Oho yambidida ngoo ounamapangelo waJehova?

“Udifeni mokati kovapaani mu tye: Paife Omwene Oye ohamba.” — EPSALME 96:10.

1, 2. (a) Oshiningwanima shididilikwedi shilipi sha li sha ningwa muOktoba momudo 29 O.P. lwaapo? (b) Oshiningwanima osho osha li sha kuma ngahelipi Jesus?

MUOKTOBA momudo 29 O.P. lwaapo, opa li pa ningwa oshiningwanima shididilikwedi osho sha li inashi ningwa nande onale kombada yedu. Omushangi wEvangeli Mateus okwa popya shi na sha noshiningwanima osho a ti: ‘Jesus eshi a [ninginifwa, NW] okwa dja momeva diva, ndele tala, eulu la yeuluka, ndele [Johannes Omuninginifi okwa li] e wete omhepo yaKalunga ya fa onghuti ya kuluka ndee tai uya kombada [yaJesus]. Ndele tala, ondaka ya dja meulu ndee tai ti: Ou Omona wange omuholike, onde mu hokwa.’ Oshiningwanima osho, osho shimwe shomoiningwanima oyo ya shangwa kovashangi vane vOmavangeli. — Mateus 3:16, 17; Markus 1:9-11; Lukas 3:21, 22; Johannes 1:32-34.

² Eshi Jesus a li a tililwa omhepo iyapuki moipafi yaJohannes Omuninginifi, osha li sha ulika kutya Jesus oye Omuvaekwa, osho tashi ti Messias ile Kristus. (Johannes 1:33) Xuuninwa, ‘oludalo’ olo la li la udanekwa ola li le uya. Johannes Omuninginifi okwa li a holokelwa kuJesus oo a li ta ka tuwa moshififinwa kuSatana, ndele Jesus ota ka nyanyaula omutwe waSatana oo e li omutondi munenenene waJehova nounamapangelo waye. (Genesis 3:15) Okudja eshi Jesus a tililwa omhepo iyapuki, okwa li e shii filufilu kutya oku na okukendabala okuwanifa po elalakano laJehova li na sha nounamapangelo waye nosho yo Ouhamba waye.

3. Jesus okwa li e lilongekidila ngahelipi onghandangala oyo a li ta ka dana mokuyambidida ounamapangelo waJehova?

³ Opo Jesus e lilongekidile oshilonga shaye osho shipe, “okwa dja kuJordan a yada Omhepo Iyapuki ndele okwa twalwa kOmhepo mombuwa.” (Lukas 4:1; Markus 1:12) Eshi a kala mombuwa oule womafiku 40, okwa kala ta dilonga moule shi na sha nomhata i na sha nounamapangelo waJehova oyo ya etifwa po kuSatana nosho yo shi na sha nonghatu oyo a li e na okukatuka opo a yambidide ounamapangelo waJehova. Omhata oyo oya kwatela mo oishitwa aishe inaendunge, meulu nosho yo kombada yedu. Onghee hano, natu ka konakoneni oshihopaenenwa shaJesus shoudiinini nokumona kutya otu na okuninga po shike opo tu ulike kutya otwa hala okuyambidida ounamapangelo waJehova. — Job 1:6-12; 2:2-6.

