Aagundjuka, kaleni hamu wilikwa koohapu dhaKalunga
“Ilikolela owino, ilikolela uunongo.”—OMAYEL. 4:5.
1, 2. (a) Oshike sha li sha kwathele omuyapostoli Paulus i idhidhimikile omahalo ngoka taga kondjithathana? (b) Ongiini to vulu okwiimonena owino nuunongo?
“NANDO ndi kale nda hala okulonga uuwanawa, uuwinayi auke he longo.” Mbela owu shi kutya olye a li a popi oohapu ndhoka? Omuyapostoli Paulus oye a li e dhi popi. Nonando Paulus okwa li e hole Jehova, opwa li ethimbo sho a li e wete oshidhigu okulonga uuwanawa. Mbela okwa li u uvite ngiini sho a li e na omahalo taga kondjithathana? Okwa li a nyola a ti: “Ongame omuntu omukweyi!” (Rom. 7:21-24) Mbela owu uvite ko kutya Paulus okwa li u uvite ngiini? Mbela oho shi mono oshidhigu omathimbo gamwe okulonga uuwanawa? Mbela shoka ohashi ku ningitha wu kale wu uvite nayi ngaashi Paulus a li u uvite? Ngele osho, ino teka omukumo. Paulus okwa li u ungaunga nomupondo nomashongo ngoka ga li ge mu taalela, nangoye oto vulu oku shi ninga.
2 Paulus okwa li e shi pondola molwaashoka okwa li e etha a wilikwe ‘koohapu dhoshili.’ (2 Tim. 1:13, 14) Shoka osha li she mu kwathele i ilikolele owino nuunongo mboka a li a pumbwa opo a vule okwiidhidhimikila omashongo nokuninga omatokolo omawanawa. Jehova Kalunga ota vulu oku ku kwathela wu mone owino nuunongo. (Omayel. 4:5) Okwa gandja omayele dhingi mOohapu dhe, Ombiimbeli. (Lesha 2 Timoteus 3:16, 17.) Tala nkene to vulu okukwathelwa komakotampango ngoka taga adhika mOmanyolo uuna to ungaunga naavali yoye, to ningi omatokolo nkene wu na okulonga niimaliwa nongele wu li ongoye awike.
Kaleni hamu wilikwa kOohapu dhaKalunga muukwanegumbo
3, 4. Omolwashike tashi vulika wu mone oshidhigu okuvulika koompango dhaavali yoye, ihe mbela omolwashike haye dhi tula po?
3 Mbela oho mono oshidhigu okukala to vulika koompango dhaavali yoye? Mbela omolwashike to vulu okukala wu uvite ngaaka? Otashi vulika omolwaashoka ho kala wa hala okukala nemanguluko olindji. Iikala mbyoka oyi li paunshitwe. Oyi li oshitopolwa shokukoka sho to ningi omukuluntu. Ihe manga wu li natango megumbo, owu na oshinakugwanithwa shokuvulika kaavali yoye.—Ef. 6:1-3.
4 Okukala netaloko lyu uka shi na ko nasha noompango dhaavali yoye niitegelelwa yawo, otashi vulu shi ku ningile oshipu wu kale wu na ekwatathano nayo. Dhoshili, omathimbo gamwe otashi vulika wu kale wu uvite ngaashi Brielle gwoomvula 18a ngoka a popi kombinga yaavali ye a ti: “Oya dhimbwa thiluthilu kutya omuntu oho kala wu uvite ngiini ngele wu li pepipi ngaashi lyandje. Inaya hala ndi popye omadhiladhilo gandje nondi ninge omatokolo.” Ngaashi Brielle, otashi vulika wu uvite kutya aavali yoye oye ku indika emanguluko olindji ndyoka to dhiladhila kutya oye na oku ku pa. Ihe aavali yoye oye ku tulila po oompango, unene tuu molwaashoka oye na ko nasha nangoye. Kakele kaashono, aavali Aakriste oye shi kutya Jehova okwe ya pa oshinakugwanithwa shoku ku sila oshimpwiyu.—1 Tim. 5:8.
