Jehova oye Omuwa gwetu Omupangeliawike
“OMUWA Omupangeliawike onde mu ningi egameno lyandje.”—EPS. 73:28.
1. Sho Paulus a popi oohapu dhe ndhoka dhi li mAakorinto yotango 7:31, osha yela kutya okwa li tu ulike koshike?
OMUYAPOSTOLI PAULUS okwa ti: “Olupe lwuuyuni mbuka otalu lunduluka.” (1 Kor. 7:31, NW) Osha yela kutya okwa li ta faathanitha uuyuni nomutune hoka ku na aanyandi taya dhana oshinyandwa moka ye na oonkandangala dha yoolokathana, oombwanawa nenge oombwinayi sigo oshinyandwa tashi hulu.
2, 3. (a) Eshongo lyuunamapangelo waJehova otali vulu okuyelekwa nashike? (b) Omapulo geni taga ka konakonwa?
2 Kunena otapu dhanwa oshinyandwa sha simana noonkondo noshe ku kwatela mo. Osha kwatela mo unene okuyukipalitha uunamapangelo waJehova Kalunga. Oshinyandwa shika otashi vulu okuthanekwa nonkalo ndjoka tashi vulika yi li moshilongo shontumba. Ando moshilongo shoka omu na epangelo lya tulwa po ndoka hali kaleke po elandulathano. Ihe opu na wo ehangano lyomiineya ndyoka tali pangele nomakoto, tali longitha oonkondo noli li edhipagi. Ehangano lya tya ngaaka kaali li paveta oli li eshongo kepangelo lyoshilongo ndyoka li li paveta notali makele uudhiginini waakwashigwana ayehe kepangelo lyawo.
3 Onkalo ya faathana oyi li muuyuni auhe. Opu na epangelo li li paveta ‘lyOmuwa Omupangeliawike, Jehova.’ (Eps. 71:5, NW) Ihe ngashingeyi aantu otaya tilithwa kehangano ndyoka hali longo omuyonena tali wilikwa ‘komuhindadhi.’ (1 Joh. 5:19) Otali shongo epangelo lyaKalunga ndyoka li li pauyuuki nokumakela uudhiginini waantu ayehe kepangelo lye. Oshike she etitha onkalo ndjika? Omolwashike Kalunga e yi pitike? Oshike tatu vulu okuninga po kombinga yayo tu li oohandimwe?
Iinima mbyoka ya kwatelwa moshinyandwa
4. Oshinyandwa shoka tashi dhanwa muuyuni auhe osha kwatela mo oompata mbali dhini dha pambathana?
4 Oshinyandwa shika tashi gwanithilwa uuyuni auhe osha kwatela mo oompata mbali dha pambathana: Ompata ndjoka yi na ko nasha nuunamapangelo waJehova naandjoka yi na ko nasha nuudhiginini waantu. MOmanyolo, olundji Jehova ohi ithanwa “OMUWA Omupangeliawike.” Pashiholelwa, molwaashoka omupisalomi okwa li e mu inekela thiluthilu okwa li i imbi a ti: “OMUWA Omupangeliawike onde mu ningi egameno lyandje.” (Eps. 73:28) “Omupangeliawike” oku na oonkondo dha shiga ko mokupangela. Kalunga oha longitha oonkondopangelo dhe dha shiga ko. Opu na omatompelo omawanawa okutala ko Jehova Kalunga e li Omukombandambanda.—Dan. 7:22.
5. Omolwashike tu na okwiinyengithwa tu kale hatu ambidhidha uunamapangelo waJehova?
5 Jehova Kalunga e li Omushiti, oye Omupangeli gwevi nogweshito alihe. (Lesha Ehololo 4:11.) Jehova oku li wo Omupanguli gwetu, Omugandjimpango nOmukwaniilwa gwetu, molwaashoka oye e na uuthemba wokupangula, wokugandja oompango nowokupangela uuyuni auhe. (Jes. 33:22) Molwaashoka Kalunga oye e tu shita notwi ikolelela kuye, otu na oku mu tala ko e li Omuwa Omupangeliawike gwetu. Otashi ke tu inyengitha tu ambidhidhe ondondo ye yopombanda ngele otwa kala hatu dhimbulukwa aluhe kutya ‘OMUWA oku li koshipangelapundi she megulu ta pangele ayihe.’—Eps. 103:19; Iil. 4:24.
