. 12:7-9) Opo nduno, sho a li ta dhana onkandangala ye e li ‘omutumwa gwehangano’ lyaJehova, Jesus okwe ya naHe opo a konakone otempeli yopambepo. (Mal. 3:1) Okwa li a pangula Uukwakriste, oshitopolwa ‘shaBabiloni Oshinene,’ nokwa mono kutya oku na ondjo onene mokutilahi ombinzi nosho wo yokuhondela pambepo nonkalelo yopapolotika yuuyuni mbuka.—Eh. 18:2, 3, 24.
Okwa li a yogo omupiya gwe gwokombanda yevi
3, 4. (a) Iilonga yini Kristus a li a gwanitha po e li “omutumwa” gwaJehova? (b) Okutalelwa kwotempeli okwa li kwa holola shike, na Jesus e li Omutse gwegongalo okwa li a langeke po lye?
3 Okutalela kwaJehova ‘nomutumwa’ gwe okwa li wo ku ulike kutya mehale lyotempeli ndjoka yopambepo li li kombanda yevi omwa li mu na ongundu yAakriste yashili, mboka ya li kaaye shi oshitopolwa shoongeleka dhUukwakriste. Ihe nokuli nAakriste aagwayekwa mbaka, nenge “oyanamati yaLevi,” oya li ya pumbwa okuyogwa. Osha li sha ningwa ngaashi omupolofeti Maleaki a li a hunganeke: “[Jehova] ote ke ya okupangula a fa omuhemuni ta yelitha oshisiliveli noshingoli. Osho omutumwa gwOMUWA ta ka yogola [oyanamati yaLevi, KB], opo ye etele OMUWA omayambo gu uka.” (Mal. 3:3) Jehova okwa li a longitha ‘omutumwa gwe gwehangano,’ Kristus Jesus, a yoge Aaisraeli mbaka yopambepo.
4 Nonando ongawo, Kristus okwa li a adha Aakriste aagwayekwa mbaka aadhiginini taya longo ngaashi taya vulu ya longekidhile uukwanegumbo wawo meitaalo iikulya pethimbo lyo opala. Okuza 1879 sigo ongashingeyi, oya kala taya nyanyangidha oshili yopaMbiimbeli kombinga yUukwaniilwa waKalunga moshifo shika kashi na nduno mbudhi kutya omomathimbo omawanawa nenge omawinayi. Jesus okwa li a hunganeke kutya “ngele te ya” a talele aalelwa ye pethimbo ‘lyehulilo lyuuyuni,’ okwa li ta ka adha omupiya gwe te ya pe “iikulya pethimbo.” Okwa li ta ka popya kutya omupiya ngoka oku li omunelago nokwa li te ke ‘mu pa etonatelo lyiinima ye ayihe’ kombanda yevi. (Mat. 24:3, 45-47) E li Omutse gwegongalo lyopaKriste, Kristus okwa longitha ‘omupiya omudhiginini nomunandunge’ nguka a tonatele iinima ye yUukwaniilwa kombanda yevi. Okwa gandja ewiliko ‘kaapiya ooyakwawo’ mboka ye li aagwayekwa ‘nokoonzi dhilwe’ okupitila mOlutuwiliki.—Joh. 10:16.
Eteyo lyevi
5. Iilonga yini yopaukwaniilwa omuyapostoli Johannes a li a mono memoniko?
5 Omuyapostoli Johannes okwa li a mono emoniko lyoshinima shimwe shi ili shoka Omukwaniilwa gwopaMesiasa ta ka ninga “mesiku lyOmuwa” konima sho a tulwa koshipangelapundi mo 1914. Johannes okwa nyola a ti: “Ongame onda tala nonda mono oshikogo oshitokele, nokusho okwa kuutumba gumwe a fa Omuna gwOmuntu e na oshishani shoshingoli komutse gwe noshimwitho sha tsa moshikaha she.” (Eh. 1:10; 14:14) Johannes okwa li u uvu omuyengeli a tumwa kuJehova ta lombwele Omuteyi nguka a longithe oshimwitho she, oshoka “evi olya tiliganena eteyo.”—Eh. 14:15, 16.
