Ounamapangelo waJehova nosho yo Ouhamba waye

“Omwene, ounene owoye, neenghonopangelo odoye, noshinge oshoye, nouyelele owoye, nepangelofimano oloye. . . . Oshilongo oshoye Omwene.” — 1 OMAFIMBO 29:11.

1. Omolwashike Jehova oye a wana okukala Omupangeli weshito alishe?

OMUPSALME umwe okwa li a popya oushili u na sha nounamapangelo waJehova a ti: “Omwene meulu okwe liningila mo olukalwa laye, nouhamba waye otau pangele akushe.” (Epsalme 103:19) Jehova Kalunga, e li Omushiti, oye a wana okukala Omupangeli weshito alishe.

2. Daniel okwa hokolola ngahelipi onghedi yaJehova yokupangela oishitwa yaye yopamhepo?

² Opo omupangeli a dule okupangela, ope na okukala pe na ovapangelwa. Jehova okwa kala alushe ta pangele oishitwa yaye yomeulu. Tete okwa kala ta pangele Omona waye ewifa nosho yo ovaengeli eshi va ka shitwa. (Ovakolossi 1:15-17) Omuprofeti Daniel okwa li a pewa emoniko omo a mona Jehova e li kolukalwapangelo. Okwa ti: “Ndele fimbo handi shi tale, okwa dikwa omalukalwapangelo, ndele Omuxungu ta kala omutumba. . . . Eyovi lwomayovi ove mu longela, nomayovi omulongo lwomayovi omulongo ova kala ofika koshipala shaye.” (Daniel 7:9, 10) Oule womido dihapuhapu, Jehova, oo a popiwa e li “Omuxungu,” okwa kala ta pangele ovana vaye vopamhepo vahapu nova unganekwa nawa, ovo ve li “ovapiya” vaye notava longo ehalo laye. — Epsalme 103:20, 21.

3. Osha enda ngahelipi opo Jehova a kale ta pangele eshito alishe?

³ Jehova okwa kala yo ta pangele eshito linene nola kitakana olo a shita, mwa kwatelwa edu. (Job 38:4, 7) Ngeenge ovanhu tava tale komaminikilo okeulu oo haa longo nawa palandulafano, ohaa monika a fa taa longo nopehe na omuwiliki. Ndele Omupsalme umwe okwa ti: “[Jehova] okwa tonga, opo yo oya holoka po; ndele Ye okwe i tula po, i kalelele po fiyo alushe, ndee te i pe oshipango ihashi taulukwa.” (Epsalme 148:5, 6) Jehova okwa kala ta pangele oishitwa yaye yopamhepo meulu nokuwilika omaminikilo nosho yo oinima ikwao oyo i li mewangadjo. — Nehemia 9:6.

4. Jehova oha pangele ovanhu ngahelipi?

⁴ Kalunga okwa li yo a ulika ounamapangelo waye monghedi i lili eshi a shita ovalihomboli votete. Kakele koku va pa keshe osho va li va pumbwa opo va kale nonghalamwenyo i na eityo noihafifa, Jehova okwa li yo e va pa oufemba wokupangela oinamwenyo. (Genesis 1:26-28; 2:8, 9) Osho otashi ulike kutya Kalunga ke fi ashike omupangeli omunahole nomunanghenda, ndele oha fimaneke yo ovapangelwa vaye. Adam naEva okwa li tava dulu okukala nomwenyo fiyo alushe moparadisa kombada yedu, ngeno ova dulikile kounamapangelo waJehova. — Genesis 2:15-17.

5. Jehova oha pangele monghedi ya tya ngahelipi?

⁵ Mbela oshike hatu lihongo monghedi yaJehova yokupangela? Shotete, Jehova okwa kala alushe ta pangele eshito laye alishe. Oshitivali, Jehova omupangeli omunahole noha fimaneke ovapangelwa vaye. Oshititatu, okudulika nokuyambidida ounamapangelo waye otaku tu etele omanangeko noupuna taa kalelele. Onghee hano, itashi kumwifa eshi ohamba David yaIsrael shonale kwa li ye linyengifwa i tye: “Omwene, ounene owoye, neenghonopangelo odoye, noshinge oshoye, nouyelele owoye, nepangelofimano oloye, heeno, aishe yomeulu noyokombada yedu oyoye. Oshilongo oshoye Omwene, ndele Oove Omupangeli waaishe!” — 1 Omafimbo 29:11.

Omolwashike twa pumbwa Ouhamba waKalunga?

6. Eenghonopangelo nosho yo Ouhamba waKalunga oya pambafana ngahelipi?

⁶ Molwaashi Jehova, Omupangeli weshito alishe, okwa kala alushe ta pangele, omolwashike twa pumbwa Ouhamba waye? Omupangeli luhapu oha pangele ovapangelwa vaye ta longifa oupitilo wonhumba. Onghee hano, Kalunga ota longifa Ouhamba waye u li oupitilo wokupangela oishitwa yaye aishe.

