Kala omudiinini kuKristus nokomupiya waye omudiinini

‘Omwene waye ote mu ningi elenga loinima yaye aishe.’ — MATEUS 24:45-47.

1, 2. (a) Omishangwa otadi ti kutya Omuwiliki wetu olyelye? (b) Oshike tashi ulike kutya Kristus ota wilike shili eongalo lopaKriste?

“INAMU pitika, mu ifanwe ‘omuwiliki’, molwaashi omuwiliki weni umwe aeke oKristus.” (Mateus 23:10, OB-1986) Eendjovo odo daJesus otadi ulike sha yela kutya ovashikuli vaye kava li tava ka kala nomuwiliki wopanhu kombada yedu. Ova li tava ka kala ve na Omuwiliki umwe aeke, Jesus Kristus, oo kwa li te ke va wilika okudja meulu. Jesus okwa nangekwa po e li Omuwiliki wovashikuli vaye kuKalunga. Jehova okwe “mu nyumuna movafi ndele . . . , okwe mu pa a kale omutwe waaishe keongalo, olo olutu laye.” — Ovaefeso 1:20-23.

² Molwaashi Kristus okwa nangekwa po e li “omutwe waaishe” keongalo lopaKriste, oku na eenghonopangelo dokuyukifa oshinima keshe meongalo. Oku wete ashishe osho tashi ningwa meongalo noha konenene onghalonawa yopamhepo yeongalo keshe lopaKriste. Osho oshi liwetikile filufilu mehololo olo a li a pa omuyapostoli Johannes lwopexulilo lefelemudo lotete O.P. Eshi Jesus a yandja omatumwalaka aye komaongalo aheyali, okwa popya lwoikando kutya oku shii oilonga yavo, omaukwatya avo mawa nosho yo omaunghundi avo, nokwa li e va pa omayele noku va twa omukumo she likolelela keenghalo deongalo keshe. (Ehololo 2:2, 9, 13, 19; 3:1, 8, 15) Naasho otashi ulike yo kutya Kristus okwa li e shii yo onghalonawa yopamhepo yomaongalo makwao oo a li muAsia Linini, muPalestina, muSiria, muBabilon, muGreka, muItalia nosho yo moilongo imwe i lili. (Oilonga 1:8) Ongahelipi shi na sha nomaongalo okunena?

Omupiya omudiinini

3. Omolwashike sha yeleka okufaafana Kristus nomutwe nosho yo eongalo nolutu?

³ Konima eshi Jesus a nyumuka, fimbo kwa li ku na okafimbo kaxupi a ye meulu kuXe, okwa li a lombwela ovahongwa vaye a ti: “Onda pewa eenghono adishe meulu nokombada yedu.” Okwa ti yo kutya: “Tala, Ame ndi li pamwe nanye omafiku aeshe fiyo okexulilo lefimbo lounyuni.” (Mateus 28:18-20) Jesus okwa li ta ka twikila okuwilika ovahongwa vaye e li Omutwe wavo. Eshi omuyapostoli Paulus kwa li a shangela Ovakriste vokuEfeso nokuKolossi, okwa li a faafanifa eongalo lopaKriste ‘nolutu,’ olo Kristus e li Omutwe walo. (Ovaefeso 1:22, 23; Ovakolossi 1:18) O-The Cambridge Bible for Schools and Colleges oya ti kutya efaafanifo olo “itali ulike ashike kutya osha fimana keongalo okukala li li metwokumwe nOmutwe, ndele otali ulike yo kutya ovakwaneongalo ohava wilikwa kOmutwe. Ovakwaneongalo ove li oilongifo yOmutwe.” Mbela oolyelye va kala tava longifwa kuKristus ve li oshilongifo shaye okudja eshi a pewa eenghono dOuhamba mo 1914? — Daniel 7:13, 14.

4. Ngaashi sha li sha xunganekwa komuprofeti Malakia, Jehova naKristus Jesus ova li va mona shike eshi va konakona otembeli yopamhepo?

