Shoka tashi eta enyanyu muukwanegumbo

Kundathana naamwoye kombinga yomilalo

Alicia agwoomvula omulongo nasha ota ti: “Omathimbo gamwe ohandi kala owala nda hala okuuva nawa kombinga yomilalo, ihe ondi uvite kutya ngele onda pula aavali yandje omapulo kombinga yadho, otashi vulika ya dhiladhile kutya onda hala okuninga sha oshiwinayi.”

Inez, yina yaAlicia ota ti: “Ohandi kala nda hala okukuutumba nokamwandjekadhona nokupopya nako kombinga yomilalo, ihe oki ipyakidhila noonkondo nonkalamwenyo yako. Ohashi kala oshidhigu okumona ethimbo lyokupopya nako.”

KUNENA omilalo ohadhi ulikwa kehe pamwe ngaashi ko-TV, moomuvi nomomatseyitho giipindi. Otashi monika sha fa aavali noyana oyo owala inaaya manguluka okukundathana kombinga yomilalo. Omugundjuka gumwe gwoomvula omulongo nasha gwomuKanada gwedhina Michael okwa ti: “Ohandi kala nda hala aavali ya tseye kutya ohashi kala oshitilithi noshisitha ohoni shi thike peni kaagundjuka okupopya nayo kombinga yomilalo. Oshipu oku dhi popya nakuume koye.”

Olwindji aavali nayo ihaya kala ya manguluka okupopya naanona yawo kombinga yomilalo. Membo lye Beyond the Big Talk, omulongi gwuundjolowele Debra W. Haffner okwa ti: “Aavali oyendji oya lombwela ndje kutya oya landela oyana omambo ge na ko nasha nomilalo nenge nethimbo lyokamukondapweyu e taye ga tula moondunda dhoyana yomimvo omugoyi sigo omulongo nandatu, noihaya kundathana nayo kombinga yago.” Haffner okwa ti kutya kungawo, aavali oya hala okulombwela oyana taya ti: “Otwa hala mu tseye kombinga yomalutu geni nokombinga yomilalo, ihe inatu hala owala okupopya nane kombinga yadho.”

Ngele owu li omuvali, ku na okukala wu na iikala ya tya ngawo. Dhoshili, osha simana wu popye nokamwoye kombinga yomilalo. Tala komatompelo ngaka gatatu:

1. Etaloko li na ko nasha nomilalo olya lunduluka. James gwoomvula 20 okwa ti: “Kunena ngele aantu taya popi omilalo, ihaya dhiladhila owala omilalo pokati komusamane nomukulukadhi mboka ya hokanathana. Ihe ohaya dhiladhila kombinga yomilalo dhomaludhi ogendji, ngaashi okuthipathana kiilyo yoluvalo, uushenge, okwiitumina omatumwalaka nomathano giipala ko-Internet, nokuli nokoongodhi dhopeke.”

2. Aanona yoye otashi vulika yu uve uuyelele wa puka manga ye li aashona. Omuvali gwedhina Sheila okwa ti: “Nziya shampa aanona ya tameke osikola otaye ku uva kombinga yomilalo noitaya ka kala ye na etaloko ndyoka wa hala ya kale ye na.”

3. Aamwoye oye na omapulo kombinga yomilalo, ihe otashi vulika ya tila okutameka oku ga kundathana nangoye. Ana gwoomvula 15 gwokuBrasilia okwa ti: “Dhoshili, kandi shi nkene ndi na okutameka oonkundathana naavali yandje kombinga yomilalo.”

Dhoshili, okupopya naanona yeni kombinga yomilalo oshi li oshinakugwanithwa sheni mwe shi pewa kuKalunga mu li aavali. (Aaefeso 6:4) Shika otashi vulu okukala kaashi shi oshipu kungoye nokuyo oku shi ninga. Ihe, aagundjuka oyendji otaya tsu kumwe naDanielle gwoomvula 15 ngoka a ti: “Otwa hala okulongwa kombinga yomilalo kaavali yetu, ihe hakaalongi yontumba nenge koopolohalama dhoko-TV.” Ongiini ano to vulu okukundathana naanona yoye kombinga yoshinima shoka sha simana nonando kashi shi oshipu?b

Kundathana nayo shi ikwatelela koomvula dhawo

Aanona ohaya tameke okuuva kombinga yomilalo manga ye li aashonashona, kakele owala ngele oye li mpoka kaapu na aantu. Nokuli shoka shiyemateka noonkondo osho kutya ‘momasiku ngaka gahugunina,’ aakolokoshi otaa tsikile okuza “muuwanawa yu uka muuwinayi.” (2 Timoteus 3:1, 13) Shinikitha oluhodhi, aanona oyendji ohaya hepekwa pamilalo kaantu mboka aakuluntu.