7. Omolwashike Jehova a li a tota po onghedi ipe yokupangela?

⁷ Jehova okwa kala ta pangele meenghedi di lili noku lili pomafimbo a yooloka. Okwa li a tota po onghedi ipe yokupangela molwaashi opa li pa holoka onghalo ipe. Osho osha li sha ningwa eshi omonamati waKalunga umwe omunashibofa a li a pondola mokunwefa mo Adam naEva va tukulile ounamapangelo waJehova oshibofa. Ounashibofa oo owa li wa shonga ounamapangelo waKalunga. Ngahelipi mbela? Satana okwa li a lombwela Eva kutya ‘ita ka fya shili’ ngeenge okwa li oshiimati osho sha li sha dilikwa kuJehova. Kungaho, Satana okwa li ta ti lelalela kutya Jehova okwa popya oipupulu nonokutya ke shii okulineekelwa. Satana okwa li yo a lombwela Eva a ti: “Kalunga oku shi shii nokutya, ngenge tamu li [kuo], omesho eni taa pashuka, opo mu shiive ngaashi Kalunga ouwa nowii.” Satana okwa li ta ti kutya Adam naEva otave ke shi endifa nawa ngeenge ova nyono oipango yaKalunga nokukala va manguluka ko kuYe. (Genesis 3:1-6) Osho osha li sha shonga oufemba waKalunga wokupangela. Jehova okwa li ta ka ninga po shike mbela?

8, 9. (a) Omupangeli ota ka ninga po shike ngeenge pe na omunhu wonhumba a tukula oshibofa mepangelo laye? (b) Jehova okwa li a ninga po shike eshi Satana, Adam naEva va li ve mu tukulila oshibofa muEden?

⁸ Mbela omupangeli ota ka ninga po shike ngeenge pe na omunhu wonhumba a tukula oshibofa mepangelo laye? Ovo ve shii nawa ondjokonona otava dulu okudimbulukwa osho hashi ningwa po. Ponhele yokulipwililikila ounashibofa oo, omupangeli, nokuli naao e li omunahole ota ka katukila ovanashibofa onghatu, te ke va pa ehandukilo omolwoukengeleledi. Omupangeli oo otashi dulika a tume ondjai i ka lwife ovanashibofa ovo noi etife po ombili. Sha faafana, Jehova naye okwa li a ulika kutya oye omupangeli eshi a li a katuka diva onghatu a tokole ovo va li ve mu tukululila oshibofa. Okwa li a popya kutya Adam naEva kava li va wana okukala nomwenyo waalushe, nokwa li e va ta mo moshikunino shaEden. — Genesis 3:16-19, 22-24.

⁹ Eshi Jehova a li a tokola Satana, okwa li a holola onghedi ipe yokupangela, oyo okupitila muyo a li ta ka etifa po ombili nelandulafano mepangelo laye. Jehova okwa li a lombwela Satana a ti: “Ame ohandi ka tula outondanhu pokati koye nomwalikadi . . . nokoludalo loye nokoludalo laye. Ye ota ka nyanyaula omutwe woye ndele ove to ke mu twa moshififinwa.” (Genesis 3:15) Kungaho, Jehova okwa li a ulika kutya okwa lalakanena okupa ‘oludalo’ eenghono li hanaune po Satana novakalelipo vaye opo a ulike kutya onghedi yaye yokupangela oya yuka. — Epsalme 2:7-9; 110:1, 2.

10. (a) ‘Oludalo’ olo la udanekwa ola li lyelye? (b) Paulus okwa li a popya shike shi na sha newanifo lexunganeko lotete?

¹⁰ Jesus Kristus oye a li oshitukulwa ‘sholudalo’ olo la udanekwa nosho yo ovo tava ka pangela pamwe naye. Ove li yo oshitukulwa shOuhamba waKalunga wopaMessias. (Daniel 7:13, 14, 27; Mateus 19:28; Lukas 12:32; 22:28-30) Ndelenee oinima aishe oyo oya enda tai hololwa kanini nakanini. Ewanifo lexunganeko lotete ola kala ‘oshiholekwa [shiyapuki, NW] eshi sha hololwa, osho sha li inashi hololwa momafimbo onale.’ (Ovaroma 16:25) Oule womafelemido, ovapiya vaJehova vonale ova li va teelela nodjuulufi ‘oshiholekwa shiyapuki’ shi hololwe nexunganeko lotete li wanifwe opo ounamapangelo waJehova u yukipalifwe. — Ovaroma 8:19-21.