6. Uudhiginini oshike?
6 Opo tu ambidhidhe uunamapangelo waJehova, otu na okukakatela uudhiginini wetu kuye. Okukala ‘omudhiginini’ otashi ti okukala wa yogoka pamikalo. Omukakateli gwuudhiginini oye ngoka kee na oshipo nomuyuuki. Tatekulululwa Job osho a li ngaaka.—Job 1:1.
Nkene oshinyandwa sha li sha tameke
7, 8. Ongiini Satana a li a shongo uuthemba waJehova wokupangela?
7 Oshishitwa shopambepo osha li sha shongo uuthemba waJehova wokupangela, oomvula 6 000 lwaampono dha piti. Oohapu dhomunashipotha niilonga ye oya li tayi ulike kutya okwa kokeka ehalo lyokwiihola mwene, a hala oye a longelwe. Okwa li a heke aaihokani yotango, Adam naEva, ya kale kaaye shi we aadhiginini kuunamapangelo waKalunga nokukambadhala a nyateke edhina lye moku mu lundila kutya okwa popya iifundja. (Lesha Genesis 3:1-5.) Omunashipotha okwa ningi omutondi omunenenene, Satana (Omupataneki), Ondiaboli (Omulundili), eyoka (omukotokeli) noshikoko (omuketsuli).—Eh. 12:9.
8 Satana okwi iningi ye mwene omupangeli e li ompinge nuunamapangelo waKalunga. Mbela Jehova Omuwa Omupangeliawike okwa li ta ka ninga po shike opo a ungaunge neshongo ndyoka? Mbela okwa li ta ka hanagula po mbala aanashipotha mboka yatatu, Satana, Adam naEva? Dhoshili, okwa li e na oonkondo dhoku shi ninga, nonkatu ya tya ngawo oya li tayi ka kandula po ompata kutya olye e na oonkondo dha dhengambanda dhokupangela. Osha li wo tashi ku ulika kutya Jehova okwa popya oshili kombinga yokugeela ngoka ta yono ompango ye. Omolwashike Kalunga inaa katuka onkatu ya tya ngawo?
9. Satana okwa li a tula momalimbililo shike?
9 Mokupopya iifundja nokugamuna ko Adam naEva kuKalunga, Satana okwa li a tula momalimbililo uuthemba waJehova wokukala a tegelela aantu ya vulike Kuye. Kakele kaashono, mokuheka aaihokani yotango kaaya vulike kuKalunga, Satana okwa li wo a tula momalimbililo uudhiginini wiishitwa ayihe iinandunge. Ngaashi shu ulikwa moshinima shaJob ngoka a li omudhiginini kuunamapangelo waJehova, Satana okwa li a ti kutya ota vulu okugamuna ko aantu ayehe kuKalunga.—Job 2:1-5.
10. Kalunga okwa gandja ompito yashike sho inaa longitha mbala oonkondopangelo dhe?
10 Sho Jehova inaa hanagula po Satana mbala opo u ulike kutya oye omupangeliawike, okwa li a pe Satana ompito opo u ulike ngele shoka a popya oshoshili ngaa. Kalunga okwa pe wo aantu ompito yu ulike uudhiginini wawo kuunamapangelo we. Oshike sha li sha ningwa po mokweendela ko kwomathelemimvo? Satana okwa li a toto po ehangano lye enankondo lyokulonga omuyonena. Lwahugunina Jehova ote ke li hanagula po nosho wo Ondiaboli, te ku ulika kutya oye awike e na uuthemba wokupangela. Jehova Kalunga okwa li e na uushili kutya shoka a hunganeke konima yuunashipotha muEden, otashi ke eta oshizemo oshiwanawa.—Gen. 3:15.