⁴ Omuprofeti Malakia okwa li a xunganeka kutya Jehova nosho yo “Omwengeli wehangano,” Kristus Jesus, Omona waye oo a nangeka po e li Ohamba, ova li tava ka konakona nokutokola shi na sha ‘notembeli’ yaYe, ongulu yaYe yeilikano yopamhepo. Oumbangi otau ulike kutya ‘efimbo lokutokola eumbo laKalunga’ ola li la hovela mo 1918.a (Malakia 3:1; 1 Petrus 4:17) Aveshe ovo va li tave liti kutya ove lile po Kalunga nelongelokalunga lashili ova li va konakonwa nawa. Oshidjemo, eengeleka dOukwakriste, odo da kala tadi hongo ovanhu oule womafelemido omahongo oo itaa fimanekifa Kalunga noda li da kufa ombinga momadipao oo a li a ningwa pefimbo lOita yotete yOunyuni, oda li da tokolwa. Ndele opa li oshixupe shOvakriste ovavaekwa nomhepo oshidiinini osho sha li sha konakonwa nokuyelifwa nomundilo nosha li sha monika mo kutya osha wana ‘okweetela Jehova eyambo mouyuki.’ — Malakia 3:3.

5. Metwokumwe nexunganeko laJesus li na sha nokukala po kwaye, oolyelye va li va ulika kutya ova li “omupiya” omudiinini?

⁵ Metwokumwe nexunganeko laMalakia, eshi Jesus a yandja edidiliko li na sha ‘nokukala po kwaye nolefimbo lexulilo longhalelo yoinima,’ okwa li a popya shi na sha nongudu ‘yomupiya omudiinini.’ Jesus okwa ti: “Olyelye hano omupiya omudiinini nomunaendunge, omwene waye e mu tula kombada yovapiya vaye, e va pe oikulya pefimbo [layo]? Omupiya ou e nelao, omwene waye nge ta aluka [ndele] te mu hange a ninga ngaha. Oshili handi mu lombwele: Oye te mu ningi elenga loinima yaye aishe.” (Mateus 24:3, 45-47, yelekanifa NW.) Eshi Kristus a “aluka” mo 1918, okwa li a hanga oshixupe shovavaekwa nomhepo shidiinini, osho sha kala tashi nyanyangida Oshungonangelo okudja mo 1879 nosho yo oishangomwa ikwao ya kanghamena kOmbibeli, tashi yandje “oikulya pefimbo layo.” Okwa li a tambula ko oshixupe osho shi li oshilongifo shaye, “omupiya” waye. Opo nee okudja mo 1919, okwe shi lineekelela oshinakuwanifwa shokupashukila oinima yaye aishe yokombada yedu.

Omupiya omudiinini okwa nangekwa po a pashukile oinima yaKristus yokombada yedu

6, 7. (a) Jesus okwa longifa vali omautumbulilo elipi e na sha ‘nomupiya’ waye omudiinini? (b) Jesus okwa li a hala lela okutya shike eshi a longifa outumbulilo “omukeleli weumbo”?

⁶ Eemwedi dinini fimbo Jesus ina xunganeka edidiliko lokukala po kwaye olo la kwatela mo “omupiya” oo te mu kalele po kombada yedu, okwa li a popya shi na sha ‘nomupiya’ oo, ta longifa omautumbulilo amwe e lili oo taa holola oinakuwanifwa yomupiya. Jesus okwa ti: “Olyelye hano omukeleli weumbo omudiinini nomunaendunge, Omwene waye e mu pa epangelo lovapiya vaye, e va pe eendya pefimbo lado? Oshili handi mu lombwele: Ye ote mu pe epangelo loinima yaye aishe.” — Lukas 12:42, 44.

⁷ MuLukas 12, omupiya ota ifanwa omukeleli weumbo, osho tashi toloka oshitya shOshigreka osho tashi ti “omupashukili weumbo ile wonhele.” Ongudu yomukeleli weumbo kaya li tai ka kala ashike ngeno ongudu yovanaendunge oyo hai yelifa oitwa ihokwifa yOmbibeli. Kakele kokukala tai yandje eendja dopamhepo tadi palula “pefimbo lado,” ongudu oyo ‘yomukeleli weumbo omudiinini’ oya li tai ka nangekwa po opo i pashukile ovapiya aveshe vaKristus nosho yo ‘oinima aishe’ yaKristus yokombada yedu. Mbela oinima oyo yaKristus oya kwatela mo shike?

8, 9. Omupiya okwa nangekwa po a pashukile ‘oinima’ ilipi?

