Natu imbileni Jehova!
‘Onda hala okwiimbila Kalunga, manga ndi li po.’—EPS.146:2.
1. Oshike sha li shi inyengitha omugundjuka David a tote gamwe gomomapisalomi ge?
SHO David a li omugundjuka okwa li ha kala melundu ethimbo ele ta litha oonzi dhahe popepi naBetlehem. Sho David a li ta tonatele oonzi, okwa li a mono kutya eshito lyaJehova olya dhenga mbanda: egulu lyu udha oonyothi, “iiyamakuti” nosho wo “oondhila” dhokegulu. Okwa li i inyengithwa noonkondo kwaashoka a li a mono nosha li she mu ningitha a tote omaimbilohambelelo gatuntula taga tanga Omushiti gwiinima mbika iikumithi. Ogendji gomomaimbilo ngoka ga totwa kuDavid otaga adhika mOmapisalomi.a—Lesha Episalomi 8:3, 4, 7-9.
2. (a) Omusika otayi vulu okuningila omuntu shike? Gandja oshiholelwa. (b) Oshike tatu vulu okwiilonga mEpisalomi 34:7, 8 nosho wo mEpisalomi 139:2-8 kombinga yekwatathano lyaDavid naJehova?
2 Pethimbo ndyoka otashi vulika opo David a li i ilongo okukala omwiimbi a dhenga mbanda monkalamwenyo ye. Dhoshili, okwa li a ningi onkulungu nokwa li i ithanwa a hikile omukwaniilwa Saul okaharpa. (Omayel. 22:29) Omusika yaDavid oya li hayi kodheke ombepo ombwinayi ndjoka ya li hayi hepeke omukwaniilwa, ngaashi naanaa omusika olundji hayi ngungumaneke aantu nokuli nokunena. Ngele David a hiki okaharpa ke, Saul ‘okwa li ha pepelelwa e ta ngungumana.’ (1 Sam. 16:23) Omaimbilo ngoka omwiimbi nguka omutilikalunga nomunyoli gwomaimbilo a li a toto, oge na ongushu sigo okunena. Dhiladhila owala kwaashika! Ngashingeyi opwa pita oomvula dhi vulithe 3 000, okuza sho David a valwa, aantu omamiliyona yomomihoko adhihe naamboka ya za koombinga adhihe dhevi oya kala aluhe haya lesha omapisalomi gaDavid opo ya mone ehekeleko noya kale ye na etegameno.—2 Ondjal. 7:6; lesha Episalomi 34:7, 8; 139:2-8; Amos 6:5.
Omaimbilo oga simana melongelokalunga lyashili
3, 4. Omalongekidho geni ga li ga ningwa pethimbo lyaDavid ge na ko nasha nokwiimba omaimbilo omayapuki?
3 David okwa li e na oshitalenti nokwa li e shi longitha momukalo omwaanawa ngaashi tashi vulika, sha hala okutya, mokusimanekitha Jehova. Konima sho David a ningi omukwaniilwa gwaIsraeli, okwa ningi po elongekidho opo okulongela Kalunga kwometsalihangano ku kwatele mo okwiimba omaimbilo omawanawa. Aalevi ye vulithe poshitimulongo shimwe shomwaamboka ya li haya longo motempeli, sha hala okutya, Aalevi 4 000 lwaampo, oya li ya hogololwa ya kale hayi ‘imbi omahambelelondjimbo’ nAalevi 288, oya li ‘oonkulungu ya longwa okwiimba.’—1 Ondjal. 23:3, 5; 25:7.
4 Ogendji gomomaimbilo ngoka ga li hagi imbwa kAalevi oga li ga totwa kuDavid. Aaisraeli mboka ya li ye na uuthembahenda wokukala po sho omapisalomi gaDavid ga li tagi imbwa, osha yela kutya oya li yi inyengithwa kwaashoka yu uvu. Konima yethimbo sho oshikethahangano sha li sha falwa kuJerusalem, “David okwa lombwele aawiliki yAalevi, ya hogolole mokati kAalevi mboka taa imbi omahambelelondjimbo naamboka taa hiki uuharpa, iiketala niiyaha,” ya hike uuharpa womawi gopombanda.—1 Ondjal. 15:16.