“Oshiholekwa shiyapuki” osha enda tashi hololwa kanini nakanini

11. Jehova okwa li a hololela Abraham shike?

¹¹ Mokweendela ko kwefimbo, Jehova okwa enda ta holola kanini nakanini oinima i na sha ‘noshiholekwa shiyapuki shouhamba waye.’ (Markus 4:11, yelekanifa NW.) Umwe womwaavo Jehova a li a hololela oshiholekwa osho okwa li Abraham, oo a li “kaume kaKalunga.” (Jakob 2:23) Jehova okwa li a udanekela Abraham kutya ote ke mu ‘ninga oshiwana shinene.’ Konima yefimbo, okwa li a lombwela Abraham kutya ‘eehamba otadi ka holoka muye,’ ‘noiwana aishe kombada yedu otai ka nangekwa noupuna okupitila moludalo laye.’ — Genesis 12:2, 3; 17:6; 22:17, 18.

12. Oludalo laSatana ole ke limonikila mo ngahelipi konima yEyelu?

¹² Okudja pefimbo laAbraham, ovanhu ova kala tava pangele vakwao nonyanya. Pashihopaenenwa, Ombibeli oya popya shi na sha naNimrod omutekulululwa waNoa, ya ti: “Ye okwa li omunaenghono nomunamapangelo wotete kombada yedu. Ye okwa li omukongo omunaenghono koshipala [shOmwene].” (Genesis 10:8, 9) Osha yela kutya Nimrod nosho yo vakwao ovo va li ve lininga vovene ovapangeli ova li va nwefwa mo kuSatana. Ovapangeli va tya ngaho nosho yo ovayambididi vavo ova li va ninga oshitukulwa sholudalo laSatana. — 1 Johannes 5:19.

13. Jehova okwa li a xunganeka shike okupitila muJakob?

¹³ Nonande Satana okwa kala ta kendabala okweeta po ovapangeli vopanhu, Jehova ota twikile natango okuwanifa po elalakano laye. Okwa li a xunganeka okupitila momutekulu waAbraham, Jakob a ti: “Epangelodibo itali ka kufwa muJuda nodibo youhamba itai di po peemhadi daye fiyo [Silo, NW] ou e nokuuya te uya. Noiwana tai ka dulika kuye.” (Genesis 49:10) Oshitya “Silo” otashi ti “Oo shi li shaye.” Kungaho, eendjovo odo dopaxunganeko okwa li tadi ulike kutya ota pe ke uya oo a wana okupewa “epangelodibo” nosho yo ‘odibo youhamba,’ sha hala okutya, epangelo, opo a pangele ‘oiwana’ ile ovanhu aveshe. Mbela oo a wana okwa li ta ka kala lyelye?

“Fiyo Silo te uya”

14. Jehova okwa li a ninga ehangano lilipi naDavid?

¹⁴ Omufita woimuna David, omona waIsai,a oye a li a hoololwa tete kuJehova mepata laJuda a ninge ohamba yoshiwana shaye. (1 Samuel 16:1-13) Nonande David okwa li ha ningi omapuko mahapu, Jehova okwa li e mu hokwa molwaashi okwa li omudiinini kounamapangelo waye. Jehova okwa li a yandja ouyelele wa wedwa po u na sha nexunganeko olo a li a xunganeka muEden eshi a ninga ehangano naDavid a ti: “Ame ohadi ka lenga oludalo loye tali di molutu loye ndee handi ka pameka ouhamba walo.” Eendjovo odo ka da li ashike da kwatela mo Salomo omonamati waDavid oo a li e mu pingena po, molwaashi Jehova okwa popya a ti: “Ame ohandi ka pameka olukalwapangelo laye louhamba fiyo alushe.” Ehangano olo Jehova a li a ninga naDavid ola li la ulika kutya “oludalo” lOuhamba olo la udanekwa otali ka dja mepata laDavid. — 2 Samuel 7:12, 13.

15. Omolwashike taku dulu okutiwa kutya ouhamba waJuda owa li u lile po Ouhamba waKalunga?

¹⁵ David oye a li a hoololwa tete mepata leehamba, odo da li hadi vaekwa nomaadi mayapuki komupristeri omukulunhu. Kungaho, eehamba odo okwa li hadi ifanwa ovavaekwa ile oomessias. (1 Samuel 16:13; 2 Samuel 2:4; 5:3; 1 Eehamba 1:39) Okwa li hadi kala omutumba kolukalwapangelo laJehova, tadi pangele okudja muJerusalem. (2 Omafimbo 9:8) Kungaho, ouhamba waJuda owa li u lile po Ouhamba waKalunga, naasho osha li onghedi omo Jehova a li ha pangele.

