Kala omulaadhi nelongelokalunga lyashili
“Iilya oyi li po oyindji, ihe aalongi oyo aashona.”—MAT. 9:37.
1. Omuntu ngoka u uvite kutya oshinima shontumba oshi na okulongwa neendelelo ohi inyenge ngiini?
NATU tye nduno owu na ombapila ya pumbwa okushainwa esiku ndyoka komuntu gwontumba. Oto ka ninga po shike? Oto ka nyola ko kutya “OYE ENDELELA!” Nenge natu tye owu na oshilage sha simana, ihe owa tokelwa. Oto ka ninga po shike? Oto ke endelela! Uuna wu na oshinima shoka wa hala shi pwe okuningwa nowu wete kutya ethimbo oli li pokupwa po, oho kala wu na oshimpwiyu. Omutima gwoye ohagu tameke okudhenga noonkondo e to tameke okulonga neendelelo ngaashi to vulu.
2. Aakriste yashili kunena oye na oshilonga shashike shoka she endelela?
2 KAakriste yashili kunena kapu na oshinima shilwe she endelela kaashi shi okuuvitha onkundana ombwanawa yUukwaniilwa nokuninga aantu yomiigwana ayihe aalongwa. (Mat. 24:14; 28:19, 20) Sho omulongwa Markus a totha moohapu dhaJesus, okwa nyola a ti kutya iilonga mbika oyi na okulongwa “tangotango,” sha hala okutya, oyi na okuningwa manga ehulilo inaali ya. (Mark. 13:10) Shoka osho naanaa shi na okukala ngaaka. Jesus okwa ti: “Iilya oyi li po oyindji, ihe aalongi oyo aashona.” Eteyo itali vulu okutegelela; oli na okuningwa manga ethimbo lyalyo inaali pita.—Mat. 9:37.
3. Aauvithi oyendji oya ninga po shike shi na ko nasha niilonga yokuuvitha mbyoka ye endelela?
3 Molwaashoka iilonga yokuuvitha oya simana kutse, otwa pumbwa okulongitha ethimbo lyetu olindji, oonkondo dhetu nosho wo okugandja eitulomo kuyo ngaashi tashi vulika. Oshi shi okupandulwa sho oyendji taya ningi ngaaka. Yamwe oya ninga onkalamwenyo yawo yanathangwa opo ya ye miilonga yethimbo lyu udha ye li aakokolindjila, aatumwa nAabetel. Onkalamwenyo yawo oyi ipyakidhila noonkondo. Otashi vulika ya ninga omaiyambo ogendji nohaya tsakaneke omashongo ogendji. Ihe nonando ongawo, oya lalekwa nuuyamba kuJehova notwa nyanyukilwa iilonga yawo. (Lesha Lukas 18:28-30.) Yalwe mboka itaaya vulu okuya miilonga yethimbo lyu udha, ohaya longitha ethimbo lyawo olindji ngaashi tashi vulika miilonga yokuhupitha oomwenyo mbyoka ya kwatela mo okukwathela aanona yetu opo ya hupithwe.—Deut. 6:6, 7.
4. Oshike tashi vulika hashi ningitha yamwe kaaya kale ye wete kutya ethimbo ndyoka tu li mulyo olye endelela?
4 Ngaashi twe shi mona, ohatu kala tu wete ethimbo lye endelela ngele otatu longo oshilonga shontumba shoka shi na okulongwa muule wethimbo lya ngambekwa. Otu li methimbo lyehulilo nopu na uunzapo owundji wopamanyolo nowopandjokonona tawu shi ulike. (Mat. 24:3, 33; 2 Tim. 3:1-5) Nonando ongawo, kapu na omuntu e shi kutya ehulilo otali ya naanaa uunake. Sho Jesus a gandja uuyelele wu na ko nasha “nendhindhiliko” ndyoka tali holola ethimbo ‘lyehulilo lyuuyuni,’ okwa popi shu ukilila a ti: “Esiku notundi ndjoka kaku na ngoka e yi shi, nando aayengeli yomegulu nenge Omwana, oTate oye awike.” (Mat. 24:36) Molwaashoka katu shi kutya ehulilo otali ya uunake, yamwe otashi vulika ya mone oshidhigu okukala ye wete kutya ethimbo olye endelela, unene tuu ngele oya kala ye li tegelela ethimbo nuule. (Omayel. 13:12) Mbela opu na omathimbo gamwe ho kala wu uvite ngaaka? Oshike tashi vulu oku tu kwathela tu kale tu wete kutya iilonga mbyoka twa pewa kuJehova Kalunga naJesus Kristus oye endelela?