5. Okuvulika kaavali yoye otaku vulu oku ku kwathela ngiini?
5 Dhoshili, okuvulika kaavali owa fa to futu oondjo dhombaanga ndhoka wu na, sha hala okutya, mpoka ngaa pu thike okukala wi inekelwa mokufuta kwoye oondjo dhombaanga, opo ngaa tapu ka kala pu thike oku ku pa natango omukuli gulwe. Sha faathana, owu na oshinakugwanithwa shokusimaneka noshokuvulika kaavali yoye. (Lesha Omayeletumbulo 1:8.) Mpoka ngaa pu thike okuvulika kwoye kaavali yoye, opo ngaa tapu ka kala pu thike oku ku pa emanguluko olindji. (Luk. 16:10) Odhoshili kutya ngele owa kala aluhe ho taaguluka oompango dhawo, inashi ku kumitha ngele oye ku pe emanguluko eshona nenge ye li ku kutha thiluthilu.
6. Ongiini aavali taya vulu okukwathela aagundjuka ya kale aavuliki?
6 Omukalo gumwe aavali taya vulu okukwathela nago aagundjuka yawo ya vulike koompango ndhoka ya tula po ogwo oku ya tulila po oshiholelwa. Okuvulika kwawo nehalo ewanawa kwaashoka Jehova ta pula, oku na okuulika kutya oompango dhe odhi li pandjele. Shika otashi ke shi ninga oshipu kaagundjuka ya vulike koompango ndhoka dha tulwa po kaavali. (1 Joh. 5:3) Ihe Ombiimbeli otayi popi kutya opwa li omathimbo sho Jehova a li a pe nokuli aapiya ye ompito ya popye shoka taya dhiladhila shi na ko nasha niinima yontumba. (Gen. 18:22-32; 1 Aak. 22:19-22) Mbela otashi vulika pu na omathimbo gamwe moka aavali taya vulu okupa oyana ompito ya popye kombinga yiinima yi ili noyi ili?
7, 8. (a) Aagundjuka yamwe ohaya kala ya taalela eshongo lini? (b) Okudhimbulula shike taku vulu oku ku kwathela wu mone uuwanawa megeeloputudho?
7 Aagundjuka otaya vulu wo okutaalela eshongo lyokuungaunga nokupewa uusama kaavali yawo shoka ya tala kaashi li pauyuuki. Omathimbo gamwe otashi vulika ho kala wu uvite ngaashi omugundjuka gwedhina Craig ngoka a ti: “Meme okwa fa owala omupolisi gwomiineya, molwaashoka oha tala aluhe mpoka tandi ningi epuko.”
8 Olundji epukululo nenge egeeloputudho ohali ningwa tashi pitile mokuyelwa oombedhi. Ombiimbeli otayi popi kutya oshi li oshidhigu okutaamba ko egeeloputudho nokuli naampoka lya pumbiwa lelalela. (Heb. 12:11) Oshike tashi vulu oku ku kwathela wu mone uuwanawa megeeloputudho ndyoka to pewa? Oshinima sha simana shoka wu na okudhimbulukwa osho kutya aavali yoye ohaye ku pe omayele molwaashoka ye ku hole. (Omayel. 3:12) Oya hala oku ku kwathela wu kale kuu na iikala iiwinayi nowu kokeke mbyoka iiwanawa. Aavali yoye oye shi kutya ngele itaye ku pukulula, oya fa ye ku tonde. (Lesha Omayeletumbulo 13:24.) Owu na wo okukala wu shi kutya okuninga omapuko oku li oshitopolwa shokwiilonga sha mugo. Ano ngele wa pukululwa, tala kutya owino yini to vulu okulikola mwaashoka sha popiwa. ‘Okulikola owino okuwanawa ku vule oshisiliveli notaku etitha ontanitho yi vule ndjoka yoshingoli.’—Omayel. 3:13, 14.
9. Pehala lyokukala taya dhiladhila kutya shoka aavali yawo taya ningi kashi li pauyuuki, aagundjuka otaya vulu okuninga shike?
9 Ihe aavali nayo ohaya ningi omapuko. (Jak. 3:2) Ngele taye ku pe epukululo otashi vulika omathimbo gamwe ya popye inaaya dhiladhila nawa. (Omayel. 12:18) Oshike tashi vulu okuningitha aavali yoye ya katuke momukalo nguka? Otashi vulika ya li ya gwililwa po kuudhigu nenge ye wete kutya oho ningi omapuko molwaashoka inaaye ku putudha nawa. Pehala lyokukala to dhiladhila kutya shoka taya ningi kashi li pauyuuki, omolwashike itoo ya pandula sho ya halelela oku ku kwathela? Okutaamba ko egeeloputudho otaku ke ku kwathela nongele wa koko.