5, 6. (a) Omolwashike okwiimba kwa li kwa pewa eitulomo olindji noonkondo pethimbo lyelelo lyaDavid? (b) Otu shi shi ngiini kutya muIsraeli shonale okwiimba okwa li kwa talika ko kwa simana melongelokalunga?
5 Omolwashike okwiimba kwa li kwa pewa eitulomo olindji noonkondo pethimbo lyaDavid? Mbela omolwaashoka owala omukwaniilwa a li omwiimbi gwadho? Aawe, opwa li etompelo lilwe ndyoka lya li lya holowa konima yomathelemimvo sho omukwaniilwa omuyuuki Hiskija a li a totulula iilonga yokulongela Jehova motempeli. Otatu lesha mOndjalulo ontiyali 29:25, taku ti: “[Hiskija] okwa landula omalombwelo ngoka OMUWA e ga lombwele omukwaniilwa David mokana kaGad, omuhunganeki gwomukwaniilwa, nokomuhunganeki Natan; okwa tula Aalevi motempeli ye na iiyaha, uuharpa niiketala.”
6 Eeno, okupitila maapolofeti ye, Jehova okwa li a lombwele aalongeli ye ye mu hambelele nomaimbilo. Aaimbi yomezimo lyaasaaseri oya li nokuli ya kuthwa mo miilonga mbyoka Aalevi yalwe ya li ye na okulonga opo ya vule okukala ye na ethimbo lya gwana oku ga tota nuunene tuu ethimbo lyokwiiyenditha po.—1 Ondjal. 9:33.
7, 8. Ngele tashi ya pokwiimba nawa omaimbilo gUukwaniilwa, oshike sha simanenena shi vule uunkulungu wokwiimba?
7 Otashi vulika wu tye: “Ngele tashi ya pokwiimba nawa, ando ngame inandi vula okukwatelwa mo mwaambono ya li hayi imbi nawa petsalihangano molwaashono kandi na uunkulungu wokwiimba.” Ihe Aalevi ayehe kaya li oonkulungu dhokwiimba. Ondjalulo yotango 25:8 (KB) otayi ti kutya opwa li wo “aalongwa.” Oshi li wo oshindhindhilikwedhi kutya otashi vulika pwa li aahiki yomusika yamwe oonkulungu noonkondo nosho wo aaimbi ya za momihoko dhilwe dhAaisraeli, ihe Jehova oshinakugwanithwa shokwiimba okwa li e shi pe Aalevi. Otatu vulu okukala nuushili kutya, kutya nduno Aalevi aadhiginini mboka ya li ya ‘pyokoka’ mokwiimba nenge “aalongwa” owala, ayehe oya li haya gwanitha po oshinakugwanithwa shawo nomutima aguhe.
8 David okwa li e hole okwiimba nokwa li onkulungu mokwiimba. Ihe mbela oshitalenti osho owala sha simana kuKalunga? MEpisalomi 33:3, David okwa nyola a ti: ‘Mu hikileni okaharpa nuunkulungu e tamu ligola!’ Etumwalaka olya yela kutya: Shoka sha simana osho okuhambelela Jehova ‘nuunkulungu.’
Onkandangala ndjoka omaimbilo ga kala taga dhana konima yeso lyaDavid
9. Hokolola shoka tashi vulika ando wa li wa mono nowu uvu ando owa li peyapulo lyotempeli pethimbo lyelelo lyaSalomo.
9 Pethimbo lyepangelo lyaSalomo, omaimbilo oga li haga dhana onkandangala ya simana melongelokalunga lya yogoka. Peyapulo lyotempeli opwa li pu na oongundu dhomalwiimbo odhindjidhindji, pamwe nadho opwa li aayambi 120 taa hiki omankuma. (Lesha 2 Ondjalulo 5:12.) Ombiimbeli otayi tu lombwele kutya ‘aaimbi mboka ayehe ya li aayambi oya thindikilwa momutono gwa gwana po komankuma, kiiyaha nokiihikomwa yilwe, sho taa hambelele OMUWA oshoka oye omwaanawa, nohole ye oyaaluhe.’ Sho ya li tayi imbi nenyanyu, “oshikogo oshu udha otempeli,” shoka sha li tashi ulike kutya Jehova okwa hokwa okwiimba kwawo. Ando opo twa li, ando inatu kala tuu twa nyanyukwa noonkondo notwa kumwa okuuva omutono gwomankuma ngoka nogwaaimbi omayovi tayi imbi ya fa omuntu gumwe!—2 Ondjal. 5:13.