Konakona oshiholelwa shaJesus
5. Omomikalo dhini Jesus a li u ulike kutya ethimbo olye endelela shi na ko nasha nuukalele?
5 Jesus Kristus okwa li ha longo iilonga yaKalunga u uvite kutya ethimbo olye endelela noku li oshiholelwa dhingi moshinima shoka. Etompelo kutya omolwashike ethimbo lye lya li lye endelela omolwaashoka okwa li e na oshindji okulonga muule owala woomvula ndatu netata. Nonando ongaaka, okwa li a longo oshindji shi na ko nasha nelongelokalunga lyashili e vule aantu ayehe. Okwa li a tseyitha edhina nelalakano lyaHe, u uvitha onkundana ombwanawa yUukwaniilwa, a yaneke pomutenya iihelele nomalongo giifundja gaawiliki yomalongelokalunga nokwa ambidhidha uunamapangelo waJehova nokuli sigo okeso. Okwa li he ende oondjila oonde ta longo aantu, te ya kwathele note ya aludha. (Mat. 9:35) Kapu na we gulwe a li a vulu okulonga iilonga oyindji muule wethimbo efupi li thike mpoka. Jesus okwa li a longo shili nuudhiginini ngaashi ta vulu.—Joh. 18:37.
6. Jesus okwa li a gandja eitulomo kushike monkalamwenyo ye?
6 Oshike sha li shi inyengitha Jesus a longe muukalele nopwaahe na oluthuwo? Omolwehunganeko lyaDaniel, Jesus okwa li e shi shi kutya okwa li ku na ethimbo li thike peni opo a tsakanithe oshilonga she metsokumwe neuthwathimbo ndyoka Jehova a tula po. (Dan. 9:27) Ngaashi sha li sha hunganekwa, uukalele we wokombanda yevi owa li wu na okuhula konima ‘yetata lyoshiwike shimwe’ nenge tu tye konima yoomvula ndatu netata. Nziya konima sho Jesus a li e ya muJerusalem ta hambelelwa e li Omukwaniilwa pethimbo lyokwenye kwokUuzilo woPokati mo 33 E.N., okwa ti: “Ethimbo olye ya, Omuna gwOmuntu a pewe esimano enene.” (Joh. 12:23) Nonando Jesus okwa li e shi shi kutya ethimbo lyokusa kwe olya li popepi, ine etha shoka shi mu ningithe a kale ta gandja eitulomo konkalamwenyo ye mwene naashoka hasho owala sha li she mu ningitha a kale ta longo nuudhiginini. Pehala lyaashono, okwa li a gandja eitulomo kokulongitha ompito kehe a longe ehalo lyaHe nokuulukila aantu ooyakwawo ohole. Ohole ndjoka oya li ye mu inyengitha a konge aantu mboka ya li ya hala okuninga aalongwa e te ya dheula noku ya tuma ye ku uvithe. Shoka okwa li e shi ningi opo ya ka tsikile niilonga mbyoka a li a tameke noya li nokuli taya ka longa iilonga iinene yi vule mbyoka a li a longo.—Lesha Johannes 14:12.
7, 8. Aalongwa yaJesus oya li yi inyenge ngiini sho a li a tidha mo aalandithi motempeli, nomolwashike a li a katuka onkatu ndjoka?
7 Oshiningwanima shimwe shoka sha li sha ningwa petameko lyuukalele waJesus pethimbo lyoshituthi shOpaasa mo 30 E.N., osha li sha gandja uunzapo wa kola kutya okwa li e na uulaadhi wu thike peni. Jesus naalongwa ye oya li ye ya kuJerusalem e taya adha aantu motempeli “taa landitha oongombe, oonzi noonguti, naapingakanithi yiimaliwa ya kuutumba piitaafula yawo.” Jesus okwa li a ningi po shike nosha li sha gumu ngiini aalongwa ye?—Lesha Johannes 2:13-17.