Satana okwa shonga ounamapangelo waJehova monghedi ya yukilila

4. Satana okwa li a shonga ngahelipi ounamapangelo waJehova monghedi ya yukilila?

⁴ Satana okwa li a mona oiningwanima i na sha naJesus oyo ya tumbulwa moutendo va tetekela. Nopehe na okwoongaonga, okwa li a ponokela oshitukulwa sha fimanenena ‘sholudalo’ ‘lomwalikadi’ waKalunga. (Genesis 3:15) Satana okwa li a yeleka Jesus lwoikando itatu, a ti kutya Jesus oku na okuninga osho a hala ponhele yokulonga ehalo laXe. Satana okwa li a shonga ounamapangelo waJehova monghedi ya yukilila eshi a li a yeleka Jesus oshikando oshititatu. Okwa li a ulikila Jesus “omauhamba aeshe omounyuni nefimano lao,” nokwa li a lombwela Jesus sha yukilila a ti: “Aishe ei ohandi i ku pe, ngenge to twile nge eengolo ndee to linyongamene nge.” Molwaashi Jesus okwa li e shii kutya “omauhamba aeshe omounyuni” oaSatana, okwa li a ulika kutya ota yambidida ounamapangelo waJehova eshi a ti: “Dja po, Satana, osheshi opa shangwa: Omwene Kalunga koye u noku mu twila eengolo, noye aeke u noku mu kalela.” — Mateus 4:8-10.

5. Jesus okwa li e na okuwanifa po oshilonga shidjuu shilipi?

⁵ Jesus okwa li a ulika filufilu okupitila monghedi yaye yokukalamwenyo kutya omudiinini kounamapangelo waJehova. Jesus okwa li e shii nawa kutya oku na okukanyatela oudiinini waye fiyo Satana te ke mu dipaifa. Osha li sha xunganekwa kutya ‘oludalo’ lomwalikadi otali ka tuwa moshififinwa, opo li ulike kutya Kalunga oye a wana okukala omupangeli. (Mateus 16:21; 17:12) Okwa li yo a yandja oundombwedi kutya Kalunga ota ka longifa Ouhamba waye u hanaune po Satana omunashibofa opo a etele oishitwa aishe ombili nelandulafano. (Mateus 6:9, 10) Mbela Jesus okwa li a ninga po shike opo a wanife po oshilonga osho shidjuu?

‘Ouhamba waKalunga owa ehena popepi’

6. Jesus okwa li a ulika ngahelipi kutya Kalunga ota ka longifa Ouhamba waye opo a “hanaune po oilonga yaSatana”?

⁶ Tete, “Jesus okwa ya kuGalilea, ndele okwa udifa evangeli laKalunga, ndee ta ti: Efimbo ola fika, ouhamba waKalunga wa ehena popepi.” (Markus 1:14, 15) Okwa ti: ‘Ondi na okuudifa evangeli louhamba waKalunga, osheshi olo tuu eli nde li tuminwa.’ (Lukas 4:18-21, 43) Jesus okwa li ha endaenda noilando, ta “udifa evangeli louhamba waKalunga.” (Lukas 8:1) Jesus okwa li yo a longa oilonganghono ihapu, a palula eengudu dovanhu, a lotifa oikungulu, a velula ovanaudu nokwa nyumuna ovafi. Mokulonga oikumwifilonga oyo, Jesus okwa li a ulika kutya Kalunga ota dulu okuxulifa po oilanduliko nokumona oixuna oko kwa etifwa kounashibofa oo wa li wa tukulwa moshikunino shaEden, nokungaho ota ka ‘hanauna po oilonga yaSatana.’ — 1 Johannes 3:8.

7. Jesus okwa li a lombwela ovashikuli vaye va ka ninge shike, noshidjemo osha li shike?

⁷ Opo onghundana iwa yOuhamba i udifwe pauyadi, Jesus okwa li a ongela ovashikuli ovadiinini noku va deula. Tete, okwa li a pa ovayapostoli vaye 12 oshilonga nokwe ‘va tuma va ka udife ouhamba waKalunga.’ (Lukas 9:1, 2) Opo nee okwa li vali a tuma ovahongwa vaye 70 va ka udife tava ti: “Ouhamba waKalunga wa ehena popepi nanye.” (Lukas 10:1, 8, 9) Eshi ovahongwa ovo 70 va aluka nova hokololela Jesus nghee va li ve shi endifa nawa moilonga yokuudifa Ouhamba, Jesus okwa li e va lombwela a ti: “Onda mona Satana a wa meulu ngaashi oluvadi.” — Lukas 10:17, 18.

