Omaimbilo omape!
1 Pokugongala kokwomumvo kwo-Watch Tower Bible and Tract Society of Pennsylvania, hoka kwa li kwa ningwa mo 4 Kotoba 2014, opwa li pwa tseyithwa kutya eimbilo lyetu otali ka pepalekwa. Onkundana ndjoka oya li shili tayi nyanyudha! Ayehe mboka ya li po oya li ya dhimbulukithwa kutya omaimbilo getu gUukwaniilwa oge li oshitopolwa sha simana shelongelokalunga lyetu. — Eps. 96:2.
2 Otashi vulika nduno wi ipule kutya, ‘omolwashike eimbilo li na okupepalekwa?’ Opu na omatompelo gontumba noogongandi. Lyotango, euvoko lyetu lyOmanyolo otali tsikile nokuyelithwa, naashoka otashi vulu okuguma iitya yomaimbilo getu. (Omayel. 4:18) Etompelo lilwe: Omautumbulilo ogendji nosho wo omatumbulo ngoka ga longithwa meimbilo lyetu ndyoka hatu longitha ngashingeyi oga li ga kuthwa metoloko ekulu lyo-New World Translation. Iitya mbyoka ngashingeyi oya lundululwa, opo yi tse kumwe naambyoka yi li mo-New World Translation ompe. Molwaashoka otashi ka pula iilonga oyindji, opo iitya yi kale ya faathana noyomOmbiimbeli ompe, okwa tokolwa meimbilo mu gwedhwe omaimbilo omape.
3 Mbela otatu kala twa tegelela eimbilo epe li pilintwe, opo tu tameke okulongitha omaimbilo ngoka omape? Aawe. Otwa nyanyukwa oku mu tseyithila kutya muule woomwedhi dhontumba tadhi landula ko, kepandja lyetu lyokOintaneta lyo-jw.org otaku ka tulwa omaimbilo omape. Uuna eimbilo epe lya piti, otali ka imbwa pehulilo lyOkugongala kwoPailonga notali ka kala lya ndhindhilikwa “eimbilo epe.”
4 Nkene tatu vulu okwiilonga omaimbilo omape: Otashi vulu okukala oshidhigu okwiilonga omaimbilo ngoka. Ihe ngaashi omupisalomi, otwa hala okukala hatu imbi pombanda pokugongala kehe kwegongalo, ihe ‘haku mwena.’ (Eps. 30:12) Opo wi ilonge eimbilo epe, ninga iinima tayi landula.
Pulakena lwiikando kongowela yeimbilo ndjoka tayi ka tulwa kepandja lyetu lyokOintaneta. Uuna to yi pulakene lwiikando, opo ngaa tapu ka kala pu thike oku yi dhimbulukwa nuupu.
Iilonga iitya, e to kambadhala oku yi kopela momutse.
Imba ongowela pamwe niitya. Kala to shi ningi sigo wa tseya nawa eimbilo.
Kaleni tamu iyenditha po lwiikando yontumba pomaimbilo mEsiku lyElongelokalunga lyUukwanegumbo weni sigo mwe ga tseya.
5 Uuna eimbilo epe tali ka imbwa pehulilo lyOkugongala kwoPailonga monakuyiwa, egongalo otali ka pulakena tango lumwe kongowela yalyo. Aapulakeni otaya ka imba nduno eimbilo ndyoka ya landula ongowela, ngaashi hatu ningi nomaimbilo galwe.
6 Uuna tatu imbi pokugongala kehe kwegongalo, ohaku tu etele enyanyu sho tatu imbi pamwe twa hangana tatu tanga Jehova. Onkee ano, uuna eimbilo lya tameke okwiimbwa pokugongala kwetu kehe kwopaKriste natu kale aluhe hatu kala piipundi yetu tu imbe pamwe. Inatu kala nomukalondjigilile gwokuza po inaashi pumbiwa.
7 Opu na omukalo gulwe moka tatu vulu okuulika kutya otu na olupandu lwomaimbilo getu omayapuki. Piigongi yetu iishona niinene, ohapu dhanwa ongowela yeimbilo manga omutumba kehe inaagu tameka. Aamwatate naamwameme aadhiginini ya za kooha nooha dhuuyuni ohaya yi koPatterson, New York taya longitha iimaliwa yawo yene. Ohaye shi ningi lwaali momumvo, opo ya ka ninge omusika ombwanawa ndjoka hatu longitha melongelokalunga lyetu. Onkee ano, uuna omunashipundi e tu pula tu kuutumbe nokupulakena kwaashoka aahiki yiihikomwa ye tu nine, natu shi ninge. Okuninga ngaaka otaku tu kwathele tu longekidhe omitima dhetu, opo tu ka pulakene kuuyelele mboka tatu ka pewa. — Esra 7:10.
8 Pehulilo lyokugongala kwetu kwonena, otatu ka imba eimbilo epe li na oshipalanyolo “The Kingdom Is in Place — Let It Come!” Eimbilo ndyoka olya li lyi imbwa pokugongala kwokomumvo hoka opo kwa ningilwe. Olya li lya longekidhwa sho Uukwaniilwa wa gwanitha oomvula 100. Ngele egongalo inali vula oku li tapa ko-jw.org, imbeni eimbilo 108.
9 Omaimbilo omape oge li shili “iinima iiwanawa” ya za kuJehova. (Mat. 12:35a, NW) Onkee ano, natu kale twa tokola toko tu ilonge omaimbilo ngaka omape noku ga imba tashi zi komutima, tatu hambelele nokusimaneka Jehova momukalo tagu opalele! — Eps. 147:1.