8 Shoka Jesus a li a popi naashoka a li a ningi motempeli pethimbo ndyoka osha li sha dhimbulukitha aalongwa oohapu dhopahunganeko dhomepisalomi limwe lyaDavid tadhi ti: “Uulaadhi omolwongulu yoye otau thiminike ndje.” (Eps. 69:9) Omolwashike ya li ye dhi dhimbulukwa? Omolwaashoka shoka Jesus a li a longo osha li sha tula omwenyo gwe moshiponga. Aakuluntu yotempeli mboka ya kwatela mo aasaaseri, aanongoraamata nosho wo yalwe oyo ya li aakwatelikomeho yoongeshefa kaadhi li pauyuuki ndhoka dha li tadhi ningilwa motempeli. Sho Jesus a li a yaneke pomutenya iilonga yawo noku yi ya moshipala, osha li she mu tonditha kaawiliki yomalongelokalunga mboka. ‘Uulaadhi waJesus omolwongulu yaKalunga’ nenge elongelokalunga lyashili owa li wi iwetikile, naalongwa ye oya li ye wu dhimbulula. Ihe uulaadhi oshike naanaa? Mbela opu na eyooloko pokati kokukala wu uvite ethimbo lye endelela nokukala nuulaadhi?
Eyooloko pokati kokukala wu uvite ethimbo lye endelela nokukala nuulaadhi
9. Uulaadhi oshike?
9 Embwiitya limwe olya ti kutya “uulaadhi” owo okukala wa “halelela nowu na ohokwe onene yokuninga oshinima shontumba” nolya gandja wo oosinonime dhoshitya uulaadhi, ngaashi eitulomo, ondjungu, etuntuko nosho wo ehwamo. Uukalele waJesus otawu vulu shili okuhokololwa niitya ayihe mbika. Osho molwaashoka etoloko lyOmbiimbeli yo-Today’s English Version lya toloka ovelise ndjoka tali ti: “Ohole yandje yokuhola ongulu yoye Kalunga, oya hwama meni lyandje ya fa omulilo.” Shoka shihokitha osho kutya momalaka gamwe oshitya shoka sha tolokwa “uulaadhi” osha thikama po miitya iyali mbyoka tayi ti lelalela “omutima omupyu,” gwa fa tagu pi. Onkee ano, itashi kumitha sho aalongwa ya li ya dhimbulukwa oohapu dhaDavid sho ya mono shoka Jesus a ningi motempeli. Oshike nduno sha li sha ningitha omutima gwaJesus gu kale gwa hwama gwa fa omulilo e ta katuka ngaaka?
10. PaMbiimbeli “uulaadhi” owa kwatela mo shike?
10 Oshitya “uulaadhi” shoka sha longithwa mepisalomi lyaDavid osha kuthwa koshitya shOshihebeli shoka sha tolokwa olundji “uukodhi” moontopolwa dhilwe dhOmbiimbeli. Ombiimbeli yo-New World Translation ethimbo limwe ohayi popi oshitya uulaadhi tayi ti kutya Kalunga okwa hala okwiigandjelwa oye awike. (Eks. 20:5; 34:14, NW; Jos. 24:19, NW) Embwiitya limwe lyOmbiimbeli olya popya kombinga yuutumbulilo okwiigandjelwa oye awike lya ti: “Ngaashi owala omusamane nomukulukadhi haya kala taya kodhililathana yu uvite kutya ngoka omukulukadhi gwandje ongame awike nenge ngoka omusamane gwandje ongame awike, Kalunga naye okwa hala aantu ya kale ye mu igandjela oye awike.” Shoka otashi ulike kutya paMbiimbeli oshitya uulaadhi otashi gandja edhiladhilo lya mbwalangandja kaali shi owala okukala wu na ondjungu nenge ehwamo omolwoshilonga shontumba, ngaashi naanaa aayambidhidhi yuudhano wontumba haya kala ye wu uvitile. Uulaadhi mboka David a li e na otawu vulu okuyelekanithwa nuukodhi nenge niikala yokwaahapitika edhina ewanawa li nyatekwe moku li gamena nenge okukala nehalo lya hwama okuyukipalitha iinima.
11. Oshike sha li shi inyengitha Jesus a longe nuulaadhi?
11 Aalongwa yaJesus oya li ye li mondjila sho ya thiki pehulithodhiladhilo kutya shoka ya li ya mono tashi ningwa kuJesus motempeli oshi li metsokumwe noohapu ndhoka dha popiwa kuDavid. Jesus ka li owala a longo nuudhiginini molwaashoka a li e na ethimbo lya ngambekwa, ihe omolwaashoka wo a li e na uulaadhi nedhina lyaHe nosho wo nelongelakalunga lyashili. Sho a li a mono nkene edhina lyaKalunga lya nyatekwa nolya shekithwa, okwa li a katuka oonkatu nuulaadhi opo e li yapulithe. Sho Jesus a li a mono aantu yomitima omiwanawa ya thiminikwa kaawiliki yomalongelokalunga, uulaadhi we owa li we mu inyengitha e ya etele epepelelo nosho wo a yaneke pomutenya aawiliki yomalongelokalunga aakwanyanya.—Mat. 9:36; 23:2, 4, 27, 28, 33.