⁸ Oinakuwanifwa yomupiya oya kwatela mo okupashukila eenhele adishe odo hadi longifwa kovashikuli vaKristus mounyuni aushe opo va wanife po oilonga yavo yopaKriste, ngaashi ombelewa ya kula yEendombwedi daJehova, oitaimbelewa, nosho yo eenhele davo delongelokalunga, sha hala kutya, Omalupale Ouhamba nOmalupale Oyoongalele. Natango, ongudu yomupiya oi na oshinakuwanifwa sha fimana neenghono shokupashukila eeprograma dehongo lOmbibeli tadi tungu dokoshivike nosho yo okuunganeka oyoongalele inini naai ya kula. Pokwoongala kwa tya ngaho, ovanhu ohava yelifilwa shi na sha nokuwanifwa kwomaxunganeko Ombibeli nokukwafelwa va mone nghee ve na okutula moilonga omafinamhango Ombibeli mokukalamwenyo kwavo kwakeshe efiku.

⁹ Omukeleli weumbo oo oku na yo oshinakuwanifwa shokupashukila oilonga oyo ya fimanenena yokuudifa ‘evangeli louhamba’ noyokuninga ‘ovanhu ovahongwa.’ Oshinakuwanifwa osho osha kwatela mo okuhonga ovanhu va diinine oinima aishe oyo Kristus, oo e li Omutwe weongalo, a lombwela ovahongwa vaye va wanife po pefimbo eli lexulilo. (Mateus 24:14; 28:19, 20; Ehololo 12:17) Oilonga oyo yokuudifa nokuhonga oya etifa po “ongudu inene” oyo tai yambidida noudiinini oshixupe shovavaekwa. Nopehe na omalimbililo, ovanhu ovo ove li ‘omamona omoiwana aishe’ ova kwatelwa ‘moinima’ yaKristus i na ondilo oyo tai pashukilwa komupiya omudiinini. — Ehololo 7:9; Haggai 2:7.

Olutuwiliki olo li lile po omupiya omudiinini

10. Oolyelye va li tava longo ve li olutuwiliki mefelemudo lotete, nomatokolo olutuwiliki olo okwa li a kuma ngahelipi omaongalo?

¹⁰ Osha yela kutya omupiya omudiinini okwa li ta ka kala e na oinakuwanifwa idjuu oyo ya kwatela mo okuninga omatokolo kombinga yoinima i lili noku lili. Meongalo lopaKriste lomefelemudo lotete, ovayapostoli novakulunhu vomuJerusalem ova li tava longo ve li olutuwiliki lomupiya omudiinini. Ovo va li hava ningi omatokolo ponhele yeongalo alishe lopaKriste. (Oilonga 15:1, 2) Omatokolo oo kwa li haa ningwa kolutuwiliki olo lomefelemudo lotete okwa li haa tuminwa komaongalo okupitila meenhumwafo nosho yo movakalelipo ovaendi. Ovakriste vomefelemudo lotete okwa li hava kala va hafa omolwewiliko la yela lolutuwiliki nova li hava dulika kulo nehalo liwa, naasho osha li hashi xumifa komesho ombili noukumwe momaongalo. — Oilonga 15:22-31; 16:4, 5; Ovafilippi 2:2.

11. Kunena Kristus ota longifa oolyelye okuwilika eongalo laye, notu na okutala ko ngahelipi ewiliko lavo?

¹¹ Ngaashi sha li nale mefelemudo lotete, nokunena ope na Olutuwiliki lovashikuli vaKristus olo la fikama po mongudu inini yovapashukili ovavaekwa nomhepo. Omutwe weongalo, Kristus, oha wilike ovalumenhu ovo ovadiinini ‘neke laye lokolulyo,’ olo tali faneke eenghono daye, opo va pashukile oilonga yOuhamba. (Ehololo 1:16, 20) Omumwatate Albert Schroeder, oo a li oshilyo shOlutuwiliki efimbo lile, ndele okwa mana eengeda daye kombada yedu omido opo da di ko, okwa tile: “Olutuwiliki ohali ongala Etitatu keshe, hali hovele neilikano opo Jehova e li wilike nomhepo yaye. Ohali ningi eenghendabala da mana mo opo oinima aishe nomatokolo oo taa ningwa a kale metwokumwe nEendjovo daKalunga Ombibeli.”b Onghee hano, ohatu dulu okulineekela Ovakriste ovo ovavaekwa ovadiinini. Ngeenge tashi uya unene tuu ponghandangala oyo tava dana shi na sha newiliko, otu na okudulika kekumaido lomuyapostoli Paulus olo tali ti: “Shikuleni ovakwatelikomesho veni, nye mu dulike kuvo, osheshi ovo ohava pashukile eemwenyo deni.” — Ovaheberi 13:17.