8. Jesus okwa li a ulika shike okupitila monghedi yaye yokukalamwenyo?

⁸ Jesus okwa li a longa noudiinini nokwa li a longifa omhito keshe opo a yandje oundombwedi u na sha nOuhamba. Okwa li ha longo efiku keshe nopehe na olufuwo noka li a lalakanena okukala nonghalamwenyo youdjeko. Okwa ti: “Eembadje odi na omakwena, needila dokeulu odi na oihadi, ndelenee Omona wOmunhu ke na apa ta wilike omutwe waye.” (Lukas 9:58; Markus 6:31; Johannes 4:31-34) Okafimbo kanini fimbo ina fya, okwa li a popya nouladi koshipala shaPontius Pilatus a ti: “Onghee nda dalwa nde uya mounyuni ou, ndi [hepaulule] oshili.” (Johannes 18:37) Jesus okwa li a ulika okupitila monghedi yaye yokukalamwenyo kutya kali ashike omuhongi munene ile omulongi woikumwifilonga ile Omuxupifi omuliyambi. Ndele okwa li yo e uya okulonga ehalo laJehova nokuyandja oundombwedi kutya Jehova ota dulu okuwanifa po ehalo laye okupitila mOuhamba. — Johannes 14:6.

“Sha longwa sha pwa”

9. Satana okwa li a pondola ngahelipi okutwa ‘oludalo’ lomwalikadi waKalunga moshififinwa?

⁹ Omutondi Satana Ondiaboli, ka li a hafela oilonga oyo ya li ya longwa kuJesus omolwOuhamba. Okwa li a kendabala lwoikando okudipaa ‘oludalo’ lomwalikadi waKalunga, okupitila ‘moludalo’ laye, sha hala okutya, movanapolotika nosho yo momalongelokalunga. Jesus okwa kala oshishonekwa shaSatana nosho yo ovayambididi vaye okudja pokudalwa kwaye fiyo opexulilo longhalamwenyo yaye kombada yedu. Xuuninwa, mo 33 O.P., Omona womunhu okwa li a yandjwa momake Omutondi oo a li te ke mu twa moshififinwa. (Mateus 20:18, 19; Lukas 18:31-33) Omavangeli okwa ulika sha yela nghee Judas Iskariot, ovapristeri ovakulunhu, ovanongo vomishangwa, Ovafarisai nosho yo Ovaroma va li va longifwa kuSatana va tokole Jesus noku mu dipaifa efyo tali udifa omunhu omwenyo munyenye komuti womahepeko. — Oilonga 2:22, 23.

10. Jesus okwa li a wanifa po oshinima sha fimanenena shilipi eshi a fila komuti womahepeko?

¹⁰ Oshike hashi uya momadiladilo oye ngeenge to diladila shi na sha naJesus e li komuti womahepeko ta fi efyo tali udifa omunhu omwenyo munyenye? Otashi dulika ho dimbuluka ekuliloyambo olo Jesus a li a yandja nopehe na okuliholamwene omolwovanhu inava wanenena. (Mateus 20:28; Johannes 15:13) Otashi dulika u kale wa kumwa omolwohole inene oyo Jehova a ulikila ovanhu mokuyandja ekuliloyambo olo. (Johannes 3:16) Ile pamwe otashi dulika u popye ngaashi omukulunhu wetanga lovakwaita Omuroma oo a tile: “Oshili ou okwa li Omona waKalunga.” (Mateus 27:54) Omanyamukulo aeshe oo oku li mondjila. Mepingafano naasho, diladila shi na sha neendjovo daJesus daxuuninwa odo a li a popya eshi a li komuti womahepeko a ti: “Sha longwa sha pwa.” (Johannes 19:30) Eendjovo daJesus odo okwa li da hala okutya shike? Jesus okwa li a pondola shihapu monghalamwenyo yaye nosho yo okupitila mefyo laye. Kakele kaasho, etomheno la fimanenena molwaashi e uyile kombada yedu olo okukandula po omhata i na sha nounamapangelo waJehova. Jesus okwa li e lididimikila omahepeko manene ngaashi sha li sha xunganekwa, nokungaho, okwa li a yapulifa edina laJehova. (Jesaja 53:3-7) Nonande kasha li shipu kuJesus okuwanifa po oinakuwanifwa oyo ya kwata moiti, okwa li e i wanifa po filufilu. Onghee hano, okwa li ta dulu kutya sha longwa sha pwa.