Kala wu na uulaadhi nelongelokalunga lyashili
12, 13. Aakwatelikomeho yomalongelokalunga gUukwakriste kunena oya ninga po shike shi na ko nasha (a) nedhina lyaKalunga? (b) nUukwaniilwa waKalunga?
12 Onkalo yomalongelokalunga ngoka ge li po kunena oya faathana naandjoka yomalongelokalunga ngoka ga li ko pethimbo lyaJesus nenge tashi vulika ya pita po. Pashiholelwa, dhimbulukwa kutya oshinima shotango shoka Jesus a li a longo aalanduli ye ya galikane kombinga yasho osha li shi na ko nasha nedhina lyaKalunga. Okwe ya longo ya kale haya galikana taya ti: “Edhina lyoye nali yapulwe.” (Mat. 6:9) Mbela aawiliki yomalongelokalunga, unene tuu aasita yUukwakriste, ohaya longo aantu edhina lyaKalunga nosho wo oku li yapulitha nenge oku li simanekitha? Pehala lyaashono, ohaya longo aantu omalongo giifundja ngaashi Uukwatatu, omwenyo ihaagu si nosho wo omulilo gwoheli, nokungawo, ohaya ningitha aantu ya kale ye wete kutya Kalunga ita vulu okuuviwa ko, omukwanyanya noha hepeke nokuli aantu. Ohaya shekitha wo Kalunga neihumbato lyawo inaali yogoka nosho wo niihelele yawo. (Lesha Aaroma 2:21-24.) Natango, oya ninga kehe shimwe taya vulu opo yi imbe aantu kaaya tseye edhina lyaKalunga, ye li kutha mo nokuli momatoloko gOombiimbeli dhawo. Kungawo, oya ningitha aantu kaaya hedhe popepi naKalunga nokaaya kale ye na ekwatathano naye.—Jak. 4:7, 8.
13 Jesus okwa li wo a longo aalanduli ye ya galikane kombinga yUukwaniilwa taya ti: “[Uukwaniilwa woye nawu ye, KB], ehalo lyoye nali gwanithe kombanda yevi wo ngaashi megulu.” (Mat. 6:10) Nonando aakwatelikomeho yomalongelokalunga gUukwakriste olundji ohaye endulula egalikano ndyoka, ohaya ladhipike aantu ya ambidhidhe oopolotika nosho wo omahangano galwe gopantu. Kakele kaashono, oya dhina mboka hayu uvitha nokugandja uunzapo kombinga yUukwaniilwa mbuka. Oshizemo, aantu oyendji mboka hayi iti kutya Aakriste, ihaya popi we kombinga yUukwaniilwa noinaye wu itaala.
14. Ongiini aasita yUukwakriste ya hekula Oohapu dhaKalunga?
14 Sho Jesus a galikana kuKalunga okwa li a popi sha yela a ti: “Oohapu dhoye odho oshili.” (Joh. 17:17) Manga Jesus a li natango kombanda yevi, okwa li u ulike kutya okwa li ta ka langeka po “omupiya omudhiginini nomunandunge” a gandje oondya dhopambepo kaalanduli ye. (Mat. 24:45, KB) Nonando aasita yUukwakriste ohaya ti kutya ohaya longo aantu Oohapu dhaKalunga, mbela oyu ulika ngaa kutya oye li aadhiginini kOmuwa gwawo? Aawe. Ohaya ti owala kutya shoka tashi popiwa kOmbiimbeli oshi li ongano yowala. Pehala lyokupalutha aakwanegongalo yawo niikulya yopambepo, shoka tashi ke ya hekeleka noku ya pa uuyelele, aasita ohaya nywitha omakutsi gawo nomalongo gopantu. Kakele kaashono, oya hekula omithikampango dhaKalunga dhopamikalo opo kaaya geyithe iilyo yoongeleka dhawo mbyoka ihaayi ihumbata metsokumwe nadho.—2 Tim. 4:3, 4.