Natu ulike kutya otwa fimaneka shili omupiya omudiinini

12, 13. Omatomheno opamishangwa elipi taa ufa kutya otu na okukala hatu fimaneke ongudu yomupiya?

¹² Etomheno la fimanenena molwaashi tu na okuulika kutya otwa fimaneka shili ongudu yomupiya omudiinini ololo kutya kungaho ohatu ulike kutya otwa fimaneka Omwene, Jesus Kristus. Paulus okwa li a popya shi na sha novavaekwa a ti: “Ou a ifanwa a hangika omudalwa, oye omupika waKristus. Onye omwa kulilwa noikulila idjuu.” (1 Ovakorinto 7:22, 23; Ovaefeso 6:6) Onghee hano, ngeenge ohatu dulika kewiliko lomupiya omudiinini nokOlutuwiliki olo li mu lile po, ohatu ulike oudiinini wetu kuKristus, Omwene womupiya. Okukala hatu fimaneke shili oshilongifo osho Kristus ta longifa okupashukila oinima yaye yokombada yedu otaku ulike kutya otwa dimina ‘kutya Jesus Kristus oye Omwene nohatu fimaneke Kalunga Xe.’ — Ovafilippi 2:11.

¹³ Etomheno vali limwe lopamishangwa molwaashi tu na okukala hatu fimaneke omupiya omudiinini ololo kutya Ovakriste ovavaekwa ovo ve li kombada yedu ove li “otembeli” yaJehova yopafaneko, omo ha kala okupitila ‘momhepo’ yaye, nokungaho okwe va tala ko ve li ‘ovayapuki.’ (1 Ovakorinto 3:16, 17; Ovaefeso 2:19-22) Ongudu oyo yotembeli iyapuki oye lineekelelwa kuJesus oinima yaye yokombada yedu, naasho osha hala okutya omaufembanghenda noinakuwanifwa imwe meongalo lopaKriste oye lineekelelwa ashike ongudu oyo yomupiya omudiinini. Onghee hano, oilyo aishe yeongalo lopaKriste oi na okutala ko oshiteelelwa shokudulika kewiliko lomupiya omudiinini nOlutuwiliki shi li oshinima sha fimanenena mokulongela Kalunga. Nopehe na omalimbililo, ‘eedi dimwe’ ode shi tala ko shi li oufembanghenda munene okuyambidida ongudu yomupiya shi na sha nokufila oshisho oinima yOmwene. — Johannes 10:16, OB-1986.

Nghee eedi dimwe hadi yambidida noudiinini ongudu yomupiya

14. Ngaashi sha xunganekwa kuJesaja, omeityo lilipi eedi dimwe hadi shikula ongudu yomupiya nokulonga di li “ovalongi ovo ihava longele ondjabi”?

¹⁴ Omuprofeti Jesaja okwa li a xunganeka shi na sha nokudulika nelininipiko kweedi dimwe kovavaekwa ovo ve li Israel shopamhepo. Okwa xunganeka a ti: “Omwene ota ti: [ovanailonga ovo ihava longele ondjabi vokuEgipti novashingifi vokuEtiopia, NW] nOvasaba ovalumenhu vale, otave uya kuove, ndee tava ningi voye, otave ku shikula, tava ende momalyenge ndee tave ke ku linyongamena, tave ku ilikana ndee tava ti: Heeno, oshili, omuove amuke mu na Kalunga, kape na vali [Kalunga] umwe.” (Jesaja 45:14) Eedi dimwe ohadi shikula ongudu yomupiya nOlutuwiliki, sha hala okutya, ohadi dulika kewiliko lomupiya omudiinini nOlutuwiliki olo li mu lile po. Eedi dimwe ohadi longo di li “ovalongi ovo ihava longele ondjabi,” mokulongifa nehalo liwa eenghono noiniwe yado mokuyambidida oilonga yokuudifa yomounyuni aushe oyo Kristus e lineekelela ovashikuli vaye ovavaekwa ovo ve li kombada yedu. — Oilonga 1:8; Ehololo 12:17.