11. Jesus ota ka ninga po shike opo a wanife po filufilu exunganeko olo la li la xunganekwa muEden?

¹¹ Jesus okwa li a nyumunwa e li “omhepo ei hai yandje omwenyo,” omolwoudiinini waye. (1 Ovakorinto 15:45; 1 Petrus 3:18) Jehova okwa li a udanekela Omona waye omutumbalekwa a ti: “Kala omutumba kolulyo lange, fiyo handi ningi ovatondi voye [oshilyatelo] shokeemhadi doye.” (Epsalme 110:1) “Ovatondi” ovo ova kwatela mo omweetifi woupyakadi munene, Satana, ‘noludalo’ laye alishe. Jesus Kristus, Ohamba yOuhamba waJehova wopaMessias, pamwe nomatanga omeulu, ota ka hanauna po Satana neendemoni nosho yo ovanashibofa aveshe kombada yedu. (Ehololo 12:7-9; 19:11-16; 20:1-3, 10) Opo nee exunganeko olo li li muGenesis 3:15 nosho yo eilikano olo Jesus a li a honga ovashikuli vaye va ilikane kutya “ouhamba woye nau uye; ehalo loye nali wanifwe kombada yedu yo ngaashi meulu” otai ka wanifwa pauyadi. — Mateus 6:10; Ovafilippi 2:8-11.

Jesus okwe tu tulila po oshihopaenenwa tu shi shikule

12, 13. (a) Ovanhu otave linyenge ngahelipi konghundana iwa yOuhamba kunena? (b)  Otu na okulipula omapulo elipi ngeenge otwa hala okuhopaenena Kristus?

¹² Ngaashi Jesus a li a xunganeka, onghundana iwa yOuhamba otai udifwa moilongo ihapu kunena. (Mateus 24:14) Oshidjemo, ovanhu omamiliyona ove liyapulila Kalunga. Ova teelela nodjuulufi omanangeko noupuna oo taa ka etwa kOuhamba waKalunga. Ove na etimaumbwile loku ka kala nomwenyo fiyo alushe moparadisa kombada yedu mombili nomeameno, nohava lombwele nehafo ovanhu vakwao shi na sha neteelelo lavo. (Epsalme 37:11; 2 Petrus 3:13) Mbela naave ou li umwe womovaudifi vOuhamba ovo? Ngeenge osho, ou shii okupandulwa. Ndele ope na oshinima shimwe osho keshe umwe womufye e na okukonakona.

¹³ Omuyapostoli Petrus okwa shanga a ti: “[Kristus] yo okwe mu hepekelwa nokwe mu fiila oshihopaelelwa mu shikule oshikoti shaye.” (1 Petrus 2:21) Didilika kutya movelishe oyo Petrus ka li ta po shi na sha nouladi waJesus wokuudifa ile ounghulungu waye wokuhonga, ndele okwa li ta popi shi na sha nokumona oixuna kwaye. Molwaashi Petrus opo a li eshi Jesus a li ta hepekwa, okwa li e shii nawa kutya Jesus okwa li e na ehalo okumona oixuna opo a dulike kounamapangelo waJehova noku ulike kutya Satana omunaipupulu. Ndele mbela omeenghedi dilipi hatu dulu okuhopaenena Jesus? Otu na okulipula kutya: ‘Mbela ondi na ehalo okumona oixuna shi fike peni opo ndi yambidide nokufimanekifa ounamapangelo waJehova? Mbela ohandi ulike okupitila meenghatu dange nosho yo moukalele wange kutya onda lenga ounamapangelo waJehova?’ — Ovakolossi 3:17.