10, 11. Oshike tashi ulike kutya Aakriste yonale oya li hayi imbi pethimbo lyelongelokalunga?
10 Aakriste yonale nayo oya li wo haya imbi pethimbo lyelongelokalunga. Dhoshili, aalongelikalunga yomethelemumvo lyotango kaya li haya gongala momatsalihangano nenge moontempeli, ihe omomagumbo. Nokuli nonando oya li ya hepekwa noya li ya mono omaupyakadhi ogendji, oya li ya tsikile okuhambelela Kalunga nomaimbilo.
11 Omuyapostoli Paulus okwa li a ladhipike aamwahe yokuKolossa a ti: ‘Pukululathaneni noondunge adhihe. Imbeni omapisalomi, omaimbilo noondjimbo oondjapuki.’ (Kol. 3:16) Paulus naSilas sho ya li ya tulwa mondholongo, oya li ya “galikana nokwiimbila Kalunga omahambelelondjimbo,” nonando kaya li ye na omaimbilo. (Iil. 16:25) Ando owu tulwe mondholongo, mbela ando oto ki imba omaimbilo gUukwaniilwa gangapi momutse?
12. Ongiini tatu vulu okuulika kutya otu na olupandu lwomaimbilo gUukwaniilwa?
12 Molwaashoka omaimbilo oga simana mokulongela Kalunga kwetu, otatu ningi nawa ngele tatu ipula tatu ti: ‘Mbela ondi na ngaa olupandu lwomaimbilo getu? Mbela ohandi ningi ngaashi tandi vulu okuthika kuyele pokugongala, piigongi iishona niinene opo ndi imbe pamwe naamwatate naamwameme eimbilo lyotango tashi zi komutima? Mbela ohandi ladhipike ngaa aamwandje kaaya tale ko eimbilo ndyoka hali imbwa pokati kOsikola yUukalele woPauteokratika nOkugongala kwoPailonga nenge ndyoka hali imbwa pokati koshipopiwa shomontaneho nEkonakono lyOshungolangelo ku li ethimbo lyokuthuwa po noli li ompito yokuza pomahala gawo, tashi vulika ye ki iyuthe owala momagulu?’ Okwiimba oku li oshitopolwa shelongelokalunga lyetu. Eeno, kutya nduno otu li “oonkulungu” nenge ‘aalongwa,’ atuheni otatu vulu notu na okwiimbila Jehova omaimbilohambelelo twa hangana.—Yelekanitha 2 Aakorinto 8:12.
Oompumbwe dhetu ohadhi ende tadhi lunduka mokweendela ko kwethimbo
13, 14. Okwiimba tashi zi komutima pokugongala kwegongalo oku na ongushu yashike? Shi thaneka.
13 Oomvula dhi vulithe 100 dha piti, oshifo hashi ithanwa Zion’s Watch Tower osha li sha yelitha limwe lyomomatompelo kutya omolwashike omaimbilo getu gUukwaniilwa ga simana noonkondo. Osha ti: “Okwiimba omaimbilo oko omukalo omwaanawa okuthindila oshili momadhiladhilo nomomitima dhoshigwana shaKalunga.” Oohapu odhindji dhomaimbilo getu odha kankamena komanyolo, onkee ano, okwiilonga dhimwe dhagamwe gomugo oku li omukalo gwa dhenga mbanda okuthindila oshili muule womitima dhetu. Olundji, mboka haye ya kokugongala kwetu oshikando shotango ohayi inyengithwa kokwiimba kwegongalo taku zi komutima.
