Omamoniko tagu ulike ehala moka hamu kala iishitwa yopambepo

NONANDO owu ligamene kegulu, ito ka mona ko nando omuntu gwopambepo. Nonando owu pulakene ito ku uva ko nando ogumwe ta popi. Ihe otashi vulika wu shi shi kutya oko ye li. Aantu mbaka yopambepo oyo aanankondo naanandunge, ye na omadhina nuukwatya wa yooloka. Yamwe ohaya kala ya hala oku tu kwathela, yalwe ohaya kala ya hala oku tu ehameka. Ayehe oya hala oku tu ningila sha.

Kalunga kashili oye Ombepo. (Johannes 4:24) Oku na edhina lyi ikalekelwa ndyoka lye mu yoolola ko kiikalunga oyindji. Edhina ndyoka olyo Jehova. (Episalomi 83:18, NW) Omupisalomi okwa nyola a ti: “OMUWA oye omunene noku na okusimanekwa; oku na okutumbalekwa e vule iikalunga ayihe. Iikalunga ayihe itayi kwatha sha, ihe OMUWA oye a shiti egulu. Esimano neadhimo olye mu kunduka; oonkondo neopalo oli li motempeli ye.”—Episalomi 96:4-6.

Omamoniko kombinga yaKalunga kashili

Ombiimbeli otayi ti: “Kaku na omuntu a mono Kalunga nando olumwe.” (Johannes 1:18) Katu shi kutya olupe lwe noshinge she oya fa peni, ngaashi owala omuntu ngoka a valwa omuposi kee shi omalwaala. Ihe ngaashi owala omulongi a pyokoka ha yelithile aalongwa ye iinima ya kitakana momukalo ngoka taye yi uvu ko nawa, Kalunga naye oha yelitha iinima mbyoka itaatu vulu okumona okupitila miinima mbyoka tatu vulu okumona, ta longitha Oohapu dhe, Ombiimbeli. Momamoniko ga nwethwa mo ngoka ga li ga pewa aapiya aadhiginini yonale, Jehova okwe tu kwathela tu kale tu shi kutya megulu omu li ngiini notu uve ko kutya pokati ketu naamboka ya kala mo opu na ekwatathano lini.

Pashiholelwa, emoniko limwe ndyoka lya li lya pewa omupolofeti Hesekiel, olya li lya faathanitha eadhimo lyaJehova nomulilo, nuuyelele, nemanya lyosafire nonuutamvula. Memoniko lilwe, omuyapostoli Johannes okwa li a mono Jehova e li koshipangelapundi nokwa popi kutya ‘oshipala she osha adhima ongomamanya ge na ondilo gajaspes nakarneli’ nokwa gwedha ko kutya “oshipangelapundi osha li sha dhingolokwa kuutamvula wolwaala lwa fa emanya lyasmaragdi.” Omamoniko ga tya ngaaka otage tu kwathele tu uve ko kutya Jehova oku na eholokopo lyi ikalekelwa newanawa noonkondo, omuhokithi nomunambili.—Ehololo 4:2, 3; Hesekiel 1:26-28.

Omupolofeti Daniel okwa li a mono memoniko ‘aayengeli omayuvi ogendji taya yakula [Jehova] naantu omamiliyona ya thikama koshipala’ she. (Daniel 7:10) Emoniko ndyoka kalya li tuu ekumithi! Okumona owala nokuli omuyengeli gumwe memoniko oshinima oshikumithi noonkondo, ihe dhiladhila ando wa mona aayengeli ya gwanenena ye li omayuvi nomayuvi.

Aayengeli oya popiwa mOmbiimbeli konyala lwiikando 400, noondondo dhawo odha kwatela mo aaserafi naakerubi. Oshitya shOshigreka noshOshihebeli shoka sha tolokwa “omuyengeli” mOmbiimbeli otashi ti “omutumwa.” Onkee ano, aayengeli ohaya popi naayengeli ooyakwawo, nomethimbo lyonale oya li haya popi naantu. Aayengeli kaye shi aantu mboka ya li tango kombanda yevi. Jehova okwe ya shiti manga nokuli aantu inaaya shitwa.—Job 38:4-7.

Memoniko lyaDaniel, aayengeli oya li ya gongala ya kale oonzapo dhoshiningwanima oshindhindhilikwedhi. Konima yaashono okwa li a mono “gumwe a fa [Omuna gwomuntu, KB]” e ya poshipangelapundi shaJehova a pewe “epangelo, esimano noonkondo dhuukwaniilwa, opo aantu yomiigwana ayihe, yomomaludhi agehe noyomomalaka agehe ye mu longele.” (Daniel 7:13, 14) “Omuna gwomuntu” oye omuyumudhwa Jesus Kristus ngoka ta dhana onkandangala ya simana mehala moka hamu kala iishitwa yopambepo nokwa pewa a pangele ombanda yevi ayihe. Masiku epangelo lye otali ka pingena po omapangelo agehe gopantu nokuhulitha po omikithi, oluhodhi, omathiminiko, oluhepo nokuli neso.—Daniel 2:44.

Aayengeli oyendjiyendji aadhiginini mboka ya halela aantu uuwanawa oya nyanyukwa shili noonkondo omolwokulangekwa po kwaJesus. Shinikitha oluhodhi, haishitwa ayihe yopambepo ya li ye shi nyanyukilwa.