10. Ongiini to vulu okukala to idhidhimikile nomupondo oompango dhaavali yoye nosho wo omapukululo gawo?
10 Mbela owa hala okukala to idhidhimikile nomupondo oompango dhaavali yoye nosho wo omapukululo gawo? Ngele osho, owa pumbwa okuhwepopaleka omukalo gwoye gwokupopya. Ongiini mbela to vulu oku shi ninga? Shoka wu na okuninga tango osho okupulakena. Ombiimbeli otayi ti: ‘Kala ho pulakene mbala, ihe ikwata mokupopya nokukala ihoo geye mbala.’ (Jak. 1:19) Pehala lyokweendelela okwiiyukipalitha, kambadhala okupangela omaiyuvo goye e to pulakene shoka aavali yoye taye ku lombwele. Dhiladhila kwaashoka wa lombwelwa kaavali yoye, ihe hakomukalo moka ye shi popya. Opo nduno endulula shoka ya popya niitya yoye mwene, to shi ningi momukalo gwesimaneko. Mokuninga ngaaka oto ke ya shilipaleka kutya owu uva ko shoka ya popi. Ongiini ngele owa hala oku ya yelithila kutya omolwashike wa ti ngaaka nenge wa katuka momukalo ngoka? Poompito odhindji oshi li pandunge ‘okwiikwata mokupopya’ e to ningi shoka aavali yoye ya hala wu ninge. (Omayel. 10:19) Uuna aavali yoye ya mono kutya owa pulakena shoka ya popi, otaya ka kala wo ya hala okupulakena uuna to popi. Okukatuka pandunge hoka otaku ku ulika kutya oto wilikwa kOohapu dhaKalunga.
Kaleni hamu wilikwa kOohapu dhaKalunga uuna tamu ungaunga niimaliwa
11, 12. (a) Shi na ko nasha niimaliwa, Oohapu dhaKalunga otadhi tu ladhipike tu ninge shike, nomolwashike? (b) Ongiini aavali yoye taya vulu oku ku kwathela wu ungaunge nawa niimaliwa yoye?
11 Ombiimbeli otayi ti: “Iimaliwa oyo egameno.” Ihe ovelise oyo tuu ndjika otayi ulike kutya owino oyi na oshilonga yi vulithe iimaliwa. (Omuuv. 7:12) Oohapu dhaKalunga otadhi tu ladhipike tu kale tu na etaloko lyu uka li na ko nasha niimaliwa, ihe haku kala tu yi hole. Omolwashike wu na okukala wa kotokela okukokeka ohole yokuhola iimaliwa? Tala kethaneko ndika: Uuna omwele gu na oomemo gu li komuteleki a pyokoka ohagu kala gu li oshilongitho shi na oshilonga. Ihe uuna omwele ogo tuu ngoka tagu longithwa kwaangoka kee na ontseyo yoku gu longitha nenge kee na ko nasha ohagu kala gwa nika oshiponga. Ngele iimaliwa oya longithwa nuukeka, nayo otayi vulu okukala ekwatho. Ihe mboka ya “hala okuninga aayamba” olundji ohaye etha po ookuume kawo, ekwatathano nuukwanegumbo nosho wo naKalunga. Oshilanduliko, ohayi iyono po “niimpwiyu oyindji.”—Lesha 1 Timoteus 6:9, 10.
12 Ongiini to vulu okwiilonga nkene wu na okulongitha iimaliwa nuukeka? Omolwashike itoo pula aavali yoye omayele nkene wu na oku yi longitha? Salomo okwa nyola a ti: “Omayeletumbulo ngaka otaga gwedhele kontseyo yaanongo nokugandja ewiliko kaanandunge.” (Omayel. 1:5) Omukiintu omugundjuka gwedhina Anna okwa li a pula ewiliko lyopandunge kaavali ye. Okwa ti: “Tate okwa li a longo ndje nkene ndi na okukala handi ningi omutengenekwathaneko gwandje gwiimaliwa nokwa li u ulukile ndje nkene sha simana okukala ndi iyunganeka mokulongitha iimaliwa.” Yina naye okwa li e mu longo oshiilongomwa sha simana. Anna okwa ti: “Okwa li u ulukile ndje nkene sha simana okuyelekanitha oondando manga inaandi landa. Ongiini Anna a li a mono uuwanawa mwaashoka? Okwa yamukula a ti: “Ngashingeyi otandi vulu okuungaunga nawa niimaliwa yandje. Ohandi tala nawa nkene ndi na okulongitha iimaliwa yandje, onkee ano, ondi na emanguluko nombili yokomutima ndjoka hayi zi mokukala inoo ikongela oondjo inaashi pumbiwa.”