11. Aantu oyendji oyu ulika shike moshinima shi na ko nasha nuuthemba waJehova wokupangela?
11 Aantu oyendji oyu ulika kutya oye na eitaalo tali longo noya kakatela uudhiginini wawo kuunamapangelo waJehova nokuyapulitha edhina lye. Yamwe yomaantu mboka oyo Abel, Henok, Noowa, Abraham, Sara, Moses, Rut, David, Jesus, aalongwa yonale yaKristus naakakateli yuudhiginini omamiliyona yokunena. Aayambidhidhi yuunamapangelo waKalunga mboka, oya li ya kutha ombinga mokuulika kutya Satana omuniifundja nomokukaleka edhina lyaJehova lya yela komalundilo ngoka Ondiaboli ye li etele mokwiitadha kutya otayi vulu okugamuna ko aantu ayehe kuKalunga.—Omayel. 27:11.
Otu shi nkene oshinyandwa tashi ka hula
12. Ongiini tatu vulu okukala nuushili kutya Kalunga ite ki idhidhimikila uukolokoshi sigo aluhe?
12 Otatu vulu okukala nuushili kutya masiku Jehova ota ka longitha uunamapangelo we, molwaashoka ite ki idhidhimikila uukolokoshi sigo aluhe notu shi shi kutya otu li momasiku gahugunina. Jehova okwa li a katukile onkatu aakolokoshi pethimbo lyEyelu. Okwa li a hanagula po Sodom naGomorra nosho wo Farao nomatangakwiita ge. Sisera netangakwiita lye naSanherib nomatangakwiita ge gaAssur kaya li ye shi pondola okukondjitha Omukombandambanda. (Gen. 7:1, 23; 19:24, 25; Eks. 14:30, 31; Aatok. 4:15, 16; 2 Aak. 19:35, 36) Onkee ano, otatu vulu okukala neinekelo kutya Jehova Kalunga ite ki idhidhimikila mboka inaaya simaneka edhina lye nohaya ningi nayi Oonzapo dhe. Kakele kaashono, otu iwetele endhindhiliko lyokukala po kwaJesus nolyehulilo lyuuyuni mbuka.—Mat. 24:3.
13. Oshike tatu vulu okuninga opo kaatu ka hanagulwe po pamwe naatondi yaJehova?
13 Opo kaatu ka hanagulwe po pamwe naatondi yaJehova, otu na okukala aadhiginini kuunamapangelo we. Ongiini tatu vulu oku shi ninga? Omokukala kaatu na ombinga mepangelo lyaSatana lyomuyonena nokwaaha etha tu tilithwe kaakalelipo ye. (Jes. 52:11; Joh. 17:16; Iil. 5:29) Ngele otwa ningi ngawo, opo owala tatu ka vula okuyambidhidha uunamapangelo waTate yetu gwomegulu notatu ka kala tu na etegameno lyoku ka hupithwa uuna ta ka yogola edhina lye komasheko nokuulika kutya oye Omupangeli gweshito alihe ngele katu li oshitopolwa shepangelo lyaSatana.
14. Oontopolwa dhi ili nodhi ili dhOmbiimbeli otadhi ulike shike?
14 Uuyelele shi na ko nasha naantu nosho wo nuunamapangelo waJehova otawu adhika mOmbiimbeli. Oontopolwa ndatu dhotango dhopetameko otadhi tu lombwele kombinga yeshito noyokuyona kwomuntu, omanga oontopolwa ndatu dhahugunina tadhi popi nkene aantu ya li ya kulilwa muulunde. Oontopolwa oonkwawo dhOmbiimbeli otadhi gandja uuyelele wu na ko nasha noonkatu ndhoka dha katukwa kOmuwa Omupangeliawike, Jehova Kalunga, opo a gwanithe po elalakano lye li na ko nasha naantu, evi nosho wo eshito alihe. Genesis otu ulike nkene Satana nuukolokoshi we ya muuyuni, noontopolwa dhahugunina dhEhololo otadhi ulike nkene uukolokoshi tawu ka hulithwa po, nkene Ondiaboli tayi ka hanagulwa po nonkene ehalo lyaKalunga tali ka gwanithwa kombanda yevi ngaashi megulu. Dhoshili, Ombiimbeli otayi ulike kutya oshike she etitha uulunde neso notayi ulike nkene tayi ka hulithwa po kombanda yevi nokupingenwa po kenyanyu itaali yelekwa nasha nosho wo omwenyo gwaaluhe kaakakateli yuudhiginini.