Onkee ano, osha simana opo wu tameke okulonga aanona yoye manga ye li natango aashona. Omuvalakadhi gwedhina Renate gwokoNdowishi okwa ti: “Ngele owa tegelele sigo oosho ye li pokugwanitha oomvula omulongo, otashi vulika itaaya ka kala ya hala okupopya ya manguluka molwaashoka oya sa ohoni ndyoka hayi ya unene tuu ngele ye li pethimbo lyokamukondapweyu.” Shoka sha simana osho oku ya pa uuyelele mboka we eleka oomvula dhawo.

Aanona mboka inaaya tameka natango osikola: Gandja eitulomo koku ya longa omadhina giilyo yoluvalo nokutsa omuthindo kutya inaye etha nando ogumwe a gume iilyo mbika. Omuvalakadhi gumwe gwedhina Julia gwokuMeksiko okwa ti: “Omumwandjemati onda tameka oku mu longa kombinga yiilyo yoluvalo sho a li e na oomvula ndatu. Ohandi ipula noonkondo nokukala ndi shi kutya aalongi naamboka haya tonatele aanona nenge aanona mboka ye mu vule otashi vulika ye mu ningile sha oshiwinayi. Okwa pumbwa okutseya nkene e na okwiigamena kaantu mboka.”

KAMBADHALA OKUNINGA SHIKA: Longa okanona koye ka popye newi lyomuule ngele pu na gumwe ta kambadhala okudhanena iilyo yako yoluvalo. Pashiholelwa, oto vulu wu ka longe ka kale ha ka ti: “Ino guma ndje! Otandi ke shi tya ko!” Ka shilipaleka kutya osha simana aluhe oku ku lombwela, nokuli nuuna omuntu e ku uvanekela kutya ote ka pe omagano nenge uuna e ka ningila omatilitho.c

Aanona mboka ye li moongundu dhopevi: Tsikila okugwedhela ko kontseyo yokanona koye kashona nakashona. Omusamane gwedhina Peter okwa ti: “Manga inoo tameka okupopya nayo, kambadhala tango okutseya shoka ye shi nale naashoka ya hala okutseya natango. Ino ya kondjithila oonkundathana. Ngele oho kala nayo aluhe, ompito yoonkudhathana otayi ka holoka po.”

KAMBADHALA OKUNINGA SHIKA: Kundathana aluhe nayo paufupi pehala ‘lyokukundathana nayo ethimbo eleeleka.’ (Deuteronomium 6:6-9) Komukalo nguka, itashi ke ya dhigupalela. Kakele kaashono, sho taya koko otaya ka kala ye na uuyelele mboka ya pumbwa shi ikolelela koomvula dhawo.

Aagundjuka yepipi lyokamukondapweyu: Pethimbo mpoka opo aagundjuka mboka ya pumbwa okuyelithilwa nawa kutya omilalo odha kwatela mo naanaa shike ngele tashi ya palutu, pamaiyuvo nosho wo nkene ye na okuyanda omikalo ndhoka tadhi ya hilile momilalo. Ana gwoomvula 15 ngoka a tumbulwa metetekelo okwa ti: “Uumati nuukadhona kosikola yetu ohawu yi momilalo naantu mboka kaaye na ekwatathano nayo nenge mboka kaaye shaathane nayo. Ondi wete kutya ndi li Omukriste, onda pumbwa ontseyo ya gwana kombinga yomilalo, nonando kashi shi oshipu okukundathana kombinga yadho.”d

Kala wa kotoka: Otashi vulika aagundjuka yoomvula omulongo nasha ya kale itaaya pula omapulo molwaashoka ya tila kutya aavali yawo otaya ka kala taya dhiladhila kutya ihayi ihumbata nawa. Shoka osho omusamane gumwe Steven a mono nokwa ti: “Omumati gwetu okwa tameke okukala kee hole we okukundathana natse kombinga yomilalo ihe, konima yethimbo otwa mono kutya okwa li e wete twa fa twa limbililwa eihumbato lye. Otwe mu yelithile kutya itatu kundathana naye kombinga yoshinima shoka molwaashoka ando eihumbato lye lye tu limbilika; ihe otwa hala owala okukala nuushili kutya ota vulu okuungaunga nomanwethomo omawiinayi ngoka ge mu dhingoloka.”