14 Ongulohi yimwe mo 1869, sho C. T .Russel a li ta zi kiilonga u uka kegumbo, oku uvu oondjimbo tadhi ziilile moshinyanga shomevi. Pethimbo ndyoka okwa li i itaala kutya ke na siku na mone oshili kombinga yaKalunga. Onkee ano, okwa li a tokola okwiitula mongeshefa ye, netompelo kutya ngele okwa kala e na iimaliwa oyindji, ota ka vula okukwathela aantu moompumbwe dhawo dhopalutu nokuli nando ita vulu oku ya kwathela pambepo. Omumwatate Russel okwa li a yi mo moshinyanga moka mu udha ontsi nomu na omilema e ta mono kutya otamu ningilwa elongelokalunga. Okwa kuutumba e ta pulakene. Konima yoomwedhi okwa nyola kutya shoka a li u uvu ongulohi ndjoka, “osha li lela ekwatho lyaKalunga okukoleka eitaalo lye ndyoka lya li tali tengauka okwiitaala kutya Ombiimbeli oya nwethwa mo kuKalunga.” Ndhindhilika kutya okwiimba hoka oko kwa li kwa hilile tango omumwatate Russel kokugongala.
15. Omalunduluko geni ga ningwa po meimbilo lyetu omolweuvoko epe ndyoka twa mona?
15 Mokweendela ko kwethimbo, uuyelele wopamanyolo owe ende tawu yelithwa. Omayeletumbulo 4:18 otaga ti: “Ondjila yaayuuki oya fa uuyelele weluwa tali tende, mboka tau yele sigo kwa shi.” Sho uuyelele we ende tawu yela, osha ningitha pu ningwe omalunduluko meimbilo lyetu. Muule woomvula 25 dha piti, Oonzapo dhaJehova miilongo oyindji odha kala nokunyanyukilwa okwiimba meimbilo Sing Praises to Jehovah.b Okuza momumvo moka eimbilo ndyoka lya nyanyangidhwa oshikando shotango, uuyelele wu na ko nasha niipalanyolo yontumba owe ende tawu yela nomautumbulilo gamwe ngoka ga longithwa mo oga kwisha. Pashiholelwa, ngashingeyi ihatu ti we “onkalelo ompe,” ihe ohatu ti “uuyuni uupe.” Ngashingeyi ohatu ti kutya edhina lyaJehova otali ka “yapulithwa,” ihe itali ka “yukipalithwa.” Osha yela kutya otwa li twa pumbwa okuninga omalunduluko meimbilo lyetu, omolweuvoko epe ndyoka twa mona.
16. Eimbilo lyetu epe otali ke tu kwathela ngiini tu landule omayele gaPaulus ngoka taga adhika mAaefeso 5:19?
16 Molwetompelo ndyoka nosho wo galwe, Olutuwiliki olwa li lwa tokola pu nyanyangidhwe eimbilo epe Sing to Jehovah. Omwaalu gwomaimbilo ngoka ge li mo ogwa shunithwa pevi noge li ngashingeyi 135. Molwaashoka opu na omaimbilo omashona okwiilongwa, oshipu okwiilonga oohapu dhagamwe gomugo momutse. Shika otashi tsu kumwe nomayele gaPaulus ngoka ga nyolwa mAaefeso 5:19.—Lesha.
Oto vulu okuulika olupandu lwoye
17. Omadhiladhilo geni taga vulu oku tu kwathela tu sinde uumbanda wokukala twa sa ohoni okwiimba megongalo?
17 Mbela otu na okweetha uumbanda omolwohoni wu tu ningithe kaatu imbe muule pokugongala kwopaKriste? Shi tala ko momukalo nguka: Shi na ko na sha nokupopya kwetu, mbela kashi shi shoshili kutya “tseni atuheni ohatu puka olwindji”? (Jak. 3:2) Ihe katu na okweetha okupopya kwetu inaaku gwanenena ku tu imbe kaatu tange Jehova egumbo negumbo. Omolwashike mbela okwiimba kwetu nomawi inaaga gwanenena ku na oku tu imba kaatu hambelele Kalunga nomaimbilo? Jehova ngoka a “shitile omuntu okana,” okwa nyanyukwa okupulakena omawi getu moku mu imbila omaimbilohambelelo.—Eks. 4:11.