6. Jesus okwa li a popi shike shoka sha li tashi ka ningwa momukokomoko gwethimbo?
6 ‘Eteyo ndika lyevi’ otali tu dhimbulukitha eyele lyaJesus kombinga yiilya nomau. Jesus okwa li i ifaathanitha nomulumentu ngoka a kunu epya lye oombuto dhiilya nelalakano lyoku ka teya iilya oyindji iiwanawa, mbyoka tayi thaneke “aana yUukwaniilwa,” Aakriste yashili aagwayekwa mboka taya ka pangela pamwe naye mUukwaniilwa we. Ihe uusiku omutondi ngoka e li “Omuhindadhi” okwe ya e ta kunu mepya omau, ngoka ge li “aana yaMwiinayi.” Omukuni okwa lombwele aateyi ye ethe iilya yi kokele mumwe nomau sigo ethimbo lyeteyo, sha hala okutya, “mesiku lyahugunina.” Pethimbo mpoka ota ka tuma aayengeli ye ya yoolole mo omau mokati kiilya.—Mat. 13:24-30, 36-41, yelekanitha KB.
7. Ongiini Kristus ta gwanitha po ‘eteyo lyevi’?
7 Megwanitho lyemoniko ndyoka lya li lya pewa Johannes, Jesus okwa kala ta kwatele komeho iilonga yeteyo muuyuni auhe. ‘Eteyo lyevi’ olya li lya tameke nokugongelwa kwoshihupe ‘shaana yUukwaniilwa’ 144 000 mboka ye li “iilya” yomeyele lyaJesus. Eyooloko ndyoka li li pokati kAakriste yashili naamboka yiifundja olya kala li iwetikile lela konima yIita yotango yUuyuni osho molwaashoka ye etitha po oshitopolwa oshitiyali ‘sheteyo lyevi,’ sha hala okutya, okugongelwa kwoonzi dhilwe. Mbaka kaye shi “aana yUukwaniilwa,” ihe pehala lyaashono oye li “engathithi lyaantu” mboka yi ilongekidha okukala aapangelwa yUukwaniilwa mboka. Oya teywa nenge ya kuthwa “maantu yomomihoko adhihe, momaludhi agehe, miigwana ayihe nomomalaka agehe.” Oyi igandja kUukwaniilwa wopaMesiasa, mboka wa thikama po muKristus Jesus naantu “aayapuki” 144 000 mboka taya ka pangela pamwe naye mepangelo ndyoka lyomegulu.—Eh. 7:9, 10; Dan. 7:13, 14, 18, KB.
Okuwilikwa kwomagongalo
8, 9. (a) Oshike tashi ulike kutya Kristus ita konakona owala eihumbato lyegongalo alihe ihe nosho wo okukalamwenyo kwiilyo yegongalo pauhandimwe? (b) Ngaashi shu ulikwa methano pepandja 29, “iiholekwa yaSatana” yini tu na okuhenuka?
8 Otwa mona moshitopolwa sha tetekele nkene Kristus a li a konakona onkalo yopambepo yegongalo kehe methelemumvo lyotango E.N. Momasiku getu, e li Omukwaniilwa ta pangele a pewa “epangelo alihe megulu nokombanda yevi,” Kristus Omuwiliki gwetu okwi ipyakidhila e li omutse gwomagongalo muuyuni auhe nosho wo gwaakuluntugongalo yago. (Mat. 28:18; Kol. 1:18) Jehova “okwe mu ningi omutse gwegongalo [lyaagwayekwa] nogwiinima ayihe.” (Ef. 1:22) Molwaashoka oku li omutse, kapu na sha shoka tashi ningwa momagongalo ge vulithe 100 000 gOonzapo dhaJehova ta kala inee shi mona.