15. Opo tu mone uuwanawa uuna oshinyandwa shoka sha kwatela mo uunamapangelo sha hulu, oshike tu na okuninga?
15 Masiku olupe lwuuyuni mbuka otalu ka lunduluka thiluthilu. Oshinyandwa shi na ko nasha nompata yuunamapangelo shoka sha kala tashi dhanwa uule womathelemimvo otashi ka hula. Satana ite ke ethiwa we a pangele nohugunina ota ka hanagulwa po, opo nduno ehalo lyaKalunga otali ka gwanithwa. Ihe opo tu vule okumona uuwanawa mwaashika nokunyanyukilwa omayambeko ogendji ngoka gu uvanekwa kuKalunga mOohapu dhe, otu na okukatuka oonkatu ngashingeyi tu ambidhidhe uunamapangelo waJehova. Itatu vulu okukala oombinga mbali. Opo tu vule okupopya tatu ti: “OMUWA oku li pamwe nangame,” otu na okukala kombinga ye.—Eps. 118:6, 7.
Otatu vulu okukakatela uudhiginini wetu
16. Omolwashike tatu vulu okukala nuushili kutya aantu otaya vulu okukakatela uudhiginini kuKalunga?
16 Otatu vulu okudhiginina uunamapangelo waJehova nokukakatela uudhiginini wetu, molwaashoka omuyapostoli Paulus okwa nyola a ti: “Emakelo ndyoka lye mú adha, olyo tuu ndyoka hali adha aantu ayehe. Kalunga oku shi kwiinekelwa. Onkee ite mú ethele memakelo li vule oonkondo dheni. Ihe ngele ta pitika, mu makelwe, ote mú pe ompito okuza mo mulyo noonkondo dhoku li humbata.” (1 Kor. 10:13) Emakelo ndyoka lya popiwa kuPaulus ohali zi kulye, nongiini Kalunga te ke tu pa ompito yokuza mo mulyo?
17-19. (a) Aaisraeli sho ya li mombuga oya li yi igandja kemakelo lini? (b) Omolwashike tashi vulika tu kakatele uudhiginini wetu kuJehova?
17 Ngaashi sha li sha ningilwa Aaisraeli mombuga, natse otatu vulu okuya moonkalo ndhoka tadhi vulu oku tu ‘makela’ tu yone ompango yaKalunga. (Lesha 1 Aakorinto 10:6-10.) Aaisraeli oya li taya vulu okukondjitha emakelo, ihe oya li ya hala okulonga “iilonga iiwinayi” sho Jehova a kala te ya pe pashikumathalonga iimote uule womwedhi. Nokuli nonando aantu oya li ya kala kaaye na onyama uule wethimbo, Jehova okwa li e ya pe omana ga gwana opo ya lye. Ihe nando ongawo, Aaisraeli oya li ya makelwa e taya kwatwa kolwiho olunene sho ya li taya gongele iimote.—Num. 11:19, 20, 31-35.
18 Manga shoka sha li inaashi ningwa, sho Moses a li a ka pewa Iipango kOndundu yaSinai, Aaisraeli oya li ya tameke okulongela iikalunga mokugalikana ontana nomokukutha ombinga momainyanyudho gopamilalo inaaga yogoka. Aaisraeli oya li yi igandja kemakelo molwaashoka pethimbo mpoka kaya li ye wete omuwiliki gwawo gwopantu. (Eks. 32:1, 6) Manga owala inaaya ya mEvi lyEuvaneko, Aaisraeli omayovi oya li ya hongololwa kaakiintu yAamoab mboka ya li ya yi nayo moluhondelo. Pompito ndjoka, Aaisraeli omayovi oya li ya si omolwuulunde wawo. (Num. 25:1, 9) Omathimbo gamwe, oshigwana shaIsraeli osha li sha makelwa e tashi tameke okunyenyeta omolwuunashipotha, nopompito yimwe osha li sha popile Moses naKalunga muuwinayi. (Num. 21:5) Oshigwana shaIsraeli osha li sha nyenyeta konima sho aakolokoshi Kora, Datan, Abiram nooyakwawo ya hanagulwa po naasho ya tompathana papuko kutya aanashipotha mbaka oya li ya dhipagwa shaahe li pauyuuki. Oshilanduliko, Aaisraeli ye li 14 700 oya li ya dhipagwa komulilo gwa zi kuKalunga.—Num. 16:41, 49.