18. Gandja omaetopo ge na ko nasha nokwiilonga oohapu dhomaimbilo.
18 Oka-CD Sing to Jehovah—Vocal Renditions oke li momalaka ogendji. Oke na omusika ombwanawa nosho wo aayimbi tayi iimbi omaimbilo omape. Oshiwanawa noonkondo okupulakena komusika ndjoka yi li mo. Olundji ngele to pulakene komaimbilo komukalo ngoka, otashi ku kwathele wi ilonge nziya oohapu dhagamwe gomugo. Oohapu dhogendji gomugo odha nyolwa momukalo ngoka sho to imbi omukweyo gumwe, konyala oto vulu okukala wu shi nale kutya ngoka tagu landula ko otagu ti shike. Onkee ano, uuna to pulakene oka-CD, omolwashike itoo imbi pamwe nako? Ngele owa tseya nawa oohapu nongowela yago moku gi imba kegumbo, ito ka kala wa limbililwa kutya ito ka vula okwiimba nomutima aguhe kOshinyanga shUukwaniilwa.
19. Oshike sha kwatelwa mokulongekidha oomusika dhomaimbilo getu gUukwaniilwa?
19 Oshi na uupu wu kale itoo gandja eitulomo komusika ndjoka hatu nyanyukilwa ngele tu li piigongi yetu iinene niishona. Oku yi longekidha okwa li kwa pula oonkambadhala odhindji. Ngele eimbilo lyontumba lya hogololwa ohapu ningwa omalongekidho opo iilyo 64 yongundu yaaimbi yo-Watchtower yi pewe eimbilo ndyoka lya nyolwa lya yela yi li imbe. Opo nduno, oya li ya longitha ethimbo olindjilindji oku li talulula noku li idheula nolwahugunina tali kwatelwa mokangalo moostudio dhetu koPatterson, moNew York. Aamwatate naamwameme omulongo yomuyo ihaya zi moAmerika. Ayehe yomuyo oye shi tala ko shi li uuthembehenda sho ye na ombinga melongekidho lyomusika ombwanawa ndjoka hayi longithwa piiningwanima yetu yoPauteokratika. Otatu vulu okuulika olupandu lwetu koonkambadhala dhopahole ndhoka ya ninga. Uuna omunashipundi piigongi yetu iishona niinene te tu pula tu kuutumbe, natu shi ninge nziya opo tu vule okupulakena komusika ndjoka ye tu longekidhilwa pahole twa mwena.
20. Owa tokola toko okuninga po shike shi na ko nasha nokwiimba?
20 Jehova oha gandja eitulomo komaimbilohambelelo getu. Oga simana kuye. Otatu vulu okunyanyudha omutima gwe mokwiimba tashi zi komutima ngele twa gongala. Eeno, kutya nduno otu li oonkulungu nenge aalongwa, natu ‘imbileni OMUWA.’—Eps. 104:33.
[Omanyolo gopevi]
a Shoka shihokitha osho kutya omathelemimvo omulongo konima yeso lyaDavid, ongundu yaayengeli oya li ya lombwele aasita yoonzi mboka ya li taya litha momalundu ge li popepi naBetlehem kutya Mesiasa okwa valwa.—Luk. 2:4, 8, 13, 14.
b Eimbilo alihe li na omaimbilo 225 olya li momalaka ge vulithe 100.
Oto ti ngiini?
• Iiholelwa yini yopethimbo lyOmbiimbeli tayi ulike kutya omaimbilo otaga dhana onkandangala ya simana melongelokalunga lyetu?
• Ekwatathano lini li li pokati kokuvulika kelombwelo lyaJesus ndyoka tali adhika muMateus 22:37 nokwiimba omaimbilo gUukwaniilwa nomutima aguhe?
• Omomikalo dhimwe dhini tatu vulu okuulika olupandu lwetu lwashili lwomaimbilo gUukwaniilwa?
[Ethano pepandja 31]
Mbela oho keelele ngaa aamwoye kaaya ze pomitumba dhawo inaashi pumbiwa pethimbo aantu tayi imbi?