15. Oho kala wu uvite ngiini kombinga yaashihe shoka aasita ya ninga medhina lyaKalunga?
15 Aanamitima omiwanawa oyendji oya dhengwa koomwenyo nenge nokuli ya kanitha thiluthilu eitaalo muKalunga nosho wo mOmbiimbeli, omolwiinima ayihe mbyoka ya kala tayi ningwa taku tiwa kutya otayi ningwa medhina lyaKalunga kOmbiimbeli. Oya ninga iihakanwa yaSatana noyonkalelo yiinima ndjika ya kolokosha. Uuna to mono nenge to uvu kombinga yiinima mbyoka hayi ningwa esiku nesiku, oho kala wu uvite ngiini? Wu li omupiya gwaJehova, uuna wu wete edhina lyaKalunga tali shekwa nolya dhinika, mbela ihashi ku inyengitha wu ninge shoka to vulu opo wu li yapulithe? Uuna to mono aanamitima omiwanawa ya pukithwa noya ningwa nayi, mbela ihashi ku inyengitha wu ya hekeleke? Sho Jesus a li a mono kutya aantu yopethimbo lye oya “hepekwa noya loloka ya fa oonzi dhaa na omusita,” ine ya etela owala ohenda e ta kala inaa ninga po sha. (Mat. 9:36; Mark. 6:34) Otu na omatompelo lela gokukala tu na uulaadhi nelongelokalunga lyashili, ngaashi Jesus a li.
16, 17. (a) Oshike shi na oku tu inyengitha tu longe nuudhiginini muukalele? (b) Oshike tatu ka kundathana moshitopolwa tashi landula?
16 Ngele otwa kala twa tala ko uukalele wetu ngaashi Jesus, oohapu dhomuyapostoli Paulus ndhoka dhi li muTimoteus gwotango 2:3, 4 otadhi ka kala tadhi ti sha lela kutse. (Lesha enyolo ndyoka.) Ohatu longo nuudhiginini muukalele hamolwaashoka owala tu shi kutya otu li momasiku gahugunina, ihe omolwaashoka wo twa ndhindhilika kutya oshi li ehalo lyaKalunga. Okwa hala aantu ya tseye oshili opo nayo yi ilonge oku mu galikana noku mu longela noya lalekwe nuuyamba. Ohatu inyengithwa tu longe nuudhiginini muukalele, hamolwaashoka ethimbo ndyoka lya hupa ko olya ngambekwa, ihe omolwaashoka twa hala tu simanekithe edhina lyaKalunga nokukwathela aantu ya tseye ehalo lye. Otu li aalaadhi nelongelokalunga lyashili.—1 Tim. 4:16.
17 Tu li oshigwana shaJehova, otwa lalekwa nuuyamba nontseyo yoshili kombinga yelalakano lyaKalunga li na ko nasha naantu nosho wo nevi. Otu na ontseyo ndjoka tatu vulu okukwathela nayo aantu ya mone enyanyu noya kale ye na etegameno lyonakuyiwa. Otatu vulu oku yu ulukila nkene taya vulu oku ka hupa sho uuyuni waSatana tawu ka hanagulwa po. (2 Tes. 1:7-9) Pehala lyokukala tu uvite nayi nenge twa teka omukumo molwaashoka esiku lyaJehova tali monika lya fa lya kala ko, otu na okukala twa nyanyukwa molwaashoka oku na natango ethimbo tu kale aalaadhi nelongelokalunga lyashili. (Mika 7:7; Hab. 2:3) Ongiini tatu vulu okukala tu na uulaadhi mboka? Shoka otatu ke shi kundathana moshitopolwa tashi landula.
Oto vulu okuyelitha?
• Oshike sha li shi inyengitha Jesus a longe muukalele nopwaahe na oluthuwo?
• PaMbiimbeli, oshitya “uulaadhi” otashi ti shike?
• Oshike tu wete kunena tashi ningilwa edhina lyaKalunga nosho wo aantu shi na oku tu inyengitha tu kale aalaadhi nelongelokalunga lyashili?
[Ethano pepandja 16]
Jesus okwa li a gandja eitulomo kokulonga ehalo lyaKalunga nokuulukila aantu ooyakwawo ohole
[Ethano pepandja 18]
Otu na omatompelo lela gokukala tu na uulaadhi nelongelokalunga lyashili