16. Oshike sha li oshidjemo shokupangela kweehamba daJuda?

¹⁶ Ngeenge ohamba nosho yo oshiwana va li va dulika kounamapangelo waJehova, okwa li he va amene noku va nangeka noupuna. Pefimbo lokupangela kwaSalomo opa li ombili nehepuluko linene, naasho osha li sha ulika kanini nghee Ouhamba waKalunga tau ka kala ngeenge Satana a hanaunwa po filufilu ndele ounamapangelo waJehova tau yukipalifwa. (1 Eehamba 4:20, 25) Shi nyikifa oluhodi, eehamba dihapu domepata laDavid ka da li da dulika koiteelelwa yaJehova, novanhu ova li hava haele nokulongela oikalunga. Hauxuninwa, Jehova okwa li a efa ouhamba oo u hanaunwe po kOvababilon mo 607 K.O.P. Osho osha li sha ningifa Satana a kale e wete a finda epangelo laJehova.

17. Oshike tashi ulike kutya Jehova oye omupangeli nonande ouhamba weehamba domepata laDavid owa li wa teka po?

¹⁷ Okuteka po kwouhamba weehamba domepata laDavid nosho yo kwouhamba waIsrael wokolundume ka sha li euliko kutya Jehova ka li omupangeli muwa, ndele okwa li kwa etifwa kenwefemo lii laSatana nosho yo kokumanguluka ko kwovanhu kuKalunga. (Omayeletumbulo 16:25; Jeremia 10:23) Opo Jehova a ulike kutya oye omupangeli, okwa li a popya okupitila momuprofeti Hesekiel a ti: “Embale loulenga nali dje ko! Oshikoroni nashi dje ko! . . . Oikulukuma, oikulukuma, oikulukuma, ame ohandi shi teya. Ndele itashi ka kala po fiyo OU te uya, a wana ndee Ame ohandi ke shi mu pa.” (Hesekiel 21:26, 27) Eendjovo odo otadi ulike kutya ‘oludalo’ olo la udanekwa, sha hala okutya, Oo “a wana” kali e uya natango.

18. Omweengeli Gabriel okwa li a lombwela Maria shike?

¹⁸ Eshi pa pita omido omafele ahamano lwaapo, okudja eshi ouhamba weehamba domepata laDavid wa teka po, omweengeli Gabriel okwa li a tumwa kokakadona Maria, oko ka li ha ka kala muNasaret, oshilando osho sha li muGalilea kolundume laPalestina. Okwa li a popya a ti: “Tala, ove to ningi omufimba ndee to dala okamati, ndee to ka [luku] edina lako Jesus. Ye ota ningi omunene, ndele Ye e nokwiifanwa Omona [waau] wOkombadambada. Kalunga Omwene ote mu pe olukalwa louhamba waxe David; ndele Ye ota ningi ohamba yeumbo laJakob fiyo alushe, nouhamba waye kau na apa tau xulu po.” — Lukas 1:31-33.

19. Efimbo loiningwanima itunhula lilipi la li la ehena popepi?

¹⁹ Efimbo lokuholola “oshiholekwa shiyapuki” ola li lili popepi. Oshitukulwa sha fimanenena ‘sholudalo’ olo la li la udanekwa okwa li tashi ke uya. (Ovagalati 4:4; 1 Timoteus 3:16) Oludalo olo okwa li tali ka tuwa moshififinwa kuSatana. Ndele ‘oludalo’ olo otali ka nyanyaula omutwe waSatana, sha hala okutya, otali ka hanauna po Satana nosho yo ovayambididi vaye. Oludalo olo okwa li tali ka yandja oundombwedi kutya Ouhamba waKalunga otau ka kufa po oilanduliko oyo ya etifwa kuSatana, nokungaho, ounamapangelo waJehova otau ka yukipalifwa. (Ovaheberi 2:14; 1 Johannes 3:8) Ongahelipi Jesus a li ta ka wanifa po oinima aishe oyo? Okwe tu tulila po oshihopaenenwa shilipi? Ohatu ka mona omanyamukulo omapulo oo moshitukulwa tashi landula.

[Eshangelo lopedu]

Oto dulu okuyelifa?

• Omolwashike Jehova oye a wana okukala Omupangeli weshito alishe?

• Omolwashike Jehova a li a tota po Ouhamba?

• Ongahelipi Jehova a enda ta holola kanini nakanini “oshiholekwa shiyapuki”?

• Oshike tashi ulike kutya Jehova oye omupangeli nonande ouhamba weehamba domepata laDavid owa teka po?

[Efano pepandja 5]

Jehova okwa li a udaneka shike okupitila muAbraham?

[Efano pepandja 7]

Omolwashike okuteka po kwouhamba weehamba domepata laDavid kuhe fi euliko kutya Jehova omupangeli mwii?