Aatondi yaKalunga noyaantu

Petameko lela lyondjokonona yaantu, gumwe gwomaayengeli, okwa li a hala a kale ha galikanwa, shoka she mu ningitha a pilamene Jehova nokwi iningi ye mwene Satana, edhina ndyoka tali ti “Omupataneki.” Satana ngoka e li omukolokoshi a shiga ko oku li ompinge naJehova, ngoka omunahole kaaku na we. Aayengeli yalwe oya li yi imbwanga mumwe naSatana muunashipotha we. Ombiimbeli ohayi ya ithana oompwidhuli. Ngaashi Satana, oompwidhuli odhi iningi dho dhene aatondi yaantu. Okumona iihuna okundji kombanda yevi, okwaahe na uuyuuki, uuwehame, oluhepo niita ohayi etithwa koompwidhuli.

Oongeleka odhindji dhUukwakriste ihadhi popi we unene kombinga yaSatana ngaashi dha li hadhi shi ningi nale. Embo lyOmbiimbeli lyaJob otali gandja uuyelele kutya Satana omuntu a tya ngiini nosho wo kutya omalalakano gomuyengeli nguka omunashipotha ogeni. Olya ti: “Esiku limwe aayengeli yaKalunga oya holoka koshipala shOMUWA, naSatana okwa li mokati kawo.” Moonkundathana ndhoka dha landula ko, Satana okwa popi ta sheke kutya omulumentu Job okwa li ha longele owala Kalunga omolwiinima mbyoka a li e mu pe. Opo Satana u ulike kutya shoka a li ta popi oshoshili, okwa li e etele Job uudhigu uunene sho a dhipaga iimuna ye naanona ye ayehe omulongo. Konima yaashoka, Satana oku umbu Job iitumbuka molutu aluhe. Omashongo gaSatana agehe inaga pondola sha.—Job 1:6-19; 2:7.

Jehova okwe etha Satana a kale po uule wethimbo molwaashoka oku na omatompelo omawanawa, ihe ite ke mu idhidhimikila sigo aluhe. Masiku Ondiaboli otayi ka hanagulwa po. Onkatu yotango oya katukwa nale noya popiwa membo lyEhololo moka twa hololelwa natango oshiningwanima sha simana sha li sha ningwa megulu shoka tashi vulika ando inaatu tseya. Ombiimbeli otayi ti: “Megulu omwa tukuluka olugodhi. Mikael [omuyumudhwa Jesus Kristus] naayengeli ye oya kondjitha oshikoko [Satana] pamwe naayengeli yasho. Oshikoko naayengeli yasho oya sindika yo inaa pitikwa we okukala megulu. Oshikoko oshinene oshu umbwa mo megulu. Osho eyoka ndyoka hali ithanwa omuhindadhi nenge Satana, ngoka ta pukitha uuyuni auhe. Osho oshu umbilwa kombanda yevi pamwe naayengeli yasho ayehe.”—Ehololo 12:7-9.

Ndhindhilika kutya Ombiimbeli oya ti kutya Satana ota “pukitha uuyuni auhe.” Oha pukitha aantu mokuhumitha komeho iifundja yomalongelokalunga opo e ya gamune ko kuJehova nokOohapu dhe. Iifundja mbyoka hayi longwa komalongelokalunga giifundja oyo mbyoka kutya omuntu ngele a si oha yi kehala hoka haku kala iishitwa yopambepo. Opu na iinima ya yoolokathana mbyoka aantu yi itaala shi na ko nasha naashoka hashi ningwa po ngele omuntu a si. Pashiholelwa, muAfrika nomuAsia, oyendji oyi itaala kutya omuntu ngele a si oha yi kaakwampungu. Elongo lyomulilo gweyogolitho nolyoheli olya kankamena kedhiladhilo ndyoka kutya omuntu oha kala e na omwenyo konima yeso.

Mbela ngele omuntu a si oha tsikile okukala nomwenyo megulu?

Mbela ongiini kombinga yelongo ndyoka li itaalwa kaantu omamiliyona muuyuni auhe kutya aantu ayehe aayuuki ohaya yi megulu? Odhoshili kutya yamwe yomaantu aayuuki omo haya yi, ihe omwaalu gwawo omushona mokuyelekanithwa naantu omabiliyona mboka ya sa. Ombiimbeli oyu ulike kutya aantu ye li 144 000 otaya ka “kulilwa ko kevi” ya ka ‘pangele ombanda yevi’ ye li aasaaseri naakwaniilwa. (Ehololo 5:9, 10; 14:1, 3) Otaya ka kala iilyo yepangelo lyomegulu pamwe nOmuna gwomuntu, Jesus Kristus. Epangelo ndyoka otali ka hanagula po Satana noompwidhuli dhe nokulundulula evi li ninge oparadisa. Oyendji yomwaamboka ya sa otaya ka yumudhwa e taya kala netegameno lyokukala nomwenyo sigo aluhe moparadisa ndjoka kombanda yevi.—Lukas 23:43.

Oku shi ngonga, mehala lyiishitwa yopambepo omu na iishitwa oyindji. Ngoka e ya vule ayehe oye Jehova Kalunga, omushiti gwaashihe shi na omwenyo. Aayengeli aadhiginini omayuvi omilongo otaye mu longele nuudhiginini. Aayengeli yalwe mboka ya kwatelwa komeho kuSatana oya li yi iteka Jehova noye li taya pukitha aantu. Natango, aantu yomwaalu gwa ngambekwa oya “kulilwa ko kevi,” opo ya pewe iinakugwanithwa yi ikalekelwa megulu. Tu na shika momadhiladhilo, natu ka taleni ngaashingeyi kutya oolye taya vulu okukwatathanwa nayo mehala moka hamu kala iishitwa yopambepo, nongiini tu na okukwatathana nayo.