15. Jesaja 61:5, 6 okwa li a xunganeka ngahelipi ekwatafano olo li li pokati keedi dimwe naIsrael shopamhepo?

¹⁵ Eedi dimwe ohadi longele Jehova nehafo koshi yepashukilo longudu yomupiya omudiinini nOlutuwiliki. Oda dimina kutya ovavaekwa ovo ‘Israel yaKalunga.’ (Ovagalati 6:16) Eedi dimwe oda popiwa pafaneko di li “ovanailongo” ovo tava yakula nehafo Israel shopamhepo, tava longo ve li ‘ovalongi voikokola yomiviinyu’ koshi yewiliko lovavaekwa, ovo ve li “ovapristeri vOmwene” nove li yo “ovamati vaKalunga.” (Jesaja 61:5, 6) Ohadi udifa nouladi onghundana iwa yOuhamba nokukufa ombinga moilonga yokuninga ovanhu vomoiwana aishe ovahongwa. Ohadi yambidida nomutima aushe ongudu yomupiya mokulifa nokufila oshisho ovo vape.

16. Oshike hashi linyengifa eedi dimwe di kale tadi yambidida noudiinini omupiya omudiinini nomunaendunge?

¹⁶ Eedi dimwe odi shi shii kutya ohadi mono ouwa muhapu meendja dopamhepo odo hadi yandjwa pefimbo lado kongudu yomupiya oyo hai longo noudiinini. Oda dimina nelininipiko kutya ngeno kapa li omupiya omudiinini nomunaendunge, ngeno kadi na eshi di shii lela shi na sha naasho Ombibeli tai hongo kombinga yoinima ei ya fimana, ngaashi ounamapangelo waJehova, okuyukipalifwa kwedina laye, Ouhamba waye, eulu lipe nedu lipe, omwenyo, onghalo yoonakufya, eyooloko pokati kaJehova nOmona nosho yo omhepo iyapuki. Omolwohole yado nomolwaashi odi na olupandu linene, ohadi yambidida noudiinini oshixupe ‘shovamwaxe’ vaKristus ovavaekwa osho shi li kombada yedu pefimbo eli lexulilo. — Mateus 25:40.

17. Olutuwiliki ola ninga po omalongekido elipi a fimana, noshike tashi ka kundafanwa moshitukulwa tashi landula?

¹⁷ Molwaashi omuvalu wovavaekwa otau ende tau ninipala, itava dulu okukala ve li meongalo keshe lopaKriste opo va pashukile odikilila oinima yaKristus. Onghee hano, Olutuwiliki ola nangeka po ovalumenhu ovo ve li oilyo yeedi dimwe va kale tava pashukile oitaimbelewa, oitukulwa, oikandjo, nosho yo omaongalo Eendombwedi daJehova. Mbela oikala yetu shi na sha novapashukili ovo tava longo ve li ovafita koshi yewiliko laKristus ohai kumu ngahelipi oudiinini wetu kuKristus nokomupiya waye omudiinini? Osho otashi ka kundafanwa moshitukulwa tashi landula.

[Omashangelo opedu]

Omapulo eendululo

• Omuwiliki wetu olyelye, noshike tashi ulike kutya oku shii onghalonawa yomaongalo aeshe?

• Eshi ‘otembeli’ ya li ya konakonwa, oolyelye va hangwa tava longo ve li omupiya omudiinini, nova li ve lineekelelwa oinima ilipi?

• Omatomheno opamishangwa elipi taa ufa kutya otu na okukala hatu yambidida noudiinini ongudu yomupiya?

[Omafano pepandja 25]

‘Oinima’ oyo tai pashukilwa kongudu ‘yomukeleli weumbo’ oya kwatela mo omatungo, eeprograma dehongo lOmbibeli nosho yo oilonga yokuudifa

[Efano pepandja 26]

Eedi dimwe ohadi yambidida ongudu yomupiya omudiinini mokukala tadi udifa nouladi