13. Ongiini to vulu okwiipangela ngele tashi ya pokulongitha oshimaliwa?
13 Otashi vulika wu ki iyadhe wu na oondjo ngele owa landa iinima mbyoka kaawa li wa dhiladhila okulanda nenge wu yi lande owala molwaashoka wa hala okwiimonikitha kookuume koye. Oshike tashi vulu oku ku kwathela wu henuke omwigo nguka? Uuna tashi ya pokulongitha iimaliwa, owu na okwiilonga okukala ho ipangele. Shika osho Ellena ngoka e na oomvula 20 nasha a li a ningi. Okwa ti: “Uuna tandi zi po nookuume kandje, ohandi kala nda dhiladhila komeho yethimbo nohandi kala nda yalula kutya otandi ka longitha ingapi. . . . Ohandi mono wo shi li pandunge oku ka landa owala nookuume kandje mboka haya uungaunga niimaliwa yawo nawa notaya ka ladhipika ndje ndi yelekanithe oondando nokwaaha landa oshinima shoka tandi mono tango.”
14. Omolwashike wu na okukala wa kotokela ‘efundjaleko lyuuyamba’?
14 Okukala ho mono oshimaliwa noku shi longitha oshi li oshinima sha simana mokukalamwenyo kwomuntu. Ihe Jesus okwa ti kutya elago lyashili ohali monika kwaamboka “yu uvite oyo oohepele koomwenyo.” (Mat. 5:3) Okwa londodha wo kutya ohokwe yomuntu yiinima yopambepo ohayi vulu okuthininikwa kiinima ngaashi ‘efundjaleko lyuuyamba.’ (Mark. 4:19) Inashi simana tuu wu ethe wu kale to wilikwa kOohapu dhaKalunga nokukala wu na etaloko li li nawa shi na ko nasha niimaliwa!
Kala ho wilikwa kOohapu dhaKalunga nongele wu li ongoye awike
15. Uunake hashi vulika uudhiginini woye kuKalunga wu makelwe unene?
15 Uunake unene tuu uudhiginini woye kuKalunga hashi vulika wu makelwe? Mbela ongele wu li nayalwe nenge ongele wu li ongoye awike? Eeno, ngele wu li kosikola nenge kiilonga oho kala wa kotokela iinima mbyoka tayi vulu okuyona po ekwatathano lyoye naKalunga. Uuna wu li pomainyanyudho nongele itoo tonatele uupambepo woye, oho ningi oshihakanwa shakehe oshinima shoka tashi vulu okuyona po uupambepo woye.
16. Omolwashike wu na okukala wa hala okuvulika kuJehova nuuna wu li ongoye awike?
16 Omolwashike wu na okukala wa hala okuvulika kuJehova nuuna nokuli wu li ongoye awike? Dhimbulukwa oshinima shika: Otashi vulika wu uvithe nayi Jehova nenge wu nyanyudhe omwenyo gwe. (Gen. 6:5, 6; Omayel. 27:11) Jehova oha gumwa kiilonga yoye molwaashoka ‘oye omusilishimpwiyu gwoye.’ (1 Pet. 5:7) Okwa hala wu pulakene kuye opo wu mone uuwanawa. (Jes. 48:17, 18) Sho yamwe yomoshigwana shaJehova shomuIsraeli shonale ya li yi ipwililikile omayele ge, oya li ye mu uvitha nayi. (Eps. 78:40, 41) Mepingathano naashono, Jehova okwa li e hole noonkondo omupolofeti Daniel, osho molwaashono omuyengeli e mu ithana “omulumentu omwaanawa.” (Dan. 10:11, KB) Omolwashike? Daniel okwa li omudhiginini kuKalunga kaashi shi owala ngele e li naantu, ihe nongele wo oye awike.—Lesha Daniel 6:10.