19 Omamakelo agehe ngoka ga tumbulwa mpaka kapwa li nando olimwe ndyoka Aaisraeli ya li itaaya vulu okukondjitha. Aaisraeli oya li yi igandja kemakelo molwaashoka eitaalo lyawo olya li lya nkundipala noya li ya dhimbwa Jehova, esiloshimpwiyu lye lyopahole nosho wo oondjila dhe dhi li pauyuuki. Ngaashi moshinima shAaisraeli, omamakelo ngoka hatu tsakaneke ohaga adha aantu ayehe. Ngele otwa ningi oonkambadhala twa mana mo tu ga kondjithe nokukala twi inekela muKalunga e tu hupithe, otatu ka vula okukakatela uudhiginini wetu. Otatu vulu okukala tu na einekelo mwaashika molwaashoka “Kalunga oku shi kwiinekelwa” noihe etha tu makelwe ‘nemakelo li vule oonkondo dhetu.’ Jehova ke na nando esiku e tu ethe tu ye monkalo ndjoka tayi ke tu imba tu longe ehalo lye.—Eps. 94:14.
20, 21. Uuna tatu makelwa, ongiini Kalunga ha gandja “ompito yokuza mo mulyo”?
20 Jehova ohe tu pe “ompito yokuza mo” moku tu pa oonkondo tu vule okukondjitha omamakelo. Pashiholelwa, aahepeki otashi vulika ye tu hepeke palutu nelalakano lyoku tu ethitha po eitaalo lyetu. Ngele tatu ningwa nayi momukalo gwa tya ngawo otashi vulu oku tu makela tu igandje nelalakano lyokuhenuka okudhengwa okuhepekwa nenge eso nokuli. Ihe shi ikolelela keshilipaleko lya nwethwa mo ndyoka lya nyolwa kuPaulus mAakorinto yotango 10:13, otu shi shi kutya emakelo kehe tali tu adha olyopokathimbo owala. Jehova ita ka pitika tu makelwe sigo oponkatu mpoka itaatu vulu okukala aadhiginini kuye. Kalunga ota vulu okukoleka eitaalo lyetu noku tu pa oonkondo dhopambepo ndhoka twa pumbwa opo tu vule okukakatela uudhiginini wetu.
21 Jehova ohe tu koleke nombepo ye ondjapuki. Ombepo ndjoka ohayi tu dhimbulukitha wo omanyolo ngoka twa pumbwa opo tu kondjithe emakelo. (Joh. 14:26) Kungawo, itatu ka hongololwa tu landule ondjila ya puka. Pashiholelwa, otu uvite ko oompata dha pambathana dhi na ko nasha nuunamapangelo waJehova nosho wo nuudhiginini waantu. Molwaashoka oye na ontseyo ndjoka, oyendji oya pewa oonkondo kuKalunga opo ya vule okukakatela uudhiginini wawo sigo eso. Ihe eso halyo lya li lye ya pe ompito yokupita momakelo, ihe ekwatho lyaJehova olyo lye shi ningi tashi wapa opo yi idhidhimike sigo okehulilo nopwaahe na okwiigandja komamakelo. Jehova ota vulu oku shi tu ningila wo. Dhoshili, oha longitha wo aayengeli ye aadhiginini oku tu ambidhidha ye li aapiya yomontaneho ya “tumwa kuye okukwatha aantu mboka taa ka hupithwa.” (Heb. 1:14) Ngaashi oshitopolwa tashi landula tashi ulike, aakakateli yuudhiginini owala taya vulu okukala ye na etegameno lyuuthembahenda wunyanyudha wokwaambidhidha uunamapangelo waKalunga sigo aluhe. Natse otatu vulu okukala mokati kawo ngele otwa kakatele kuJehova e li Omuwa Omupangeliawike gwetu.
Oto yamukula ngiini?
• Omolwashike tu na okukala twa tala ko Jehova e li Omuwa Omupangeliawike?
• Otashi ti shike okukakatela uudhiginini wetu kuKalunga?
• Otu shi shi ngiini kutya masiku Jehova ota ka longitha oonkondopangelo dhe?
• Shi ikolelela kAakorinto yotango 10:13, omolwashike tashi wapa okukakatela uudhiginini?