9 Jesus okwa li a tumine etumwalaka kegongalo lyaTiatira lyonale a ti: “Omuna gwaKalunga ngoka e na omeho ga fa oohandje dhomulilo . . . ota ti: ‘Iilonga yoye ondi yi shi.’” (Eh. 2:18, 19) Okwa li a ganda iilyo yegongalo ndyoka omolwonkalamwenyo yawo ya nyata noyokwiihola mwene, te ya lombwele ta ti: “Omadhiladhilo niiholekwa ayihe yaantu oyi li puuyelele koshipala shandje. Ongame otandi ka futila kehe gumwe shi thike piilonga ye.” (Eh. 2:23) Oohapu ndhoka otadhi ulike kutya Kristus iha konakona owala eihumbato lyegongalo kehe, ihe oha konakona wo onkalamwenyo yoshilyo kehe shalyo. Jesus okwa li a pandula Aakriste yomuTiatira mboka “inaa taamba shoka haku tiwa ‘iiholekwa yaSatana.’” (Eh. 2:24) Kunena okwa hokwa wo aagundjuka nenge aakokele mboka haya tindi okwiimbwanga mumwe ‘niiholekwa yaSatana’ okupitila mo-Internet nenge muudhano woovidio mu na elongitho lyoonkondo nenge mokwiigandja komadhiladhilo gopantu ngoka inaaga hokiwa kuJehova. Jesus ina nyanyukwa tuu okumona oonkambadhala nomaiyambo gAakriste oyendji kunena mboka taya ningi ngaashi taya vulu ya landule ewiliko lye miinima ayihe yonkalamwenyo yawo!
10. Ongiini okuwilika kwaKristus aakuluntugongalo taku thanekwa, ihe oya pumbwa okuzimina elongekidho lini?
10 Kristus oha tonatele omagongalo ge kombanda yevi okupitila maakuluntugongalo ya langekwa po. (Ef. 4:8, 11, 12) Methelemumvo lyotango, aatonateli ayehe oya li aagwayekwa. Oya li taya thanekwa mEhololo ye li oonyothi dhi li moshikaha shaJesus shokolulyo. (Eh. 1:16, 20) Kunena, aakuluntugongalo oyendji oye li oonzi dhilwe.Oya langekwa po konima yegalikano nosho wo kohi yewiliko lyombepo ondjapuki; onkee ano, nayo otaya vulu okutalwa ko ye li kohi yewiliko lyaKristus. (Iil. 20:28) Nonando ongawo, ohaya zimine kutya Kristus oha longitha okangundu okashona kaalumentu Aakriste aagwayekwa ye li Olutuwiliki okukwatela komeho nokuwilika aalongwa ye kombanda yevi.—Lesha Iilonga 15:6, 28-30.
“Ila, Omuwa Jesus!”
11. Omolwashike twa tegelela nondjuulukwe okumona Omuwiliki gwetu e ye mbala?
11 Mehololo ndyoka lya li lya pewa omuyapostoli Johannes, Jesus okwa popi lwiikando kutya ote ya mbala. (Eh. 2:16; 3:11; 22:7, 20) Nopwaahe na omalimbililo, okwa li ta popi kombinga yokuya kwe a pangule Babiloni Oshinene nuuyuni waSatana awuhe wa kolokosha. (2 Tes. 1:7, 8) Omunamimvo omuyapostoli Johannes okwa li e na ondjuulukwe yokumona egwanitho lyiiningwanima ayihe yituntula mbyoka ya li ya hunganekwa nokwa ti: “Eewa ano. Ila, Omuwa Jesus!” Tse mboka tu na omwenyo methimbo lyehulilo lyuuyuni mbuka wa kolokosha natse otwa tegelela nondjuulukwe Omuwiliki nOmukwaniilwa gwetu te ya moonkondo dhUukwaniilwa we a yapule edhina lyaHe nokuyukipalitha uunamapangelo We.