17. Omapulo geni to vulu okwiipula uuna to hogolola omainyanyudho?
17 Opo wu kale omudhiginini kuKalunga nuuna wu li ongoye awike, owu na okukala wi ‘ilonga nowi igilila okuyoolola shoka shu uka nenge sha puka’ mokukatuka oonkatu ndhoka wu shi kutya odhi li mondjila. (Heb. 5:14) Pashiholelwa, uuna to hogolola kutya oomusika dhini to pulakene, oomuvi ndhoka to tala nenge epandja lyo-Internet ndyoka ho yi kulyo, omapulo taga landula otage ke ku kwathela wu hogolole shoka shi li mondjila nowu henuke shoka sha puka. Ipula omapulo taga landula: “Uuyelele mbuka otawu ladhipike ndje ndi kale ndi na ohenda nenge otawu ka nwetha ndje mo ndi nyanyukilwe ‘oshiponga shamukwetu’?” (Omayel. 17:5) Mbela otawu ka kwathela ndje ndi kale ndi ‘hole uuyuuki’ nenge otawu ke shi ninga oshidhigu kungame ndi ‘tonde uuwinayi’? (Amos 5:15) Shoka ho ningi ngele wu li ongoye awike otashi ulike shoka wa simaneka.—Luk. 6:45.
18. Oshike wu na okuninga ngele owa kala ho kutha ombinga meholamo meihumbato lya puka, nomolwashike?
18 Oshike wu na okuninga ngele owa kala ho kutha ombinga meholamo meihumbato ndyoka wu shi kutya olya puka? Dhimbulukwa kutya ‘ngoka ta holeke iilonga ye iiwinayi, oye ke na elago, ihe ngoka te yi hempulula note yi etha, oye ta silwa ohenda.’ (Omayel. 28:13) Itashi ka kala tuu sha nika uusama okutsikila nokulonga iilonga ya puka ‘nokunikitha ombepo yaKalunga uuthigwa’! (Ef. 4:30) Oto ka kala lela wu na oshinakugwanithwa shokuhempulula omapuko goye kuKalunga, kaavali yoye nokungoye mwene. Shi na ko nasha naashika, “aakuluntu yegongalo” otaya vulu oku ku kwathela lela. Omulongwa Jakob okwa ti: ‘Naya galikanene omuyoni noye mu gwayeke omagadhi medhina lyOmuwa. Egalikano lyomwiitaali otali aludha omuvu. Omuwa ota galulile omuvu uundjolowele we, noondjo dhe otadhi dhimwa po.’ (Jak. 5:14, 15) Dhoshili, shika otashi vulu okusitha omuntu ohoni notashi vulika shi ete iilanduliko iiwinayi. Ihe ngele owa kala wu na omukumo okupula ekwatho, oto ki ihupitha ngoye mwene kiilanduliko kehe iiwinayi noto ka kala wu uvite wa pepelelwa sho wu na eiyuvo lya yela.—Eps. 32:1-5.
Nyanyudha omutima gwaJehova
19, 20. Jehova okwe ku halela shike, ihe owu na okuninga shike?
19 Jehova oye ‘Kalunga omunelago,’ nokwa hala wu kale wu uvite elago. (1 Tim. 1:11, OB-1954) Okwe ku hokwa. Nokuli ngele kapu na ngoka a dhimbulula oonkambadhala ndhoka ho ningi opo wu ninge shoka shi li mondjila, ye oku dhi wete. Kapu na sha shoka sha holekwa omeho ge. Oha kala noku tu tala, haku konga omapuko, ihe oku tu ambidhidha tu longe shoka oshiwanawa. “Ota tonatele uuyuni auhe, a nkondopaleke mboka ye na omitima dhe mu inekela.”—2 Ondjal. 16:9.
20 Onkee ano, pitika wu kale to wilikwa kOohapu dhaKalunga nokutula omayele gadho miilonga. Ano oto ka mona uunongo nowino mboka wa pumbiwa opo wu sinde omaupyakadhi nowu ninge omatokolo ga kwata miiti monkalamwenyo yoye. Ito ka nyanyudha owala aavali yoye naJehova, ihe oto ka nyanyukilwa wo onkalamwenyo ombwanawa.
[Enyolo lyopevi]
a Omadhina oga lundululwa.
Oto yamukula ngiini?
• Aagundjuka otaya vulu okuninga shike opo ya taambe ko oompango nomapukululo gaavali yawo, nuuwanawa wuni taya mono mo?
• Omolwashike sha simana omuntu a kale e na etaloko li li nawa kombinga yiimaliwa?
• Ongiini to vulu okukala omudhiginini kuJehova nokuli nuuna wu li ongoye awike?