14, 15. (a) Jesus okwa li e linyenga ngahelipi komaetepo a puka oo a li a pewa, nomolwashike? (b) Omhata ilipi tu na alushe okukaleka momadiladilo? (Kwatela mo yo omatyekosha oo e li moshimhungu shi na oshipalanyole: “Yambidida ounamapangelo waJehova.”)

¹⁴ Efiku keshe, ohatu shakeneke omayeleko nohatu ningi omatokolo a kwata moiti nosho yo oo inaa kwata moiti. Ohatu ka ninga po shike shi na sha neenghalo da tya ngaho? Pashihopaenenwa, ngeenge hatu yelekwa tu ninge oshinima shonhumba osho tashi dulu okutula moshiponga omufika wetu wopaKriste, ohatu ke linyenga ngahelipi? Jesus okwa li e linyenga ngahelipi eshi Petrus a li e mu lombwela e lietele onghenda? Jesus okwa li e mu lombwela a ti: ‘Dja po puame, Satana. Ove ito diladila osho shaKalunga, ndele oshosho shovanhu.’ (Mateus 16:21-23) Ngeenge otwa mono eemhito dokumona oimaliwa ihapu ile ondodo yopombada moilonga, oinima oyo tai dulu okukuma omalipyakidilo etu opaKriste nosho yo ekwatafano letu naKalunga, mbela ohatu ke linyenga ngoo ngaashi Jesus? Eshi Jesus a li a mona kutya ovanhu ovo va li va mona oikumwifilonga oyo a li a longa okwa li va “hala oku mu kufa noku mu fininika, ve mu ninge ohamba,” okwa li a dja po diva puvo. — Johannes 6:15.

¹⁵ Omolwashike Jesus a li ha anye filufilu omaetepo ile omaheka a tya ngaho? Omolwaashi okwa li e shii kutya opa li sha osho sha fimanenena shi dule eameno laye ile osho kwa li a diladila kutya osho tashi mu etele ouwa. Okwa li a hala okulonga ehalo laXe nokuyambidida ounamapangelo waye kashi na nee mbudi kutya okwa li tashi mu pula shike. (Mateus 26:50-54) Onghee hano, ngeenge itatu kaleke alushe momadiladilo omhata i na sha nounamapangelo waJehova ngaashi Jesus a li a ninga, oshi na oupu tu liyandje ngeenge hatu yelekwa ile tu nyone. Omolwashike mbela? Omolwaashi oshi na oupu tu yulwe komakonda aSatana, oo ha ningifa oinima oyo ii i kale tai monika ya fa iwa, ngaashi a li a ninga eshi a pukifa Eva. — 2 Ovakorinto 11:14; 1 Timoteus 2:14.

16. Oshike shi na okukala elalakano letu la fimana eshi hatu kwafele vamwe?

¹⁶ Ngeenge tu li moukalele, ohatu kendabala okupopya novanhu shi na sha nomalipulo avo noku va pa omanyamukulo okudja mOmbibeli. Oyo oyo onghedi ya denga mbada omo hatu dulu okupendula ohokwe yovanhu opo va konakone Ombibeli. Ndelenee elalakano letu la fimana kali fi ashike okukwafela ovanhu va shiive osho Ombibeli tai hongo ile shi na sha nomanangeko noupuna oo taa ka etwa kOuhamba waKalunga, ndele otu na yo oku va kwafela va ude ko omhata i na sha nounamapangelo waye. Mbela ove na ngoo ehalo okuninga Ovakriste vashili nokulitwika ‘omuti wavo womahepeko’ nokumona oixuna omolwOuhamba? (Markus 8:34, NW) Mbela ove lilongekida okulimbwanga mumwe naavo tava yambidida ounamapangelo waJehova notava yandje oumbangi kutya Satana omunaipupulu nomulundili? (Omayeletumbulo 27:11) Oshi li oufembanghenda okukala hatu yambidida ounamapangelo waJehova nokukwafela vamwe va ninge ngaho. — 1 Timoteus 4:16.