12. Iilonga yini Kristus ta ka ninga manga oombepo dhehanagulo inaadhi piithwa mo?
12 Manga Jesus inaa hanagula po ehangano lyaSatana lyi wetike, iilyo yahugunina yomiilyo 144 000 yaIsraeli yopambepo otayi ka dhengwa oshihako shahugunina. Ombiimbeli otayi popi sha yela kutya oombepo dhehanagulo lyuuyuni waSatana itadhi ka piithwa mo manga okudhengwa oshihako kwaagwayekwa 144 000 huka inaaku pwa.—Eh. 7:1-4.
13. Ongiini Kristus ta ka ulika okukala po kwe pethimbo lyoshitopolwa shotango ‘shuudhigu uunene’?
13 Aantu oyendji yokombanda yevi inaya dhimbulula “okukala po” kwaKristus okuza mo 1914. (2 Pet. 3:3, 4, NW) Ihe mbala ote ku ulika okukala po kwe mokweeta omapangulo gaJehova kombanda yiitopolwa yi ili noyi ili yuuyuni waSatana. Ehanagulo ‘lyomuntu gwuulunde,’ sha hala okutya, aawiliki yopambepo yUukwakriste, otali ka kala ‘eholokopo’ lyokukala po kwe lyi iwetikile. (Lesha 2 Aatessalonika 2:3, 8, KB.) Otali ka gandja uunzapo wa kola kutya Kristus okwa ya miilonga e li Omupanguli a hogololwa kuJehova. (Lesha 2 Timoteus 4:1.) Okuhanagulwa po kwoshitopolwa shoka shi na unene ondjo shaBabiloni Oshinene otaku ka kala ku li etameko lyehanagulo lyakehe shimwe shuukwaniilwa mbuka wuuyuni womalongelokalunga giifundja. Jehova ota ka tula momitima dhaawiliki yopapolotika ya hanagule po ohonda ndjika yopambepo. (Eh. 17:15-18) Shoka otashi ka kala oshitopolwa shotango ‘shuudhigu uunene.’—Mat. 24:21.
14. (a) Omolwashike oshitopolwa shotango shuudhigu uunene tashi ka ningwa oshifupi? (b) “Endhindhiliko lyOmuna gwOmuntu” otali ka tya shike koshigwana shaJehova?
14 Jesus okwa ti kutya omasiku guudhigu uunene mboka otaga ka ningwa omafupi “omolwaahogololwa ye,” oshihupe shAakriste aagwayekwa mboka ye li natango kombanda yevi. (Mat. 24:22) Jehova ita ka pitika okuponokelwa huka kwomalongelokalunga ku kuthe po Aakriste aagwayekwa nosho wo oonzi dhilwe. Jesus okwa gwedha ko kutya “uudhigu womasiku ngoka otau landulwa” komandhindhiliko ge li ketango, komwedhi nokoonyothi, nopo nduno “endhindhiliko lyOmuna gwOmuntu otali ka holoka ihe kegulu.” Shika otashi ka ningitha iigwana yokombanda yevi yi ‘lilagane.’ Hasho tashi ka kala ngaaka naagwayekwa mboka ye na etegameno lyoku ka kala megulu nosho wo mboka haye endele pamwe nayo, mboka ye na etegameno lyokukala kombanda yevi. Otaya ka ‘tala pombanda nokuyelula omitse dhawo oshoka ehupitho lyawo olya hedha popepi.’—Mat. 24:29, 30; Luk. 21:25-28, KB.