KAMBADHALA OKUNINGA SHIKA: Pehala lyokupula okamwoye hoka ke li mepupi lyokamukondapweyu omapulo ge ku ukilila ge na ko nasha nomilalo, ka pula nkene aanasikola ooyakwawo ye dhi tala ko. Pashiholelwa, otashi vulika wu tye: “Aantu oyendji kunena oyu uvite kutya okuthipathana kiilyo yoluvalo kaku shi naanaa okuya momilalo. Mbela aanasikola ooyakweni nayo osho haya kala yu uvite ngawo?” Okupula aamwoye omapulo ga tya ngaaka ohaku ya ningitha ya popye ya manguluka nkene ya tala ko omilalo.

Sinda uumbanda wokukala wa tila okukundathana naamwoye kombinga yomilalo

Dhoshili, okupopya naanona yoye kombinga yomilalo otashi vulika shi kale oshilonga oshidhigu. Ihe oonkambadhala dhoye otadhi ke eta iizemo iiwanawa. Omuvalakadhi gwedhina Diane okwa ti: “Mokweendela ko kwethimbo, ito ka kala wa tila unene okukundathana naamwoye kombinga yomilalo, notashi ka koleka nokuli ekwatathano lyeni nayo.” Steven ngoka a tumbulwa metetekelo ote shi zimine ta ti: “Ohashi kala oshipu okukundathana kombinga yiinima ngaashi omilalo ngele uukwanegumbo weni owe shi ningi omukalondjigilile okukala wa manguluka okupopya kombinga yakehe shimwe mwa hala okukundathana muukwanegumbo.” Okwa gwedha ko a ti: “Uumbanda wokukala wa tila okukundathana iinima yi na ko nasha momilalo ihawu hulu po thiluthilu, ihe okupopya mwa mangulukilathana okwa simana muukwanegumbo wopaKriste.”

[Omanyolo gopevi]

[Oshimpungu/Ethano pepandja 14]

IPULA OMAPULO TAGA LANDULA

Lesha omatyokosha taga landula ngoka ga za kaagundjuka muuyuni auhe e to ipula omapulo ngoka ge ga landula.

• “Aavali yandje ohaya lombwele ndje ndi leshe iitopolwa yi na ko nasha nomilalo opo nduno tandi ke ya pula ngele ondi na epulo lyasha. Ihe ohandi kala nda hala ando ya popye oshindji nangame kombinga yadho.”—Ana gwokoBrasilia.

Omolwashike wu wete kutya osha simana okuninga oshindji kaashi shi owala okupa okanona koye iileshomwa oyo yi ka longe shi na ko nasha nomilalo?

• “Ondi shi iinima oyindji noonkondo ya puka kombinga yomilalo, mbyoka ndi wete kutya tate ke yi shi. Ota ka kala a kumwa ngele onde mu pula kombinga yomilalo.”—Ken gwokoKanada.

Okanona koye otashi vulika haka kala ka tila okupopya nangoye kombinga yashike?

• “Hugunina sho nda pula aavali yandje kombinga yomilalo, oya li ya yamukula ya fa taya pe ndje uusama, taya ti: ‘Omolwashike to tu pulile ngaaka? Ou na mbela sho wa ninga?’”—Masami gwokuJapani.

Ngele okamwoye take ku pula epulo kombinga yomilalo, ongiini omukalo moka to ki inyenga tagu vulu oku ka ningitha ka kale ka manguluka oku ku pula ishewe monakuyiwa nenge oku ka ningitha kaake ku pule we?

• “Otashi ka kwathela ndje ngele aavali yandje oya shilipaleke ndje kutya nayo sho ya li ye thike pungame, oya li haya pula omapulo ga fa ngoka tandi ya pula nonokutya oshi li paunshitwe okupula omapulo.”—Lisette gwokuFulaanisa.

Ongiini to vulu oku shi ninga oshipu opo okamwoye ka kale haka popi nangoye kombinga yomilalo ka manguluka?

• “Meme okwa li ha pula ndje omapulo kombinga yomilalo, ihe onewi lyombili. Ondi wete kutya shika osha simana kaavali, opo okanona kaaka kale ke uvite ka fa taka pangulwa.”—Gerald gwokuFulaanisa.

Ewi lyoye ohali kala ngiini ngele to popi nokamwoye kombinga yomilalo? Mbela owa pumbwa okuninga omalunduluko gontumba momukalo moka ho popi nako?