Kalunga ota ka ninga ‘omunaashishe moinima aishe’

17, 18. Efimbo lihafifa lilipi hatu dulu okuteelela nodjuulufi ngeenge ohatu yambidida ounamapangelo waJehova?

¹⁷ Ngeenge ohatu ulike okupitila melihumbato letu nosho yo moukalele wetu kutya ohatu yambidida ounamapangelo waJehova, ohatu dulu okuteelela nodjuulufi efimbo olo eshi Jesus Kristus ta ka ‘yandja ouhamba kuKalunga Xe.’ Mbela osho otashi ka ningwa naini? Omuyapostoli Paulus okwa yelifa a ti: “[Osheshi] a hanauna po elelo alishe nepangelo neenghono adishe. Osheshi Oye e nokupangela fiyo ota tula ovatondi vaye aveshe koshi yeemhadi daye. . . . Opo nee Omona Ye mwene ote ke litula yo koshi yaau e mu tulila ko aishe, Kalunga opo a kale omunashishe moinima aishe.” — 1 Ovakorinto 15:24, 25, 28.

¹⁸ Itashi ka kala tuu shihafifa eshi Kalunga ta ka ninga ‘omunaashishe moinima aishe’! Ouhamba otau ka wanifa po elalakano lao. Aveshe ovo hava pataneke ounamapangelo waJehova otava ka hanaunwa po. Eshito alishe otali ka kala li na ombili nelandulafano. Oishitwa aishe otai ka imba metwokumwe neendjovo domupsalme odo tadi ti: “Yandjeni kOmwene efimano ledina laye. . . . Udifeni mokati kovapaani mu tye: Paife Omwene Oye ohamba.” — Epsalme 96:8, 10.

Oto nyamukula ngahelipi?

• Jesus okwa li a ulika ngahelipi oudiinini waye kounamapangelo waKalunga?

• Oshinima sha fimanenena shilipi Jesus a li a wanifa po okupitila moukalele waye nosho yo mefyo laye?

• Omeenghedi dilipi hatu dulu okuhopaenena Jesus mokuyambidida ounamapangelo waJehova?

[Oshimhungu/Omafano pepandja 11]

YAMBIDIDA OUNAMAPANGELO WAJEHOVA

Ngeenge twa taalelwa komayeleko madjuu, oshiwa okukaleka momadiladilo kutya omolwashike hatu hangika komayeleko a tya ngaho, ngaashi ovamwatate vahapu muKorea nosho yo moilongo imwe i lili.

Ondombwedi imwe oyo ya li modolongo pefimbo lepangelo laSoviet shonale oya hokolola ya ti: “Otwa li twa dula okulididimika molwaashi otwa li twa uda ko nawa omhata oyo ya li ya etifwa po moshikunino shaEden i na sha noufemba waKalunga wokupangela. . . . Otwa li tu shii kutya otu na omhito yokuyambidida ounamapangelo waJehova. . . . Osho osha li she tu pameka noshe tu kwafela tu kanyatele oudiinini wetu.”

Ondombwedi imwe vali oya hokolola osho sha li she va kwafela eshi vali mokamba yehandukilo ya ti: “Jehova okwa li e tu yambidida, nonande otwa li meenghalo didjuu otwa li oupafi pamhepo. Otwa kala hatu twaafana omukumo mokukala hatu lidimbulukifa kutya ohatu yambidida ounamapangelo waJehova.”

[Efano pepandja 8]

Jesus okwa li a yambidida ngahelipi ounamapangelo waJehova eshi a li a yelekwa kuSatana?

[Efano pepandja 10]

Jesus okwa li a wanifa po shike okupitila mefyo laye?