15. Uuna Kristus e ya, ota ka longa iilonga yini?
15 Manga inaa sindana, Omuna gwomuntu ote ke ya natango momukalo gwi ili. Okwa li a hunganeke a ti: “Uuna Omuna gwOmuntu te ya meadhimo lyuukwaniilwa we pamwe naayengeli ye ayehe, nena ota ka kuutumba koshipangelapundi shuukwaniilwa we. Aantu ayehe yokombanda yevi otaa ka gongelwa ihe koshipala she, note ke ya yoolola mooyakwawo, ongashika omusita ta yoolola oonzi miikombo. Oonzi ote dhi gameke kolulyo lwe, iikombo okolumoho lwe.” (Mat. 25:31-33) Shika otashi popi okuya kwaKristus e li Omupanguli a yoolole “aantu ayehe yokombanda yevi” moongundu dhi li mbali: “oonzi,” aantu mboka ya kala nokwaambidhidha aamwahe yopambepo (Aakriste aagwayekwa kombanda yevi) nosho wo “iikombo,” aantu mboka “inaa vulika kelaka etoye tali popi Omuwa gwetu Jesus.” (2 Tes. 1:7, 8) Oonzi ndhoka dha popiwa dhi li aantu “aayuuki,” otaya ka mona “omwenyo gwaaluhe” kombanda yevi, ihe iikombo otayi ka ya “mokugeyelwa kwaaluhe,” nenge mehanagulo lyaaluhe.—Mat. 25:34, 40, 41, 45, 46.
Jesus ota ka sindana
16. Ongiini Omuwiliki gwetu Kristus ta ka sindana?
16 Kristus ota vulu okuya “a ka sindane” konima ngele mboka taya ka pangela pamwe naye ya dhengwa oshihako nosho wo ngele oonzi dha yoololwa mo nodha tulwa kolulyo lwe opo dhi hupithwe. (Eh. 5:9, 10; 6:2) E li omutse gwetanga lyaayengeli aanankondo nosho wo gwaamwahe mboka ya yumudhwa, ota ka hanagula po onkalelo yaSatana ayihe yopapolotika, yopaukwiita nosho wo yopamalandithilo kombanda yevi. (Eh. 2:26, 27; 19:11-21) Okusindana kwaKristus otaku ka pwa ngele a hanagula po uuyuni waSatana wa kolokosha. Opo nduno ota ka umbila Satana noompwidhuli dhe molumbogo uule woomvula eyuvi.—Eh. 20:1-3.
17. Kristus ota ka wilika oonzi dhilwe moku dhi fala peni pethimbo lyElelo lyOomvula Eyuvi, notu na okukala twa tokola toko okuninga shike?
17 Sho Johannes a li ta popi kombinga ‘yengathithi lyaantu’ lyoonzi dhilwe mboka taya ka hupa muudhigu uunene, okwa hunganeke kutya “Onzigona, ngoka a kuutumba pokati koshipangelapundi, ota kala omusita gwawo note ke ya wilika noku ya fala koothithiya dhomeya omanamwenyo.” (Eh. 7:9, 17) Eeno, momukokomoko gwElelo lyOomvula Eyuvi, Kristus ota ka tsikila okuwilika oonzi dhilwe, aantu mboka haya pulakene shili kewi lye, noku ya fala momwenyo gwaaluhe. (Lesha Johannes 10:16, 26-28.) Onkee ano, natu landule nuudhiginini Omuwiliki gwetu omudhiginini ngashingeyi nosho wo sigo omuuyuni uupe waJehova mboka e tu uvanekela!
Omapulo geendululo
• Kristus okwa li a katuka oonkatu dhini konima sho a langekwa po e li omukwaniilwa?
• Kristus ota longitha oolye okuwilika omagongalo ye li iilongitho ye yi wetike?
• Omomikalo dhini Kristus Omuwiliki gwetu te ke ya natango?
• Ongiini Kristus ta ka tsikila oku tu wilika muuyuni uupe?
[Ethano pepandja 32]
Okuhanagulwa po kwuuyuni waSatana wa kolokosha otaku ka ulika okukala po kwaKristus